RCB vs DC: ಆರ್​ಸಿಬಿ ಎದುರು ಐವರು ವಿದೇಶಿ ಆಟಗಾರ್ತಿಯರನ್ನು ಕಣಕ್ಕಿಳಿಸಿದ ಡೆಲ್ಲಿ; ನಿಯಮ ಹೇಳುವುದೇನು?

ಮೂರನೇ ಆವೃತ್ತಿಯ ಮಹಿಳಾ ಪ್ರೀಮಿಯರ್ ಲೀಗ್​ನ ನಾಲ್ಕನೇ ಪಂದ್ಯವು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ದೆಹಲಿ ಕ್ಯಾಪಿಟಲ್ಸ್ ನಡುವೆ ವಡೋದರಾದಲ್ಲಿ ನಡೆಯುತ್ತಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆರ್​ಸಿಬಿ ಮೊದಲು ಬೌಲಿಂಗ್ ಮಾಡಲು ನಿರ್ಧರಿಸಿತು. ಹೀಗಾಗಿ ಡೆಲ್ಲಿ ಕ್ಯಾಪಿಟಲ್ಸ್ ಮೊದಲು ಬ್ಯಾಟಿಂಗ್ ಮಾಡುತ್ತಿದೆ. ಆದರೆ ಅದಕ್ಕೂ ಮುನ್ನ ಡೆಲ್ಲಿ ತಂಡ ತನ್ನ ಪ್ಲೇಯಿಂಗ್ 11 ಬಗ್ಗೆ ತೆಗೆದುಕೊಂಡಿರುವ ಒಂದು ನಿರ್ಧಾರ ಎಲ್ಲರನ್ನೂ ಅಚ್ಚರಿಗೊಳಿಸಿದೆ. ವಾಸ್ತವವಾಗಿ, ಡೆಲ್ಲಿ ಕ್ಯಾಪಿಟಲ್ಸ್ ಈ ಪಂದ್ಯಕ್ಕಾಗಿ ತನ್ನ ಆಡುವ 11 ರ ಬಳಗದಲ್ಲಿ ಒಟ್ಟು ಐವರು ವಿದೇಶಿ ಆಟಗಾರ್ತಿಯರನ್ನು ಸೇರಿಸಿಕೊಂಡಿದೆ. ಐಪಿಎಲ್ ಮತ್ತು ಡಬ್ಲ್ಯೂಪಿಎಲ್‌ನಲ್ಲಿ ಸಾಮಾನ್ಯವಾಗಿ ಆಡುವ 11 ರಲ್ಲಿ 4 ವಿದೇಶಿ ಆಟಗಾರ್ತಿಯರಿರಬೇಕು ಎಂಬ ನಿಯಮವಿದೆ. ಇಂತಹ ಪರಿಸ್ಥಿತಿಯಲ್ಲಿ, ಡೆಲ್ಲಿ ಹೇಗೆ ಐವರು ವಿದೇಶಿ ಆಟಗಾರ್ತಿಯರನ್ನು ಕಣಕ್ಕಿಳಿಸಿದೆ? ಇದು ನಿಯಮಗಳ ಉಲ್ಲಂಘನೆಯೇ ಎಂಬುದು ದೊಡ್ಡ ಪ್ರಶ್ನೆಯಾಗಿದೆ.

5 ಐವರು ವಿದೇಶಿ ಆಟಗಾರ್ತಿರು

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧದ ಈ ಪಂದ್ಯಕ್ಕಾಗಿ, ದೆಹಲಿ ತಂಡವು ಮೆಗ್ ಲ್ಯಾನಿಂಗ್, ಮರಿಜಾನ್ನೆ ಕಪ್, ಅನ್ನಾಬೆಲ್ ಸದರ್ಲ್ಯಾಂಡ್, ಜೆಸ್ ಜೊನಾಸ್ಸೆನ್ ಮತ್ತು ಸಾರಾ ಬ್ರೈಸ್ ಅವರನ್ನು ತಮ್ಮ ಪ್ಲೇಯಿಂಗ್ 11 ರಲ್ಲಿ ವಿದೇಶಿ ಆಟಗಾರ್ತಿಯರನ್ನಾಗಿ ಸೇರಿಸಿಕೊಂಡಿದೆ. ಆಡುವ ಹನ್ನೊಂದರ ಬಳಗದಲ್ಲಿ ಕೇವಲ 4 ವಿದೇಶಿಯರಿರಬೇಕು ಎಂಬ ನಿಯಮವಿರುವಾಗ ಡೆಲ್ಲಿ ತಂಡ ಐವರು ಆಟಗಾರ್ತಿಯರನ್ನು ಕಣಕ್ಕಿಳಿಸಿದ್ದಾದರೂ ಹೇಗೆ ಎಂಬುದನ್ನು ನೋಡುವುದಾದರೆ…

ಡೆಲ್ಲಿ ತಂಡ ವಿಶೇಷ ನಿಯಮವನ್ನು ಬಳಸಿಕೊಳ್ಳುವ ಮೂಲಕ ಚಾಣಾಕ್ಷತೆ ಮೆರೆದಿದೆ. ವಾಸ್ತವವಾಗಿ, ಡಬ್ಲ್ಯೂಪಿಎಲ್‌ನಲ್ಲಿ ವಿದೇಶಿ ಆಟಗಾರ್ತಿಯರ ನಿಯಮಗಳು ಐಪಿಎಲ್​ನಲ್ಲಿರುವ ನಿಯಮಗಳಿಗಿಂತ ಭಿನ್ನವಾಗಿವೆ. ಡಬ್ಲ್ಯೂಪಿಎಲ್‌ನಲ್ಲಿ ಒಂದು ತಂಡವು ಐವರು ವಿದೇಶಿ ಆಟಗಾರ್ತಿಯರನ್ನು ಕಣಕ್ಕಿಳಿಸಲು ಅವಕಾಶ ನೀಡುವ ವಿಶೇಷ ನಿಯಮವಿದೆ. ಆ ನಿಯಮವೆಂದರೆ ಐವರು ಆಟಗಾರರ್ತಿಯರಲ್ಲಿ ಒಬ್ಬ ಆಟಗಾರ್ತಿ ಅಸೋಸಿಯೇಟ್ ದೇಶದಿಂದ ಬಂದಿರಬೇಕು.

ಅಸೋಸಿಯೇಟ್ ರಾಷ್ಟ್ರಗಳೆಂದರೇನು?

ಕ್ರಿಕೆಟ್‌ನಲ್ಲಿ ಐಸಿಸಿಯ ಪೂರ್ಣ ಸದಸ್ಯತ್ವ ಪಡೆಯದಿರದ ರಾಷ್ಟ್ರಗಳನ್ನು ಅಸೋಸಿಯೇಟ್ ರಾಷ್ಟ್ರಗಳೆಂದು ಕರೆಯಲಾಗುತ್ತದೆ. ಇದೀಗ ಡೆಲ್ಲಿ ಪರ ಕಣಕ್ಕಿಳಿದಿರುವ ಸಾರಾ ಬ್ರೈಸ್ ಸ್ಕಾಟ್ಲೆಂಡ್​​ ಆಟಗಾರ್ತಿಯಾಗಿರುವ ಕಾರಣ ಅವರನ್ನು ವಿದೇಶಿ ಆಟಗಾರ್ತಿಯರ ಪಟ್ಟಿಯಲ್ಲಿ ಸೇರಿಸಲಾಗಿಲ್ಲ. ಅಂದರೆ, ಈ ಪಂದ್ಯದಲ್ಲಿ ಡೆಲ್ಲಿ ತಂಡವು 1 ಅಸೋಸಿಯೇಟ್ ದೇಶ ಮತ್ತು ನಾಲ್ಕು ಸದಸ್ಯ ರಾಷ್ಟ್ರಗಳ ಆಟಗಾರ್ತಿಯರನ್ನು ಕಣಕ್ಕಿಳಿಸಿದೆ. ಹೀಗಾಗಿ ಇದರಲ್ಲಿ ಯಾವುದೇ ನಿಯಮದ ಉಲ್ಲಂಘನೆಯಾಗಿಲ್ಲ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ