ಯಾರಿಗೂ ಸಿಗದ 61 ಮ್ಯಾಜಿಕ್ ನಂಬರ್: ಅತಂತ್ರ ಸಂಸತ್ತಿನತ್ತ ಇಸ್ರೇಲ್, ನೆತನ್ಯಾಹು ಹಾಗೂ ಐಸೆನ್‌ಕೋಟ್ ಬಣಗಳಿಗೆ ಬಹುಮತದ ಕೊರತೆ

ಜೆರುಸಲೇಂ, ಅಕ್ಟೋಬರ್ 28: ಇಸ್ರೇಲ್ ಸಾರ್ವತ್ರಿಕ ಚುನಾವಣೆಯ ಮತದಾನೋತ್ತರ ಸಮೀಕ್ಷೆಗಳು ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಮೈತ್ರಿಕೂಟ ಮತ್ತು ವಿರೋಧ ಪಕ್ಷಗಳ ನಡುವೆ ತೀವ್ರ ಪೈಪೋಟಿ ಇರುವುದನ್ನು ಸೂಚಿಸಿವೆ. 120 ಸ್ಥಾನಗಳ ಸಂಸತ್ತಿನಲ್ಲಿ ಸರ್ಕಾರ ರಚಿಸಲು ಬೇಕಾದ 61 ಸ್ಥಾನಗಳನ್ನು ಯಾವುದೇ ಬಣ ಸ್ಪಷ್ಟವಾಗಿ ಪಡೆಯುವ ಸಾಧ್ಯತೆ ಕಂಡುಬಂದಿಲ್ಲ. ಹೀಗಾಗಿ, ಇಸ್ರೇಲ್‌ನಲ್ಲಿ ಮುಂದಿನ ಸರ್ಕಾರ ಯಾರ ನೇತೃತ್ವದಲ್ಲಿ ರಚನೆಯಾಗಲಿದೆ ಎಂಬ ಕುತೂಹಲ ಹೆಚ್ಚಾಗಿದೆ.

ಈ ಚುನಾವಣೆಯು ಇಸ್ರೇಲ್‌ನ ರಾಜಕೀಯ ಭವಿಷ್ಯಕ್ಕೆ ಮಹತ್ವದ್ದಾಗಿದೆ. 2023ರ ಅಕ್ಟೋಬರ್ 7ರಂದು ಹಮಾಸ್ ನಡೆಸಿದ ದಾಳಿ, ಗಾಜಾದಲ್ಲಿ ಮುಂದುವರಿದ ಸಂಘರ್ಷ ಮತ್ತು ಇರಾನ್ ಜೊತೆಗಿನ ಉದ್ವಿಗ್ನತೆಯ ಹಿನ್ನೆಲೆಯಲ್ಲಿ ಮತದಾನ ನಡೆದಿದೆ. ಈ ಪರಿಸ್ಥಿತಿಯಲ್ಲಿ ದೇಶದ ಭದ್ರತೆ, ಯುದ್ಧ ನಿರ್ವಹಣೆ ಮತ್ತು ಸರ್ಕಾರದ ನೀತಿಗಳ ಬಗ್ಗೆ ಮತದಾರರ ಅಭಿಪ್ರಾಯ ಚುನಾವಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ನೆತನ್ಯಾಹು ಅವರ ಮೈತ್ರಿಕೂಟಕ್ಕೆ ಹಿನ್ನಡೆಯಾಗಲು ಹಲವು ಕಾರಣಗಳಿವೆ ಎಂದು ರಾಜಕೀಯ ವಿಶ್ಲೇಷಣೆಗಳು ಸೂಚಿಸುತ್ತವೆ.

ಅಲ್ಟ್ರಾ-ಆರ್ಥೊಡಾಕ್ಸ್ ಯಹೂದಿ ಸಮುದಾಯದ ಧಾರ್ಮಿಕ ವಿದ್ಯಾರ್ಥಿಗಳಿಗೆ ಕಡ್ಡಾಯ ಸೇನಾ ಸೇವೆಯಿಂದ ವಿನಾಯಿತಿ ನೀಡುವ ವಿಚಾರ ವಿವಾದಕ್ಕೆ ಕಾರಣವಾಗಿದೆ. ಯುದ್ಧದ ಸಮಯದಲ್ಲಿ ಇತರ ಯುವಕರು ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿರುವಾಗ, ಒಂದು ಸಮುದಾಯಕ್ಕೆ ವಿನಾಯಿತಿ ನೀಡುವುದು ಸರಿಯಲ್ಲ ಎಂಬ ಅಸಮಾಧಾನ ಕೆಲವು ಮತದಾರರಲ್ಲಿ ವ್ಯಕ್ತವಾಗಿದೆ. 2023ರ ಹಮಾಸ್ ದಾಳಿಯ ವೇಳೆ ಉಂಟಾದ ಭದ್ರತಾ ವೈಫಲ್ಯದ ಬಗ್ಗೆಯೂ ಸರ್ಕಾರ ಟೀಕೆ ಎದುರಿಸಿದೆ.

ಸರ್ಕಾರ ರಚನೆಯ ಲೆಕ್ಕಾಚಾರದಲ್ಲಿ ಅರಬ್ ಪಕ್ಷಗಳ ಪಾತ್ರವೂ ನಿರ್ಣಾಯಕವಾಗುವ ಸಾಧ್ಯತೆಯಿದೆ. ಮತದಾನೋತ್ತರ ಸಮೀಕ್ಷೆಗಳ ಪ್ರಕಾರ, ಅರಬ್ ಪಕ್ಷಗಳು ಒಟ್ಟಾಗಿ 17ರಿಂದ 18 ಸ್ಥಾನಗಳನ್ನು ಗೆಲ್ಲಬಹುದು. ವಿರೋಧ ಪಕ್ಷಗಳ ಬಣಕ್ಕೆ ಬಹುಮತ ತಲುಪಲು ಈ ಪಕ್ಷಗಳ ಬೆಂಬಲ ಅಗತ್ಯವಾಗಬಹುದು. ಆದರೆ, ಅರಬ್ ಪಕ್ಷಗಳೊಂದಿಗೆ ಮೈತ್ರಿ ಮಾಡಿಕೊಳ್ಳುವ ವಿಚಾರದಲ್ಲಿ ವಿರೋಧ ಪಕ್ಷಗಳಲ್ಲೇ ಭಿನ್ನಾಭಿಪ್ರಾಯಗಳಿವೆ.

ಹಮಾಸ್ ದಾಳಿ, ಗಾಜಾ ಸಂಘರ್ಷ ಮತ್ತು ಇರಾನ್ ಜೊತೆಗಿನ ಉದ್ವಿಗ್ನತೆಯ ಬಳಿಕ ನಡೆದ ಮೊದಲ ಸಾರ್ವತ್ರಿಕ ಚುನಾವಣೆ ಇದಾಗಿದ್ದು, ನೆತನ್ಯಾಹು ಅವರ ಬಲಪಂಥೀಯ ಒಕ್ಕೂಟದ ಭವಿಷ್ಯ ಅತಂತ್ರ ಸ್ಥಿತಿಗೆ ತಲುಪಿದೆ.2023ರ ಅಕ್ಟೋಬರ್ 7 ರ ಗುಪ್ತಚರ ವೈಫಲ್ಯ, ನಿರಂತರ ಯುದ್ಧದಿಂದ ಕುಸಿದಿರುವ ಆರ್ಥಿಕತೆ ಮತ್ತು ತೀವ್ರ ಬಲಪಂಥೀಯ ಪಕ್ಷಗಳೊಂದಿಗೆ ಮಾಡಿಕೊಂಡಿದ್ದ ಮೈತ್ರಿ ನೆತನ್ಯಾಹು ಅವರ ವರ್ಚಸ್ಸಿಗೆ ಭಾರಿ ಹೊಡೆತ ನೀಡಿದೆ.

ಅರಬ್ ಪಕ್ಷಗಳ ಪಾತ್ರ: ಐಸೆನ್‌ಕೋಟ್ ಬಣ ಸರ್ಕಾರ ರಚಿಸಬೇಕಾದರೆ ಸುಮಾರು 18 ಸ್ಥಾನಗಳನ್ನು ಗೆಲ್ಲುವ ಮುನ್ಸೂಚನೆ ಹೊಂದಿರುವ ಅರಬ್ ಒಕ್ಕೂಟದ ಪಕ್ಷಗಳ ಬೆಂಬಲ ಅನಿವಾರ್ಯ. ಆದರೆ, ಅರಬ್ ಪಕ್ಷಗಳೊಂದಿಗೆ ಕೈಜೋಡಿಸುವುದು ಇಸ್ರೇಲ್‌ನ ಇತರ ಮಧ್ಯಮ-ಬಲಪಂಥೀಯ ವಿರೋಧ ಪಕ್ಷಗಳಿಗೆ ರಾಜಕೀಯವಾಗಿ ಮುಜುಗರ ತರಬಹುದು.

ಇದನ್ನೂ ಓದಿ: ಇಸ್ರೇಲ್ ವಿರೋಧಿ ಧೋರಣೆಯ ಅಮೆರಿಕ ಅಧ್ಯಕ್ಷ ಅಧಿಕಾರಕ್ಕೇರುವ ಸಾಧ್ಯತೆ: ಭಾರತದೊಂದಿಗೆ ಹೊಸ ಮೈತ್ರಿಗೆ ನೆತನ್ಯಾಹು ಕರೆ

ಹಂಗಾಮಿ ಪ್ರಧಾನಿಯಾಗಿ ನೆತನ್ಯಾಹು: ಮುಂದಿನ 24 ರಿಂದ 48 ಗಂಟೆಗಳಲ್ಲಿ ಅಂತಿಮ ಫಲಿತಾಂಶಗಳು ಪ್ರಕಟವಾಗಲಿದ್ದು, ಅಲ್ಲಿಯವರೆಗೆ ಬೆಂಜಮಿನ್ ನೆತನ್ಯಾಹು ಅವರೇ ಹಂಗಾಮಿ ಪ್ರಧಾನಿಯಾಗಿ ಮುಂದುವರಿಯಲಿದ್ದಾರೆ. ಅಧ್ಯಕ್ಷ ಐಸಾಕ್ ಹರ್ಜೋಗ್ ಅವರು ಸರ್ಕಾರ ರಚಿಸಲು ಅವಕಾಶ ನೀಡಿದ ಬಳಿಕವೂ ಯಾವುದೇ ನಾಯಕರಿಗೆ 61 ಸಂಸದರ ಬೆಂಬಲ ಸಾಬೀತುಪಡಿಸಲು ಸಾಧ್ಯವಾಗದಿದ್ದರೆ, ಇಸ್ರೇಲ್ ಮತ್ತೊಂದು ಸುತ್ತಿನ ಚುನಾವಣೆಯನ್ನು ಎದುರಿಸಬೇಕಾಗಬಹುದು.

ನಾಯಕರ ತಕ್ಷಣದ ಪ್ರತಿಕ್ರಿಯೆ ಗಾಡಿ ಐಸೆನ್‌ಕೋಟ್: ಎಕ್ಸಿಟ್ ಪೋಲ್ ಹೊರಬಿದ್ದ ಬೆನ್ನಲ್ಲೇ ಮಾತನಾಡಿದ ಮಾಜಿ ಮಿಲಿಟರಿ ಮುಖ್ಯಸ್ಥ ಗಾಡಿ ಐಸೆನ್‌ಕೋಟ್, “ಇಸ್ರೇಲ್ ಜನತೆಗೆ ನೆತನ್ಯಾಹು ನಾಯಕತ್ವದ ಮೇಲೆ ವಿಶ್ವಾಸವಿಲ್ಲ ಎಂಬುದು ಸಮೀಕ್ಷೆಗಳಿಂದ ಸ್ಪಷ್ಟವಾಗಿದೆ. ದೇಶಕ್ಕೆ ಹೊಸ ಮತ್ತು ಜವಾಬ್ದಾರಿಯುತ ಸರ್ಕಾರ ನೀಡಲು ತಕ್ಷಣವೇ ಹೆಜ್ಜೆ ಇಡುತ್ತೇನೆ” ಎಂದಿದ್ದಾರೆ.ಅಧಿಕೃತ ಅಂತಿಮ ಮತ ಎಣಿಕೆ ಹಾಗೂ ಸೈನಿಕರ ಬ್ಯಾಲಟ್ ಮತಗಳುಎಣಿಕೆಯಾಗುವವರೆಗೂ ಕಾಯುವಂತೆ ನೆತನ್ಯಾಹು ಬೆಂಬಲಿಗರಿಗೆ ಸೂಚಿಸಲಾಗಿದ್ದು, ಲಿಕುಡ್ ಪಕ್ಷದ ಮುಖಂಡರು ಸದ್ಯಕ್ಕೆ ಯಾವುದೇ ಆತುರದ ಹೇಳಿಕೆಗಳನ್ನು ನೀಡಿಲ್ಲ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ