ವಾಟ್ ಎ ಸೆಲೆಬ್ರೇಷನ್: ದೀಪೇಂದ್ರ ಸಿಂಗ್ ಪಲ್ಟಿಗೆ ಕ್ರಿಕೆಟ್ ಪ್ರೇಮಿಗಳು ಫಿದಾ

ನೇಪಾಳ ತಂಡದ ಆಟಗಾರ ದೀಪೇಂದ್ರ ಸಿಂಗ್ ಅಯಿರಿ ಅವರ ಸಂಭ್ರಮದ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ. ಹೀಗೆ ವೈರಲ್ ಆಗಲು ಕಾರಣ ಮುಖ್ಯ ಕಾರಣ ದೀಪೇಂದ್ರ ಸಿಂಗ್ ಪಲ್ಟಿ ಹೊಡೆದು ಸಂಭ್ರಮಿಸಿದರು.

ಕುವೈತ್ ವಿರುದ್ಧದ ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ನೇಪಾಳ ತಂಡವು 20 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 141 ರನ್ ಕಲೆಹಾಕಿದ್ದರು. ಈ ಗುರಿ ಬೆನ್ನತ್ತಿದ ಕುವೈತ್ ತಂಡಕ್ಕೆ ಕ್ಲಿಂಟೊ ಆ್ಯಂಟೊ ಉತ್ತಮ ಆರಂಭ ಒದಗಿಸಿದ್ದರು.

ಆರಂಭಿಕನಾಗಿ ಕಣಕ್ಕಿಳಿದ ಆ್ಯಂಟೊ 2 ಸಿಕ್ಸರ್​ಗಳೊಂದಿಗೆ 26 ರನ್ ಬಾರಿಸಿದ್ದರು. ಈ ಹಂತದಲ್ಲಿ ದಾಳಿಗಿಳಿದ ದೀಪೇಂದ್ರ ಸಿಂಗ್ ಅಯಿರಿ ಡೈರೆಕ್ಟ್ ಥ್ರೋ ಮೂಲಕ ರನೌಟ್ ಮಾಡಿ ಆ್ಯಂಟೊ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು.

ಈ ವಿಕೆಟ್ ಸಿಗುತ್ತಿದ್ದಂತೆ ಓಡಿ ಹೋದ ದೀಪೇಂದ್ರ ಸಿಂಗ್ ಅಯಿರಿ ಸಮ್ಮರ್​ಸಾಲ್ಟ್ ಹೊಡೆದು ಸಂಭ್ರಮಿಸಿದರು. ಇದೀಗ ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಭಾರೀ ಮೆಚ್ಚುಗೆಗಳು ವ್ಯಕ್ತವಾಗುತ್ತಿದೆ.

ಇನ್ನು ಈ ಪಂದ್ಯದಲ್ಲಿ ನೇಪಾಳ ತಂಡ ನೀಡಿದ 141 ರನ್​ಗಳ ಗುರಿ ಬೆನ್ನತ್ತಿದ ಕುವೈತ್ ತಂಡವು ಕೇವಲ 83 ರನ್​ಗಳಿಗೆ ಆಲೌಟ್ ಆಗಿದೆ. ಈ ಮೂಲಕ ನೇಪಾಳ ತಂಡ 58 ರನ್​ಗಳ ಭರ್ಜರಿ ಜಯ ಸಾಧಿಸಿದೆ.