ನಮ್ಮ ಹಾಗೂ ಇರಾನ್ ವ್ಯಾಪಾರದಲ್ಲಿ ಅಮೆರಿಕ ಮೂಗು ತೂರಿಸಬೇಡಿ: ಟ್ರಂಪ್ ಆರ್ಥಿಕ ನಿರ್ಬಂಧಗಳಿಗೆ ಚೀನಾ ಖಡಕ್ ಎಚ್ಚರಿಕೆ

ಬೀಜಿಂಗ್, ಆಗಸ್ಟ್​ 26: ಇರಾನ್(Iran) ದೇಶವನ್ನು ಜಾಗತಿಕ ಆರ್ಥಿಕ ವ್ಯವಸ್ಥೆಯಿಂದ ಸಂಪೂರ್ಣವಾಗಿ ಪ್ರತ್ಯೇಕಿಸಲು ಅಮೆರಿಕ ಘೋಷಿಸಿರುವ ‘ಆಪರೇಷನ್ ಎಕನಾಮಿಕ್ ಔಟ್‌ಕಾಸ್ಟ್’ ವಿರುದ್ಧ ಚೀನಾ ತೀವ್ರ ಆಕ್ರೋಶ ಹೊರಹಾಕಿದೆ. ಇರಾನ್ ಜೊತೆ ವ್ಯಾಪಾರ ನಡೆಸುವ ದೇಶಗಳ ಮೇಲೂ ‘ದ್ವಿತೀಯ ನಿರ್ಬಂಧ’ ಹೇರುವುದಾಗಿ ಅಮೆರಿಕ ಎಚ್ಚರಿಸಿದ ಬೆನ್ನಲ್ಲೇ, ಚೀನಾ ತನ್ನ ಸಾರ್ವಭೌಮ ಆರ್ಥಿಕ ಹಿತಾಸಕ್ತಿಗಳನ್ನು ರಕ್ಷಿಸಿಕೊಳ್ಳುವುದಾಗಿ ಸ್ಪಷ್ಟಪಡಿಸಿದೆ.

ಚೀನಾ ವಿದೇಶಾಂಗ ಸಚಿವಾಲಯದ ವಕ್ತಾರ ಲಿನ್ ಜಿಯಾನ್ ಮಾತನಾಡಿ, ಅಮೆರಿಕದ ಏಕಪಕ್ಷೀಯ ನಿರ್ಬಂಧಗಳು ಕಾನೂನುಬಾಹಿರವಾಗಿದ್ದು, ಇರಾನ್-ಚೀನಾ ನಡುವಿನ ದ್ವಿಪಕ್ಷೀಯ ಸಹಕಾರದಲ್ಲಿ ಅಮೆರಿಕ ಮಧ್ಯಪ್ರವೇಶಿಸುವುದನ್ನು ನಿಲ್ಲಿಸಬೇಕು ಎಂದು ಆಗ್ರಹಿಸಿದ್ದಾರೆ.

ಅಮೆರಿಕದ ಆರ್ಥಿಕ ಡಿ-ಡೇ ತಂತ್ರ

ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಪ್ರಕಾರ, ಇರಾನ್‌ನ ಡಿಜಿಟಲ್ ಸ್ವತ್ತುಗಳು, ತಂತ್ರಜ್ಞಾನ, ಚಿನ್ನ, ವಾಯುಯಾನ ಹಾಗೂ ಹಡಗು ಸಾರಿಗೆಯನ್ನು ಜಾಗತಿಕ ಡಾಲರ್ ಮಾರುಕಟ್ಟೆಯಿಂದ ಹೊರಗಿಡುವುದು ಈ ಕಾರ್ಯಾಚರಣೆಯ ಮುಖ್ಯ ಉದ್ದೇಶವಾಗಿದೆ.

ಇರಾನ್ ಜೊತೆ ವ್ಯಾಪಾರ ಸಂಬಂಧ ಮುಂದುವರಿಸಿದರೆ ಚೀನಾ, ಭಾರತ, ಯುಎಇ, ಟರ್ಕಿ, ಇರಾಕ್, ಪಾಕಿಸ್ತಾನ ಮತ್ತು ರಷ್ಯಾ ದೇಶಗಳ ಸಂಸ್ಥೆಗಳ ಮೇಲೂ ಅಮೆರಿಕದ ದಂಡನಾತ್ಮಕ ನಿರ್ಬಂಧಗಳು ಬೀಳುವ ಸಾಧ್ಯತೆಯಿದೆ.

ಮತ್ತಷ್ಟು ಓದಿ: ಹಾರ್ಮುಜ್ ಜಲಮಾರ್ಗ ಬಿಕ್ಕಟ್ಟು ತೀವ್ರ, ಜಾಗತಿಕ ತೈಲ ಸಾಗಣೆ ಸಂಪೂರ್ಣ ಸ್ಥಗಿತಗೊಳಿಸುವ ಬೆದರಿಕೆ ಹಾಕಿದ ಇರಾನ್

ಇರಾನ್ ತೈಲಕ್ಕೆ ಚೀನಾವೇ ಪ್ರಮುಖ ಆಸರೆ

ಶೇ. 90ರಷ್ಟು ತೈಲ ಖರೀದಿ: ಅಮೆರಿಕದ ಲೆಕ್ಕಾಚಾರದ ಪ್ರಕಾರ, ಇರಾನ್ ರಫ್ತು ಮಾಡುವ ಒಟ್ಟು ಕಚ್ಚಾ ತೈಲದಲ್ಲಿ ಸುಮಾರು 90 ಪ್ರತಿಶತವನ್ನು ಚೀನಾವೇ ಖರೀದಿಸುತ್ತದೆ.

ಪರ್ಯಾಯ ಪಾವತಿ ವ್ಯವಸ್ಥೆ: ಕೆಪ್ಲರ್ (Kpler) ಸಂಸ್ಥೆಯ ವರದಿ ಪ್ರಕಾರ, ಚೀನಾದ ಸ್ವತಂತ್ರ ಸಂಸ್ಕರಣಾಗಾರಗಳು ದಿನಕ್ಕೆ ಸರಾಸರಿ 1.38 ಮಿಲಿಯನ್ ಬ್ಯಾರೆಲ್ ಇರಾನಿ ತೈಲವನ್ನು ಮಲೇಷಿಯಾ ಅಥವಾ ಇಂಡೋನೇಷ್ಯಾದ ಮಾರ್ಗಗಳ ಮೂಲಕ ಮತ್ತು ಡಾಲರ್ ರಹಿತ ಪರ್ಯಾಯ ಕರೆನ್ಸಿ ಬಳಸಿ ಆಮದು ಮಾಡಿಕೊಳ್ಳುತ್ತಿವೆ.

ಅಮೆರಿಕವು ಡಾಲರ್ ಅನ್ನು ರಾಜತಾಂತ್ರಿಕ ಅಸ್ತ್ರವನ್ನಾಗಿ ಬಳಸುತ್ತಿರುವುದಕ್ಕೆ ಪ್ರತಿಯಾಗಿ, ಚೀನಾ ಮತ್ತು ರಷ್ಯಾ ನೇತೃತ್ವದ ಬ್ರಿಕ್ಸ್ (BRICS) ಒಕ್ಕೂಟವು ಡಾಲರ್ ಮೇಲಿನ ಅವಲಂಬನೆ ಕಡಿಮೆ ಮಾಡಲು ಸ್ಥಳೀಯ ಕರೆನ್ಸಿ ಪಾವತಿ ಜಾಲವನ್ನು ಇನ್ನಷ್ಟು ಬಲಪಡಿಸುತ್ತಿವೆ.

ಜಾಗತಿಕ ತೈಲ ಬೆಲೆ ಏರಿಕೆಯ ಭೀತಿ: ಚೀನಾದ ಸಂಸ್ಕರಣಾಗಾರಗಳ ಮೇಲೆ ಅಮೆರಿಕ ಸಂಪೂರ್ಣ ನಿರ್ಬಂಧ ಹೇರಿದರೆ, ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಪೂರೈಕೆ ಕೊರತೆ ಉಂಟಾಗಿ ಬ್ಯಾರೆಲ್ ಬೆಲೆ ದಿಢೀರ್ ಗಗನಕ್ಕೇರುವ ಆತಂಕ ಜಾಗತಿಕ ಆರ್ಥಿಕತೆಯನ್ನು ಕಾಡುತ್ತಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ