9 ಗಂಟೆ ತಡವಾಗಿ ಬಂದ ರೈಲು; ಪ್ರಯಾಣಿಕರು ಸಂಭ್ರಮಿಸಿದ ವಿಡಿಯೋ ವೈರಲ್

Viral Video : ಅಬ್ಬಬ್ಬಾ ಎಂದರೆ ಒಂದು ತಾಸು ಕಾಯಬಹುದು ರೈಲನ್ನು. ಅದಕ್ಕಿಂತ ಹೆಚ್ಚಾದರೆ ಯಾರಿಗೂ ಬೇಸರವಾಗುತ್ತದೆ. ಆದರೆ ಆ ರೈಲು ಬಿಟ್ಟರೆ ಬೇರೆ ಮಾರ್ಗವೇ ಇಲ್ಲವೆಂದಾಗ ಕಾಯುವುದು ಅನಿವಾರ್ಯವೇ ಆಗುತ್ತದೆ. ಕಾಯ್ದು ಕಾಯ್ದು ಅಂತೂ ಕೊನೆಗೆ ರೈಲು ಬಂದಾಗ ಆಗುವ ಸಂತೋಷ ಇದೆಯಲ್ಲ, ಅನುಭವಿಸಿದವರಿಗೇ ಗೊತ್ತು. ಈಗ ವೈರಲ್ ಆಗುತ್ತಿರುವ ಈ ವಿಡಿಯೋ ನೋಡಿ. ಒಂಭತ್ತು ತಾಸುಗಳ ತನಕ ರೈಲಿಗಾಗಿ ಕಾಯ್ದ ಪ್ರಯಾಣಿಕರು, ರೈಲು ಬಂದ ನಂತರ ಸಂಭ್ರಮಿಸಿದ ಪರಿಯನ್ನು.

ನೂರಾರು ಜನರು ಪ್ಲ್ಯಾಟ್​ಫಾರ್ಮ್ ಮೇಲೆ ಈ ರೈಲಿಗಾಗಿ ಕಾಯುತ್ತಿದ್ದಾರೆ. ದೂರದಿಂದ ರೈಲು ಬರುತ್ತಿದ್ದಂತೆ ವಿಜಯೋತ್ಸಾಹದಿಂದ ಸಂಭ್ರಮಿಸಿದ್ದಾರೆ. ಈ ವಿಡಿಯೋ ಅನ್ನು ಅಲ್ಲಿದ್ದ ಪ್ರಯಾಣಿಕರೊಬ್ಬರು ಸಾಮಾಜಿಕ ಜಾಲತಾಣಕ್ಕೆ ಅಪ್​ಲೋಡ್ ಮಾಡಿದ್ದಾರೆ. 6,000ಕ್ಕಿಂತಲೂ ಹೆಚ್ಚು ಜನರು ಈ ವಿಡಿಯೋ ನೋಡಿದ್ದಾರೆ.

ಅಬ್ಬಾ ನಿಮಗೆಲ್ಲ ಇಷ್ಟೊಂದು ತಾಳ್ಮೆ ಇದೆಯಲ್ಲ ಶಭಾಷ್​ ಎಂದಿದ್ದಾರೆ ನೆಟ್ಟಿಗರು. ನಾನಾಗಿದ್ದರೆ ಖಂಡಿತ ಇಷ್ಟುಹೊತ್ತು ಕಾಯುತ್ತಲೇ ಇರಲಿಲ್ಲ ಎಂದಿದ್ದಾರೆ ಇನ್ನೊಬ್ಬರು. ಒಂದು ದಿನವೇ ವ್ಯರ್ಥವಾಯಿತಲ್ಲ ಒಂದು ರೈಲಿಗೆ ಎಂದಿದ್ದಾರೆ ಮತ್ತೊಬ್ಬರು. ಅಂತೂ ಬಂತೂ ಬಂತೂ ರೈಲು ಬಂತು ಎಂಬಂತಾಗಿದೆ.

ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?