ಧೋನಿಯಂತೆ ಬ್ಯಾಟಿಂಗ್ ಮಾಡುವವರನ್ನ ನಾನೇಂದೂ ನೋಡಿಲ್ಲ -ಕೈಫ್​ ಗುಣಗಾನ

ಮಹೇಂದ್ರ ಸಿಂಗ್ ಧೋನಿ ಬ್ಯಾಟಿಂಗ್ ವೈಖರಿಯೇ ಹಾಗೇ.. ಒಂದೋ ಹೊಡೆದಿರುಳಿಸಬೇಕು.. ಇಲ್ಲಾ ಸೈಲೆಂಟ್ ಆಗಿ ಪೆವಿಲಿಯನ್​ಗೆ ಹೋಗಬೇಕು. ಇದೇ ಕಾರಣಕ್ಕೇ ಮಹೇಂದ್ರ ಕ್ರಿಕೆಟ್ ದುನಿಯಾದ ಏಕೈಕ ಹೆಲಿಕಾಪ್ಟರ್ ವೀರನಾಗಿ ಸದ್ದು ಮಾಡಿದ್ದು.

ಧೋನಿಯನ್ನ ಗುಣಗಾನ ಮಾಡಿದ ಕೈಫ್:
ಬಹುಷಃ ಮಹೇಂದ್ರ ಸಿಂಗ್ ಧೋನಿಯಂತೆ ಕ್ರಿಕೆಟಿಗ ಭಾರತಕ್ಕೆ ಸಿಗೋದಿಲ್ಲ ಅನ್ನೋ ಮಾತಿದೆ. ಆ ಮಾತಿಗೆ ತಕ್ಕಂತೆ ಈಗ ಮಾಜಿ ಕ್ರಿಕೆಟಿಗ, ಫೀಲ್ಡಿಂಗ್ ಮಾಸ್ಟರ್ ಮೊಹಮ್ಮದ್ ಕೈಫ್, ಧೋನಿ ಬ್ಯಾಟಿಂಗ್ ವೈಭವವನ್ನ ಹಾಡಿ ಹೊಗಳಿದ್ದಾರೆ. ಧೋನಿಯಂತ ಬ್ಯಾಟ್ಸ್​ಮನ್​ನನ್ನ ನಾನು ನೋಡೇ ಇರಲಿಲ್ಲ ಎಂದು ಗುಣಗಾನ ಮಾಡಿದ್ದಾರೆ.

ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ವಿರುದ್ಧ 2005ರಲ್ಲಿ ವಿಶಾಖಪಟ್ಟಣದಲ್ಲಿ ನಡೆದ ಏಕದಿನ ಕ್ರಿಕೆಟ್ ಸರಣಿಯ ಪಂದ್ಯವೊಂದರಲ್ಲಿ ಭಾರತ ತಂಡದ ಮಾಜಿ ನಾಯಕ ಎಂ.ಎಸ್‌.ಧೋನಿ 123 ಎಸೆತಗಳಲ್ಲಿ 148 ರನ್‌ ಬಾರಿಸಿದ್ದ ಸ್ಫೋಟಕ ಬ್ಯಾಟಿಂಗ್‌ ಪ್ರದರ್ಶನವನ್ನು ಮೊಹಮ್ಮದ್‌ ಕೈಫ್‌ ತಮ್ಮ ನೆನಪಿನಾಳದಿಂದ ಬಿಚ್ಚಿಟ್ಟಿದ್ದಾರೆ. ಈ ಬಗ್ಗೆ ಮಾತನಾಡಿರೋ ಕೈಫ್, ಮೊದಲ ಬಾರಿಗೆ ಧೋನಿ ಬ್ಯಾಟಿಂಗ್ ನೋಡಿ ಅನುಭವವನ್ನ ಬಿಚ್ಚಿಟ್ಟಿದ್ದಾರೆ.

ದೇವಧರ್‌ ಟ್ರೋಫಿಯಲ್ಲಿ ಮೊದಲ ಬಾರಿ ಧೋನಿಯನ್ನ ಕಂಡೆ:
ದೇವಧರ್‌ ಟ್ರೋಫಿಯಲ್ಲಿ ನಾನು ಕೇಂದ್ರ ವಲಯದ ನಾಯಕನಾಗಿದ್ದಾಗ ಮೊದಲ ಬಾರಿ ಧೋನಿಯನ್ನು ಕಂಡೆ. ಪೂರ್ವ ವಲಯ ತಂಡವನ್ನ ಧೋನಿ ಪ್ರತಿನಿಧಿಸುತ್ತಿದ್ರು. ಇದು ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡೋದಕ್ಕೂ 2 ವರ್ಷಗಳ ಹಳೆಯ ಮಾತು. ನಾವು 360 ರನ್‌ ಗಳಿಸಿದ್ದೆವು.

ಧೋನಿ 3ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಬಂದಾಗ, ಅವರ ಮೇಲೆ ಒತ್ತಡ ಹೇರೋ ಪ್ರಯತ್ನ ಮಾಡಿದ್ವಿ. ಆದರೆ ಆ ಪಂದ್ಯದಲ್ಲಿ ಧೋನಿ 40-50 ಎಸೆತಗಳಲ್ಲಿ 80ರಿಂದ 85 ರನ್‌ಗಳನ್ನ ಬಾರಿಸಿದ್ರು. ಆ ಸಂದರ್ಭದಲ್ಲೇ ಧೋನಿ ಅವರ ಬ್ಯಾಟಿಂಗ್‌ ವಿಭಿನ್ನವಾಗಿದೆ ಮತ್ತು ಧೋನಿಯಲ್ಲಿ ಪಂದ್ಯವನ್ನು ಅರಿಯುವ ಚಾಣಾಕ್ಷತೆಯಿದೆ ಅನ್ನೋದು ನನ್ನ ಅರಿವಿಗೆ ಬಂದಿತ್ತು ಎಂದು ಕೈಫ್ ನೆನಪಿನಾಳವನ್ನು ಕೆದಕಿದ್ದಾರೆ.

ಇದಕ್ಕೂ ಮುನ್ನ ಭಾರತ ಎ ತಂಡದ ಪರ ಧೋನಿ ಆಡುವಾಗ ಅವರನ್ನು ಟಿವಿಯಲ್ಲಿ ಕಂಡ ನನ್ನ ಸ್ನೇಹಿತನೊಬ್ಬ, ಧೋನಿ ಬಗ್ಗೆ ಮೊದಲ ಬಾರಿ ಮಾತನಾಡಿದ್ದ. ಕೂಲಿಂಗ್‌ ಗ್ಲಾಸ್‌ ತೊಟ್ಟು ವಿಕೆಟ್‌ ಕೀಪಿಂಗ್‌ ಮಾಡುತ್ತಿರುವ ಉದ್ದ ಕೂದಲಿನ ಯುವಕನಲ್ಲಿ ಏನೋ ವಿಶೇಷತೆ ಕಾಣುತ್ತಿದೆ. ಬಳಿಕ ಧೋನಿಯೊಟ್ಟಿಗೆ ಆಡುವ ಅವಕಾಶ ನನಗೂ ಸಿಕ್ಕಿತ್ತು ಎಂದು ಕೈಫ್ ಹೇಳಿಕೊಂಡಿದ್ದಾರೆ.

ಪಂದ್ಯಗಳನ್ನು ಗೆಲ್ಲಿಸಿಕೊಡುವ ಒಬ್ಬ ಫಿನಿಷರ್‌:
ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ಧೋನಿ ರನ್‌ ಔಟ್‌ ಆದಾಗ ಯಾರೊಬ್ಬರಿಗೂ ಕೂಡ ಧೋನಿಯಲ್ಲಿ ಪಂದ್ಯಗಳನ್ನು ಗೆಲ್ಲಿಸಿಕೊಡುವ ಫಿನಿಷರ್‌ ಒಬ್ಬ ಇದ್ದಾನೆ ಎಂಬುದು ಗೊತ್ತಿರಲಿಲ್ಲ. ಯಾಕಂದ್ರೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅವರು ಮೊದಲ ಮೂರು ಇನಿಂಗ್ಸ್‌ಗಳು ಉತ್ತಮವಾಗಿರಲಿಲ್ಲ. ಆದರೆ ವೈಜಾಗ್​ನಲ್ಲಿ ಪಾಕಿಸ್ತಾನ ವಿರುದ್ಧ ಅವರು ಅಬ್ಬರಿಸಿದ್ರು ಎಂದಿದ್ದಾರೆ.

ಆ ಆಟವನ್ನು ಬಹಳ ಹತ್ತಿರದಿಂದ ನೋಡಿದ್ದೇನೆ. ವೃತ್ತಿ ಬದುಕಿನ ಆರಂಭಿಕ ದಿನಗಳಲ್ಲೇ ಧೋನಿ ಅಂಥಹದ್ದೊಂದು ಸ್ಫೋಟಕ ಇನ್ನಿಂಗ್ಸ್‌ ಆಡಬಲ್ಲರು ಎಂದು ಯಾರೊಬ್ಬರೂ ಊಹಿಸಿರಲಿಲ್ಲ. ಚೆಂಡನ್ನು ಬಡಿದಟ್ಟುವುದು ಇರಲಿ, ಚೆಂಡು ಎರಡು ಹೋಳಾಗುವಂತೆ ಹೊಡೆಯುವುದಕ್ಕೆ ಅದ್ಭುತ ತಾಕತ್ತು ಬೇಕು. ಪಾಕ್‌ ಬೌಲರ್‌ಗಳನ್ನು ಧೋನಿ ಅಕ್ಷರಶಃ ಚೆಂಡಾಡುತ್ತಿದ್ದರು. ಧೋನಿ ರೀತಿಯಲ್ಲಿ ಬ್ಯಾಟ್‌ ಮಾಡುವವರನ್ನು ನಾನು ಈವರೆಗೆ ಕಂಡಿಲ್ಲ. ಅವರನ್ನು 3ನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡುವಂತೆ ಮಾಡಿದ್ದು ಬಹುದೊಡ್ಡ ಸಂಗತಿ’ ಎಂದು ಕೈಫ್‌ ಧೋನಿ ಬ್ಯಾಟಿಂಗ್ ವೈಭವವನ್ನ ವರ್ಣಿಸಿದ್ದಾರೆ.