Pension Certificate: ಹಿರಿಯ ನಾಗರಿಕರಿಗೆ ಸಿಹಿ ಸುದ್ದಿ: ಈಗ ಡಿಜಿಲಾಕರ್ ಮೂಲಕ ಪಿಂಚಣಿ ಪ್ರಮಾಣಪತ್ರ ಪಡೆಯಿರಿ: ಹೇಗೆ ನೋಡಿ

ಇಂದಿನ ದಿನಗಳಲ್ಲಿ ಪ್ರಮುಖ ದಾಖಲೆಗಳನ್ನು ನಮ್ಮ ಕೈಯಲ್ಲೇ ಇಟ್ಟುಕೊಳ್ಳುವುದು ಬಹಳ ಮುಖ್ಯ. ಆಧಾರ್ ಕಾರ್ಡ್ (Adhdaar card), ಪಾನ್, ಡ್ರೈವಿಂಗ್ ಲೈಸೆನ್ಸ್, ಪರೀಕ್ಷಾ ಫಲಿತಾಂಶದ ಡಾಕ್ಯುಮೆಂಟ್ ಹೀಗೆ ಅವಶ್ಯಕವಾದ ದಾಖಲೆಗಳು ತಕ್ಷಣ ಸಿಗುವಂತೆ ನಮ್ಮ ಹತ್ತಿರ ಇದ್ದರೆ ಉಪಯೋಗವಾಗುತ್ತದೆ. ಇಂದಿನ ಡಿಜಿಟಲ್ ಯುಗದಲ್ಲಿ ಇದು ಡಿಜಿಲಾಕರ್ ಮೂಲಕ ಸಾಧ್ಯವಾಗುತ್ತಿದೆ. ನಿಮ್ಮ ಯಾವುದೇ ಅಮೂಲ್ಯ ಡಾಕ್ಯುಮೆಂಟ್​ಗಳನ್ನು ಇದರಲ್ಲಿ ಸೇವ್ ಮಾಡಿಕೊಳ್ಳಬಹುದು. ಕೆಲ ವರ್ಷಗಳ ಹಿಂದೆ ಪ್ರಧಾನಿ ನರೇಂದ್ರ ಮೋದಿ ಡಿಜಿಲಾಕರ್ (DigiLocker) ಸೇವೆಯನ್ನು ಪ್ರಾರಂಭಿಸಿದರು. ರೇಷನ್ ಕಾರ್ಡ್​ ನಿಂದ ಹಿಡಿದು ನಿಮ್ಮ ಮಾರ್ಕ್​ ಶೀಟ್ ವರೆಗೆ ಇದರಲ್ಲಿ ಸೇವ್ ಮಾಡಿಕೊಳ್ಳಬಹುದು. ಕಾಲ ಕಾಲಕ್ಕೆ ಅಪ್ಡೇಟ್​ಗಳನ್ನು ಪಡೆಯುತ್ತಿರುವ ಡಿಜಿಲಾಕರ್​ನಲ್ಲಿ ಈಗ ಹಿರಿಯ ನಾಗರಿಕರಿಗೆ ಉಪಯೋಗವಾಗುವಂತಹ ಫೀಚರ್ ನೀಡಿದೆ. ಅದೇನೆಂದರೆ ಇನ್ನುಮುಂದೆ ಡಿಜಿಲಾಕರ್ ಮೂಲಕ ಪಿಂಚಣಿ ಪ್ರಮಾಣಪತ್ರವನ್ನು (Pension Certificate) ಕೂಡ ಪಡೆಯಬಹುದಾಗಿದೆ.

ವಯಸ್ಸಾದವರಿಗೆ ಬ್ಯಾಂಕ್​ಗೆ, ಕಚೇರಿಗಳಿಗೆ ಅಲಿಯಲು ಕಷ್ಟವಾಗುತ್ತಿರವ ಕಾರಣ ಬ್ಯಾಂಕ್ ಆಫ್ ಮಹಾರಾಷ್ಟ್ರ ಪಿಂಚಣಿ ಪ್ರಮಾಣಪತ್ರಗಳನ್ನು ಡಿಜಿಲಾಕರ್ ಮೂಲಕ ನೀಡುತ್ತದೆ. ಹಾಗಾದರೆ ಡಿಜಿಲಾಕರ್ ಮೂಲಕ ನಿಮ್ಮ ಪಿಂಚಣಿ ಪ್ರಮಾಣಪತ್ರವನ್ನು ಹೇಗೆ ಪಡೆಯುವುದು? ಎಂದು ತಿಳಿದುಕೊಳ್ಳಲು ಬಯಸಿದರೆ ಇಲ್ಲಿದೆ ನೋಡಿ ಸುಲಭ ಮಾರ್ಗ.

ಡಿಜಿಲಾಕರ್‌ನಿಂದ ಪಿಂಚಣಿ ಪ್ರಮಾಣಪತ್ರವನ್ನು ಹೇಗೆ ಪಡೆಯುವುದು?:

• ಮೊದಲಿಗೆ, ನೀವು ವೆಬ್‌ನಲ್ಲಿ ಡಿಜಿಲಾಕರ್ ಖಾತೆಗೆ ಲಾಗಿನ್ ಮಾಡಬೇಕಾಗುತ್ತದೆ ಅಥವಾ ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ಈ ಆ್ಯಪ್ ತೆರೆಯಬೇಕು.
• ಆಗ ಸೈನ್-ಇನ್ ಆಗಲು 6-ಅಂಕಿಯ ಸೆಕ್ಯೂರಿಟಿ ಪಿನ್ ನಮೋದಿಸಬೇಕಾಗುತ್ತದೆ. ಜೊತೆಗೆ ನಿಮ್ಮ ಆಧಾರ್ ಸಂಖ್ಯೆ ಅಥವಾ ಫೋನ್ ಸಂಖ್ಯೆಯನ್ನು ಕೇಳುತ್ತದೆ.
• ನಂತರ ಡಿಜಿಲಾಕರ್ ಅನ್ನು ಪ್ರವೇಶಿಸಲು ನಿಮಗೆ ಒಂದು OTP ಬರುತ್ತದೆ.
• OTP ಹಾಕಿ ಲಾಗ್ ಇನ್ ಆದ ನಂತರ, “ಬ್ಯಾಂಕ್ ಆಫ್ ಮಹಾರಾಷ್ಟ್ರ ಪಿಂಚಣಿ ಪ್ರಮಾಣಪತ್ರ” ವನ್ನು ಹುಡುಕಿ.
• ಮೇಲಿನ ಆಯ್ಕೆ ಸಿಗಲಿಲ್ಲವೆಂದಾದರೆ ವೆಬ್‌ಸೈಟ್‌ನ ಎಡಭಾಗದಲ್ಲಿರುವ ಮೆನುವಿನಲ್ಲಿ ಸರ್ಚ್ ಮಾಡಬಹುದು.
• ಇಲ್ಲಿ “ಪಿಂಚಣಿ ಡಾಕ್ಯುಮೆಂಟ್” ಎಂದು ಬರೆದಾಗ ಅನೇಕ ಆಯ್ಕೆ ಕಾಣಿಸುತ್ತದೆ ಮತ್ತು ಇದರಲ್ಲಿ ಬ್ಯಾಂಕ್ ಆಫ್ ಮಹಾರಾಷ್ಟ್ರ ಆಯ್ಕೆ ಮಾಡಿ.
• ಈಗ ನಿಮಗೆ ಒಂದು ಸಣ್ಣ ಫಾರ್ಮ್ ಸಿಗುತ್ತದೆ. ಇದರಲ್ಲಿ ನೀವು ಪಿಂಚಣಿದಾರರ ಜನ್ಮ ದಿನಾಂಕ ಮತ್ತು PPO ಸಂಖ್ಯೆಯನ್ನು ನಮೂದಿಸಬೇಕು.
• ಬಳಿಕ PPO ಸಂಖ್ಯೆಯ ಸಾಲಿನ ಕೆಳಗಿರುವ ಚೆಕ್‌ಮಾರ್ಕ್ ಅನ್ನು ಟ್ಯಾಪ್ ಮಾಡಿ. ಗೆಟ್ ಡಾಕ್ಯುಮೆಂಟ್ ಮೇಲೆ ಕ್ಲಿಕ್ ಮಾಡಿದರೆ ಆಯಿತು.

ವಾಟ್ಸ್​ಆ್ಯಪ್ ಮೂಲಕ ಡಿಜಿಲಾಕರ್ ಸೇವೆ:

ಈಗ ಡಿಜಿಲಾಕರ್ ಸೇವೆಗಳು ವಾಟ್ಸ್​ಆ್ಯಪ್​ನಲ್ಲಿ ಕೂಡ ಲಭ್ಯವಾಗುತ್ತಿದೆ. ಪ್ಯಾನ್ ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್, ವಾಹನ ನೋಂದಣಿ, ಆಧಾರ್ ಕಾರ್ಡ್ ಸೇರದಿಂತೆ ಪ್ರಮಾಣಪತ್ರ ಮುಂತಾದ ದಾಖಲೆಗಳನ್ನು ಡೌನ್‌ಲೋಡ್ ಮಾಡುವುದಕ್ಕೆ ಅವಕಾಶ ಮಾಡಿಕೊಡಲಾಗಿದೆ. ಈ ಎಲ್ಲ ವಿವರಗಳನ್ನು ಪಡೆಯಲು, ಬಳಕೆದಾರರು ಕೇವಲ ‘Namaste’ ಅಥವಾ ‘Hi’ ಅಥವಾ ‘Digilocker’ ಎಂದು ವಾಟ್ಸ್​​ಆ್ಯಪ್​​​ ಸಂಖ್ಯೆ +91 9013151515 ಗೆ ಕಳುಹಿಸಬೇಕು. ಆಗ ನಿಮಗೆ ಅನೇಕ ಆಯ್ಕೆಗಳು ಕಾಣಿಸುತ್ತದೆ. ಅದರಲ್ಲಿ ನಿಮಗೆ ಬೇಕಾದ್ದನ್ನು ಸೆಲೆಕ್ಟ್ ಮಾಡಿ ದಾಖಲೆಗಳನ್ನು ಪಡೆದುಕೊಳ್ಳಬಹುದು.