AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

10ನೇ ವಿಕೆಟ್​​ಗೆ ಹೊಸ ವಿಶ್ವ ದಾಖಲೆ: ಪಾಕ್ ಪಡೆಗೆ ರಣರೋಚಕ ಜಯ!

ಏಕದಿನ ಕ್ರಿಕೆಟ್ ಇತಿಹಾಸ ಕಂಡರಿಯದ ಅತ್ಯಂತ ರೋಚಕ ಹೋರಾಟಕ್ಕೆ ಗದ್ದಾಫಿ ಕ್ರೀಡಾಂಗಣ ಸಾಕ್ಷಿಯಾಗಿದೆ! ಸಂಪೂರ್ಣ ಕೈಜಾರಿ ಹೋಗಿದ್ದ ಪಂದ್ಯದಲ್ಲಿ ಪಾಕಿಸ್ತಾನದ ಶಾದಾಬ್ ಖಾನ್ ಹಾಗೂ ಹಾರಿಸ್ ರೌಫ್ ಜೋಡಿ ಕೊನೆಯ ವಿಕೆಟ್‌ಗೆ 89 ರನ್ ಪೇರಿಸುವ ಮೂಲಕ 51 ವರ್ಷಗಳ ಹಳೆಯ ವಿಶ್ವ ದಾಖಲೆಯನ್ನು ಮುರಿದು ಹೊಸ ಇತಿಹಾಸ ಬರೆದಿದ್ದಾರೆ.

10ನೇ ವಿಕೆಟ್​​ಗೆ ಹೊಸ ವಿಶ್ವ ದಾಖಲೆ: ಪಾಕ್ ಪಡೆಗೆ ರಣರೋಚಕ ಜಯ!
Pak Vs EngImage Credit source: PCB
ಝಾಹಿರ್ ಯೂಸುಫ್
|

Updated on: Oct 26, 2026 | 8:33 AM

Share

ಲಾಹೋರ್​​ನ ಗದ್ದಾಫಿ ಕ್ರೀಡಾಂಗಣದಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ತ್ರಿಕೋನ ಸರಣಿಯ ಪಂದ್ಯದಲ್ಲಿ ಪಾಕಿಸ್ತಾನ್ ತಂಡ ರಣರೋಚಕ ಜಯ ಸಾಧಿಸಿದೆ. ಅದು ಕೂಡ 10ನೇ ವಿಕೆಟ್​​ಗೆ ವಿಶ್ವ ದಾಖಲೆಯ ಜೊತೆಯಾಟದೊಂದಿಗೆ. ಈ ಜೊತೆಯಾಟದ ಮೂಲಕ ಪಾಕ್ ಪಡೆ 1 ವಿಕೆಟ್​​ನಿಂದ ಇಂಗ್ಲೆಂಡ್ ತಂಡವನ್ನು ಮಣಿಸಿದೆ.

ಈ ಪಂದ್ಯದಲ್ಲಿ ಟಾಸ್ ಗೆದ್ದ ಪಾಕಿಸ್ತಾನ್ ತಂಡದ ನಾಯಕ ಶಾಹೀನ್ ಅಫ್ರಿದಿ ಬೌಲಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ ಪರ ಆರಂಭಿಕ ದಾಂಡಿಗ ಬೆನ್ ಡಕೆಟ್ 111 ಎಸೆತಗಳಲ್ಲಿ 105 ರನ್ ಬಾರಿಸಿದರು.

ಆದರೆ ಉಳಿದ ಬ್ಯಾಟರ್​ಗಳಿಂದ ನಿರೀಕ್ಷಿತ ಪ್ರದರ್ಶನ ಮೂಡಿಬಂದಿರಲಿಲ್ಲ. ಪರಿಣಾಮ ಇಂಗ್ಲೆಂಡ್ ತಂಡವು 46.4 ಓವರ್​​ಗಳಲ್ಲಿ 241 ರನ್​ ಗಳಿಸಿ ಆಲೌಟ್ ಆಯಿತು.

ಶಾದಾಬ್ ಖಾನ್ ದಿಟ್ಟ ಹೋರಾಟ:

242 ರನ್‌ಗಳ ಗುರಿ ಬೆನ್ನಟ್ಟಿದ ಪಾಕಿಸ್ತಾನ್ ತಂಡವು ಕೇವಲ 154 ರನ್‌ಗಳಿಗೆ 9 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಈ ಹಂತದಲ್ಲಿ ಕ್ರೀಸ್ ಕಚ್ಚಿ ನಿಂತ ಶಾದಾಬ್ ಖಾನ್ ಏಕಾಂಗಿ ಹೋರಾಟ ನಡೆಸಿದರು. ಕೊನೆಯ ವಿಕೆಟ್‌ಗೆ ಹಾರಿಸ್ ರೌಫ್ ಜೊತೆಗೂಡಿದ ಅವರು ಅಮೋಘ ಇನಿಂಗ್ಸ್ ಕಟ್ಟಿದರು.

ಇದರ ನಡುವೆ ಸ್ಪೋಟಕ ಬ್ಯಾಟಿಂಗ್ ನಡೆಸಿದ ಶಾದಾಬ್ ಖಾನ್, 96 ಎಸೆತಗಳಲ್ಲಿ 5 ಭರ್ಜರಿ ಸಿಕ್ಸರ್ ಹಾಗೂ 13 ಫೋರ್‌ಗಳ ನೆರವಿನಿಂದ ಅಜೇಯ 113 ರನ್ ಬಾರಿಸಿದರು. ಅಲ್ಲದೆ, ಹಾರಿಸ್ ರೌಫ್ (7*) ಅವರೊಂದಿಗೆ 10ನೇ ವಿಕೆಟ್‌ಗೆ ದಾಖಲೆಯ 89 ರನ್‌ಗಳ ಜೊತೆಯಾಟವಾಡಿದರು. ಈ ಮೂಲಕ ಪಾಕಿಸ್ತಾನ್ ತಂಡವು 47.1 ಓವರ್‌ಗಳಲ್ಲಿ 243 ರನ್ ಗಳಿಸಿ, 1 ವಿಕೆಟ್‌ನ ರೋಚಕ ಜಯ ಸಾಧಿಸಿತು.

51 ವರ್ಷಗಳ ಹಳೆಯ ದಾಖಲೆ ಧೂಳೀಪಟ!

ಈ ಪಂದ್ಯದಲ್ಲಿ ಶಾದಾಬ್ ಖಾನ್ ಹಾಗೂ ಹಾರಿಸ್ ರೌಫ್ ಜೊತೆಗೂಡಿ 10ನೇ ವಿಕೆಟ್​​ಗೆ ಪೇರಿಸಿದ 89 ರನ್​​ಗಳು, ಏಕದಿನ ಕ್ರಿಕೆಟ್​ ಇತಿಹಾಸದಲ್ಲಿ ಯಶಸ್ವಿ ರನ್ ಬೆನ್ನಟ್ಟುವಿಕೆಯಲ್ಲಿ ಕೊನೆಯ ವಿಕೆಟ್​​ಗೆ ದಾಖಲಾದ ಸರ್ವಶ್ರೇಷ್ಠ ದಾಖಲೆಯಾಗಿದೆ.

ಈ ಮೂಲಕ ಶಾದಾಬ್-ರೌಫ್ ಜೋಡಿ 1975ರ ವಿಶ್ವಕಪ್‌ನಲ್ಲಿ ಪಾಕಿಸ್ತಾನದ ವಿರುದ್ಧ ವೆಸ್ಟ್ ಇಂಡೀಸ್‌ನ ಡೆರಿಕ್ ಮುರ್ರೆ ಮತ್ತು ಆಂಡಿ ರಾಬರ್ಟ್ಸ್ ಜೋಡಿ 10ನೇ ವಿಕೆಟ್‌ಗೆ ಕಲೆಹಾಕಿದ್ದ 64 ರನ್‌ಗಳ ದಾಖಲೆಯನ್ನು ಮುರಿದು ಹೊಸ ಇತಿಹಾಸ ನಿರ್ಮಿಸಿದ್ದಾರೆ.

ಇದನ್ನೂ ಓದಿ: CSK ಗೆ ಕೈಕೊಟ್ಟ ಕೀರನ್ ಪೊಲಾರ್ಡ್​..!

ಯಶಸ್ವಿ ರನ್ ಚೇಸಿಂಗ್‌ನಲ್ಲಿ ಗರಿಷ್ಠ 10ನೇ ವಿಕೆಟ್ ಜೊತೆಯಾಟಗಳು:

  1.  ಶಾದಾಬ್ ಖಾನ್ ಮತ್ತು ಹಾರಿಸ್ ರೌಫ್ (ಪಾಕಿಸ್ತಾನ): 89* ರನ್ (ವಿರುದ್ಧ ಇಂಗ್ಲೆಂಡ್, 2026)
  2.  ಡೆರಿಕ್ ಮುರ್ರೆ ಮತ್ತು ಆಂಡಿ ರಾಬರ್ಟ್ಸ್ (ವೆಸ್ಟ್ ಇಂಡೀಸ್): 64* ರನ್ (ವಿರುದ್ಧ ಪಾಕಿಸ್ತಾನf, 1975)
  3.  ಜೇಮ್ಸ್ ಫಾಲ್ಕನರ್ ಮತ್ತು ಕ್ಲಿಂಟ್ ಮೆಕೇ (ಆಸ್ಟ್ರೇಲಿಯಾ): 57* ರನ್ (ವಿರುದ್ಧ ಇಂಗ್ಲೆಂಡ್, 2014)
Follow Us
ಝಾಹಿರ್ ಯೂಸುಫ್
ಝಾಹಿರ್ ಯೂಸುಫ್

ಟಿವಿ9 ಡಿಜಿಟಲ್ ಚೀಫ್ ಸಬ್ ಎಡಿಟರ್. 10 ವರ್ಷಗಳಿಂದ ಕನ್ನಡ ಡಿಜಿಟಲ್​ ಮಾಧ್ಯಮದಲ್ಲಿ ಪತ್ರಿಕಾ ವೃತ್ತಿ. ಕ್ರೀಡಾ ಸುದ್ದಿ, ದೀರ್ಘ ಲೇಖನ, ವಿಶ್ಲೇಷಣೆ, ಹೀಗೆ ಎಲ್ಲ ತರಹದ ಬರಹದಲ್ಲೂ ಅನುಭವ. ಪ್ರಸ್ತುತ ವಿದ್ಯಮಾನಗಳ ವ್ಯಾಖ್ಯಾನ, ಚರ್ಚೆಯಲ್ಲಿ ನೈಪುಣ್ಯ. ಈ ಹಿಂದೆ ಉದಯವಾಣಿ, ನ್ಯೂಸ್ 18 ಕನ್ನಡ ಡಿಜಿಟಲ್​​ನಲ್ಲಿ ಕೆಲಸ ಮಾಡಿದ ಅನುಭವ. ಆಸಕ್ತಿದಾಯಕ ವಿಷಯ ಕ್ರೀಡೆ, ಸಿನಿಮಾ ಮತ್ತು ರಾಜಕೀಯ.

Read More