PIN Code : ಅಂಚೆ ಕಚೇರಿಯ ಪಿನ್ ಕೋಡ್ ಆವಿಷ್ಕಾರಕ್ಕೆ 50 ರ ಸಂಭ್ರಮ
Shriram Bhikaji Velankar : 1972ರ ಆಗಸ್ಟ್ 15 ರಂದು ಅಂದಿನ ಸಂವಹನ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಶ್ರೀರಾಮ್ ಭಿಕಾಜಿ ವೇಲಂಕರ್ ಅವರು, ಪತ್ರಗಳನ್ನು ವಿಂಗಡಿಸುವ ಕೆಲಸ ಸುಲಭವಾಗಲಿ ಎಂಬ ಕಾರಣಕ್ಕೆ ಪಿನ್ ಕೋಡ್ ವ್ಯವಸ್ಥೆಯನ್ನು ಜಾರಿಗೆ ತಂದರು.
PIN Code : ಇಂದು ದೇಶಾದ್ಯಂತ ಸ್ವತಂತ್ರ ಭಾರತದ ಅಮೃತಮಹೋತ್ಸವ ಆಚರಿಸಲಾಗುತ್ತಿದೆ. ಈ ದಿನಕ್ಕೆ ಮತ್ತೊಂದು ಮಹತ್ವದ ದಿನ ಸೇರ್ಪಡೆಗೊಂಡಿದೆ. ಅಂಚೆ ಕಚೇರಿಯ ಪಿನ್ ಆವಿಷ್ಕಾರವಾಗಿ ಇಂದಿಗೆ 50 ವರ್ಷಗಳು ಸಂದಿವೆ. ಯಾವುದೇ ಪತ್ರವಿರಲಿ, ಅಪ್ಲಿಕೇಷನ್ ಇರಲಿ ಆರು ನಂಬರ್ ಹೊಂದಿದ PIN (Post Index Number) ಪಿನ್ ಕೋಡ್ ಬರೆಯುವುದು ಇಂದಿಗೂ ಚಾಲ್ತಿಯಲ್ಲಿದೆ. ಇದು ಭಾರತೀಯ ಅಂಚೆ ಇಲಾಖೆ ರೂಪಿಸಿಕೊಂಡ ವ್ಯವಸ್ಥೆ. ಅಂಚೆ ಇಲಾಖೆಯ ಪ್ರಕಾರ, ಭಾರತ ಸ್ವಾತಂತ್ರ್ಯ ಪಡೆದ ನಂತರ ನಗರ ಮತ್ತು ಪ್ರದೇಶಗಳಲ್ಲಿ ಒಟ್ಟು 23,344 ಅಂಚೆ ಕಚೇರಿಗಳು ಇದ್ದವು. ಆದರೆ, ದೇಶದ ತ್ವರಿತಗತಿಯ ಬೆಳವಣಿಯಿಂದಾಗಿ ಅಂಚೆಕಚೇರಿಯ ಕಾರ್ಯವಿಧಾನವೂ ವೇಗ ಹೆಚ್ಚಿಸಿಕೊಳ್ಳುವುದು ಅನಿವಾರ್ಯವಾಯಿತು. ಆಗ ಇದಕ್ಕಾಗಿ ಸುಲಭ ಉಪಾಯ ಕಂಡುಕೊಳ್ಳಬೇಕು ಎನ್ನಿಸಿತು. ಏಕೆಂದರೆ, ಪತ್ರವ್ಯವಹಾರಗಳು ಎಂದಮೇಲೆ ಸ್ಥಳೀಯ ಭಾಷೆಯಲ್ಲಿಯೇ ನಡೆಯುವಂಥದ್ದು. ಎಲ್ಲರಿಗೂ ಎಲ್ಲ ಭಾಷೆಯೂ ಬರುವುದುಂಟೆ? ಹಾಗೆಯೇ ಎಷ್ಟೋ ಬಾರಿ ಒಂದೇ ಹೆಸರಿನ ಜಿಲ್ಲೆ, ಊರುಗಳೂ ಗೊಂದಲವನ್ನು ಉಂಟು ಮಾಡುವುದಲ್ಲವೆ? ಹೀಗಿದ್ದಾಗ ಅಂಚೆ ಕಚೇರಿಯವರಿಗೆ ಪತ್ರಗಳನ್ನು ವಿಂಗಡಿಸುವುದು ದೊಡ್ಡ ಸವಾಲಿನ ಕೆಲಸವಲ್ಲವೆ? ಆಗ ಈ ಪಿನ್ಕೋಡ್ ನಂಬರ್ ಪರಿಚಯಿಸಲಾಯಿತು.
ಪಿನ್ ಕೋಡನ ವಿವರವನ್ನು ತಿಳಿದುಕೊಳ್ಳುವುದಾದರೆ, ಎಂಟು ಪ್ರಾದೇಶಿಕ ವಲಯ ಮತ್ತು ಭಾರತೀಯ ಸೇನೆಗಾಗಿ ಒಂದು ವಲಯ ಒಳಗೊಂಡಂತೆ ಒಟ್ಟು ಒಂಬತ್ತು ಪಿನ್ ಕೋಡ್ ವಲಯಗಳಿವೆ. ಮೊದಲ ಅಂಕೆ ‘ವಲಯ’, ಎರಡನೇ ಅಂಕೆ ‘ಉಪವಲಯ’, ಮೂರನೇ ಅಂಕೆ ‘ಅಂಚೆ ವಿಂಗಡಣೆಯ ಜಿಲ್ಲೆ‘ಯನ್ನು ಸೂಚಿಸುತ್ತದೆ. ಕೊನೆಯಲ್ಲಿಉಳಿಯುವ ಮೂರು ಅಂಕೆಗಳು ಕಚೇರಿಯ ಸೂಚಿಸುತ್ತವೆ. ಈ ಉಪಾಯದಿಂದ ಪತ್ರಗಳ ವಿಂಗಡಣೆಯು ಸುಲಭವೂ, ತ್ವರಿತವೂ ಮತ್ತು ಗೊಂದಲರಹಿತವೂ ಆಯಿತು.
1972ರ ಆಗಸ್ಟ್ 15 ರಂದು ಅಂದಿನ ಸಂವಹನ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಮತ್ತು ಅಂಚೆ ಮತ್ತು ಟೆಲಿಗ್ರಾಫ್ ಬೋರ್ಡ್ನ ಹಿರಿಯ ಸದಸ್ಯರಾಗಿದ್ದ ಶ್ರೀರಾಮ್ ಭಿಕಾಜಿ ವೇಲಂಕರ್ ಅವರು ಪತ್ರಗಳನ್ನು ವಿಂಗಡಿಸುವ ಕೆಲಸ ಸುಲಭವಾಗಲಿ ಎಂಬ ಕಾರಣಕ್ಕೆ ಪಿನ್ ಕೋಡ್ ವ್ಯವಸ್ಥೆಯನ್ನು ಜಾರಿಗೆ ತಂದರು.
ವೇಲಂಕರ್ ಅವರು ಮುಂಬೈನಲ್ಲಿ ನಿಧನರಾಗುವ ಮೂರು ವರ್ಷಗಳ ಮೊದಲು (1996 ರಲ್ಲಿ) ಸಂಸ್ಕೃತ ಸಾಹಿತ್ಯಕ್ಕೆ ನೀಡಿದ ಕೊಡುಗೆಗಾಗಿ ರಾಷ್ಟ್ರಪತಿಗಳ ಪ್ರಶಸ್ತಿಯನ್ನು ಪಡೆದಿದ್ದರು. ಅವರು ಸಂಸ್ಕೃತದಲ್ಲಿ ರಚಿಸಿದ ಒಟ್ಟು ಪುಸ್ತಕಗಳ ಸಂಖ್ಯೆ 105. ನಾಟಕಗಳಲ್ಲಿ ಅವರ ವಿಲೋಮ ಕಾವ್ಯವನ್ನು ಸಾಹಿತ್ತ್ಯಿಕ ಮೇರುಕೃತಿ ಎಂದು ಪರಿಗಣಿಸಲಾಗಿತ್ತು. ಇದು ರಾಮಸ್ತುತಿ ಪದ್ಯಗಳನ್ನು ಒಳಗೊಂಡಿದೆ. ವೇಲಂಕರ್ ಅವರು ಮುಂಬೈನಲ್ಲಿ ದೇವವಾಣಿ ಮಂದಿರಂ ಎಂಬ ಸಾಂಸ್ಕೃತಿಕ ತಂಡವನ್ನು ಸ್ಥಾಪಿಸಿದ್ದರು. ಇದು ಭಾರತ ಮತ್ತು ವಿದೇಶಗಳಲ್ಲಿ ಸಂಸ್ಕೃತದ ಬಗ್ಗೆ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ರೂಪಿಸಿದ ಯೋಜನೆಯಾಗಿತ್ತು. ಅಲ್ಲದೆ ಇವರು 1973 ರಲ್ಲಿ ನವದೆಹಲಿಯಲ್ಲಿ ನಡೆದ ಇಂಡಿಪೆಕ್ಸ್ ಎಂಬ ವಿಶ್ವ ಅಂಚೆಚೀಟಿಗಳ ಸಂಗ್ರಹದ ಪ್ರದರ್ಶನದ ಅಧ್ಯಕ್ಷರಾಗಿದ್ದರು. ಆ ಪ್ರದರ್ಶನದಲ್ಲಿ 120 ದೇಶಗಳು ಭಾಗಿಯಾಗಿದ್ದವು. 1973ರ ಡಿಸೆಂಬರ್ 31ರಂದು ವೇಲಂಕರ್ ಸರ್ಕಾರಿ ಸೇವೆಯಿಂದ ನಿವೃತ್ತರಾದರು.
ಮತ್ತಷ್ಟು ಟ್ರೆಂಡಿಂಗ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
Published On - 10:49 am, Mon, 15 August 22