ಹೆಂಡತಿಯೊಂದಿಗೆ ಜಗಳಕ್ಕಿಳಿದ ಯೂಟ್ಯೂಬರ್; ಕೊನೆಯಲ್ಲಿ ಏನಾಯಿತು?

Viral Video : ಕೊರೋನಾ ನಂತರದ ಅವಧಿಯಲ್ಲಿ ಡಿಜಿಟಲ್​ ಕಂಟೆಂಟ್​ ಕ್ರಿಯೇಷನ್​ಗೆ ಬಹು ಬೇಡಿಕೆ ಉಂಟಾಯಿತು. ಯಾವ ರೀತಿ ಎಂದರೆ ಕುಟುಂಬಕ್ಕೆ ಕುಟುಂಬವೇ ಈ ಸೃಷ್ಟಿಯಲ್ಲಿ ತೊಡಗಿಕೊಳ್ಳಲು ಶುರುಮಾಡಿತು. ಅದರಲ್ಲಿ ಎಲ್ಲ ರೀತಿಯ ನೀರೂ ಹರಿಯಿತು. ಅವರವರ ಆಯ್ಕೆ ಅಭಿರುಚಿಗೆ ತಕ್ಕಂತೆ ಫಾಲೋವರ್​ಗಳು ಹುಟ್ಟಿಕೊಂಡರು. ಕ್ಷಣಕ್ಷಣವೂ ಭಿನ್ನವಾಗಿ ತಮ್ಮ ಕಂಟೆಂಟ್​ ಅನ್ನು ಪ್ರೆಸೆಂಟ್ ಮಾಡುವುದು ಹೇಗೆ ಎಂಬ ಯೋಚನೆಯಲ್ಲಿಯೇ ಹಲವಾರು ಯೂಟ್ಯೂಬರ್​ಗಳು, ಇನ್​ಸ್ಟಾಗ್ರಾಮ್​, ಫೇಸ್​ಬುಕ್​ ಖಾತೆದಾರರು ಮುಳುಗಿ ಅದನ್ನೇ ಬದುಕಾಗಿಸಿಕೊಂಡು ಸಾಗುವಷ್ಟು. ಇದೀಗ ವೈರಲ್ ಆಗಿರುವ ಈ ವಿಡಿಯೋ ನೋಡಿ.

ಇನ್​ಸ್ಟಾಗ್ರಾಂ, ಯೂಟ್ಯೂಬ್​ ಮೂಲಕ ಇಂಗ್ಲಿಷ್​ ಟ್ಯುಟೋರಿಯಲ್​ ವಿಡಿಯೋಗಳನ್ನು ಪೋಸ್ಟ್​ ಮಾಡುತ್ತಾರೆ ಈ ಕಂಟೆಂಟ್​ ಕ್ರಿಯೇಟರ್ ಗೌರವ್. ಈ ವಿಡಿಯೋದಲ್ಲಿ ತಮ್ಮ ಹೆಂಡತಿಯೊಂದಿಗೆ ಕೆಟ್ಟ ಜಗಳಕ್ಕಿಳಿದಿದ್ದಾರೆ. ಇದು ಮನೆಯಾ? ಮೂರು ದಿನದಿಂದ ಬಟ್ಟೆ ಬಿದ್ದಲ್ಲೇ ಬಿದ್ದುಕೊಂಡಿದೆ. ಇನ್ನು ಬೆಡ್​ರೂಮಿನಲ್ಲಿ ಮಲಗಲೂ ಜಾಗವಿಲ್ಲ. ಡೈನಿಂಗ್​ ಟೇಬಲ್​ ಎಂಥ ಕೆಟ್ಟದಾಗಿದೆ. ಸ್ವಚ್ಛತೆ ಅನ್ನೋದೇ ಇಲ್ಲ. ಮೂರ್ಹೊತ್ತೂ ಮೊಬೈಲ್​ನಲ್ಲಿಯೇ ಇರ್ತೀಯಾ. ಅದು ಹಾಗೆ ಇದು ಹೀಗೆ ಎಂದು ಎಲ್ಲರ ಮನೆಯ ದೋಸೆಯೂ ತೂತು ಎಂಬಂತೆ ಈ ಜಗಳದ ಕ್ಲಿಪ್​ ಇದೆ.

ಇದನ್ನೂ ನೋಡಿ : ಸಿಲ್ಕಿ ಹೇರ್​ ಸಿಂಹಪ್ಪ ವೈರಲ್ ಆದನು ನೋಡಪ್ಪ

ನನಗೆ ಇದೊಂದೇ ಕೆಲಸವಾ ಎಂದು ಹೆಂಡತಿಯೂ ಪ್ರತಿಯಾಗಿ ತರಾಟೆಗೆ ತೆಗೆದುಕೊಳ್ಳುತ್ತಾಳೆ. ನನಗೂ ಸಾಕಾಯ್ತು ಮಾಡಿ ಮಾಡಿ ಬೇಡವಾದರೆ ಡೈವೋರ್ಸ್​ ಕೊಡಿ ಎನ್ನುತ್ತಾಳೆ. ಅಷ್ಟೊತ್ತಿಗೆ ಅಡ್ಡಬಂದ ಮಗು ಬೇಡ ಎನ್ನುತ್ತೆ. ಅದು ಡೈವೋರ್ಸ್​ ಅಲ್ಲ ಡಿವೋರ್ಸ್​ ಎಂದು ಇಂಗ್ಲಿಷ್​ ಪದದ ಉಚ್ಛಾರದ ಬಗ್ಗೆ ಪಾಠ ಮಾಡುತ್ತಾರೆ ಗೌರವ್.

ಈ ವಿಡಿಯೋ ನೋಡಿ ಇವರ ಫಾಲೋವರ್​ಗಳು ಆರಂಭದಲ್ಲಿ ನಿಜಕ್ಕೂ ಆಘಾತಕ್ಕೆ ಒಳಗಾಗುತ್ತಾರೆ. ಇಷ್ಟು ದಿನ ಶಾಂತರೀತಿಯಿಂದ ಇಂಗ್ಲಿಷ್​ ಪಾಠ ಮಾಡುತ್ತಿದ್ದವರು ಹೀಗೆ ಹೆಂಡತಿಯೊಂದಿಗೆ ಕೆಟ್ಟದಾಗಿ ಜಗಳವಾಡುವ ವಿಡಿಯೋ ಯಾಕೆ ಅಪ್​ಲೋಡ್ ಮಾಡಿದ್ದಾರೆ ಎಂದು. ಕೊನೆಯ ತನಕ ನೋಡಿದಾಗ ನಿಜವಾದ ವಿಷಯ ತಿಳಿಯುತ್ತದೆ.

ಹೇಗಿದೆ ಸೃಜನಶೀಲತೆಯ ಪರಮಾವಧಿ!

ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ