GST Collection: ಮೇ ತಿಂಗಳಲ್ಲಿ ಜಿಎಸ್​ಟಿ ಸಂಗ್ರಹ 1.57 ಲಕ್ಷ ಕೋಟಿ ರೂ; ಕರ್ನಾಟಕದಲ್ಲಿ ತೆರಿಗೆ ಕಲೆಕ್ಷನ್ ಎಷ್ಟು?

ನವದೆಹಲಿ: 2023ರ ಮೇ ತಿಂಗಳಲ್ಲಿ ಜಿಎಸ್​ಟಿ ತೆರಿಗೆಯಿಂದ ಆದ ಸಂಗ್ರಹ (GST Collection) 1.57 ಲಕ್ಷ ಕೋಟಿ ರೂ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಜೂನ್ 1ರಂದು ಬಿಡುಗಡೆ ಮಾಡಿದ ವರದಿಯಲ್ಲಿ ತಿಳಿಸಿದೆ. ಜಿಎಸ್​ಟಿ ಜಾರಿಯಾದಾಗಿನಿಂದ ಒಂದು ತಿಂಗಳಲ್ಲಿ ಜಿಎಸ್​ಟಿ ಸಂಗ್ರಹ ಒಂದೂವರೆ ಲಕ್ಷ ಕೋಟಿ ರೂ ದಾಟಿದ್ದು ಇದು ಐದನೇ ಬಾರಿ. ಹಾಗೆಯೇ, ಸತತ 15 ತಿಂಗಳು ಜಿಎಸ್​ಟಿ ಸಂಗ್ರಹ 1.4 ಲಕ್ಷ ಕೋಟಿಗಿಂತ ಹೆಚ್ಚಿದೆ. ಇನ್ನು, ಮೇ ತಿಂಗಳಲ್ಲಿ ಸಿಕ್ಕಿರುವ 1.57 ಲಕ್ಷ ಕೋಟಿ ರೂ ಹಿಂದಿನ ವರ್ಷದ ಇದೇ ತಿಂಗಳಿಗೆ ಹೋಲಿಸಿದರೆ ಶೇ. 12ರಷ್ಟು ಹೆಚ್ಚಳವಾಗಿದೆ. ಆದರೆ, ಏಪ್ರಿಲ್ ತಿಂಗಳಲ್ಲಿ ಜಿಎಸ್​ಟಿ 1.87 ಲಕ್ಷ ಕೋಟಿಯಷ್ಟು ಸಂಗ್ರಹವಾಗಿದ್ದು ದಾಖಲೆಯಾಗಿ ಇನ್ನೂ ಉಳಿದಿದೆ.

2023ರ ಮೇ ತಿಂಗಳ ಜಿಎಸ್​ಟಿ ಕಲೆಕ್ಷನ್ಸ್ ವಿವರ

• ಮೇ ತಿಂಗಳಲ್ಲಿ ಒಟ್ಟು ಜಿಎಸ್​ಟಿ ಸಂಗ್ರಹ: 1,57,090 ಕೋಟಿ ರೂ
• ಸಿಜಿಎಸ್​ಟಿ: 28,411 ಕೋಟಿ ರೂ
• ಎಸ್​ಜಿಎಸ್​ಟಿ: 35,828 ಕೋಟಿ ರೂ
• ಐಜಿಎಸ್​ಟಿ: 81,363 ಕೋಟಿ ರೂ
• ಸೆಸ್: 11,489 ಕೋಟಿ ರೂ

ಇದನ್ನೂ ಓದಿ: 7th Pay Commission: ಸರ್ಕಾರಿ ನೌಕರರಿಗೆ ಈ ಬಾರಿ ಡಬಲ್ ಧಮಾಕ; ಡಿಎ ಜೊತೆಗೆ ಫಿಟ್ಮೆಂಟ್ ಫ್ಯಾಕ್ಟರ್ ಕೂಡ ಹೆಚ್ಚಳ ಸಾಧ್ಯತೆ

ಇದರಲ್ಲಿ ಸಿಜಿಎಸ್​ಟಿಯು ಕೇಂದ್ರ ಸರ್ಕಾರಕ್ಕೆ ಸಲ್ಲಿಕೆಯಾಗುವ ಮೊತ್ತ. ಎಸ್​ಜಿಎಸ್​ಟಿಯು ರಾಜ್ಯದ ಪಾಲಾಗಿರುತ್ತದೆ. ಇನ್ನು ಐಜಿಎಸ್​ಟಿ ಎಂಬುದು ಅಂತರರಾಜ್ಯ ವಹಿವಾಟು ವೇಳೆ ಸಂಗ್ರಹವಾಗುವ ತೆರಿಗೆಯಾಗಿರುತ್ತದೆ.

ಒಟ್ಟಾರೆ ಮೇ ತಿಂಗಳಲ್ಲಿ ಸಂಗ್ರಹವಾದ 1.57 ಲಕ್ಷ ಕೋಟಿ ರೂ ಜಿಎಸ್​ಟಿ ಹಣದ ಪೈಕಿ ಕೇಂದ್ರ ಸರ್ಕಾರಕ್ಕೆ 63,780 ಕೋಟಿ ರೂ, ರಾಜ್ಯಗಳಿಗೆ 65,597 ಕೋಟಿ ರೂ ಸಂದಾಯವಾಗಿದೆ.

ಜಿಎಸ್​ಟಿ ಕಲೆಕ್ಷನ್​ನಲ್ಲಿ ಕರ್ನಾಟಕ ಎರಡನೇ ಸ್ಥಾನ

ಹಿಂದಿನ ತಿಂಗಳುಗಳಲ್ಲಿಯಂತೆ ಜಿಎಸ್​ಟಿ ಸಂಗ್ರಹದಲ್ಲಿ ಕರ್ನಾಟಕ ಎರಡನೇ ಸ್ಥಾನ ಕಾಯ್ದುಕೊಂಡಿದೆ. 2023ರ ಮೇ ತಿಂಗಳಲ್ಲಿ ಕರ್ನಾಟಕದಲ್ಲಿ ಜಿಎಸ್​ಟಿ ಸಂಗ್ರಹವಾಗಿದ್ದು 10,317 ಕೋಟಿ ರೂ. 23,536 ಕೋಟಿ ರೂ ಜಿಎಸ್​ಟಿ ಸಂಗ್ರಹ ಕಂಡಿರುವ ಮಹಾರಾಷ್ಟ್ರ ಮೊದಲ ಸ್ಥಾನದಲ್ಲಿದೆ. ಇದು ಸರ್ಕಾರದ ಪಿಐಬಿ ಇಲಾಖೆ ಬಿಡುಗಡೆ ಮಾಡಿರುವ ಮಾಹಿತಿ.

ಇದನ್ನೂ ಓದಿ: SpiceJet: ಕಳಾನಿಧಿ ಮಾರನ್​ಗೆ 380 ಕೋಟಿ ರೂ ಕೊಡಲು ಸ್ಪೈಸ್​ಜೆಟ್​ಗೆ ದೆಹಲಿ ಕೋರ್ಟ್ ಆದೇಶ; ಏನಿದು ಪ್ರಕರಣ?

2023 ಮೇ ತಿಂಗಳಲ್ಲಿ ಅತಿಹೆಚ್ಚು ಜಿಎಸ್​ಟಿ ಸಂಗ್ರಹವಾಗಿರುವ ಪ್ರಮುಖ ರಾಜ್ಯಗಳ ಪಟ್ಟಿ

1. ಮಹಾರಾಷ್ಟ್ರ: 23,536 ಕೋಟಿ ರೂ
2. ಕರ್ನಾಟಕ: 10,317 ಕೋಟಿ ರೂ
3. ಗುಜರಾತ್: 9800 ಕೋಟಿ ರೂ
4. ತಮಿಳುನಾಡು: 8,953 ಕೋಟಿ ರೂ
5. ಉತ್ತರಪ್ರದೇಶ: 7,468 ಕೋಟಿ ರೂ
6. ಹರ್ಯಾಣ: 7,250 ಕೋಟಿ ರೂ
7. ಪಶ್ಚಿಮ ಬಂಗಾಳ: 5,162 ಕೋಟಿ ರೂ
8. ದೆಹಲಿ: 5,147 ಕೋಟಿ ರೂ
9. ತೆಲಂಗಾಣ: 4,507 ಕೋಟಿ ರೂ
10. ಒಡಿಶಾ: 4,398 ಕೋಟಿ ರೂ
11. ಆಂಧ್ರಪ್ರದೇಶ: 3,373 ಕೋಟಿ ರೂ

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ