Wisden Almanack: ವಿಶ್ವ ಕ್ರಿಕೆಟ್​ ಪಂಚಾಂಗದಲ್ಲಿ ಕಪಿಲ್ ದೇವ್, ಸಚಿನ್​ ತೆಂಡೂಲ್ಕರ್ ನಂತರ ಇದೀಗ ವಿರಾಟ್​ ಕೊಹ್ಲಿಗೆ ಸ್ಥಾನ

ದೆಹಲಿ: ಪುರುಷರ ಕ್ರಿಕೆಟ್​ನಲ್ಲಿ ಏಕದಿನ ಪಂದ್ಯಾವಳಿ ಆರಂಭವಾಗಿ 50 ವರ್ಷ ಸಂದಿದೆ. ಕ್ರಿಕೆಟ್​ ಜಗತ್ತಿನ ಪಂಚಾಂಗ ಎಂದೇ ಪರಿಗಣಿತವಾಗಿರುವ ವಾರ್ಷಿಕ ಪ್ರಕಟಣೆಯ ವಿಸ್ಡನ್​ ಅಲ್ಮನಾಕ್ ಪ್ರತಿ 10 ವರ್ಷಕ್ಕೊಮ್ಮೆ ದಶಕದ ಅತ್ಯುತ್ತಮ ಏಕದಿನ ಪಂದ್ಯಾವಳಿ ಆಟಗಾರನನ್ನು (ODI player of each decade) ಆಯ್ಕೆ ಮಾಡುತ್ತಾ ಬಂದಿದೆ. ವಿವಿಯನ್​ ರಿಚರ್ಡ್ಸ್​, ಕಪಿಲ್ ದೇವ್, ಸಚಿನ್​ ತೆಂಡೂಲ್ಕರ್, ಮುತ್ತಯ್ಯ ಮುರಳೀಧರನ್ ಮತ್ತು ವಿರಾಟ್​ ಕೊಹ್ಲಿ.. ಹೀಗೆ ಇದುವರೆಗಿನ ಒಟ್ಟಿ ಸಾಗುತ್ತದೆ. ಪಟ್ಟಿಯಲ್ಲಿ ನಾನಾ ಕಾಲಘಟ್ಟದಲ್ಲಿ ಅಂದ್ರೆ 1980ರ ದಶಕ, 1990ರ ದಶಕ ಮತ್ತು 2010ರ ದಶಕದಲ್ಲಿ ಅನುಕ್ರಮವಾಗಿ ಭಾರತೀಯ ಕ್ರಿಕೆಟಿಗರು ಸ್ಥಾನ ಪಡೆದಿರುವುದು ಸಂಭ್ರಮಿಸುವ ವಿಷಯವಾಗಿದೆ. ವಿಸ್ಡನ್​ ಅಲ್ಮನಾಕ್ (Wisden Almanack) ಬೈಬಲ್​ ಆಫ್ ಕ್ರಿಕೆಟ್ ಎಂದು ಪರಿಗಣಿತವಾಗಿದೆ. ಇದನ್ನು 1864ರಲ್ಲಿ ಜಾನ್ ವಿಸ್ಡನ್​ ಸ್ಥಾಪಿಸಿದರು.

ಈ ವಿಸ್ಡನ್​ ಅಲ್ಮನಾಕ್ ಪುಸ್ತಕದ ತಾಜಾ ಬೆಳವಣಿಗೆ ಏನಪ್ಪಾ ಅಂದ್ರೆ 2010ರ ದಶಕದಲ್ಲಿ ಏಕದಿನ ಕ್ರಿಕೆಟ್​ನ ಅನಭಿಷಕ್ತ ದೊರೆಯಾಗಿ ಭಾರತೀಯ ಕ್ರಿಕೆಟ್​ನ ಹಾಲಿ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಗುರುತಿಸಲ್ಪಟ್ಟಿದ್ದಾರೆ. ಆದರೆ ಕೊಹ್ಲಿ ಹಾಗೆ ಆಯ್ಕೆಯಾದ ಬೆನ್ನಲ್ಲೇ ಬುಧವಾರದಂದು ಪಾಕಿಸ್ತಾನದ ಬಾಬರ್​ ಅಜಂಗೆ ಅಂತಾರಾಷ್ಟ್ರೀಯ ಕ್ರಿಕೆಟ್​ ಕೌನ್ಸಿಲ್​ನ ಏಕದಿನ ಕ್ರಿಕೆಟ್​ನಲ್ಲಿ ನಂಬರ್​ 1 ಸ್ಥಾನವನ್ನು ಕಳೆದುಕೊಂಡರು.

ಆಯಾ ದಶಕದ ಗ್ರೇಟೆಸ್ಟ್​ ಒಡಿಐ ಆಟಗಾರರ ಬಗ್ಗೆ ಹೇಳುವುದಾದರೆ..

ಇಡೀ ದಶಕದುದ್ದಕ್ಕೂ 32 ವರ್ಷದ ಅದ್ಭುತ ಆಟಗಾರ ವಿರಾಟ್​ ಕೊಹ್ಲಿ ಈ ವಿಸ್ಡನ್​ ಅಲ್ಮನಾಕ್ ಪುಸ್ತಕದಲ್ಲಿ ಪ್ರತಿಷ್ಠಿತ ಸ್ಥಾನ ಪಡೆದಿದ್ದರು. ವಿರಾಟ್​ ಕೊಹ್ಲಿ ಏಕ ದಿನ ಕ್ರಿಕೆಟ್​ನಲ್ಲಿ ಮೊದಲ ಬಾರಿಗೆ 2008 ಆಗಸ್ಟ್​ ತಿಂಗಳಲ್ಲಿ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ ಸ್ಥಾನ ಪಡೆದರು. ಅದಾದ ಮೇಲೆ ಕೊಹ್ಲಿ ಇದುವರೆಗೂ 254 ಪಂದ್ಯಗಳನ್ನು ಆಡಿದ್ದು12,169 ರನ್ ಕಲೆಹಾಕಿದ್ದಾರೆ. ದಾಖಲಾರ್ಹ ಸಂಗತಿಯೆಂದ್ರೆ ವಿಸ್ಡನ್​ ಅಲ್ಮನಾಕ್​ನ ನಾಲ್ಕೂ ಏಕದಿನ ಕ್ರಿಕೆಟ್ ದಿಗ್ಗಜರ ಪೈಕಿ ವಿರಾಟ್​ ಕೊಹ್ಲಿ ಸರಾಸರಿ ಅತ್ಯುತ್ತಮವಾಗಿದೆ. ವಿರಾಟ್​ ಕೊಹ್ಲಿ ಬಹುಶಃ ಸಚಿನ್​ ತೆಂಡೂಲ್ಕರ್​ ಅವರ ಸರಾಸರಿಯನ್ನೂ ಮೀರುವ ಲಕ್ಷಣಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ.

ಇತರೆ ಪ್ರತಿಷ್ಠಿತರ ಬಗ್ಗೆ ಹೇಳುವುದಾರೆ..
ವಿಸ್ಡನ್​ ಅಲ್ಮನಾಕ್​ ಪ್ರಕಟಣೆಯು ಬೆನ್​ ಸ್ಟೋಕ್ಸ್ ಅವರನ್ನು ಸತತವಾಗಿ ಎರಡನೆಯ ವರ್ಷಕ್ಕೆ ‘ಕ್ರಿಕೆಟರ್​ ಆಫ್​ ದಿ ಇಯರ್’ ಆಯ್ಕೆ ಮಾಡಿದೆ. ಇನ್ನು ಮಹಿಳಾ ಕ್ರಿಕೆಟ್​ನಲ್ಲಿ ಆಸ್ಟ್ರೇಲಿಯಾದ ಬೆತ್​ ಮೂನಿ ಮುಂಚೂಣಿ ಆಟಗಾರ್ತಿ ಎಂದು ಗುರುತಿಸಲ್ಪಟ್ಟಿದ್ದಾರೆ. ವೆಸ್ಟ್​ ಇಂಡೀಸ್​ ಆಟಗಾರ ಕೈರೆನ್​ ಪೊಲ್ಲಾರ್ಡ್​ ಅವರನ್ನು ವಿಶ್ವದ ಅತ್ಯುತ್ತಮ ಟಿ20 ಕ್ರಿಕೆಟರ್​ ಎಂದು ಆಯ್ಕೆ ಮಾಡಿದೆ.