5 Planets Alignment: ಇಂದು ಆಕಾಶದಲ್ಲಿ 5 ಗ್ರಹಗಳ ಅಪರೂಪದ ಜೋಡಣೆ; ವೀಕ್ಷಿಸುವುದು ಹೇಗೆ ಎಂಬ ಮಾಹಿತಿ ಇಲ್ಲಿದೆ

ಇಂದು ಐದು ಗ್ರಹಗಳು – ಬುಧ (Mercury), ಗುರು (Jupiter), ಶುಕ್ರ (Venus), ಯುರೇನಸ್ (Uranus) ಮತ್ತು ಮಂಗಳ(Mars) – ಚಂದ್ರನ (Moon) ಬಳಿ ಸಾಲಿನಲ್ಲಿರುತ್ತವೆ. ಇದು ವಾರವಿಡೀ ಕಾಣುತ್ತದಾದರೂ, ಇಡೀ ಗುಂಪನ್ನು ನೋಡಲು ಉತ್ತಮ ದಿನ ಮಂಗಳವಾರ (ಮಾರ್ಚ್ 28). ಸೂರ್ಯಾಸ್ತದ ನಂತರ ನೀವು ಪಶ್ಚಿಮ ದಿಗಂತವನ್ನು ನೋಡಬೇಕು ಎಂದು ನಾಸಾ ಖಗೋಳಶಾಸ್ತ್ರಜ್ಞ ಬಿಲ್ ಕುಕ್ ಹೇಳಿದ್ದಾರೆ. ಗ್ರಹಗಳು ಹಾರಿಜಾನ್ ಲೈನ್‌ನಿಂದ ರಾತ್ರಿಯ ಆಕಾಶದ ಅರ್ಧದವರೆಗೆ ವಿಸ್ತರಿಸುತ್ತವೆ. ಆದರೆ ತಡ ಮಾಡಬೇಡಿ, ಸೂರ್ಯಾಸ್ತದ ಅರ್ಧ ಗಂಟೆಯ ನಂತರ ಬುಧ ಮತ್ತು ಗುರು ಗ್ರಹಗಳು ತ್ವರಿತವಾಗಿ ಕಣ್ಮರೆಯಾಗುತ್ತವೆ.

ಆಕಾಶದ ಪಶ್ಚಿಮದಲ್ಲಿ ನೀವು ಸ್ಪಷ್ಟವಾದ ಆಕಾಶವನ್ನು ಹೊಂದಿರುವವರೆಗೆ ಐದು ಗ್ರಹಗಳ ಹರಡುವಿಕೆಯನ್ನು ಭೂಮಿಯ ಮೇಲೆ ಎಲ್ಲಿಂದಲಾದರೂ ಕಾಣಬಹುದು. “ಇದು ಈ ಗ್ರಹಗಳ ಜೋಡಣೆಗಳ ಸೌಂದರ್ಯ. ಇದನ್ನೂ ನೋಡಲು ಯಾವ ಉಪಕರಣಗಳೂ ಬೇಕಿಲ್ಲ, ” ಎಂದು ಕುಕ್ ಹೇಳಿದರು.

ಇದನ್ನು ನೋಡಲು ದುರ್ಬೀನು ಬೇಕೇ?

ಗುರು, ಶುಕ್ರ ಮತ್ತು ಮಂಗಳ ಗ್ರಹಗಳು ಪ್ರಕಾಶಮಾನವಾಗಿ ಹೊಳೆಯುವುದರಿಂದ ಅವುಗಳನ್ನು ನೋಡಲು ತುಂಬಾ ಸುಲಭ ಎಂದು ಕುಕ್ ಹೇಳಿದರು. ಶುಕ್ರವು ಆಕಾಶದಲ್ಲಿ ಪ್ರಕಾಶಮಾನವಾದ ವಸ್ತುಗಳಲ್ಲಿ ಒಂದಾಗಿದೆ, ಮತ್ತು ಮಂಗಳವು ಚಂದ್ರನ ಬಳಿ ಕೆಂಪು ಹೊಳಪಿನಿಂದ ಕಾಣುತ್ತದೆ. ಮರ್ಕ್ಯುರಿ ಮತ್ತು ಯುರೇನಸ್ ಗುರುತಿಸಲು ಸ್ವಲ್ಪ ಕಷ್ಟವಾಗಬಹುದು, ಏಕೆಂದರೆ ಅವುಗಳು ಮಂದವಾಗಿರುತ್ತವೆ. ನೀವು ಬಹುಶಃ ಒಂದು ಜೋಡಿ ಬೈನಾಕ್ಯುಲರ್‌ಗಳ ಅಗತ್ಯ ಬೀಳಬಹುದು. ಆದರೆ ಶುಭ್ರ ಆಕಾಶವಿದ್ದಲ್ಲಿ ಯಾವುದೇ ಪರಿಕರಗಳಿಲ್ಲದೆ ಬರಿ ಕಣ್ಣಿಗೆ ಕಾಣುತ್ತದೆ.

ನೀವು “ಗ್ರಹ ಸಂಗ್ರಾಹಕ” ಆಗಿದ್ದರೆ, ಯುರೇನಸ್ ಅನ್ನು ಗುರುತಿಸಲು ಇದು ಅಪರೂಪದ ಅವಕಾಶವಾಗಿದೆ, ಅದು ಸಾಮಾನ್ಯವಾಗಿ ಗೋಚರಿಸುವುದಿಲ್ಲ ಎಂದು ಕುಕ್ ಹೇಳಿದರು. ಶುಕ್ರನ ಮೇಲೆ ಇರುವ ಹಸಿರು ಹೊಳಪಿನಿಂದ ಅದನ್ನು ಗುರುತಿಸಬಹುದು.

ಇದನ್ನೂ ಓದಿ:

ಇದು ಆಗಾಗ ಸಂಭವಿಸುತ್ತದೆಯೇ?

ಗ್ರಹಗಳ ವಿವಿಧ ಸಂಖ್ಯೆಗಳು ಮತ್ತು ಗುಂಪುಗಳು ಕಾಲಕಾಲಕ್ಕೆ ಆಕಾಶದಲ್ಲಿ ಸಾಲುಗಟ್ಟಿರುತ್ತವೆ. ಕಳೆದ ಬೇಸಿಗೆಯಲ್ಲಿ ಐದು ಗ್ರಹಗಳ ತಂಡವಿತ್ತು ಮತ್ತು ಜೂನ್‌ನಲ್ಲಿ ಸ್ವಲ್ಪ ವಿಭಿನ್ನವಾದ ಗುಂಪಿನದು ಕಂಡಿತ್ತು. ಭೂಮಿಯ ದೃಷ್ಟಿಕೋನದಿಂದ ಗ್ರಹಗಳ ಕಕ್ಷೆಗಳು ಸೂರ್ಯನ ಒಂದು ಬದಿಯಲ್ಲಿ ಜೋಡಿಸಿದಾಗ ಈ ರೀತಿಯ ಜೋಡಣೆ ಸಂಭವಿಸುತ್ತದೆ ಎಂದು ಕುಕ್ ಹೇಳಿದರು.