30 ಕೋಟಿ ಪ್ರತಿಗಳ ಮಾರಾಟ, ರಾಜಕೀಯ, ಜೈಲು ವಾಸ: ಅಂತಿಮ ಕಾದಂಬರಿ ಬಿಡುಗಡೆಯ ಹಿಂದಿನ ದಿನ ಜೆಫ್ರಿ ಆರ್ಚರ್ ನಿಧನ

ಲಂಡನ್, ಅಕ್ಟೋಬರ್ 06: ಬ್ರಿಟನ್‌ನ ಖ್ಯಾತ ಕಾದಂಬರಿಕಾರ ಹಾಗೂ ಮಾಜಿ ಸಂಸದ ಜೆಫ್ರಿ ಆರ್ಚರ್ 86ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ವಿಶ್ವಾದ್ಯಂತ ಕೋಟ್ಯಂತರ ಓದುಗರನ್ನು ತಮ್ಮ ರೋಮಾಂಚಕ ಕಥೆಗಳ ಮೂಲಕ ತುದಿಗಾಲಿನಲ್ಲಿ ನಿಲ್ಲಿಸಿದ್ದ ಬ್ರಿಟನ್‌ನ ದಿಗ್ಗಜ ಕಾದಂಬರಿಕಾರ ಜೆಫ್ರಿ ಆರ್ಚರ್ ಅವರು ಮೃತಪಟ್ಟಿದ್ದಾರೆ. ವಿಪರ್ಯಾಸವೆಂದರೆ, ಅವರ ಜೀವಮಾನದ ಕೊನೆಯ ಹಾಗೂ 31ನೇ ಕಾದಂಬರಿ ‘ಆಡಮ್ ಆ್ಯಂಡ್ ಈವ್’ ಬಿಡುಗಡೆಯಾಗುವ ಕೆಲವೇ ಗಂಟೆಗಳ ಮೊದಲು ಈ ಮಹಾನ್ ಕಥೆಗಾರ ಬಾರದ ಲೋಕಕ್ಕೆ ಪಯಣ ಬೆಳೆಸಿದ್ದಾರೆ.

ಅಕ್ಟೋಬರ್ 5ರಂದು ತಮ್ಮ ಮನೆಯಲ್ಲಿ ಅವರು ಇದ್ದಕ್ಕಿದ್ದಂತೆ ನಿಧನರಾದರು ಎಂದು ಅವರ ಪ್ರಕಾಶಕ ಹಾರ್ಪರ್‌ಕಾಲಿನ್ಸ್ ತಿಳಿಸಿದೆ. ಅವರ ನಿಧನದ ಕಾರಣವನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಲಾಗಿಲ್ಲ. ಕನ್ನಡ ಓದುಗರಲ್ಲಿ ಜೆಫ್ರಿ ಆರ್ಚರ್ ಹೆಸರು ಎಲ್ಲರಿಗೂ ಪರಿಚಿತವಾಗಿರದಿರಬಹುದು. ಆದರೆ ಜಾಗತಿಕ ಮಟ್ಟದಲ್ಲಿ ಅವರು ಅತ್ಯಂತ ಜನಪ್ರಿಯ ಕಾದಂಬರಿಕಾರರಲ್ಲಿ ಒಬ್ಬರು. ಐದು ದಶಕಗಳ ಬರವಣಿಗೆ ವೃತ್ತಿಜೀವನದಲ್ಲಿ ಅವರ ಪುಸ್ತಕಗಳು 30 ಕೋಟಿಗೂ ಹೆಚ್ಚು ಪ್ರತಿಗಳು ಮಾರಾಟವಾಗಿವೆ. ಅವರ ಕೃತಿಗಳು 100ಕ್ಕೂ ಹೆಚ್ಚು ದೇಶಗಳಲ್ಲಿ ಓದುಗರನ್ನು ತಲುಪಿವೆ.

ಸಂಸದನಾಗಿ ಆರಂಭ, ಬರವಣಿಗೆಯೇ ವೃತ್ತಿ

ಜೆಫ್ರಿ ಆರ್ಚರ್ ಕೇವಲ ಲೇಖಕರಾಗಿರಲಿಲ್ಲ. ಅವರು ತಮ್ಮ 29ನೇ ವಯಸ್ಸಿನಲ್ಲೇ ಬ್ರಿಟನ್‌ನ ಕನ್ಸರ್ವೇಟಿವ್ ಪಕ್ಷದ ಸಂಸದರಾಗಿದ್ದರು. ನಂತರ ಮಾರ್ಗರೇಟ್ ಥ್ಯಾಚರ್ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ಪಕ್ಷದ ಹಿರಿಯ ಹುದ್ದೆಯನ್ನೂ ನಿರ್ವಹಿಸಿದ್ದರು. ಆದರೆ ಅವರ ರಾಜಕೀಯ ಜೀವನ ವಿವಾದಗಳಿಂದ ಕೂಡಿತ್ತು. 2001ರಲ್ಲಿ ಸುಳ್ಳು ಸಾಕ್ಷ್ಯ ಮತ್ತು ನ್ಯಾಯದ ಹಾದಿಯನ್ನು ವಿರೂಪಗೊಳಿಸಿದ ಪ್ರಕರಣದಲ್ಲಿ ಅವರಿಗೆ ನಾಲ್ಕು ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಯಿತು. ಅವರು ಸುಮಾರು ಎರಡು ವರ್ಷ ಜೈಲಿನಲ್ಲಿ ಕಳೆದರು. ಆದರೆ ರಾಜಕೀಯ ಏರಿಳಿತಗಳ ನಡುವೆಯೂ ಬರವಣಿಗೆಯನ್ನು ಅವರು ಕೈಬಿಡಲಿಲ್ಲ. ಸಂಸದನಾಗಿ ರಾಜಕೀಯ ಪ್ರವೇಶಿಸಿ, ಬಳಿಕ ಬರವಣಿಗೆಯನ್ನೇ ತಮ್ಮ ಪ್ರಮುಖ ವೃತ್ತಿಯಾಗಿಸಿಕೊಂಡು, ವಿಶ್ವದಾದ್ಯಂತ ಕೋಟ್ಯಂತರ ಓದುಗರನ್ನು ಗಳಿಸಿದ್ದು ಅವರ ಜೀವನದ ವಿಶೇಷ ಸಾಧನೆ.

‘ಕೇನ್ ಆ್ಯಂಡ್ ಅಬೆಲ್’ನಿಂದ ‘ಆಡಮ್ ಆ್ಯಂಡ್ ಈವ್’ವರೆಗೆ

1976ರಲ್ಲಿ ‘Not a Penny More, Not a Penny Less’ ಮೂಲಕ ಕಾದಂಬರಿ ಲೋಕಕ್ಕೆ ಕಾಲಿಟ್ಟ ಆರ್ಚರ್, 1979ರಲ್ಲಿ ಪ್ರಕಟವಾದ ‘Kane & Abel’ ಮೂಲಕ ವಿಶ್ವಮಟ್ಟದಲ್ಲಿ ದೊಡ್ಡ ಖ್ಯಾತಿ ಪಡೆದರು. ಈ ಕೃತಿಯೇ ಅವರ ಅತ್ಯಂತ ಪ್ರಸಿದ್ಧ ಕಾದಂಬರಿಗಳಲ್ಲಿ ಒಂದಾಗಿದೆ.

ಅವರ 31ನೇ ಹಾಗೂ ಕೊನೆಯ ಕಾದಂಬರಿ ಆ್ಯಡಮ್ ಆ್ಯಂಡ್ ಈವ್ ಅಕ್ಟೋಬರ್ 6ರಂದು ಬಿಡುಗಡೆಯಾಗಬೇಕಿತ್ತು. ಅಂದರೆ ತಮ್ಮ ಕೊನೆಯ ಪುಸ್ತಕ ಓದುಗರ ಕೈ ಸೇರುವ ಒಂದು ದಿನ ಮುನ್ನವೇ ಆರ್ಚರ್ ನಿಧನರಾಗಿದ್ದಾರೆ. 86ನೇ ವಯಸ್ಸಿನಲ್ಲೂ ಅವರು ಬರವಣಿಗೆಯನ್ನು ಮುಂದುವರೆಸಿದ್ದರು. ಅವರ ಪ್ರಕಾಶಕರ ಪ್ರಕಾರ, ಅವರು ಕೊನೆಯ ದಿನಗಳವರೆಗೂ ಬರೆಯುತ್ತಿದ್ದರು. ಹೀಗಾಗಿ ರಾಜಕೀಯ, ವಿವಾದಗಳು ಮತ್ತು ಏರಿಳಿತಗಳ ನಡುವೆಯೂ ಬರವಣಿಗೆಯನ್ನೇ ಜೀವನದ ಕೇಂದ್ರವಾಗಿಸಿಕೊಂಡು, 30 ಕೋಟಿ ಪುಸ್ತಕಗಳ ಮಾರಾಟದ ಮೂಲಕ ವಿಶ್ವದ ಓದುಗರ ಮನಸ್ಸಿನಲ್ಲಿ ಸ್ಥಾನ ಪಡೆದ ಲೇಖಕರಾಗಿ ಜೆಫ್ರಿ ಆರ್ಚರ್ ಅವರ ಪಯಣ ನೆನಪಿನಲ್ಲಿ ಉಳಿಯಲಿದೆ.

ಕನ್ನಡದ ಓದುಗರಿಗೆ ಇವರ ಪರಿಚಯ ಕಡಿಮೆಯಿರಬಹುದು, ಆದರೆ ಇವರ ಪಯಣ ಅಸಾಧಾರಣ

ಕನ್ನಡದ ಜನಸಾಮಾನ್ಯರಿಗೆ ಜೆಫ್ರಿ ಆರ್ಚರ್ ಅವರ ಹೆಸರು ಅಷ್ಟಾಗಿ ಪರಿಚಿತವಿಲ್ಲದಿರಬಹುದು. ಆದರೆ ಕೇವಲ 29ನೇ ವಯಸ್ಸಿಗೆ ಸಂಸದರಾಗಿ (MP) ಬ್ರಿಟನ್ ರಾಜಕೀಯ ಪ್ರವೇಶಿಸಿ, ನಂತರ ಅದೇ ರಾಜಕೀಯದ ಏಳುಬೀಳುಗಳ ನಡುವೆ ಬರವಣಿಗೆಯನ್ನೇ ತಮ್ಮ ಮುಖ್ಯ ವೃತ್ತಿಯನ್ನಾಗಿ ಮಾಡಿಕೊಂಡು ಜಾಗತಿಕ ಮಟ್ಟದಲ್ಲಿ ಬೆಳೆದ ಇವರ ಜೀವನ ಶೈಲಿ ನಿಜಕ್ಕೂ ಬೆರಗು ಹುಟ್ಟಿಸುವಂತದ್ದು.

ಸಂಸದರಾಗಿ ಸಾಹಿತ್ಯದತ್ತ ಪಯಣ:

ಮಾರ್ಗರೇಟ್ ಥ್ಯಾಚರ್ ಅವರ ಸರ್ಕಾರದಲ್ಲಿ ಕನ್ಸರ್ವೇಟಿವ್ ಪಕ್ಷದ ಉಪಾಧ್ಯಕ್ಷರಾಗಿದ್ದ ಆರ್ಚರ್, ಷೇರು ಮಾರುಕಟ್ಟೆಯಲ್ಲಿ ದಿವಾಳಿಯಾದಾಗ ಸಾಲ ತೀರಿಸಲು ಬರೆಯಲು ಆರಂಭಿಸಿದ ಮೊದಲ ಕಾದಂಬರಿ ‘ನಾಟ್ ಎ ಪೆನ್ನಿ ಮೋರ್, ನಾಟ್ ಎ ಪೆನ್ನಿ ಲೆಸ್’ (1976) ಇವರನ್ನು ಲೇಖಕರನ್ನಾಗಿ ಮಾಡಿತು.

ವಿಶ್ವದಾಖಲೆಯ ‘ಕೇನ್ ಆ್ಯಂಡ್ ಅಬೆಲ್’:

1979ರಲ್ಲಿ ಪ್ರಕಟವಾದ ಇವರ ‘ಕೇನ್ ಆ್ಯಂಡ್ ಅಬೆಲ್’ ಕಾದಂಬರಿ ಒಂದೇ ಜಗತ್ತಿನ 47 ಭಾಷೆಗಳಲ್ಲಿ ಭಾಷಾಂತರಗೊಂಡು 3.4 ಕೋಟಿಗೂ ಅಧಿಕ ಪ್ರತಿಗಳು ಮಾರಾಟವಾಗಿ ಇತಿಹಾಸ ನಿರ್ಮಿಸಿತು.

ಜೈಲುವಾಸವನ್ನೂ ಪುಸ್ತಕವಾಗಿಸಿದ ಛಲ:

ಸುಳ್ಳು ಸಾಕ್ಷ್ಯ ನುಡಿದ ಆರೋಪದ ಮೇಲೆ 2001ರಲ್ಲಿ 2 ವರ್ಷಗಳ ಜೈಲು ಶಿಕ್ಷೆಗೆ ಒಳಗಾದರೂ, ಜೈಲಿನ ದಿನಚರಿಯನ್ನೇ ಆಧರಿಸಿ ಅವರು ಬರೆದ ‘ಎ ಪ್ರಿಸನ್ ಡೈರಿ’ ಬೆಸ್ಟ್ ಸೆಲ್ಲರ್ ಆಯಿತು. ರಾಜಕೀಯ ಮುಗಿದರೂ ಅಕ್ಷರ ಲೋಕದಲ್ಲಿ ಎಂದಿಗೂ ಸೋಲೊಪ್ಪಿಕೊಳ್ಳದ ಜಾಯಮಾನ ಇವರದ್ದು.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 9:33 am, Tue, 6 October 26