Megha Rajagopalan: ಮೇಘಾ ರಾಜಗೋಪಾಲನ್​ ಗ್ರಂಥಿಗೆ ಈ ಬಾರಿಯ ಪುಲಿಟ್ಜರ್​ ಪ್ರಶಸ್ತಿ ಗೌರವ

ಲಂಡನ್: ಅಂತಾರಾಷ್ಟ್ರೀಯ ವರದಿಗಾರಿಕೆಯಲ್ಲಿ ಅತ್ಯುನ್ನತ ವೃತ್ತಿಪರತೆ ಸಾಧಿಸಿ ತೋರಿಸಿರುವ ತಮಿಳು ಮೂಲದ ಮೇಘಾ ರಾಜಗೋಪಾಲನ್​ ಗ್ರಂಥಿಗೆ ಈ ಬಾರಿಯ ಪುಲಿಟ್ಜರ್​ ಪ್ರಶಸ್ತಿ (Pulitzer prize 2021 ) ದಕ್ಕಿದೆ. ಮೇಘಾ ರಾಜಗೋಪಾಲನ್​ (Megha Rajagopalan GRANTEE) ಪ್ರಸ್ತುತ ಲಂಡನ್​ನಲ್ಲಿ ನೆಲೆಸಿದ್ದು, ಬಜ್​ಫೀಡ್​ ನ್ಯೂಸ್ (BuzzFeed News)​ ಸುದ್ದಿ ಸಂಸ್ಥೆಯಲ್ಲಿ ವರದಿಗಾರ್ತಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಚೀನಾ, ಥಾಯ್ಲೆಂಡ್, ಇಸ್ರೇಲ್ ಮತ್ತು ಪ್ಯಾಲೆಸ್ತೀನ್ ಪ್ರಾಂತ್ಯಗಳಲ್ಲಿಯೂ ಮೇಘಾ, ಈ ಹಿಂದೆ ಬಜ್​ಫೀಡ್​ ನ್ಯೂಸ್ ಸಂಸ್ಥೆಗಾಗಿ ಸೇವೆ ಸಲ್ಲಿಸಿದ್ದಾರೆ.​ ​ಅದಕ್ಕೂ ಮೊದಲು ಚೀನಾದಲ್ಲಿ ರಾಯ್ಟರ್ಸ್​ ಸುದ್ದಿ ಸಂಸ್ಥೆಗಾಗಿ ರಾಜಕೀಯ ವರದಿಗಾರರಾಗಿ ದುಡಿದಿದ್ದಾರೆ. 

ಏಷ್ಯಾ ಮತ್ತು ಮಧ್ಯ ಪ್ರಾಚ್ಯದ 23 ರಾಷ್ಟ್ರಗಳಲ್ಲಿ ಮೇಘಾ ರಾಜಗೋಪಾಲನ್​ ಗ್ರಂಥಿ ಉತ್ತರ ಕೊರಿಯಾದ ಅಣು ಬಿಕ್ಕಟ್ಟು, ಅಫಘಾನಿಸ್ತಾನದಲ್ಲಿನ ಶಾಂತಿ ಪ್ರಕ್ರಿಯೆ ಸೇರಿದಂತೆ ಅನೇಕ ಪ್ರಮುಖ ವಿಷಯಗಳ ಬಗ್ಗೆ ವರದಿ ಮಾಡಿದ್ದಾರೆ. ಚೀನಾದ ಪಶ್ಚಿಮ ತುದಿಯಲ್ಲಿರುವ ಉಘುರ್​ ಮುಸಲ್ಮಾನರ ತಡೆ ಶಿಬಿರಗಳಿಗೆ (internment camp) ಭೇಟಿ ನೀಡಿದ ಮೊದಲ ಪತ್ರಕರ್ತೆ ಮೇಘಾ ರಾಜಗೋಪಾಲನ್. ಅದಕ್ಕಾಗಿ ಅವರಿಗೆ 2018ನೇ ಸಾಲಿನ ಮಾನವ ಹಕ್ಕುಗಳ ಮಾಧ್ಯಮ ಪ್ರಶಸ್ತಿ ನೀಡಲಾಯಿತು.

ಇನ್ನು, ಫೇಸ್​ಬುಕ್​ ಮತ್ತು ಶ್ರೀಲಂಕಾದ ಧಾರ್ಮಿಕ ಹಿಂಸಾಚಾರ ನಡುವಣ ಸಂಪರ್ಕಗಳನ್ನು ಪತ್ತೆ ಹಚ್ಚಿದ ತನಿಖಾ ಪತ್ರಿಕೋದ್ಯಮಿ ಮೇಘಾ ರಾಜಗೋಪಾಲನ್. 2019ರಲ್ಲಿ ಅವರಿಗೆ ಮಿರರ್​ ಅವಾರ್ಡ್​ನಿಂದ ಗೌರವಿಸಲಾಯಿತು. ಬೀಜಿಂಗ್​ನಲ್ಲಿ ಫುಲ್​ಬ್ರೈಟ್​ ಫೆಲೋ ಆಗಿದ್ದ ಮೇಘಾ ರಾಜಗೋಪಾಲನ್ ವಾಷಿಂಗ್ಟನ್​ ಡಿಸಿಯಲ್ಲಿ ರೀಸರ್ಚ್​​ ಫೆಲೋ ಆಗಿದ್ದರು. ತಮಿಳು ಮತ್ತು ಮ್ಯಾಂಡರಿನ್​  (Mandarin Chinese)​ ಚೀನೀ ಭಾಷೆಗಳನ್ನು ಅವರು ಕರಗತ ಮಾಡಿಕೊಂಡಿದ್ದಾರೆ. ಬಜ್​ಫೀಡ್​ ನ್ಯೂಸ್   ಸುದ್ದಿ ಸಂಸ್ಥೆಯ ಇನ್ನೂ ಇಬ್ಬರ ಜೊತೆ  ಮೇಘಾ ರಾಜಗೋಪಾಲನ್​ ಈ ಬಾರಿಯ ಪುಲಿಟ್ಜರ್​ ಪ್ರಶಸ್ತಿಯನ್ನು ಹಂಚಿಕೊಂಡಿದ್ದಾರೆ.

(Excellent journalism Megha Rajagopalan Grantee of BuzzFeed News based in London awarded the 2021 pulitzer prize in international reporting)
Puri Rath Yatra 2021: ಕೊರೊನಾದ್ದೇ ಪ್ರತಾಪ… ಪುರಿ ಜಗನ್ನಾಥ ರಥ ಯಾತ್ರೆ ಈ ಬಾರಿಯೂ ಭಕ್ತರಿಲ್ಲದೆ ಭಣಗುಡಲಿದೆ!