Forex Reserves: 654 ಬಿಲಿಯನ್ ಡಾಲರ್ ಮುಟ್ಟಿದ ಫಾರೆಕ್ಸ್ ರಿಸರ್ವ್ಸ್; ಎರಡು ವರ್ಷದಲ್ಲೇ ಅತಿಹೆಚ್ಚು ಏರಿಕೆ
Forex reserves of India: ಭಾರತದ ಫಾರೆಕ್ಸ್ ರಿಸರ್ವ್ಸ್ ಮಾರ್ಚ್ 7ಕ್ಕೆ 653.966 ಬಿಲಿಯನ್ ಡಾಲರ್ ಮಟ್ಟದಲ್ಲಿದೆ ಎಂದು ಆರ್ಬಿಐ ಡಾಟಾ ಹೇಳುತ್ತಿದೆ. ಒಂದು ವಾರದಲ್ಲಿ 15.267 ಬಿಲಿಯನ್ ಡಾಲರ್ನಷ್ಟು ಹೆಚ್ಚಳ ಆಗಿದೆ. ಕಳೆದ ಎರಡು ವರ್ಷದಲ್ಲಿ ಒಂದು ವಾರದಲ್ಲಿ ಕಂಡ ಗರಿಷ್ಟ ಏರಿಕೆ ಅದು. ಫಾರೆಕ್ಸ್ ನಿಧಿಯ ಏರಿಕೆಯಲ್ಲಿ ಫಾರೀನ್ ಕರೆನ್ಸಿ ಆಸ್ತಿ ಪಾಲು ಅತಿಹೆಚ್ಚು.
ನವದೆಹಲಿ, ಮಾರ್ಚ್ 16: ಭಾರತದ ವಿದೇಶೀ ವಿನಿಮಯ ಮೀಸಲು ನಿಧಿ (Forex Reserves) ಒಂದು ವಾರದಲ್ಲಿ 15.267 ಬಿಲಿಯನ್ ಡಾಲರ್ನಷ್ಟು ಹೆಚ್ಚಳವಾಗಿದೆ. ಕಳೆದ ಎರಡು ವರ್ಷದಲ್ಲೇ ಒಂದು ವಾರದ ಫಾರೆಕ್ಸ್ ರಿಸರ್ವ್ಸ್ ಕಂಡ ಗರಿಷ್ಠ ಏರಿಕೆ ಆಗಿದೆ. ಆರ್ಬಿಐ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಮಾರ್ಚ್ 7ರಂದು ಅಂತ್ಯಗೊಂಡ ವಾರದಲ್ಲಿ ಈ ಏರಿಕೆ ಆಗಿದೆ. ಇದರೊಂದಿಗೆ ಭಾರತದ ಫಾರೆಕ್ಸ್ ಮೀಸಲು ನಿಧಿ 653.966 ಬಿಲಿಯನ್ ಡಾಲರ್ ಮೊತ್ತ ಮುಟ್ಟಿದೆ. ಹಿಂದಿನ ವಾರದಲ್ಲಿ ಅದು 638.698 ಬಿಲಿಯನ್ ಡಾಲರ್ನಷ್ಟಿತ್ತು.
ಮಾರ್ಚ್ 3ರಿಂದ 7ರವರೆಗೆ ಏರಿಕೆಯಾದ 15.267 ಬಿಲಿಯನ್ ಡಾಲರ್ ಫಾರೆಕ್ಸ್ ಮೀಸಲು ನಿಧಿಯಲ್ಲಿ ವಿದೇಶೀ ಕರೆನ್ಸಿ ಆಸ್ತಿಯದ್ದೇ ಸಿಂಹಪಾಲು. ಇದು 13.993 ಬಿಲಿಯನ್ ಡಾಲರ್ನಷ್ಟು ಹಿಗ್ಗಿದೆ. ಚಿನ್ನವೂ ಕೂಡ 1.053 ಬಿಲಿಯನ್ ಡಾಲರ್ನಷ್ಟು ಹೆಚ್ಚಳ ಆಗಿದೆ. ಎಸ್ಡಿಆರ್ಗಳು 212 ಮಿಲಿಯನ್ ಡಾಲರ್ನಷ್ಟು ಹೆಚ್ಚಳಗೊಂಡಿವೆ. ಆದರೆ, ಐಎಂಎಫ್ನೊಂದಿಗಿನ ಮೀಸಲು ಸ್ಥಾನವು 69 ಮಿಲಿಯನ್ ಡಾಲರ್ನಷ್ಟು ಇಳಿಕೆ ಆಗಿದೆ.
ಇದನ್ನೂ ಓದಿ: ಆರ್ಬಿಐ ಈ ವರ್ಷ ಇನ್ನೂ ಮೂರು ಬಾರಿ ಬಡ್ಡಿದರ ಕಡಿತಗೊಳಿಸಬಹುದು: ಎಸ್ಬಿಐ ವರದಿ
ಹಣದ ಹರಿವು ಹೆಚ್ಚಿಸಲು ಆರ್ಬಿಐ ಫೆಬ್ರುವರಿ 28ರಂದು ಸಾಕಷ್ಟು ವಿದೇಶೀ ಕರೆನ್ಸಿಗಳನ್ನು ಖರೀದಿಸಿದೆ. ಹೀಗಾಗಿ, ಫಾರೆಕ್ಸ್ ಮೀಸಲು ನಿಧಿ ಗಣನೀಯವಾಗಿ ಹೆಚ್ಚಿದೆ.
ಮಾರ್ಚ್ 7ರಂದು ಭಾರತದ ಫಾರೆಕ್ಸ್ ಮೀಸಲು ನಿಧಿ
ಒಟ್ಟು ಫಾರೆಕ್ಸ್ ಮೀಸಲು ನಿಧಿ: 653.966 ಬಿಲಿಯನ್ ಡಾಲರ್
- ವಿದೇಶೀ ಕರೆನ್ಸಿ ಆಸ್ತಿ: 557.282 ಬಿಲಿಯನ್ ಡಾಲರ್
- ಚಿನ್ನದ ಆಸ್ತಿ: 74.325 ಬಿಲಿಯನ್ ಡಾಲರ್
- ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್: 18.21 ಬಿಲಿಯನ್ ಡಾಲರ್
- ಐಎಂಎಫ್ನಲ್ಲಿರುವ ನಿಧಿ: 4.148 ಬಿಲಿಯನ್ ಡಾಲರ್
2024ರ ಸೆಪ್ಟೆಂಬರ್ ಕೊನೆಯಲ್ಲಿ ಭಾರತದ ಫಾರೆಕ್ಸ್ ಮೀಸಲು ನಿಧಿ 704.885 ಬಿಲಿಯನ್ ಡಾಲರ್ ತಲುಪಿತ್ತು. ಅದು ಭಾರತದ ಫಾರೆಕ್ಸ್ ಇತಿಹಾಸದಲ್ಲೇ ಗರಿಷ್ಠ ಮೀಸಲು ಸಂಪತ್ತಿನ ಮಟ್ಟವಾಗಿದೆ. ಅದಾದ ಬಳಿಕ ರುಪಾಯಿ ಕರೆನ್ಸಿಯ ಕುಸಿತ ತಡೆಯಲು ಆರ್ಬಿಐ ನಿರ್ದಿಷ್ಟ ಕ್ರಮಗಳನ್ನು ತೆಗೆದುಕೊಂಡ ಪರಿಣಾಮ ಫಾರೆಕ್ಸ್ ಸಂಪತ್ತು ಸ್ವಲ್ಪಸ್ವಲ್ಪವೇ ಕರಗುತ್ತಾ ಬಂದಿದೆ.
ಇದನ್ನೂ ಓದಿ: ಫೆಬ್ರುವರಿಯಲ್ಲಿ ಹಣದುಬ್ಬರ ಶೇ 3.61ಕ್ಕೆ ಇಳಿಕೆ; ನಿರೀಕ್ಷೆಗಿಂತ ಕೆಳಗಿಳಿದ ಬೆಲೆ ಏರಿಕೆ ದರ
ಜಾಗತಿಕವಾಗಿ ಅತಿಹೆಚ್ಚು ಫಾರೆಕ್ಸ್ ಮೀಸಲು ನಿಧಿ ಹೊಂದಿರುವ ದೇಶಗಳ ಪಟ್ಟಿಯಲ್ಲಿ ಭಾರತ 4ನೇ ಸ್ಥಾನದಲ್ಲಿದೆ. ಚೀನಾ ಮೂರೂವರೆ ಟ್ರಿಲಿಯನ್ ಡಾಲರ್ಗಿಂತಲೂ ಅಧಿಕ ಮೌಲ್ಯದ ಫಾರೆಕ್ಸ್ ಮೀಸಲು ಸಂಪತ್ತನ್ನು ಹೊಂದಿದೆ. ಜಪಾನ್ ದೇಶದ ಸಂಪತ್ತು ಒಂದು ಟ್ರಿಲಿಯನ್ ಡಾಲರ್ಗೂ ಹೆಚ್ಚಿದೆ. ಸ್ವಿಟ್ಜರ್ಲ್ಯಾಂಡ್ನ ಫಾರೆಕ್ಸ್ ಮೀಸಲು ನಿಧಿ ಒಂದು ಟ್ರಿಲಿಯನ್ ಡಾಲರ್ ಗಡಿ ಸಮೀಪವೇ ಇದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 10:54 am, Sun, 16 March 25