7th Pay Commission: ಶೀಘ್ರದಲ್ಲೇ ಡಿಎ ಮತ್ತು ಫಿಟ್ಮೆಂಟ್ ಫ್ಯಾಕ್ಟರ್ ಹೆಚ್ಚಳ ಸಾಧ್ಯತೆ; ಏನಿದು ಫಿಟ್ಮೆಂಟ್ ಏರಿಕೆ?
Central Government Soon May Rise Fitment Factor, DA & DR: ಒಂದು ವೇಳೆ ಫಿಟ್ಮೆಂಟ್ ಫ್ಯಾಕ್ಟರ್ ಅನ್ನು ಏರಿಕೆ ಮಾಡಿದಲ್ಲಿ 18,000 ರೂ ಇರುವ ಕೇಂದ್ರ ಸರ್ಕಾರಿ ನೌಕರರ ಕನಿಷ್ಠ ಸಂಬಳದಲ್ಲಿ ಭಾರೀ ಹೆಚ್ಚಳವಾಗಲಿದೆ. ಮೂಲಗಳ ಪ್ರಕಾರ ಕನಿಷ್ಠ ಸಂಬಳ 26 ಸಾವಿರ ರುಪಾಯಿಗೆ ಹೆಚ್ಚಾಗಬಹುದು.
Updated on:Oct 08, 2026 | 12:09 PM
ನವದೆಹಲಿ: ಹಲವು ದಿನಗಳಿಂದ ಕಾತರದಿಂದ ಕಾಯುತ್ತಿರುವ ಕೇಂದ್ರ ಸರಕಾರಿ ನೌಕರರಿಗೆ ಶೀಘ್ರದಲ್ಲೇ ಖುಷಿಯ ಸುದ್ದಿ ಸಿಗಲಿದೆ. ಕೇಂದ್ರ ಉದ್ಯೋಗಿಗಳ ಸಂಬಳದಲ್ಲಿ ಭರಪೂರ ಏರಿಕೆಯಾಗಲಿದೆ. ಸರ್ಕಾರ ತನ್ನ ಉದ್ಯೋಗಿಗಳ ತುಟ್ಟಿ ಭತ್ಯೆ (DR- Dearness Allowance) ಮತ್ತು ಫಿಟ್ಮೆಂಟ್ ಫ್ಯಾಕ್ಟರ್ (Fitment Factor) ಎರಡನ್ನೂ ಹೆಚ್ಚಿಸಲು ನಿರ್ಧರಿಸಿದೆ ಎಂದು ಹೇಳಲಾಗುತ್ತಿದೆ. ಈ ವರದಿಗಳ ಪ್ರಕಾರ ಸರ್ಕಾರ ಈ ತಿಂಗಳು ಮುಗಿಯುವುದರೊಳಗೆ ಸಂಬಳ ಏರಿಕೆಯನ್ನು ಪ್ರಕಟಿಸುವ ನಿರೀಕ್ಷೆ ಇದೆ.
ಒಂದು ವೇಳೆ ಫಿಟ್ಮೆಂಟ್ ಫ್ಯಾಕ್ಟರ್ ಅನ್ನು ಏರಿಕೆ ಮಾಡಿದಲ್ಲಿ 18,000 ರೂ ಇರುವ ಕೇಂದ್ರ ಸರ್ಕಾರಿ ನೌಕರರ ಕನಿಷ್ಠ ಸಂಬಳದಲ್ಲಿ ಭಾರೀ ಹೆಚ್ಚಳವಾಗಲಿದೆ. ಮೂಲಗಳ ಪ್ರಕಾರ ಕನಿಷ್ಠ ಸಂಬಳ 26 ಸಾವಿರ ರುಪಾಯಿಗೆ ಹೆಚ್ಚಾಗಬಹುದು. ಇನ್ನೂ ಕೆಲ ವರದಿಗಳ ಪ್ರಕಾರ ಇನ್ನೊಂದು ಅಥವಾ ಎರಡು ವಾರದೊಳಗೆ ಸರ್ಕಾರ ಘೋಷಣೆ ಹೊರಡಿಸಬಹುದು. ಇದರೊಂದಿಗೆ 50 ಲಕ್ಷ ಸರ್ಕಾರಿ ನೌಕರರಿಗೆ ಯುಗಾದಿಗೆ ಮುನ್ನ ಸುಗ್ಗಿಯೋ ಸುಗ್ಗಿ ಆಗಬಹುದು.
ಏನಿದು ಫಿಟ್ಮೆಂಟ್ ಫ್ಯಾಕ್ಟರ್?
ಇದು ಎಷ್ಟು ಸಂಬಳ ಹೆಚ್ಚಿಸಬೇಕು ಎಂಬ ಕ್ರಮಬದ್ಧ ಲೆಕ್ಕಾಚಾರ. ಸದ್ಯ ಫಿಟ್ಮೆಂಟ್ ಫ್ಯಾಕ್ಟರ್ 2.57 ಇದೆ. 7ನೇ ವೇತನ ಆಯೋಗವು ಈ ದರ ನಿಗದಿ ಮಾಡಿತ್ತು. ಆಗ ಇದ್ದ ಕನಿಷ್ಠ ವೇತನ 7 ಸಾವಿರ ರೂ ವೇತನಕ್ಕೆ 2.57ರ ಫಿಟ್ಮೆಂಟ್ ಫ್ಯಾಕ್ಟರ್ ಅನ್ನು ಗುಣಿಸಿದಾಗ ಕನಿಷ್ಠ ವೇತನ 18,000 ರುಪಾಯಿಗೆ ಹೆಚ್ಚಾಗಿತ್ತು. ಈಗ ಫಿಟ್ಮೆಂಟ್ ಫ್ಯಾಕ್ಟರ್ ಅನ್ನು 3.68ಕ್ಕೆ ಹೆಚ್ಚಿಸಬೇಕೆಂಬುದು ಸರ್ಕಾರಿ ನೌಕರರ ಒತ್ತಾಯವಾಗಿದೆ. ಇದಕ್ಕೆ ಸರ್ಕಾರ ಸಮ್ಮತಿಸಿದಲ್ಲಿ 18,000 ರೂ ಇರುವ ಕನಿಷ್ಠ ವೇತನ 26,000 ರುಪಾಯಿಗೆ ಹೆಚ್ಚಾಗಬಹುದು.
ಉದಾಹರಣೆಗೆ, 20,000 ರುಪಾಯಿಯ ಬೇಸಿಕ್ ಸ್ಯಾಲರಿ ಹೊಂದಿರುವ ಉದ್ಯೋಗಿಯ ಸಂಬಳಕ್ಕೆ ಫಿಟ್ಮೆಂಟ್ ಫ್ಯಾಕ್ಟರ್ ಸೇರಿಸಿದರೆ 20,000 X 3.68 = 73,600 ರೂ ಆಗುತ್ತದೆ.
ಡಿಎ ಶೇ. 4 ಹೆಚ್ಚಳ?
ಇದೇ ವೇಳೆ ಕೇಂದ್ರ ಸರ್ಕಾರದ ಉದ್ಯೋಗಿಗಳಿಗೆ ಡಬಲ್ ಧಮಾಕ ಸಿಗಬಹುದು. ಈ ಬಾರಿಯೂ ಸರ್ಕಾರ ಡಿಎ ಮತ್ತು ಡಿರ್ ದರಗಳನ್ನು ಏರಿಸಬಹುದು. ವರದಿಗಳ ಪ್ರಕಾರ ಡಿಎ ಮತ್ತು ಡಿಆರ್ಗಳು ಶೇ. 4ರಷ್ಟು ಹೆಚ್ಚಾಗಬಹುದು. ಸರ್ಕಾರ ಪ್ರತೀ ವರ್ಷ ಎರಡು ಬಾರಿ ಡಿಎ ಮತ್ತು ಡಿಆರ್ ಹೆಚ್ಚಿಸುತ್ತದೆ. 2022ರ ಸೆಪ್ಟಂಬರ್ನಲ್ಲಿ ಶೇ. 4ರಷ್ಟು ಡಿಎ ಹೆಚ್ಚಿಸಿತ್ತು. ಅದಕ್ಕೂ ಮುನ್ನ ಶೇ. 3ರಷ್ಟು ಹೆಚ್ಚಿಗೆಯಾಗಿತ್ತು. ಈ ಬಾರಿ ಶೇ. 4ರಷ್ಟು ಡಿಎ ಹೆಚ್ಚಾದರೆ ಒಟ್ಟು ತುಟ್ಟಿಭತ್ಯೆ ಶೇ. 42 ಆಗುತ್ತದೆ.
ಡಿಎ ಎಂದರೆ ಡಿಯರ್ನೆಸ್ ಅಲೋಯನ್ಸ್, ಅಥವಾ ತುಟ್ಟಿಭತ್ಯೆ. ಇದು ಹಣದುಬ್ಬರವನ್ನು ಗಮನದಲ್ಲಿಟ್ಟುಕೊಂಡು ಏರಿಕೆ ಮಾಡಲಾಗುವ ದರ. ಜೀವನೋಪಯೋಗಿ ವಸ್ತುಗಳ ಬೆಲೆ ಏರಿಕೆಯಿಂದ ಉದ್ಯೋಗಿಗಳ ಸಂಬಳದ ಮೌಲ್ಯ ಕಡಿಮೆ ಆಗದಂತೆ ನೋಡಿಕೊಳ್ಳಲು ತೆಗೆದುಕೊಳ್ಳಲಾಗುವ ಕ್ರಮ ಇದು. ಇದು 50 ಲಕ್ಷ ಸರ್ಕಾರಿ ನೌಕರರ ಸಂಬಳಕ್ಕೆ ಅನ್ವಯ ಆಗುತ್ತದೆ.
ಇನ್ನು ಡಿಯರ್ನೆಸ್ ರಿಲೀಫ್ ಅಥವಾ ತುಟ್ಟಿ ಪರಿಹಾರವೂ ಇದೇ ಉದ್ದೇಶ ಹೊಂದಿದ್ದು, ಇದು ನಿವೃತ್ತರಾಗಿರುವ ಸರ್ಕಾರಿ ನೌಕರರ ಪಿಂಚಣಿಗೆ ಅನ್ವಯ ಆಗುತ್ತದೆ. ಒಟ್ಟು 68 ಲಕ್ಷಕ್ಕೂ ಹೆಚ್ಚು ಪಿಂಚಣಿದಾರರಿದ್ದಾರೆ.
ಡಿಎ ಅರಿಯರ್ಸ್ ಸಿಗುತ್ತಾ?
ಸರ್ಕಾರ ನಿಯಮಿತವಾಗಿ ಡಿಎ ಹೆಚ್ಚಿಸುತ್ತಾ ಬಂದರೂ 2020ರಿಂದ ಕೋವಿಡ್ ಕಾರಣಕ್ಕೆ ಡಿಎ ಮೊತ್ತವನ್ನು ಉದ್ಯೋಗಿಗಳಿಗೆ ವರ್ಗಾವಣೆ ಮಾಡಲಾಗಿರಲಿಲ್ಲ. 18 ತಿಂಗಳಿಂದ ಬಾಕಿ ಇರುವ ಡಿಎ ಮತ್ತು ಡಿಆರ್ ಅನ್ನು ಸರ್ಕಾರ ಈ ಬಾರಿ ಒಟ್ಟಿಗೆ ಬಿಡುಗಡೆ ಮಾಡುವ ಸಾಧ್ಯತೆ ಇದೆ.
Published On - 3:23 pm, Thu, 9 March 23
