ಬ್ರೆಜಿಲ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಲುಲಾ ಸಿಲ್ವಾಗೆ ಚಾರಿತ್ರಿಕ ಜಯ; 4ನೇ ಬಾರಿ ಅಧಿಕಾರಕ್ಕೇರಿ ಇತಿಹಾಸ ನಿರ್ಮಿಸಿದ ಎಡಪಂಥೀಯ ನಾಯಕ

ಬ್ರೆಜಿಲ್, ಅಕ್ಟೋಬರ್ 26: ಇಲ್ಲಿಯ ಜನಪ್ರಿಯ ನಾಯಕ ಲುಯಿಜ್ ಇನಾಸಿಯೊ ಲುಲಾ ಡಾ ಸಿಲ್ವಾ (Luiz Ignacio Lula da Silva) ಅವರು ದೇಶದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಮತ್ತೊಮ್ಮೆ ಜಯಭೇರಿ ಭಾರಿಸಿದ್ದಾರೆ. ಈ ಮೂಲಕ 4ನೇ ಬಾರಿಗೆ ಬ್ರೆಜಿಲ್‌ನ ಅಧ್ಯಕ್ಷರಾಗಿ ಆಯ್ಕೆಯಾಗಿ ಇತಿಹಾಸ ಸೃಷ್ಟಿಸಿದ್ದಾರೆ. ಜಾಗತಿಕ ರಾಜಕೀಯ ಕ್ಷೇತ್ರದಲ್ಲಿ ಅವರ ಈ ಪುನರಾಗಮನವು ಭಾರಿ ಗಮನಸೆಳೆದಿದೆ.

ಬ್ರೆಜಿಲ್​ನ ಮಾಜಿ ಅಧ್ಯಕ್ಷ ಜೇರ್ ಬೋಲ್ಸೊನಾರೋ ಅವರ ಹಿರಿಯ ಮಗ ಫ್ಲೇವಿಯೋ ಬೋಲ್ಸೊನಾರೋ ವಿರುದ್ಧ ನಡೆದ ನೇರ ಮತ್ತು ಕಠಿಣ ಪೈಪೋಟಿಯಲ್ಲಿ ಲುಲಾ ಡ ಸಿಲ್ವಾ ಅವರು ಶೇ. 51.75 ಮತ ಗಳಿಸಿ ಚುನಾವಣೆ ಜಯಿಸಿದ್ದಾರೆ. ಬೋಲ್ಸೊನಾರೋ ಶೇ. 48.25ರಷ್ಟು ಮತ ಗಳಿಸಿದರು. ಈ ಚುನಾವಣೆಯಲ್ಲಿ ಮೊದಲ ಸುತ್ತಿನಲ್ಲಿ ಲುಲಾ ಸೋತರೂ ನಂತರ ಕಂಬ್ಯಾಕ್ ಮಾಡಿ ಹೊಸ ಇತಿಹಾಸ ಸೃಷ್ಟಿಸಿದ್ದಾರೆ.

ಬ್ರೆಜಿಲ್‌ನ ರಾಜಕೀಯ ಇತಿಹಾಸದಲ್ಲೇ ಅತ್ಯಂತ ಹೆಚ್ಚು ಬಾರಿ (4ನೇ ಬಾರಿ) ಪ್ರಜಾಸತ್ತಾತ್ಮಕವಾಗಿ ಅಧ್ಯಕ್ಷರಾಗಿ ಆಯ್ಕೆಯಾದ ಏಕೈಕ ನಾಯಕ ಎಂಬ ಹೆಗ್ಗಳಿಕೆಗೆ ಲುಲಾ ಪಾತ್ರರಾಗಿದ್ದಾರೆ.

ಇದನ್ನೂ ಓದಿ: ಒಂದೆಡೆ ಮಿಲಿಟರಿ ದಾಳಿಯ ಎಚ್ಚರಿಕೆ, ಮತ್ತೊಂದೆಡೆ ಒಪ್ಪಂದದ ಮಾತು: ಟ್ರಂಪ್ ಮಾತುಗಳಿಂದ ಜಾಗತಿಕ ಮಾರುಕಟ್ಟೆಯಲ್ಲಿ ತಳಮಳ

ಕಾರ್ಮಿಕ ನಾಯಕನಿಂದ ಜಾಗತಿಕ ನಾಯಕನವರೆಗೆ ಲುಲಾ ಪ್ರಯಾಣ

ಕಾರ್ಮಿಕ ಸಂಘಟನೆಯ ನಾಯಕರಾಗಿದ್ದ ಲುಲಾ, ಬಡತನ ನಿರ್ಮೂಲನೆ ಮತ್ತು ಸಾಮಾಜಿಕ ಕಲ್ಯಾಣ ಯೋಜನೆಗಳ (Bolsa Familia) ಮೂಲಕ ಬ್ರೆಜಿಲ್‌ನ ಲಕ್ಷಾಂತರ ಜನರನ್ನು ಬಡತನದಿಂದ ಹೊರತಂದ ಧುರೀಣರಾಗಿ ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಂಡಿದ್ದಾರೆ. ಬ್ರೆಜಿಲ್​ನಲ್ಲಿ ಎಡಪಕ್ಷದ ಆಡಳಿತ ಮುಂದುವರಿಸಿದ್ದಾರೆ.

ಕಠಿಣ ಕಾನೂನು ಸವಾಲುಗಳು, ಜೈಲು ವಾಸ ಮತ್ತು ರಾಜಕೀಯ ಬಿಕ್ಕಟ್ಟುಗಳನ್ನು ಎದುರಿಸಿ, ಮತ್ತೆ ದೇಶದ ಅತ್ಯುನ್ನತ ಹುದ್ದೆಗೆ ಅತ್ಯಂತ ಜನಪ್ರಿಯ ಬೆಂಬಲದೊಂದಿಗೆ ಮರಳಿರುವುದು ಅವರ ರಾಜಕೀಯ ಸೌಧದ ಸ್ಥಿತಿಸ್ಥಾಪಕತ್ವಕ್ಕೆ ಸಾಕ್ಷಿಯಾಗಿದೆ.

ಲುಲಾ ಗೆಲುವು ಹಾಗೂ ಕೆಲ ದಾಖಲೆಗಳು

1. ನಾಲ್ಕು ಗೆಲುವು ಇದೇ ಮೊದಲು: ಬ್ರೆಜಿಲ್​ನಲ್ಲಿ ನಾಲ್ಕು ಬಾರಿ ಅಧ್ಯಕ್ಷೀಯ ಚುನಾವಣೆ ಗೆದ್ದ ಮೊದಲ ವ್ಯಕ್ತಿ ಲುಲಾ. 2003ರಿಂದ 2010ರವರೆಗೆ ಎರಡು ಬಾರಿ, ಹಾಗೂ 2022ರಿಂದ ಇಲ್ಲಿಯವರೆಗೆ ಎರಡು ಬಾರಿ ಅವರು ಬ್ರೆಜಿಲ್ ಅಧ್ಯಕ್ಷರಾಗಿದ್ದಾರೆ.
2. ಮೊದಲ ಸುತ್ತಿನಲ್ಲಿ ಸೋತರೂ ಚುನಾವಣೆ ಗೆದ್ದ ಮೊದಲಿಗ: ಲುಲಾ ಅವರು ಈ ಚುನಾವಣೆಯಲ್ಲಿ ತಮ್ಮ ಪ್ರತಿಸ್ಪರ್ಧಿ ಫ್ಲೇವಿಯೋ ಬೋಲ್ಸೊನಾರೋ ವಿರುದ್ಧ ಮೊದಲ ಸುತ್ತಿನಲ್ಲಿ ಹಿನ್ನಡೆ ಅನುಭವಿಸಿದ್ದರು. ಆದರೆ ನಂತರ ರನ್ ಆಫ್​ನಲ್ಲಿ ವಿಜೇತರಾಗಿ ಹೊರಹೊಮ್ಮಿದ್ದಾರೆ. ಆ ದೇಶದಲ್ಲಿ ಆಗಿದ್ದು ಇದೇ ಮೊದಲು.
3. ಅತ್ಯಂತ ಹಿರಿಯ ಬ್ರೆಜಿಲ್ ಅಧ್ಯಕ್ಷ: ಲಲಾ ಅವರ ವಯಸ್ಸು 81 ವರ್ಷ ಇದೆ. ಕಳೆದ ಬಾರಿ ಅವರು 77ರ ವಯಸ್ಸಿನಲ್ಲಿ ಅಧ್ಯಕ್ಷರಾಗಿದ್ದರು. ಬ್ರೆಜಿಲ್​ನ ಅತ್ಯಂತ ಹಿರಿಯ ವಯಸ್ಸಿನ ಅಧ್ಯಕ್ಷನೆಂಬ ದಾಖಲೆ ಮಾಡಿದ್ದರು. ಈಗ 81 ವರ್ಷ ವಯಸ್ಸಿನಲ್ಲಿರುವ ಅವರು ಆ ದಾಖಲೆಯನ್ನು ವಿಸ್ತರಿಸಿದ್ದಾರೆ. ಈ ಅಧ್ಯಕ್ಷ ಅವಧಿ ಮುಗಿದರೆ ಅವರ ವಯಸ್ಸು 85 ವರ್ಷ ಇರುತ್ತದೆ.

ಇದನ್ನೂ ಓದಿ: ಮೆಕ್ಕಾ, ಮದೀನಾ ಗುರಿಯಾಗಿಸಿ ದಾಳಿ ಎಂದ ಸೌದಿ ಅರೇಬಿಯಾ: ಆರೋಪ ನಿರಾಕರಿಸಿದ ಹೌತಿಗಳು

ಬಲಪಂಥೀಯರ ಮಧ್ಯೆ ಎಡಪಂಥೀಯ ಸರ್ಕಾರ…

ಲ್ಯಾಟಿನ್ ಅಮೆರಿಕ ಭಾಗದ ಬಹುತೇಕ ದೇಶಗಳಲ್ಲಿ ಬಲಪಂಥೀಯರ ನೇತೃತ್ವದ ಸರ್ಕಾರಗಳಿವೆ. ಆದರೆ, ಲುಲಾ ಅವರು ಎಡಪಂಥೀಯ ಪಕ್ಷದ ನಾಯಕರಾಗಿದ್ದಾರೆ. ಅಮೆರಿಕದ ಬಗುಲಲ್ಲೇ ಎರಡು ದಶಕಗಳ ಕಾಲ ಎಡಪಂಥೀಯ ಸರ್ಕಾರ ಸ್ಥಾಪಿಸಿದ್ದಾರೆ. ಈ ಬ್ರೆಜಿಲ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಫ್ಲೇವಿಯೋ ಬೋಲ್ಸೊನಾರೋ ಅವರನ್ನು ಪೂರ್ಣವಾಗಿ ಬೆಂಬಲಿಸಿದ್ದರು. ಆದರೂ ಕೂಡ ಲೂಲಾ ಗೆಲುವು ಸಾಧಿಸಿರುವುದು ಗಮನಾರ್ಹ ಸಂಗತಿ.

ಇನ್ನಷ್ಟು ಅಂತರರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ