ಟ್ಯಾಕ್ಸ್ ಆಡಿಟ್ ರಿಪೋರ್ಟ್ ಸಲ್ಲಿಸಲು ಗಡುವು ಅಕ್ಟೋಬರ್ 31ರವರೆಗೂ ವಿಸ್ತರಣೆ

ನವದೆಹಲಿ, ಸೆಪ್ಟೆಂಬರ್ 25: ಟ್ಯಾಕ್ಸ್ ಆಡಿಟ್ ರಿಪೋರ್ಟ್​ಗಳನ್ನು (TAR- Tax Audit Report) ಸಲ್ಲಿಸಲು ಸೆಪ್ಟೆಂಬರ್ 30ಕ್ಕೆ ಇದ್ದ ಗಡುವನ್ನು ಒಂದು ತಿಂಗಳು ವಿಸ್ತರಿಸಲಾಗಿದೆ. ಇದೀಗ ಟಿಎಆರ್​ಗಳನ್ನು ಸಲ್ಲಿಸಲು ಅಕ್ಟೋಬರ್ 31ರವರೆಗೂ ಕಾಲಾವಕಾಶ ಸಿಕ್ಕಂತಾಗಿದೆ. ಆದಾಯ ತೆರಿಗೆಗಳ ಕಾನೂನು ನಿಯಂತ್ರಕವಾದ ಸಿಬಿಡಿಟಿ ಎರಡು ಹೈಕೋರ್ಟ್​ಗಳ ನಿರ್ದೇಶನದ ಮೇರೆಗೆ ಈ ನಿರ್ಧಾರ ಕೈಗೊಂಡಿದೆ. ರಾಜಸ್ಥಾನ್ ಹೈಕೋರ್ಟ್ ಮತ್ತು ಕರ್ನಾಟಕ ಹೈಕೋರ್ಟ್ ಟ್ಯಾಕ್ಸ್ ಆಡಿಟ್ ರಿಪೋರ್ಟ್​ಗಳನ್ನು ಸಲ್ಲಿಸಲು ಡೆಡ್​ಲೈನ್ ಅನ್ನು ಅ. 31ರವರೆಗೆ ವಿಸ್ತರಿಸುವಂತೆ ಸಿಬಿಡಿಟಿಗೆ ನಿರ್ದೇಶನ ನೀಡಿದ್ದವು.

ತೆರಿಗೆ ಪಾವತಿದಾರರು ಹಾಗೂ ಪ್ರಾಕ್ಟೀಶನರ್​ಗಳಿಗೆ ಆಡಿಟ್ ರಿಪೋರ್ಟ್ ಅನ್ನು ಸರಿಯಾದ ಸಮಯಕ್ಕೆ ಮುಗಿಸಲು ಕೆಲ ಸಮಸ್ಯೆಗಳಿವೆ ಎಂದು ಹೇಳಿ ಚಾರ್ಟರ್ಡ್ ಅಕೌಂಟೆಂಟ್ ಸಂಘಟನೆಗಳು ಒಳಗೊಂಡಂತೆ ವಿವಿಧ ಸಂಘಟನೆಗಳ ಪ್ರತಿನಿಧಿಗಳು ಸಿಬಿಡಿಟಿಯನ್ನು ಸಂಪರ್ಕಿಸಿದ್ದುವಂತೆ. ದೇಶದ ಕೆಲ ಭಾಗಗಳಲ್ಲಿ ಪ್ರವಾಹ ಹಾಗು ಇತರ ನೈಸರ್ಗಿಕ ವಿಕೋಪಗಳಿಂದ ಬ್ಯುಸಿನೆಸ್ ಚಟುವಟಿಕೆಗೆ ಧಕ್ಕೆಯಾಗಿದೆ. ಇದರಿಂದ ಆಡಿಟ್ ಮಾಡುವುದು ವಿಳಂಬವಾಗಿದೆ ಎಂಬುದು ಈ ಸಂಘಟನೆಗಳ ವಾದವಾಗಿದೆ.

ಇದನ್ನೂ ಓದಿ: ಬ್ಯಾಂಕ್​ನಲ್ಲಿವೆ RTGS, NEFT, IMPS, ECS ACH ಪೇಮೆಂಟ್ ಸಿಸ್ಟಂಗಳು; ಯಾವುದಕ್ಕೆ ಎಷ್ಟಿದೆ ಶುಲ್ಕ? ಇಲ್ಲಿದೆ ಮಾಹಿತಿ

ಸಿಬಿಡಿಟಿ ಬಳಿ ಮನವಿ ಮಾಡಿದ್ದು ಮಾತ್ರವಲ್ಲ, ಈ ವಿಚಾರವು ವಿವಿಧ ಹೈಕೋರ್ಟ್​ಗಳಲ್ಲೂ ದಾಖಲಾಗಿದೆ. ಸದ್ಯ ರಾಜಸ್ಥಾನ್ ಹೈಕೋರ್ಟ್ ಮತ್ತು ಕರ್ನಾಟಕ ಹೈಕೋರ್ಟ್ ತೀರ್ಪು ನೀಡಿದ್ದು, ಡೆಡ್​ಲೈನ್ ವಿಸ್ತರಿಸುವಂತೆ ಸಿಬಿಡಿಟಿಗೆ ನಿರ್ದೇಶನ ನೀಡಿವೆ.

ಇದೇ ವೇಳೆ, ಇನ್ಕಮ್ ಟ್ಯಾಕ್ಸ್ ಇ ಫೈಲಿಂಗ್ ಪೋರ್ಟಲ್ ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎನ್ನುವ ಸುದ್ದಿಯನ್ನು ಸಿಬಿಡಿಟಿ ಅಲ್ಲಗಳೆದಿದೆ. ಪೋರ್ಟಲ್​ನಲ್ಲಿ ಯಾವುದೇ ತಾಂತ್ರಿಕ ದೋಷ ಇಲ್ಲ. ಟ್ಯಾಕ್ಸ್ ಆಡಿಟ್ ರಿಪೋರ್ಟ್​ಗಳು ಸರಿಯಾಗಿ ಅಪ್​ಲೋಡ್ ಆಗುತ್ತಿವೆ ಎಂದು ಸಿಬಿಡಿಟಿ ತನ್ನ ಸೋಷಿಯಲ್ ಮೀಡಿಯಾ ಪೋಸ್ಟ್​ನಲ್ಲಿ ಸ್ಪಷ್ಟಪಡಿಸಿದೆ.

ಇದನ್ನೂ ಓದಿ: ಭಾರತದ ಮೊಬೈಲ್ ರಫ್ತು ಕಡಿಮೆ ಆಗಿಲ್ಲ; ಆಗಸ್ಟ್​ನಲ್ಲಿ ಗಣನೀಯ ಏರಿಕೆ: ಐಸಿಇಎ ದತ್ತಾಂಶ ಬಿಡುಗಡೆ

ಸೆಪ್ಟೆಂಬರ್ 24ರಂದು ಒಂದೇ ದಿನ 60,000ಕ್ಕೂ ಅಧಿಕ ಟ್ಯಾಕ್ಸ್ ಆಡಿಟ್ ರಿಪೋರ್ಟ್​ಗಳು ಅಪ್​ಲೋಡ್ ಆಗಿವೆ. ಇಲ್ಲಿಯವರೆಗೆ ಅಪ್​ಲೋಡ್ ಆದ ಟಿಎಆರ್​ಗಳ ಸಂಖ್ಯೆ 4 ಲಕ್ಷಕ್ಕೂ ಅಧಿಕ. ಇದೇ ವೇಳೆ, ಸೆಪ್ಟೆಂಬರ್ 23ರವರೆಗೂ ಸಲ್ಲಿಕೆಯಾದ ಐಟಿ ರಿಟರ್ನ್​ಗಳ ಸಂಖ್ಯೆ 7.57 ಕೋಟಿಗೂ ಅಧಿಕ ಎಂದು ಹೇಳಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ