Zim Afro T10 2023: 5 ಸಿಕ್ಸ್​, 4 ಫೋರ್​: ಸಿಕಂದರ್ ರಾಝ ಸ್ಪೋಟಕ ಅರ್ಧಶತಕ

Zim Afro T10 2023: ಹರಾರೆಯ ಸ್ಪೋರ್ಟ್ಸ್ ಕ್ಲಬ್ ಮೈದಾನದಲ್ಲಿ ನಡೆದ ಝಿಮ್ ಆಫ್ರೊ ಟಿ10 ಲೀಗ್​ನ ಮೊದಲ ಪಂದ್ಯದಲ್ಲಿ ಸಿಕಂದರ್ ರಾಝ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಹರಾರೆ ಹರಿಕೇನ್ಸ್ ತಂಡವು ಟಾಸ್ ಗೆದ್ದು, ಬುಲವಾಯೊ ಬ್ರೇವ್ಸ್ ತಂಡವನ್ನು ಮೊದಲು ಬ್ಯಾಟಿಂಗ್​ಗೆ ಆಹ್ವಾನಿಸಿತು. ಅದರಂತೆ ಬುಲವಾಯೊ ಬ್ರೇವ್ಸ್ ಪರ ಇನಿಂಗ್ಸ್ ಆರಂಭಿಸಿದ ಬೆನ್ ಮೆಕ್​ಡರ್ಮಾಟ್ (18) ತಂಡಕ್ಕೆ ಉತ್ತಮ ಆರಂಭ ಒದಗಿಸಿದ್ದರು.

ಆದರೆ ಮತ್ತೋರ್ವ ಆರಂಭಿಕ ಕೋವ್ ಹರ್ಫ್ಟ್ (5) ರನೌಟ್ ಆಗುವ ಮೂಲಕ ನಿರ್ಗಮಿಸಿದರು. ಈ ಹಂತದಲ್ಲಿ ಕಣಕ್ಕಿಳಿದ ನಾಯಕ ಸಿಕಂದರ್ ರಾಝ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದರು. ಕ್ರೀಸ್​ಗೆ ಆಗಮಿಸುತ್ತಿದ್ದಂತೆ ಬಿರುಸಿನ ಬ್ಯಾಟಿಂಗ್​ಗೆ ಒತ್ತು ನೀಡಿದ ರಾಝ ಹರಾರೆ ಹರಿಕೇನ್ಸ್ ಬೌಲರ್​ಗಳ ಬೆಂಡೆತ್ತಿದರು. ಪರಿಣಾಮ ರಾಝ ಬ್ಯಾಟ್​ನಿಂದ 5 ಭರ್ಜರಿ ಸಿಕ್ಸ್ ಹಾಗೂ 4 ಫೋರ್​ಗಳು ಮೂಡಿಬಂತು. ಅಲ್ಲದೆ ಕೇವಲ 25 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು.

ಅರ್ಧಶತಕದ ಬಳಿಕ ಕೂಡ ಅಬ್ಬರ ಮುಂದುವರೆಸಿದ ರಾಝ ಕೇವಲ 30 ಎಸೆತಗಳಲ್ಲಿ ಅಜೇಯ 61 ರನ್​ ಚಚ್ಚಿದರು. ಸಿಕಂದರ್ ರಾಝ್ ಅವರ ಈ ಸ್ಪೋಟಕ ಬ್ಯಾಟಿಂಗ್ ನೆರವಿನಿಂದ ಬುಲವಾಯೊ ಬ್ರೇವ್ಸ್ ತಂಡವು ನಿಗದಿತ 10 ಓವರ್​ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 128 ರನ್ ಕಲೆಹಾಕಿತು.

129 ರನ್​ಗಳ ಕಠಿಣ ಗುರಿ ಬೆನ್ನತ್ತಿದ ಹರಾರೆ ಹರಿಕೇನ್ಸ್ ಪರ ರಾಬಿನ್ ಉತ್ತಪ್ಪ ಶೂನ್ಯಕ್ಕೆ ಔಟಾದರೆ, ಇರ್ಫಾನ್ ಪಠಾಣ್ ಕೇವಲ 15 ರನ್​ಗಳಿಸಿದರು. ಇನ್ನು ಮೊಹಮ್ಮದ್ ನಬಿ 22 ರನ್​ಗಳಿಸಿದ್ದು ತಂಡದ ಪರ ಗರಿಷ್ಠ ಸ್ಕೋರ್. ಇತ್ತ ಬೌಲಿಂಗ್ ಮೂಲಕವೂ ಮಿಂಚಿದ ರಾಝ 3 ವಿಕೆಟ್ ಕಬಳಿಸಿದರು. ಪರಿಣಾಮ ಹರಾರೆ ಹರಿಕೇನ್ಸ್ ತಂಡವು 10 ಓವರ್​ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 79 ರನ್​ಗಳಿಸಿ 49 ರನ್​ಗಳಿಂದ ಸೋಲೊಪ್ಪಿಕೊಂಡಿತು. ಇದರೊಂದಿಗೆ ಚೊಚ್ಚಲ ಝಿಮ್​ ಆಫ್ರೊ ಟಿ10 ಲೀಗ್​ನ ಮೊದಲ ಪಂದ್ಯ ಗೆದ್ದ ಶ್ರೇಯಸ್ಸು ಬುಲವಾಯೊ ಬ್ರೇವ್ಸ್ ತಂಡದ ಪಾಲಾಯಿತು.

ಹರಾರೆ ಹರಿಕೇನ್ಸ್ ಪ್ಲೇಯಿಂಗ್ 11: ಇಯಾನ್ ಮೋರ್ಗನ್ (ನಾಯಕ) , ರಾಬಿನ್ ಉತ್ತಪ್ಪ (ವಿಕೆಟ್ ಕೀಪರ್) , ಸಮಿತ್ ಪಟೇಲ್ , ಇರ್ಫಾನ್ ಪಠಾಣ್ , ಟಿನೊಟೆಂಡಾ ಮಪೋಸಾ , ಮೊಹಮ್ಮದ್ ನಬಿ , ಬ್ರ್ಯಾಂಡನ್ ಮಾವುಟಾ , ನಾಂದ್ರೆ ಬರ್ಗರ್ , ಕ್ರಿಸ್ ಎಂಪೋಫು , ಲ್ಯೂಕ್ ಜೊಂಗ್ವೆ , ಡೊನಾವೊನ್ ಫೆರೇರಾ , ತಶಿಂಗಾ ಮುಸೆಕಿ.

ಇದನ್ನೂ ಓದಿ: Team India: ಟೀಮ್ ಇಂಡಿಯಾ ಪರ ಅತ್ಯಧಿಕ ವಿಕೆಟ್ ಪಡೆದ ಟಾಪ್-5 ಬೌಲರ್​ಗಳ ಪಟ್ಟಿ ಇಲ್ಲಿದೆ

ಬುಲವಾಯೊ ಬ್ರೇವ್ಸ್ ಪ್ಲೇಯಿಂಗ್ 11: ಬೆನ್ ಮೆಕ್‌ಡರ್ಮಾಟ್ (ವಿಕೆಟ್ ಕೀಪರ್) , ಕೋಬ್ ಹರ್ಫ್ಟ್ , ಸಿಕಂದರ್ ರಾಝ (ನಾಯಕ) , ಆಷ್ಟನ್ ಟರ್ನರ್ , ರಿಯಾನ್ ಬರ್ಲ್ , ತಿಸಾರಾ ಪೆರೆರಾ , ಟಿಮಿಸೆನ್ ಮರುಮಾ , ಪ್ಯಾಟ್ರಿಕ್ ಡೂಲಿ , ತಸ್ಕಿನ್ ಅಹ್ಮದ್ , ಟೈಮಲ್ ಮಿಲ್ಸ್ , ಫರಾಜ್ ಅಕ್ರಮ್ , ತನಕಾ ಚಿವಂಗಾ.