Venkatesh Iyer: ಸ್ಪೋಟಕ ಅರ್ಧಶತಕ, 6 ವಿಕೆಟ್: ವೆಂಕಿಯ ಬೆಂಕಿ ಪ್ರದರ್ಶನ..!

ಸೈಯದ್ ಮುಷ್ತಾಕ್ ಅಲಿ (SMAT 2022) ಟೂರ್ನಿಯ ರೌಂಡ್-1 ನಲ್ಲಿ ನಡೆದ ಪಂದ್ಯದಲ್ಲಿ ಮಧ್ಯಪ್ರದೇಶದ ಆಟಗಾರ ವೆಂಕಟೇಶ್ ಅಯ್ಯರ್ (Venkatesh Iyer) ಅತ್ಯಾಧ್ಬುತ ಆಲ್​ರೌಂಡರ್ ಪ್ರದರ್ಶನ ನೀಡಿ ಗಮನ ಸೆಳೆದಿದ್ದಾರೆ. ರಾಜ್​ಕೋಟ್​ನಲ್ಲಿ ನಡೆದ ಈ ಪಂದ್ಯದಲ್ಲಿ ರಾಜಸ್ಥಾನ್ ಹಾಗೂ ಮಧ್ಯಪ್ರದೇಶ ತಂಡಗಳು ಮುಖಾಮುಖಿಯಾಗಿತ್ತು. ಟಾಸ್ ಗೆದ್ದ ಮಧ್ಯಪ್ರದೇಶ ತಂಡದ ನಾಯಕ ಪಾರ್ಥ್ ಸಹಾನಿ ಬ್ಯಾಟಿಂಗ್ ಆಯ್ದುಕೊಂಡರು. ಅದರಂತೆ ಇನಿಂಗ್ಸ್ ಆರಂಭಿಸಿದ ಮಧ್ಯಪ್ರದೇಶದ ಆರಂಭಿಕರಾದ ಚಂಚಲ್ ರಾಥೋಡ್ ಹಾಗೂ ಕುಲ್ದೀಪ್ ಗೇಹಿ ನಾಯಕನ ನಿರೀಕ್ಷೆಯನ್ನು ಹುಸಿಗೊಳಿಸಲಿಲ್ಲ. ಮೊದಲ ವಿಕೆಟ್​ಗೆ 64 ರನ್​ಗಳ ಜೊತೆಯಾಟವಾಡುವ ಮೂಲಕ ತಂಡಕ್ಕೆ ಭರ್ಜರಿ ಆರಂಭಕ್ಕೆ ಒದಗಿಸಿದ್ದರು.

ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ವೆಂಕಟೇಶ್ ಅಯ್ಯರ್ ಪಂದ್ಯದ ಚಿತ್ರಣವನ್ನೇ ಬದಲಿಸಿಬಿಟ್ಟರು ಎಂದರೆ ತಪ್ಪಾಗಲಾರದು. ಕಣಕ್ಕಿಳಿಯುತ್ತಿದ್ದಂತೆ ಸಿಡಿಲಬ್ಬರದ ಬ್ಯಾಟಿಂಗ್ ನಡೆಸಿದ ವೆಂಕಿ 4 ಭರ್ಜರಿ ಸಿಕ್ಸ್ ಹಾಗೂ 5 ಫೋರ್​ನೊಂದಿಗೆ ಕೇವಲ 31 ಎಸೆತಗಳಲ್ಲಿ ಅಜೇಯ 62 ರನ್ ಚಚ್ಚಿದರು.  ಪರಿಣಾಮ ನಿಗದಿತ 20 ಓವರ್​ಗಳಲ್ಲಿ ಮಧ್ಯಪ್ರದೇಶ ತಂಡವು 5 ವಿಕೆಟ್ ನಷ್ಟಕ್ಕೆ 173 ರನ್​ ಕಲೆಹಾಕಿತು.

ಈ ಬೃಹತ್ ಗುರಿ ಬೆನ್ನತ್ತಿದ ರಾಜಸ್ಥಾನ್ ತಂಡಕ್ಕೆ ಮತ್ತೆ ಮುಳುವಾಗಿದ್ದು ವೆಂಕಟೇಶ್ ಅಯ್ಯರ್ ಎಂಬುದು ವಿಶೇಷ. ಬ್ಯಾಟಿಂಗ್ ಬಳಿಕ ಬೌಲಿಂಗ್​ನಲ್ಲೂ ಪರಾಕ್ರಮ ಮೆರೆದ ಅಯ್ಯರ್ ರಾಜಸ್ಥಾನ್ ತಂಡದ ಆರಂಭಿಕ ಬ್ಯಾಟ್ಸ್​ಮನ್​ಗಳಿಗೆ ಪೆವಿಲಿಯನ್ ಹಾದಿ ತೋರಿಸಿದರು.

ಇದಾಗ್ಯೂ ಸಲ್ಮಾನ್ ಖಾನ್ ಅವರ 44 ರನ್​ಗಳಿಂದ ಚೇತರಿಸಿಕೊಂಡ ರಾಜಸ್ಥಾನ್ ತಂಡಕ್ಕೆ ಮತ್ತೆ ವೆಂಕಿ ಆಘಾತ ನೀಡಿದರು. ಸಲ್ಮಾನ್​ರನ್ನು ಔಟ್ ಮಾಡುವ ಮೂಲಕ ನಿರ್ಣಾಯಕ ಹಂತದಲ್ಲಿ ವೆಂಕಟೇಶ್ ಅಯ್ಯರ್ ತಂಡಕ್ಕೆ ಯಶಸ್ಸು ತಂದುಕೊಟ್ಟರು.
ಅಂತಿಮವಾಗಿ ವೆಂಕಟೇಶ್ ಅಯ್ಯರ್ ದಾಳಿಗೆ ನಲುಗಿದ ರಾಜಸ್ಥಾನ್ ತಂಡವು 19.2 ಓವರ್​ಗಳಲ್ಲಿ 135 ರನ್​ಗಳಿಗೆ ಸರ್ವಪತನ ಕಂಡಿತು. ಮಧ್ಯಪ್ರದೇಶ ತಂಡದ ಪರ 4 ಓವರ್​ಗಳಲ್ಲಿ ಕೇವಲ 20 ರನ್ ನೀಡುವ ಮೂಲಕ ವೆಂಕಟೇಶ್ ಅಯ್ಯರ್ 6 ವಿಕೆಟ್ ಕಬಳಿಸಿ ಗೆಲುವಿನ ರೂವಾರಿ ಎನಿಸಿಕೊಂಡರು.

ಮಧ್ಯಪ್ರದೇಶ ಪ್ಲೇಯಿಂಗ್ 11: ಪಾರ್ಥ್ ಸಹಾನಿ (ನಾಯಕ) , ಕುಲದೀಪ್ ಗೇಹಿ , ಶುಭಂ ಎಸ್ ಶರ್ಮಾ , ವೆಂಕಟೇಶ್ ಅಯ್ಯರ್ , ಅಕ್ಷತ್ ರಘುವಂಶಿ , ಕುಮಾರ್ ಕಾರ್ತಿಕೇಯ , ಪುನೀತ್ ದಾತೆ , ಅಶ್ವಿನ್ ದಾಸ್ , ಕುಲದೀಪ್ ಸೇನ್ , ಕಮಲ್ ತ್ರಿಪಾಠಿ , ಚಂಚಲ್ ರಾಥೋರ್ , ಅಮನ್ ಭಡೋರಿಯಾ

ರಾಜಸ್ಥಾನ್ ಪ್ಲೇಯಿಂಗ್ 11: ಅಶೋಕ್ ಮೆನಾರಿಯಾ (ನಾಯಕ) , ಯಶ್ ಕೊಠಾರಿ , ಸಲ್ಮಾನ್ ಖಾನ್ , ಮಹಿಪಾಲ್ ಲೊಮ್ರೋರ್ , ಅರ್ಜಿತ್ ಗುಪ್ತಾ , ಕಮಲೇಶ್ ನಾಗರಕೋಟಿ , ಮಾನವ್ ಸುತಾರ್ , ರಾಹುಲ್ ಚಹರ್ , ಕುನಾಲ್ ಸಿಂಗ್ ರಾಥೋರ್, ಅನಿಕೇತ್ ಚೌಧರಿ , ತನ್ವೀರ್ ಉಲ್-ಹಕ್ , ಅನಿರುದ್ ಸಿಂಗ್.