ದೇಶೀಯ ವಿಡಿಯೋ ಆ್ಯಪ್​ಗಳಿಗೆ ವರವಾಯ್ತು ಟಿಕ್​ ಟಾಕ್ ನಿಷೇಧ: ಮಾರುಕಟ್ಟೆಯಲ್ಲಿ ಶೇ. 40 ಪಾಲು ಗಳಿಕೆ

ಬೆಂಗಳೂರು: ಕಳೆದ ಜೂನ್​ನಲ್ಲಿ ಟಿಕ್​ ಟಾಕ್ ನಿಷೇಧದ ನಂತರ ದೇಶೀಯ ಕಿರು ವಿಡಿಯೋ ಆ್ಯಪ್​ಗಳು ಮುಂಚೂಣಿಗೆ ಬಂದಿವೆ. ದೇಶೀಯ ಆ್ಯಪ್​ಗಳೇ ಕಿರು ವಿಡಿಯೋ ಮಾರುಕಟ್ಟೆಯ ಶೇ. 40 ಭಾಗ ಹೊಂದಿವೆ ಎಂದು ಬೆಂಗಳೂರಿನ ರೆಡ್​ಸೀರ್ ಸಂಸ್ಥೆ ನಡೆಸಿದ ಸಮೀಕ್ಷೆಯಲ್ಲಿ ಬೆಳಕಿಗೆ ಬಂದಿದೆ.

ದೇಶದಲ್ಲಿ ಟಿಕ್ ಟಾಕ್ ನಿಷೇಧದ ನಂತರ 17 ಕೋಟಿ ಬಳಕೆದಾರರು ಇತರ ಆ್ಯಪ್​ಗಳತ್ತ ಮುಖಮಾಡಿದ್ದರು. ಈ ಅವಕಾಶವನ್ನು ದೇಶೀಯ ಕಿರು ವಿಡಿಯೋ ಆ್ಯಪ್​ಗಳು ಸದ್ಬಳಕೆ ಮಾಡಿಕೊಂಡವು. ಡೈಲಿ ಹಂಟ್ ಒಡೆತನದ ಜೋಶ್ ಕಿರು ವಿಡಿಯೋ ಆ್ಯಪ್​ ವಿನೂತನ ಸೌಲಭ್ಯಗಳನ್ನು ಒದಗಿಸುವ ಎಂಎಕ್ಸ್ ಟಕಾಟಕ್ ಎಂಬ ಆ್ಯಪ್​ನ್ನು ಬಿಡುಗಡೆಗೊಳಿಸಿತು.

ರೋಪ್ಸೋ, ಚಿಂಗಾರಿ, ಮೋಜ್ ಮಿತ್ರೋನ್, ಟ್ರೆಲ್ ಮುಂತಾದ ಆ್ಯಪ್​ಗಳು ಟಿಕ್ ಟಾಕ್ ನಿಷೇಧದ ನಂತರವೇ ಜನಪ್ರಿಯವಾದವು. ಕಿರು ವಿಡಿಯೋ ಆ್ಯಪ್​ಗಳು ಮುನ್ನೆಲೆಗೆ ಬರುತ್ತಿರುವುದನ್ನು ಗಮನಿಸಿದ ಫೇಸ್​ಬುಕ್ ‘ಫೇಸ್​ಬುಕ್ ರೀಲ್ಸ್’, ಮತ್ತು ಯೂಟ್ಯೂಬ್ ‘ಯೂಟ್ಯೂಬ್ ಶಾರ್ಟ್’ ಎಂಬ ಸೌಲಭ್ಯಗಳನ್ನು ಬಿಡುಗಡೆಗೊಳಿಸಿವೆ.

ಭಾರತೀಯ ಕಿರು ವಿಡಿಯೋ ಆ್ಯಪ್​ಗಳು ಹೊಸ ನಮೂನೆಯ ವಿಷಯಗಳನ್ನು ಬಿತ್ತರಿಸುತ್ತಿವೆ. ಈ ಕಾರಣದಿಂದಲೇ ಹೆಚ್ಚು ಬಳಕೆದಾರರನ್ನು ಸೆಳೆಯಲು ಸಾಧ್ಯವಾಗುತ್ತಿದೆ. ಮುಂದಿನ 5 ವರ್ಷಗಳಲ್ಲಿ ದೇಶಿ ಕಿರು ವಿಡಿಯೋ ಆ್ಯಪ್​ಗಳು ನಾಲ್ಕು ಪಟ್ಟು ಹೆಚ್ಚು ಬೆಳೆಯಲಿವೆ ಎಂದು ರೆಡ್​ಸೀರ್ ಸಂಸ್ಥೆಯ ಸಿಇಒ ಅನಿಲ್ ಕುಮಾರ್ ತಿಳಿಸಿದ್ದಾರೆ.

10 ಭಾರತೀಯ ಭಾಷೆಗಳಲ್ಲಿ ಸೇವೆ ಒದಗಿಸುತ್ತಿರುವ ರೋಪ್ಸೋ ಕೃತಕ ಬುದ್ಧಿಮತ್ತೆಯ ಪ್ರಮಾಣವನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ಅಳವಡಿಸಿಕೊಳ್ಳಲು ಹೂಡಿಕೆ ಮಾಡಲಿದೆ. ಸದ್ಯ ಭಾರತದಲ್ಲಿ 60 ಕೋಟಿ ಅಂತರ್ಜಾಲ ಬಳಕೆದಾರರಿದ್ದ ಮುಂದಿನ 5 ವರ್ಷದೊಳಗೆ ಈ ಸಂಖ್ಯೆ 97 ಕೋಟಿಗೆ ಏರುವ ಸಾಧ್ಯತೆಯಿದೆ. ಈ ಅವಕಾಶವನ್ನು ಬಳಸಿಕೊಳ್ಳಲು ದೇಶಿ ಕಿರು ವಿಡಿಯೋ ಆ್ಯಪ್​ಗಳು ಯೋಜನೆ ರೂಪಿಸುತ್ತಿವೆ.