Video: ಎಲ್ಲೆಲ್ಲೂ ಹಿಮ, ಕೊರೆವ ಚಳಿ; ಕೇವಲ 40 ಸೆಕೆಂಡ್​ಗಳಲ್ಲಿ 47 ಪುಶ್​ ಅಪ್ಸ್​ ತೆಗೆದ ಬಿಎಸ್​ಎಫ್ ಯೋಧ-ಸೆಲ್ಯೂಟ್​ ಹೊಡೆದ ನೆಟ್ಟಿಗರು

ಸೋಷಿಯಲ್​ ಮೀಡಿಯಾ(Social Media)ಗಳಲ್ಲಿ ವೈರಲ್​ ಆಗುವ ಒಂದಷ್ಟು ವಿಡಿಯೋಗಳು ತುಂಬ ಮೆಚ್ಚುಗೆಗೆ ಪಾತ್ರವಾಗುತ್ತವೆ. ಅದರಲ್ಲೂ ನಮ್ಮ ಸೇನೆ, ಯೋಧರಿಗೆ ಸಂಬಂಧಪಟ್ಟ ಯಾವುದೇ ವಿಡಿಯೋಗಳು ವೈರಲ್ ಆಗಲಿ, ಅದಕ್ಕಿರುವ ತೂಕವೇ ಬೇರೆ. ಅನೇಕಾನೇಕ ಜನರು ಅದನ್ನು ಮೆಚ್ಚಿಕೊಂಡು ಲೈಕ್​ ಮಾಡುತ್ತಾರೆ. ರೀ ಪೋಸ್ಟ್ ಮಾಡಿಕೊಳ್ಳುತ್ತಾರೆ. ಒಳ್ಳೆಯ ಕಮೆಂಟ್​ಗಳನ್ನೂ ಹಾಕುತ್ತಾರೆ. ಹಾಗೇ, ಈಗ ಗಡಿ ಭದ್ರತಾ ಪಡೆ (BSF) ತನ್ನ ಅಧಿಕೃತ ಟ್ವಿಟರ್​ ಅಕೌಂಟ್​ನಲ್ಲಿ ಶೇರ್ ಮಾಡಿಕೊಂಡಿರುವ ವಿಡಿಯೋ ವಿಪರೀತ ವೈರಲ್ ಆಗುತ್ತಿದೆ. ಸಂಪೂರ್ಣವಾಗಿ ಹಿಮಾಚ್ಛಾದಿತವಾದ ಪ್ರದೇಶದಲ್ಲಿ ಯೋಧನೊಬ್ಬ ಪುಶ್​ ಅಪ್ಸ್​ ತೆಗೆದ ವಿಡಿಯೋ ಇದು. ಈ ಯೋಧ 40 ಸೆಕೆಂಡ್​ಗಳಲ್ಲಿ 47 ಪುಶ್​ ಅಪ್ಸ್​ ತೆಗೆದಿದ್ದಾಗಿ ಬಿಎಸ್​ಎಫ್​ ಕ್ಯಾಪ್ಷನ್​ನಲ್ಲಿ ತಿಳಿಸಿದೆ.

ಎಲ್ಲೆಲ್ಲೂ ಬೆಳ್ಳಗಿನ ಹಿಮ. ಅಂಥ ಚಳಿಯಲ್ಲಿ ಈ ಯೋಧ ಒಂದು ಮರದ ಬುಡದಲ್ಲಿ ಪುಶ್​ ಅಪ್ಸ್​ ತೆಗೆಯುವುದು ಸುಲಭವಲ್ಲ. ಹಾಗಿದ್ದಾಗ್ಯೂ ಕೂಡ ಕೇವಲ 40 ಸೆಕೆಂಡ್​ಗಳಲ್ಲಿ 47 ಪುಶ್​ ಅಪ್ಸ್​ ತೆಗೆದಿದ್ದಾರೆ. ಅಷ್ಟು ಪ್ರಮಾಣದ ಹಿಮದಲ್ಲಿ ಪುಶ್​ ಅಪ್ಸ್​ ಮಾಡಿದ್ದು ಒಂದು ಸಾಧನೆಯಾಗಿದ್ದರೆ, 40 ಸೆಕೆಂಡ್​ಗಳಲ್ಲಿ 47 ಪುಶ್ ಅಪ್ಸ್​ ತೆಗೆದಿದ್ದು ಇನ್ನೊಂದು ದಾಖಲೆ.  ಈ ವಿಡಿಯೋಕ್ಕೆ ಫಿಟ್ ಇಂಡಿಯಾ ಚಾಲೆಂಜ್​ ಎಂದು ಹೆಸರು ಕೊಟ್ಟಿರುವ ಬಿಎಸ್​ಎಫ್​, ನೀವೂ ಪುಶ್​ ಅಪ್ಸ್​ ತೆಗೆಯಿರಿ ಎಂದು ಹೇಳಿದೆ. ಈ ವಿಡಿಯೋ 28 ಸಾವಿರಕ್ಕೂ ಅಧಿಕ ಬಾರಿ ವೀಕ್ಷಿಸಲ್ಪಟ್ಟಿದೆ. ಅಂಥ ಚಳಿಯಲ್ಲಿ ಯೋಧ ಪುಶ್​ ಅಪ್ಸ್​ ತೆಗೆಯುವುದನ್ನು ನೋಡಿದ ಜನರು ತುಂಬ ಹೆಮ್ಮೆಯಿಂದ ಕಮೆಂಟ್ ಮಾಡಿದ್ದಾರೆ. ನಮ್ಮ ಯೋಧರ ಬಗ್ಗೆ ಹೆಮ್ಮೆಯಾಗಲು ಇಂಥ ಅನೇಕ ಕಾರಣಗಳು ಸಿಗುತ್ತವೆ ಎಂದು ನೆಟ್ಟಿಗರೊಬ್ಬರು ಕಮೆಂಟ್ ಮಾಡಿದ್ದರೆ, ನಿಮ್ಮ ಶಕ್ತಿ, ಆತ್ಮಸ್ಥೈರ್ಯಕ್ಕೆ ಸೆಲ್ಯೂಟ್​ ಎಂದು ಇನ್ನೊಬ್ಬರು ಹೇಳಿದ್ದಾರೆ.

ಈ ವಿಡಿಯೋ ವೈರಲ್​ ಆದ ಬೆನ್ನಲ್ಲೇ ಬಿಎಸ್​ಎಫ್​ ಇನ್ನೊಬ್ಬ ಯೋಧ ಹಿಮದಲ್ಲಿ  ಒಂದೇ ಕೈಯಲ್ಲಿ ಪುಶ್​ ಅಪ್ಸ್ ಮಾಡಿದ ವಿಡಿಯೋವನ್ನೂ ಶೇರ್ ಮಾಡಿಕೊಂಡಿದ್ದು, ಅದನ್ನು ನೋಡಿ ಜನರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ಹಾಗೇ, ರಕ್ಷಣಾ ಇಲಾಖೆ ಉಧಾಂಪುರ ಪಿಆರ್​ಒ ಎಂಬ ಟ್ವಿಟರ್ ಖಾತೆ ವಾಯುಪಡೆಯ ಏರ್​ಮಾರ್ಷಲ್​ಗಳ ವಿಡಿಯೋವೊಂದನ್ನು ಶೇರ್ ಮಾಡಿಕೊಂಡು, ಗಣರಾಜ್ಯೋತ್ಸವ ಪರೇಡ್​ಗೆ ಸಿದ್ಧತೆ ನಡೆಯುತ್ತಿದೆ ಎಂದು ಹೇಳಿದೆ.

ಇದನ್ನೂ ಓದಿ: ಪ್ರತಿದಿನ ಹಸಿ ಬಾಳೆಹಣ್ಣು ಸೇವಿಸುವುದರಿಂದಾಗುವ ಆರೋಗ್ಯ ಪ್ರಯೋಜನಗಳೇನು; ಇಲ್ಲಿದೆ ಮಾಹಿತಿ