Foxconn: ತೆಲಂಗಾಣಕ್ಕೆ ಹೋಯ್ತು ಫಾಕ್ಸ್​ಕಾನ್; 200 ಎಕರೆ ಜಾಗದಲ್ಲಿ ಆ್ಯಪಲ್ ಏರ್​ಪಾಡ್ ತಯಾರಿಕೆ; ಕರ್ನಾಟಕಕ್ಕೆ ಕೈಕೊಟ್ಟಿತಾ ತೈವಾನೀ ಕಂಪನಿ?

ನವದೆಹಲಿ: ಆ್ಯಪಲ್ ಉತ್ಪನ್ನಗಳ ಪ್ರಮುಖ ತಯಾರಕಾ ಕಂಪನಿ ಫಾಕ್ಸ್​ಕಾನ್ (Foxconn- Hon Hai Precision) ತೆಲಂಗಾಣದಲ್ಲಿ ಫ್ಯಾಕ್ಟರಿ ಸ್ಥಾಪಿಸುವುದು ಖಚಿತ ಎನ್ನಲಾಗಿದೆ. ಆ್ಯಪಲ್​ನ ವಯರ್ಲೆಸ್ ಇಯರ್ ಫೋನ್ ಆದ ಏರ್​ಪಾಡ್​ಗಳನ್ನು (AirPod) ತಯಾರಿಸುವ ಗುತ್ತಿಗೆಯನ್ನು ಫಾಕ್ಸ್​ಕಾನ್ ಪಡೆದಿದೆ. ಹೈದರಾಬಾದ್ ಸಮೀಪದ ಸ್ಥಳದಲ್ಲಿ 200 ಎಕರೆ ಜಾಗದಲ್ಲಿ ಇದರ ತಯಾರಿಕಾ ಘಟಕ ಸ್ಥಾಪಿಸಲು ನಿರ್ಧರಿಸಿರುವುದು ತಿಳಿದುಬಂದಿದೆ. ಫಾಕ್ಸ್​ಕಾನ್ ಕಂಪನಿ ತೈವಾನ್ ಮೂಲದ್ದು. ಆ್ಯಪಲ್​ನ ಬಹುತೇಕ ಐಫೋನ್​ಗಳನ್ನು ಅಸೆಂಬಲ್ ಮಾಡುವುದು ಫಾಕ್ಸ್​ಕಾನ್ ಕಂಪನಿಯೇ. ತೈವಾನ್ ಮೂಲದ್ದೇ ಆದ ವಿಸ್ಟ್ರಾನ್ ಮತ್ತು ಪೆಗಾಟ್ರಾನ್ ಕಂಪನಿಗಳೂ ಐಫೋನ್ ತಯಾರಿಕೆಯ ಗುತ್ತಿಗೆ ಪಡೆದಿರುವ ಇತರ ಕಂಪನಿಗಳು. ಆದರೆ, ಶೇ. 70ರಷ್ಟು ಐಫೋನ್​ಗಳನ್ನು ಫಾಕ್ಸ್​ಕಾನ್ ಒಂದೇ ತಯಾರಿಸುತ್ತದೆ. ಆದರೆ, ಆ್ಯಪಲ್​ನ ಮತ್ತೊಂದು ಪ್ರಮುಖ ಉತ್ಪನ್ನವಾದ ಏರ್​ಪಾಡ್ ಸರಬರಾಜು ಮಾಡುವ ಗುತ್ತಿಗೆ ಫಾಕ್ಸ್​ಕಾನ್​ಗೆ ಸಿಕ್ಕಿರುವುದು ಇದೇ ಮೊದಲು. ಈ ಏರ್​ಪಾಡ್ ಅನ್ನು ಚೀನಾದ ವಿವಿಧ ಕಂಪನಿಗಳು ಆ್ಯಪಲ್​ಗೆ ಸರಬರಾಜು ಮಾಡುತ್ತಿದ್ದವು. ಈಗ ಚೀನಾದ ಆಚೆ ಇವುಗಳನ್ನು ತಯಾರಿಸಲು ಆ್ಯಪಲ್ ನಿರ್ಧರಿಸಿರುವ ಹಿನ್ನೆಲೆಯಲ್ಲಿ ಫಾಕ್ಸ್​ಕಾನ್​ಗೆ ಅವಕಾಶ ಸಿಕ್ಕಿದೆ.

ರಾಯ್ಟರ್ಸ್ ವರದಿ ಪ್ರಕಾರ ಫಾಕ್ಸ್​ಕಾನ್ ಸಂಸ್ಥೆ ಏರ್​ಪಾಡ್ ತಯಾರಿಕೆಗಾಗಿ ತೆಲಂಗಾಣದಲ್ಲಿ 200 ಎಕರೆ ಜಾಗದಲ್ಲಿ ಘಟಕ ಆರಂಭಿಸಲಿದೆ. ಇದರಲ್ಲಿ ಫಾಕ್ಸ್​ಕಾನ್ ಸುಮಾರು 200 ಮಿಲಿಯನ್ ಡಾಲರ್​ಗಿಂತ (1,600 ಕೋಟಿ ರುಪಾಯಿ) ಹೆಚ್ಚು ಹಣ ಹೂಡಿಕೆ ಮಾಡಲಿದೆ. ಈ ವರ್ಷದ ದ್ವಿತೀಯಾರ್ಧದಲ್ಲಿ ಈ ಘಟಕ ಆರಂಭವಾಗಿ, 2023ರ ಅಂತ್ಯದೊಳಗೆ ಉತ್ಪಾದನೆ ಕೂಡ ಶುರುವಾಗಬಹುದು ಎನ್ನಲಾಗಿದೆ.

ಏರ್​ಪಾಡ್​ನಲ್ಲಿ ಲಾಭ ಕಡಿಮೆ: ಫಾಕ್ಸ್​ಕಾನ್ ಮುಂದಾಲೋಚನೆ ನಿರ್ಧಾರ

ಆ್ಯಪಲ್​ನ ಏರ್​ಪಾಡ್​ಗಳನ್ನು ಗುತ್ತಿಗೆ ಪಡೆಯುವ ಆಫರ್ ಫಾಕ್ಸ್​ಕಾನ್​ಗೆ ಬಹಳ ದಿನಗಳ ಹಿಂದೆಯೇ ಇತ್ತು. ಈ ಏರ್​ಪಾಡ್​​ಗಳಿಂದ ಹೆಚ್ಚಿನ ಲಾಭ ಸಿಗುವುದಿಲ್ಲ ಎಂಬ ಕಾರಣಕ್ಕೆ ಫಾಕ್ಸ್​ಕಾನ್ ಗೊಂದಲದಲ್ಲಿತ್ತು. ತಿಂಗಳುಗಟ್ಟಲೆ ಈ ಬಗ್ಗೆ ಆಂತರಿಕವಾಗಿ ಚರ್ಚೆಗಳನ್ನು ನಡೆಸಿದ ಬಳಿಕ ಫಾಕ್ಸ್​ಕಾನ್ ಅಂತಿಮವಾಗಿ ಈ ಗುತ್ತಿಗೆಗೆ ಒಪ್ಪಿಕೊಂಡಿದೆ.

ಇದನ್ನೂ ಓದಿ: Credit Suisse: ಜಾಗತಿಕ ಬ್ಯಾಂಕಿಂಗ್ ದೈತ್ಯ ಕ್ರೆಡಿಟ್ ಸ್ವೀಸ್ ಪತನ ಸಾಧ್ಯತೆ; ಭಾರತಕ್ಕೆ ತಲೆನೋವಾಗುತ್ತಾ ಈ ಸ್ವಿಸ್ ಬ್ಯಾಂಕ್? ವಾಸ್ತವ ಪರಿಸ್ಥಿತಿ ಹೇಗಿದೆ?

ಏರ್​ಪಾಡ್​ಗಳ ತಯಾರಿಕೆಯಿಂದ ಹೆಚ್ಚು ಲಾಭ ಬರದೇ ಹೋದರೂ ಭವಿಷ್ಯದಲ್ಲಿ ಆ್ಯಪಲ್​ನ ಹೊಸ ಉತ್ಪನ್ನಗಳ ಸರಬರಾಜಿಗೆ ತನಗೇ ಗುತ್ತಿಗೆ ಸಿಗಬಹುದು ಎಂಬ ಆಶಯದಲ್ಲಿ ಫಾಕ್ಸ್​ಕಾನ್ ಧೈರ್ಯದಿಂದ ಹೆಜ್ಜೆ ಇಟ್ಟಿದೆ.

ಬೆಂಗಳೂರಿನಲ್ಲಿ ಫಾಕ್ಸ್​ಕಾನ್​ನ ಘಟಕ ಸ್ಥಾಪನೆ ಆಗುವುದಿಲ್ಲವಾ?

ಎರಡು ವಾರಗಳ ಹಿಂದೆ ಫಾಕ್ಸ್​ಕಾನ್​ನ ಐಫೋನ್ ಫ್ಯಾಕ್ಟರಿ ಸ್ಥಾಪನೆ ವಿಚಾರದಲ್ಲಿ ತೆಲಂಗಾಣ ಮತ್ತು ಕರ್ನಾಟಕ ಹೆಸರು ಕೇಳಿಬಂದಿತ್ತು. ಎರಡೂ ರಾಜ್ಯಗಳ ಜೊತೆ ಫಾಕ್ಸ್​ಕಾನ್ ಒಡಂಬಡಿಕೆ (ಎಂಒಯು) ಮಾಡಿಕೊಂಡಿತ್ತು. ಈಗ ತೆಲಂಗಾಣದಲ್ಲಿ ಆ್ಯಪಲ್​ನ ಏರ್​ಪಾಡ್ ಉತ್ಪಾದನೆಗೆ ಫಾಕ್ಸ್​ಕಾನ್ ಘಟಕ ಸ್ಥಾಪಿಸುವುದು ಬಹುತೇಕ ಖಚಿತ ಎಂಬಂತಾಗಿದೆ. ಹಾಗಾದರೆ, ಕರ್ನಾಟಕವನ್ನು ಫಾಕ್ಸ್​ಕಾನ್ ಕೈಬಿಟ್ಟಿತಾ ಎಂಬ ಪ್ರಶ್ನೆ ಇದೆ. ಈ ಬಗ್ಗೆ ಫಾಕ್ಸ್​ಕಾನ್ ಆಗಲೀ ಅಥವಾ ಕರ್ನಾಟಕ ಸರ್ಕಾರವಾಗಲೀ ಏನೂ ಸ್ಪಷ್ಟನೆ ಕೊಟ್ಟಿಲ್ಲ. ಕರ್ನಾಟಕದಲ್ಲಿ ಐಫೋನ್ ತಯಾರಿಕೆಗೆ ಫಾಕ್ಸ್​ಕಾನ್ ಯೋಜನೆಯೇನಾದರೂ ರೂಪಿಸಿದೆಯಾ ಎಂಬುದು ಸ್ಪಷ್ಟಗೊಳ್ಳಬೇಕಿದೆ. ಐಫೋನ್ ಘಟಕದ ಯೋಜನೆ ಫಾಕ್ಸ್​ಕಾನ್ ತಲೆಯಲ್ಲಿ ಇಲ್ಲವೆಂದಾದರೆ ಕರ್ನಾಟಕಕ್ಕೆ ಫಾಕ್ಸ್​ಕಾನ್​ನ ಫ್ಯಾಕ್ಟರಿ ಕೈತಪ್ಪಿತು ಎಂದೇ ಆಗುತ್ತದೆ.

ಇನ್ನಷ್ಟು ವ್ಯವಹಾರ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ