ಯುವಕನ ನೃತ್ಯಕ್ಕೆ ಮರುಳಾದ ಗಜರಾಜ! ಕಾಡಾನೆಯೂ ಹೆಜ್ಜೆ ಹಾಕಿದ ಅಪರೂಪದ ದೃಶ್ಯ
Updated on: Mar 27, 2026 | 5:42 PM
ಒಡಿಶಾದಲ್ಲಿ ಯುವಕನೊಬ್ಬ ಆನೆಯೊಂದಿಗೆ ನೃತ್ಯ ಮಾಡಿದ ಮನಮೋಹಕ ವಿಡಿಯೋ ವೈರಲ್ ಆಗಿದೆ. ಕಿಯೋಂಜರ್ ಜಿಲ್ಲೆಯಲ್ಲಿ ನಡೆದ ಈ ಘಟನೆಯಲ್ಲಿ, ಯುವಕನ ಪ್ರೀತಿಯ ಕರೆಗೆ ಆನೆಯು ತಲೆಯಾಡಿಸಿ, ಹೆಜ್ಜೆ ಹಾಕಿದೆ. ಮಾನವ-ಪ್ರಾಣಿ ಸಂಘರ್ಷದ ಸುದ್ದಿಗಳ ನಡುವೆ ಈ ವೀಡಿಯೊ ಅಚ್ಚರಿಯ ಬಾಂಧವ್ಯವನ್ನು ಎತ್ತಿ ತೋರಿಸುತ್ತದೆ. ಪ್ರೀತಿಗೆ ಪ್ರಾಣಿಗಳೂ ಸ್ಪಂದಿಸುತ್ತವೆ ಎಂಬ ಸಂದೇಶ ನೀಡುವ ಈ ದೃಶ್ಯ ಲಕ್ಷಾಂತರ ವೀಕ್ಷಣೆಗಳನ್ನು ಗಳಿಸಿದೆ.
ಒಡಿಶಾ, ಮಾ.27: ಇತ್ತೀಚಿನ ದಿನಗಳಲ್ಲಿ ಮಾನವ ಮತ್ತು ಪ್ರಾಣಿಗಳ ನಡುವಿನ ಸಂಘರ್ಷದ ಸುದ್ದಿಗಳೇ ಹೆಚ್ಚಾಗಿ ಕೇಳಿಬರುತ್ತಿವೆ. ಆದರೆ, ಇದರ ನಡುವೆ ಮನುಷ್ಯ ಮತ್ತು ಆನೆಯ ನಡುವಿನ ಅಚ್ಚರಿಯ ಬಾಂಧವ್ಯವನ್ನು ಸಾರುವ ವೀಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ಯುವಕನೊಬ್ಬನ ನೃತ್ಯವನ್ನು ಕಂಡ ಕಾಡಾನೆಯೊಂದು, ಅಷ್ಟೇ ಪ್ರೀತಿಯಿಂದ ಪ್ರತಿಕ್ರಿಯಿಸಿ ತಾನೂ ಹೆಜ್ಜೆ ಹಾಕಿರುವ ಮನಮೋಹಕ ದೃಶ್ಯವಿದು. ಒಡಿಶಾದ ಕಿಯೋಂಜರ್ ಜಿಲ್ಲೆಯ ಚಂಪುಆ ಎಂಬಲ್ಲಿ ಈ ಘಟನೆ ನಡೆದಿದೆ ಎಂದು ಹೇಳಲಾಗುತ್ತಿದೆ. ರಸ್ತೆಯ ಪಕ್ಕದಲ್ಲಿ ನಿಂತಿದ್ದ ಒಂಟಿ ಸಲಗವೊಂದರ ಮುಂದೆ ಯುವಕನೊಬ್ಬ ಆನಂದದಿಂದ ನೃತ್ಯ ಮಾಡಲು ಶುರು ಮಾಡುತ್ತಾನೆ. ಆನೆಯನ್ನು ‘ರಾಜು’ ಎಂದು ಪ್ರೀತಿಯಿಂದ ಕರೆಯುತ್ತಾ, ಕೈಮುಗಿದು ನಮಸ್ಕರಿಸಿ ಕುಣಿಯುತ್ತಾನೆ. ಆರಂಭದಲ್ಲಿ ಯುವಕನನ್ನು ಶಾಂತವಾಗಿ ಗಮನಿಸುತ್ತಿದ್ದ ಆನೆ, ಕೆಲವೇ ಕ್ಷಣಗಳಲ್ಲಿ ಆತನ ನೃತ್ಯದ ತಾಳಕ್ಕೆ ತಕ್ಕಂತೆ ತನ್ನ ತಲೆ ಮತ್ತು ದೇಹವನ್ನು ಆಡಿಸುತ್ತಾ ‘ಡ್ಯಾನ್ಸ್’ ಮಾಡಿದೆ. ಈ ಅಪರೂಪದ ಜುಗಲ್ಬಂದಿಯನ್ನು ಕಂಡ ಸ್ಥಳೀಯರು ಅಚ್ಚರಿಗೊಂಡಿದ್ದಾರೆ. ಯಾವುದೇ ಹಿಂಸೆ ಅಥವಾ ಭಯವಿಲ್ಲದೆ ಆನೆಯು ಅತ್ಯಂತ ಶಾಂತವಾಗಿ ಮತ್ತು ಖುಷಿಯಿಂದ ಪ್ರತಿಕ್ರಿಯಿಸಿದ್ದು ನೋಡುಗರ ಮನ ಗೆದ್ದಿದೆ.”ಸಂತೋಷ ಎಂಬುದು ಸಾಂಕ್ರಾಮಿಕ” ಎಂಬುದಕ್ಕೆ ಈ ವೀಡಿಯೊ ಸಾಕ್ಷಿಯಾಗಿದೆ. “ಪ್ರೀತಿ ನೀಡಿದರೆ ಪ್ರಾಣಿಗಳೂ ಸ್ಪಂದಿಸುತ್ತವೆ” ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ. ಈ ವೀಡಿಯೊ ಲಕ್ಷಾಂತರ ವೀಕ್ಷಣೆಗಳನ್ನು ಗಳಿಸಿದ್ದು, ಇಂದಿನ ಒತ್ತಡದ ಬದುಕಿನಲ್ಲಿ ಒಂದು ರೀತಿಯ ನೆಮ್ಮದಿ ನೀಡುವ ದೃಶ್ಯವಾಗಿದೆ.
ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
