ಬರೋಬ್ಬರಿ 20 ಕೆಜಿ ತೂಕ ಕಳೆದುಕೊಂಡ ಕಿಮ್​ ಜಾಂಗ್​ ಉನ್​; ಸರ್ವಾಧಿಕಾರಿಗೆ ಆಗಿದ್ದೇನು ಎಂದು ಪತ್ತೆ ಹಚ್ಚಿದ ಗುಪ್ತಚರ ದಳ

ಉತ್ತರ ಕೊರಿಯಾ ಸರ್ವಾಧಿಕಾರಿ ಕಿಮ್​ ಜಾಂಗ್​ ಉನ್​ ಅವರು ತುಂಬ ಸಪೂರ ಆಗಿಬಿಟ್ಟಿದ್ದಾರೆ ಎಂಬುದೊಂದು ವಿಚಾರ ಇತ್ತೀಚೆಗೆ ಸೋಷಿಯಲ್​ ಮೀಡಿಯಾಗಳಲ್ಲಿ ಸಿಕ್ಕಾಪಟೆ ಚರ್ಚೆಯಾಗುತ್ತಿದ್ದಾರೆ. ಕಿಮ್​ ಜಾಂಗ್​ ಉನ್​ ಮೊದಲಿನಂತಿಲ್ಲ..ಮೈಕೈ ತುಂಬಿಕೊಂಡು ಇಲ್ಲ. ಅವರ ತೂಕ ಇಳಿದಿದೆ. ಏನಾದರೂ ಆರೋಗ್ಯ ಸಮಸ್ಯೆ ಆಗಿದ್ದಿರಬಹುದು ಅಥವಾ ಡಯಟ್ ಮಾಡುತ್ತಿರಬಹುದು ಎಂಬಿತ್ಯಾದಿ ಚರ್ಚೆಗಳು ರಾಜಕೀಯ ವಿಶ್ಲೇಷಕರ ಮಟ್ಟದಲ್ಲೇ ನಡೆಯುತ್ತಿದೆ. ಅದರಲ್ಲೂ ಕಿಮ್ ಜಾಂಗ್​ ಉನ್​ ಮೊದಲಿದ್ದುದಕ್ಕೂ, ಈಗಿರುವುದಕ್ಕೂ ಸ್ಪಷ್ಟ ವ್ಯತ್ಯಾಸ ತಿಳಿಸುವ ಫೋಟೋ, ವಿಡಿಯೋಗಳು ವೈರಲ್​ ಆದ ಬೆನ್ನಲ್ಲೇ ಇನ್ನಷ್ಟು ಅನುಮಾನಗಳು ಹುಟ್ಟುಕೊಂಡಿವೆ.

ಇದೀಗ ಗುಪ್ತಚರ ದಳವೊಂದು ನೀಡಿದ ಮಾಹಿತಿಯನ್ನು ದಕ್ಷಿಣ ಕೊರಿಯಾ ಜನಪ್ರತಿನಿಧಿಯೊಬ್ಬರು ಬಹಿರಂಗಪಡಿಸಿದ್ದಾರೆ. ಅದರ ಪ್ರಕಾರನ ಉತ್ತರ ಕೊರಿಯಾ ನಾಯಕ ಕಿಮ್​ ಜಾಂಗ್​ ಉನ್​ ಅವರು ಸುಮಾರು 44 ಪೌಂಡ್​ ಅಂದರೆ ಅಜಮಾಸು 20 ಕೆಜಿ ತೂಕ ಕಳೆದುಕೊಂಡಿದ್ದಾರೆ. ಆದರೆ ಆಡಳಿತದ ಮೇಲೆ ಪರಿಣಾಮ ಬೀರುವಂಥ ಗಂಭೀರ ಆರೋಗ್ಯ ಸಮಸ್ಯೆಯೇನೂ ಅವರಿಗೆ ಇಲ್ಲ ಎಂದು ದಕ್ಷಿಣ ಕೊರಿಯಾ ಜನಪ್ರತಿನಿಧಿ ಕಿಮ್ ಬೈಂಗ್ ಕೀ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಕಿಮ್ ಜಾಂಗ್​ ಉನ್​ ಆರೋಗ್ಯದಲ್ಲಿ ಗಂಭೀರ ಸಮಸ್ಯೆಯೇನಾದರೂ ಇದ್ದರೆ ಅದು ಗೊತ್ತಾಗುತ್ತದೆ. ಅವರ ಚಿಕಿತ್ಸೆಯ ಜವಾಬ್ದಾರಿ ಹೊತ್ತಿರುವ ಆಸ್ಪತ್ರೆಗೆ ಅಗತ್ಯ ಔಷಧಿಗಳು ಆಮದಾಗುತ್ತವೆ. ಒಂದಲ್ಲ ಒಂದು ಕಾರಣದಿಂದ ತಿಳಿದೇ ತಿಳಿಯುತ್ತದೆ. ಆದರೆ ಅಂಥ ಲಕ್ಷಣಗಳೇನೂ ಕಂಡುಬಂದಿಲ್ಲ ಎಂದು ಕಿಮ್​ ಬೈಂಗ್​ ಹೇಳಿದ್ದಾರೆ. ಅಷ್ಟೇ ಅಲ್ಲ, ಅವರು ಹಲವು ತಾಸುಗಳ ಸಭೆ ನಡೆಸುತ್ತಾರೆ..ಸಹಜವಾಗಿಯೇ ನಡೆದಾಡುತ್ತಾರೆ. ಹಾಗಾಗಿ ಅವರಿಗೆ ಆರೋಗ್ಯ ಸಮಸ್ಯೆ ಏನೂ ಆದಂತಿಲ್ಲ ಎಂದೂ ಹೇಳಿದ್ದಾರೆ. 37ವರ್ಷದ ಕಿಮ್ ಜಾಂಗ್​ ಉನ್ ಮೇ ತಿಂಗಳಲ್ಲಿ ಜನರ ಕಣ್ಣಿಗೆ ಕಾಣಿಸಿಕೊಂಡಿರಲಿಲ್ಲ. ಜೂನ್​ನಲ್ಲಿ ಕಾಣಿಸಿಕೊಂಡಾಗ ಅಚ್ಚರಿ ಪಡುವ ಸರದಿ ಜನರದ್ದಾಗಿತ್ತು. ಊಹೆಗೂ ಮೀರಿ ಸಪೂರ ಆಗಿದ್ದರು. ಮುಖವೆಲ್ಲ ಇಳಿದಿತ್ತು.

ನಿರಂಕುಶಾಧಿಕಾರಿ ಕಿಮ್​ ಜಾಂಗ್​ ಉನ್​ ರಹಸ್ಯ ಆಡಳಿತದ ಮೇಲೆ ದಕ್ಷಿಣ ಕೊರಿಯಾದ ಪತ್ತೇದಾರಿ ಏಜೆನ್ಸಿಗಳು ಸದಾ ಒಂದು ಕಣ್ಣಿಟ್ಟಿರುತ್ತವೆ. ಈ ಗುಪ್ತಚರ ದಳಗಳು ಹೇಳುವ ಪ್ರಕಾರ, ಕಿಮ್​ ಜಾಂಗ್​ ಉನ್ ಸುಮಾರು 140 ಕೆಜಿ ತೂಕವಿದ್ದರು. ಅವರ ಕುಟುಂಬಕ್ಕೆ ಹೃದ್ರೋಗ ಇತಿಹಾಸವಿದ್ದು, ಹಲವರು ಈ ರೋಗಕ್ಕೆ ತುತ್ತಾಗಿದ್ದಾರೆ. ಹಾಗಾಗಿಯೇ ಈಗ ಕಿಮ್​ ಜಾಂಗ್​ ಉನ್​ ಕೂಡ ಮುನ್ನೆಚ್ಚರಿಕಾ ಕ್ರಮವಾಗಿ ತೂಕ ಇಳಿಸುತ್ತಿರಬಹುದು ಎನ್ನಲಾಗಿದೆ.

ಇದನ್ನೂ ಓದಿ: ಚೆನ್ನೈನಲ್ಲಿ ಅರ್ಜುನ್​ ಸರ್ಜಾ ನಿರ್ಮಿಸಿದ ಆಂಜನೇಯ ಸ್ವಾಮಿ ದೇವಾಲಯದ ದರ್ಶನ ಪಡೆದ ಜ್ಯೂ. ಚಿರು

North Korean leader Kim Jong Un lost 44 pounds Says South Korean Spy Agency