‘ಲಾಟರಿ ಹೊಡೀತು, ಮಿಲಿಯನೇರ್ ಆದೆ, ಆದರೀಗ ಹೆಂಡತಿ ಬೇಕಲ್ಲ’ ಯಾರು ಹುಡುಕಿ ಕೊಡ್ತೀರಿ?

Viral : ಜರ್ಮನಿಯ ಈ ಪ್ರಜೆಗೆ ಲಾಟರಿ ಹೊಡೆಯಿತು. ಅಷ್ಟಿಷ್ಟಲ್ಲ ಮಿಲಿಯನ್​ಗಟ್ಟಲೆ! ಕಾರುಗಳನ್ನು ಖರೀದಿಸಿದ, ವಾಚುಗಳನ್ನು ಖರೀದಿಸಿದ. ತನಗೆ ಬೇಕಾದ ಎಲ್ಲವನ್ನೂ ಖರೀದಿಸಿದ. ನಂತರ ಏನು? ತನ್ನೊಂದಿಗೆ ಸುಂದರವಾಗಿ ಜೀವನ ಮಾಡಲು, ಪ್ರವಾಸ ಮಾಡಲು ಯಾರಾದರೂ ಒಬ್ಬರು ಬೇಕು ಎನ್ನಿಸಿತು. ಹಾಗಾಗಿ ತನಗೊಬ್ಬಳು ಹೆಂಡತಿ ಬೇಕಲ್ಲ ಎಂದು ಈಗ ತೀವ್ರವಾಗಿ ಹುಡುಕತೊಡಗಿದ್ದಾನೆ. ಆದರೆ ಲಾಟರಿ ಹೊಡೆದಂತೆ ಒಂದೇ ಏಟಿಗೆ ಹೆಂಡತಿ ಸಿಗುವಳೇ?

ಲಾಟರಿ ಎಂದರೇ ಅದೃಷ್ಟ! ಒಮ್ಮೆ ಅದು ಹೊಡೆಯಿತು ಕನಸುಗಳು ಹೆಬ್ಬಾವಿನಂತೆ ಹೆಡೆ ಎತ್ತಿ ನಿಂತುಬಿಡುತ್ತವೆ. ಏನು ಮಾಡಲಿ ಏನು ಬಿಡಲಿ ಎಂಬ ಗೊಂದಲದಲ್ಲಿ, ಸಂತೋಷದಲ್ಲಿ, ಆವೇಗದಲ್ಲಿ ಮನುಷ್ಯ ಬಿದ್ದುಬಿಡುತ್ತಾನೆ. ಎಲ್ಲ ವಸ್ತುಗಳ ಖರೀದಿಯ ವ್ಯಾಮೋಹ ಮುಗಿದ ಮೇಲೆ ಕೊನೆಗೆ ನೆನಪಾಗುವುದು ಮನುಷ್ಯರ ಸಂಗ.

ಜರ್ಮನಿಯ ಡಾರ್ಟ್ಮಂಡ್​ನ ಕುರ್ಸಾತ್​ ಯಿಲ್ದೀರಿಮ್ ಅವಿವಾಹಿತ. ಅವ ಸೆಪ್ಟೆಂಬರ್​ನಲ್ಲಿ ಲಾಟರಿ ಮೂಲಕ ಗೆದ್ದ ಹಣ ಒಟ್ಟು ರೂ. 82 ಕೋಟಿ! ಈ ಹಣದಲ್ಲಿ ತಾನೇನು ಖರೀದಿಸಬೇಕು ಎಂದುಕೊಂಡಿದ್ದನೋ ಅದೆಲ್ಲ ಖರೀದಿಸಿಯಾಗಿದೆ. ಆದರೆ ನನಗೆ ಪ್ರೀತಿಸುವುದು ಮತ್ತು ಪ್ರಯಾಣಿಸುವುದು ಇಷ್ಟ. ನನ್ನೊಂದಿಗೆ ಮದುವೆಯಾಗಿ ಸಂಸಾರವನ್ನು ಹೂಡಲು ತಯಾರಿರುವ ಸಂಗಾತಿಯ ಹುಡುಕಾಟದಲ್ಲಿ ನಾನಿದ್ದೇನೆ ಎಂದು ಸ್ಥಳೀಯ ಪತ್ರಿಕೆಗಳಿಗೆ ತಿಳಿಸಿದ್ದಾನೆ.

ಇಷ್ಟೇ ಅಲ್ಲ ತಾನು ಮದುವೆಯಾಗಬಯಸುವ ಹುಡುಗಿ ನೋಡಲು ಸಾಧಾರಣವಾಗಿದ್ದರೆ ಸಾಕು. ಆದರೆ ಆಕೆ ನಿಷ್ಠೆಯಿಂದ ಇರಬೇಕು. ಎಂಥ ಸಂದರ್ಭ ಬಂದರೂ ಆಕೆ ತನ್ನ ಮೇಲೆ ವಿಶ್ವಾಸ ಕಳೆದಕೊಳ್ಳಬಾರದು ಎಂದಿದ್ದಾನೆ. ಇವನಿಗೆ ಈಗ ವಯಸ್ಸು 41.

ಲಾಟರಿ ಗೆದ್ದ ನಂತರ ಉಕ್ಕಿನ ಕಂಪೆನಿಯಲ್ಲಿ ಮಾಡುತ್ತಿದ್ದ ಕೆಲಸವನ್ನು ಕೈಬಿಟ್ಟಿದ್ದಾನೆ. ಅಲ್ಲದೆ, ಸಾಮಾಜಿಕ ಜಾಲತಾಣದಲ್ಲಿ ಆ ಹಣದಿಂದ ತಾನು ಆಗಾಗ್ಗೆ ಏನೇನು ಖರಿದಿಸುತ್ತಿದ್ದೇನೆ ಎನ್ನುವುದನ್ನು ಅಪ್​ಡೇಟ್ ಮಾಡುತ್ತಿರುತ್ತಾನೆ.

ನೀವೇನಾದರೂ ಇವನಿಗೆ ಹುಡುಗಿ ಹುಡುಕಿ ಕೊಡಲು ಸಹಾಯ ಮಾಡುವ ಮನಸ್ಸು ಮಾಡುತ್ತೀರೋ ಹೇಗೆ? ನಾವಂತೂ ಸಾಮಾಜಿಕ ಜಾಲತಾಣದಲ್ಲಿ ಹೆಂಡತಿ ಸಿಕ್ಕಳು! ಎಂದು ಈತ ಪೋಸ್ಟ್​ ಹಾಕುವುದನ್ನು ನೋಡಲು ಕಾಯುತ್ತಿದ್ದೇವೆ.

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ