11 ವರ್ಷಗಳಿಂದ ಟೆಸ್ಟ್ ಪಂದ್ಯ ಗೆಲ್ಲದ ಝಿಂಬಾಬ್ವೆ..!

ಬರೋಬ್ಬರಿ 11 ವರ್ಷಗಳು… ಝಿಂಬಾಬ್ವೆ ತಂಡವು ತವರಿನಲ್ಲಿ ಟೆಸ್ಟ್ ಪಂದ್ಯ ಗೆದ್ದು ದಶಕವೇ ಕಳೆದಿವೆ. ಈ ಬಾರಿಯಾದರೂ ಗೆಲ್ಲುತ್ತೆ ಎಂಬ ನಿರೀಕ್ಷೆಯಲ್ಲಿದ್ದ ಅಭಿಮಾನಿಗಳಿಗೆ ಐರ್ಲೆಂಡ್ ತಂಡ ಆಘಾತ ನೀಡಿದೆ. ಬುಲವಾಯೊದ ಕ್ವೀನ್ಸ್ ಸ್ಪೋರ್ಟ್ಸ್ ಕ್ಲಬ್ ಮೈದಾನದಲ್ಲಿ ನಡೆದ ಏಕೈಕ ಟೆಸ್ಟ್ ಪಂದ್ಯದಲ್ಲಿ ಝಿಂಬಾಬ್ವೆ ಮುಗ್ಗರಿಸಿದೆ. ಅದರಲ್ಲೂ ಗೆಲ್ಲಬಹುದಾಗಿದ್ದ ಪಂದ್ಯವನ್ನು ಆತಿಥೇಯರು ಕೈಚೆಲ್ಲಿಕೊಂಡಿದ್ದಾರೆ.

ಏಕೆಂದರೆ ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಐರ್ಲೆಂಡ್ ತಂಡವು ಮೊದಲ ಇನಿಂಗ್ಸ್​ನಲ್ಲಿ ಕೇವಲ 260 ರನ್​ಗಳಿಸಿ ಆಲೌಟ್ ಆಗಿತ್ತು. ಇದಕ್ಕುತ್ತರವಾಗಿ ಝಿಂಬಾಬ್ವೆ ಮೊದಲ ಇನಿಂಗ್ಸ್​ನಲ್ಲಿ 267 ರನ್ ಪೇರಿಸಿತ್ತು.

ಇನ್ನು 7 ರನ್​ಗಳ ಹಿನ್ನಡೆಯೊಂದಿಗೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಐರ್ಲೆಂಡ್ ತಂಡ ಕಲೆಹಾಕಿದ್ದು 298 ರನ್​ಗಳು ಮಾತ್ರ. ಅದರಂತೆ ಝಿಂಬಾಬ್ವೆ ತಂಡಕ್ಕೆ ಗೆಲ್ಲಲು ದ್ವಿತೀಯ ಇನಿಂಗ್ಸ್​ನಲ್ಲಿ ಕೇವಲ 292 ರನ್​ಗಳ ಅವಶ್ಯಕತೆ ಮಾತ್ರವಿತ್ತು.

ಈ ಗುರಿಯನ್ನು ಬೆನ್ನತ್ತಿದ ಝಿಂಬಾಬ್ವೆ ತಂಡವು 228 ರನ್​ಗಳಿಗೆ ಆಲೌಟ್ ಆಗುವ ಮೂಲಕ 63 ರನ್​ಗಳಿಂದ ಸೋಲೊಪ್ಪಿಕೊಂಡಿದೆ. ಇದರೊಂದಿಗೆ ತವರಿನಲ್ಲಿ ದಶಕದ ಬಳಿಕ ಟೆಸ್ಟ್ ಗೆಲ್ಲುವ ಝಿಂಬಾಬ್ವೆ ತಂಡದ ಕನಸು ಕೂಡ ಕಮರಿದೆ.

11 ವರ್ಷಗಳ ಸೋಲಿನ ಸರಮಾಲೆ:

ಝಿಂಬಾಬ್ವೆ ತಂಡವು ಕೊನೆಯ ಬಾರಿ ತವರಿನಲ್ಲಿ ಟೆಸ್ಟ್ ಪಂದ್ಯ ಗೆದ್ದಿದ್ದು 2013 ರಲ್ಲಿ. ಪಾಕಿಸ್ತಾನ್ ತಂಡವನ್ನು 24 ರನ್​ಗಳಿಂದ ಸೋಲಿಸಿ ಝಿಂಬಾಬ್ವೆ ಐತಿಹಾಸಿಕ ಸಾಧನೆ ಮಾಡಿತ್ತು. ಇದಾದ ಬಳಿಕ ತವರಿನಲ್ಲಿ ಗೆಲುವು ಎಂಬುದು ಝಿಂಬಾಬ್ವೆ ಪಾಲಿಗೆ ಮರೀಚಿಕೆಯಾಗಿದೆ.

ಈ 11 ವರ್ಷಗಳ ನಡುವೆ ಝಿಂಬಾಬ್ವೆ ಪಡೆ ತವರಿನಲ್ಲಿ 17 ಟೆಸ್ಟ್ ಪಂದ್ಯಗಳನ್ನಾಡಿದೆ. ಈ ವೇಳೆ 13 ಮ್ಯಾಚ್​ಗಳಲ್ಲಿ ಸೋಲನುಭವಿಸಿದರೆ, 4 ಪಂದ್ಯಗಳಲ್ಲಿ ಡ್ರಾ ಸಾಧಿಸಿದ್ದು ಶ್ರೇಷ್ಠ ಸಾಧನೆ.

ಇದೀಗ ಝಿಂಬಾಬ್ವೆ ತಂಡವು ತವರಿನಲ್ಲಿ ಟೆಸ್ಟ್ ಪಂದ್ಯ ಗೆಲ್ಲದೇ 11 ವರ್ಷ, 4 ತಿಂಗಳು, 28 ದಿನಗಳು ಕಳೆದಿವೆ. ಈ ದೀರ್ಘಾವಧಿಯ ಸೋಲಿನ ಸರಪಳಿಯನ್ನು ಕಳಚುವುದೇ ಈಗ ಝಿಂಬಾಬ್ವೆ ತಂಡದ ಮುಂದಿರುವ ಅತೀ ದೊಡ್ಡ ಸವಾಲು.

ಇದನ್ನೂ ಓದಿ: IPL 2025: RCB ತಂಡಕ್ಕೆ ವಿರಾಟ್ ಕೊಹ್ಲಿಯೇ ಕ್ಯಾಪ್ಟನ್..!

ಝಿಂಬಾಬ್ವೆ ಟೆಸ್ಟ್ ತಂಡ: ಕ್ರೇಗ್ ಎರ್ವಿನ್ (ನಾಯಕ), ಬೆನ್ ಕರನ್ , ತಕುಡ್ಜ್ವಾನಾಶೆ ಕೈಟಾನೊ , ನಿಕ್ ವೆಲ್ಚ್ , ಬ್ರಿಯಾನ್ ಬೆನ್ನೆಟ್ , ಜೊನಾಥನ್ ಕ್ಯಾಂಪ್ಬೆಲ್, ವೆಸ್ಲಿ ಮಾಧೆವೆರೆ , ನ್ಯಾಶಾ ಮಾಯಾವೊ (ವಿಕೆಟ್ ಕೀಪರ್) , ನ್ಯೂಮನ್ ನ್ಯಾಮ್ಹುರಿ , ರಿಚರ್ಡ್ ನಾಗರವಾ , ಬ್ಲೆಸ್ಸಿಂಗ್ ಮುಝರಾಬಾನಿ , ಟ್ರೆವರ್ ಗ್ವಾಂಡು, ಜಾಯ್ಲಾರ್ಡ್ ಗುಂಬಿ , ಸೀನ್ ವಿಲಿಯಮ್ಸ್ , ವಿಕ್ಟರ್ ನ್ಯಾಯುಚಿ , ವಿನ್ಸೆಂಟ್ ಮಸೆಕೆಸಾ.