ಇಎಲ್​ಐ ಸ್ಕೀಮ್​​ಗೆ ಲಕ್ಷ ಕೋಟಿ ರೂ ಅನುದಾನ; ಕೇಂದ್ರ ಸಂಪುಟ ಅನುಮೋದನೆ; ಏನಿದು ಯೋಜನೆ?

ನವದೆಹಲಿ, ಜುಲೈ 1: ಉದ್ಯೋಗ ಜೋಡಿತ ಪ್ರೋತ್ಸಾಹಕ ಯೋಜನೆಯಾದ ಇಎಲ್​​ಐ ಸ್ಕೀಮ್​​ಗೆ (ELI scheme) ಒಂದು ಲಕ್ಷ ಕೋಟಿ ರೂ ಅನುದಾನ ಬಿಡುಗಡೆ ಮಾಡಲು ಕೇಂದ್ರ ಸಂಪುಟ (union cabinet) ಅನುಮೋದನೆ ನೀಡಿದೆ. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಇಂದು ಮಂಗಳವಾರ ನಡೆದ ಸಂಪುಟ ಸಭೆಯಲ್ಲಿ ಈ ಸಂಬಂಧ ಒಪ್ಪಿಗೆ ಮುದ್ರೆ ದೊರಕಿದೆ. ಈ ಇಎಲ್​​ಐ ಸ್ಕೀಮ್​​ಗೆ ಕೇಂದ್ರ ಸರ್ಕಾರವು 1.07 ಲಕ್ಷ ಕೋಟಿ ರೂ ಪ್ರೋತ್ಸಾಹಕ ಒದಗಿಸುತ್ತಿದೆ ಎಂದು ಕೇಂದ್ರ ಸಚಿವ ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ.

ಏನಿದು ಇಎಲ್​​ಐ ಸ್ಕೀಮ್?

2024-25ರ ಬಜೆಟ್​​ನಲ್ಲಿ ಉದ್ಯೋಗ, ಕೌಶಲ್ಯವೃದ್ಧಿ ಮತ್ತಿತರ ವಿಷಯಗಳಲ್ಲಿ ಯುವಜನರಿಗೆ ಪ್ರೋತ್ಸಾಹ ನೀಡಲು ಐದು ಸ್ಕೀಮ್​​​ಗಳ ಪಿಎಂ ಪ್ಯಾಕೇಜ್ ಘೋಷಿಸಲಾಗಿತ್ತು. ಅದರಲ್ಲಿ ಇಎಲ್​​ಐ ಕೂಡ ಒಂದು. ಎಲ್ಲಾ ಸೆಕ್ಟರ್​​ಗಳಲ್ಲೂ ಉದ್ಯೋಗ ಸೃಷ್ಟಿಗೆ ಉತ್ತೇಜಿಸಲು ಸರ್ಕಾರವು ಇಎಲ್​​ಐ ಸ್ಕೀಮ್ ಜಾರಿಗೆ ತಂದಿದೆ. ಎಲ್ಲಾ ಸೆಕ್ಟರ್​​ಗಳನ್ನು ಒಳಗೊಳ್ಳಲಾಗಿದೆಯಾದರೂ ತಯಾರಕ ಕ್ಷೇತ್ರವನ್ನು ಹೆಚ್ಚು ಗಮನದಲ್ಲಿಟ್ಟುಕೊಂಡು ಸ್ಕೀಮ್ ರೂಪಿಸಲಾಗಿದೆ. ಅದರಲ್ಲೂ ಮುಖ್ಯವಾಗಿ ಕೌಶಲ್ಯ ಕೊರತೆ ಇರುವ, ಕೆಳಹಂತದ ಉದ್ಯೋಗಗಳಿಗೆ ಅವಕಾಶ ನೀಡುವುದು, ಮತ್ತು ಕೌಶಲ್ಯ ಹೆಚ್ಚುವಂತೆ ಮಾಡುವುವುದು ಈ ಸ್ಕೀಮ್​​ನ ಉದ್ದೇಶವಾಗಿದೆ.

ಉದ್ಯೋಗಿಗೆ 15,000 ರೂ ಪ್ರೋತ್ಸಾಹಕ ಧನ

ಇಎಲ್​​ಐ ಸ್ಕೀಮ್ ಪ್ರಕಾರ, ಮೊದಲ ಬಾರಿ ಕೆಲಸಕ್ಕೆ ಸೇರುವ ವ್ಯಕ್ತಿಗೆ ಕೇಂದ್ರ ಸರ್ಕಾರ 15,000 ರೂವರೆಗೂ ಹಣ ನೀಡುತ್ತದೆ. ಎರಡು ಕಂತುಗಳಲ್ಲಿ ಇದನ್ನು ನೀಡಲಾಗುತ್ತದೆ. ಈ ಉದ್ಯೋಗಿಗೆ ಇದು ಮೊದಲ ಕೆಲಸವಾಗಿರಬೇಕು. ಇಪಿಎಫ್​ ಅಕೌಂಟ್ ಹೊಂದಿರಬೇಕು. ಕೆಲಸಕ್ಕೆ ಸೇರಿ ಆರು ತಿಂಗಳ ಬಳಿಕ ಮೊದಲ ಕಂತನ್ನು ಸರ್ಕಾರವು ನೀಡುತ್ತದೆ. ಒಂದು ವರ್ಷ ಅದೇ ಕಂಪನಿಯಲ್ಲಿ ಕೆಲಸ ಮಾಡಿದರೆ ಇನ್ನೊಂದು ಕಂತಿನ ಹಣ ನೀಡುತ್ತದೆ. ಆದರೆ, ಈ ಹಣವನ್ನು ಠೇವಣಿ ರೂಪದಲ್ಲಿ ಇಟ್ಟಿರಲಾಗುತ್ತದೆ. ಉದ್ಯೋಗಿಯು ನಂತರದ ದಿನಗಳಲ್ಲಿ ಇದನ್ನು ಬಳಸಬಹುದು. 1.92 ಕೋಟಿ ಹೊಸ ಕಾರ್ಮಿಕರಿಗೆ ಇದು ಅನುಕೂಲವಾಗುತ್ತದೆ.

ಇದನ್ನೂ ಓದಿ: ಬಿಗ್ ಬ್ಯೂಟಿಫುಲ್ ಬಿಲ್: 360 ಲಕ್ಷ ಕೋಟಿ ರೂನ ಈ ಹೊಸ ಕಾಯ್ದೆಯಲ್ಲಿ ಏನಿವೆ? ಇಲ್ಲಿದೆ ಹೈಲೈಟ್ಸ್

ಕೆಲಸ ಕೊಟ್ಟ ಕಂಪನಿಗಳಿಗೂ ಸರ್ಕಾರ ಉತ್ತೇಜನ

ಈ ಸ್ಕೀಮ್​​ನ ಮತ್ತೊಂದು ಭಾಗದಲ್ಲಿ, ಹೊಸ ಉದ್ಯೋಗಿಗಳಿಗೆ ಅವಕಾಶ ಕೊಡುವ ಕಂಪನಿಗಳಿಗೆ ಸರ್ಕಾರ ಪ್ರೋತ್ಸಾಹಕ ಧನ ನೀಡುತ್ತದೆ. ಹೆಚ್ಚುವರಿ ಉದ್ಯೋಗಾವಕಾಶ ಕೊಡುವ ಕಂಪನಿಗಳಿಗೆ ಪ್ರತೀ ಉದ್ಯೋಗಿಗೂ ತಿಂಗಳಿಗೆ 3,000 ರೂವರೆಗೆ ಹಣವನ್ನು ಎರಡು ವರ್ಷ ಕಾಲ ನೀಡುತ್ತದೆ. ಮ್ಯಾನುಫ್ಯಾಕ್ಚರಿಂಗ್ ಸೆಕ್ಟರ್​​ನಲ್ಲಿ ಈ ಇನ್ಸೆಂಟಿವ್ಸ್ ಇನ್ನೂ ಎರಡು ವರ್ಷ ಮುಂದುವರಿಯುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ