ಕನ್ನಡಿಗರ ಕ್ಷಮೆ ಕೇಳಿದ ಗಾಯಕ ಸೋನು ನಿಗಮ್; ಕರವೇ ನಾರಾಯಣ ಗೌಡ ಪ್ರತಿಕ್ರಿಯೆ

ಕನ್ನಡಿಗರ ಮನಸ್ಸಿಗೆ ನೋವಾಗುವ ರೀತಿಯಲ್ಲಿ ಮಾತನಾಡಿದ್ದ ಸೋನು ನಿಗಮ್ ಅವರಿಗೆ ಕನ್ನಡಪರ ಸಂಘಟನೆಗಳು ವಿರೋಧ ವ್ಯಕ್ತಪಡಿಸಿದ್ದವು. ಈಗ ಸೋನು ನಿಗಮ್ ಅವರು ವಿಡಿಯೋ ಮೂಲಕ ಕ್ಷಮೆ ಕೇಳಿದ್ದಾರೆ. ‘ನನ್ನ ಪ್ರೀತಿಯ ಕನ್ನಡಿಗರೇ.. ಸತ್ಯ ಏನೆಂಬುದು ನನಗೆ ಮತ್ತು ದೇವರಿಗೆ ತಿಳಿದಿದೆ. ನಾರಾಯಣ ಗೌಡ ಅವರ ಜೊತೆ ನಾನು ಮಾತನಾಡಿದೆ. ಜನರನ್ನು ನೀವು ಪ್ರೀತಿಸುವುದಾದರೆ ಸಾವಿರ ಬಾರಿ ಕ್ಷಮೆ ಕೇಳಲು ನೀವು ಹಿಂಜರಿಯುವುದಿಲ್ಲ. ನನ್ನ ಹೇಳಿಕೆಯಿಂದ ನಿಮಗೆ ತೊಂದರೆ ಆಗಿದ್ದರೆ ನಾನು ಕ್ಷಮೆ ಕೇಳುತ್ತೇನೆ. ದಯವಿಟ್ಟು ನನ್ನನ್ನು ಕ್ಷಮಿಸಿ. ಕಳೆದ 30 ವರ್ಷಗಳಿಂದ ನೀವು ನನಗೆ ಸಾಕಷ್ಟು ಪ್ರೀತಿ, ಗೌರವ ನೀಡಿದ್ದೀರಿ. ಆ ಸಂಬಂಧ ಹಾಳಾಗುವುದು ನನಗೆ ಇಷ್ಟವಿಲ್ಲ’ ಎಂದು ಸೋನು ನಿಗಮ್ ಅವರು ಹೇಳಿದ್ದಾರೆ. ಈ ಬಗ್ಗೆ ಕರ್ನಾಟಕ ರಕ್ಷಣಾ ವೇದಿಕೆಯ ನಾರಾಯಣ ಗೌಡ ಅವರು ಪ್ರತಿಕ್ರಿಯೆ ನೀಡಿದ್ದಾರೆ. ‘ನಾವು ಕನ್ನಡಿಗರು ಶಾಂತಿಪ್ರಿಯರು, ಹೃದಯವಂತರು. ಕ್ಷಮೆಗಿಂತ ಬೇರೆ ಏನೂ ಹುಡುಕಲು ಸಾಧ್ಯವಿಲ್ಲ. ನಾನು ಒಬ್ಬ ಸಂಗೀತಪ್ರೇಮಿ. ಸೋನು ನಿಗಮ್ ಅವರ ಕನ್ನಡದ ಹಾಡುಗಳು ನನಗೆ ಇಷ್ಟ. ಆದರೆ ಆ ಒಂದು ವರ್ತನೆಯಿಂದ ನನಗೆ ಬೇಸರ ಆಗಿತ್ತು. ಹಾಗಾಗಿ ಕ್ಷಮೆ ಕೇಳಲೇಬೇಕು ಎಂದು ಪಟ್ಟು ಹಿಡಿದಿದ್ದೆ. ಆದರೆ ಈಗ ಅವರು ಕ್ಷಮೆ ಕೇಳಿದ್ದಾರೆ. ಅದನ್ನು ಮತ್ತೆ ಮುಂದುವರಿಸುವುದರಲ್ಲಿ ಅರ್ಥ ಇಲ್ಲ’ ಎಂದು ನಾರಾಯಣ ಗೌಡ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.