ಭಾರತದಲ್ಲಿ ಸ್ಟಾರ್ಟಪ್​ಗಳಿಗೆ ಮತ್ತೆ ಫಂಡಿಂಗ್ ಸುಗ್ಗಿ; ಒಂದೇ ವಾರದಲ್ಲಿ ಮೂರು ಪಟ್ಟು ಬಂಡವಾಳ ಹೆಚ್ಚಳ

ನವದೆಹಲಿ, ಅಕ್ಟೋಬರ್ 20: ಭಾರತದ ಸ್ಟಾರ್ಟಪ್ ಜಗತ್ತಿಗೆ ಈ ವಾರ ಒಳ್ಳೆಯ ಸುಗ್ಗಿ ಕಾಲ ಎನಿಸಿದೆ. 39 ಸ್ಟಾರ್ಟಪ್​ಗಳು ಒಟ್ಟಾರೆ 449 ಮಿಲಿಯನ್ ಡಾಲರ್​ನಷ್ಟು ಬಂಡವಾಳ ಪಡೆಯಲು ಯಶಸ್ವಿಯಾಗಿವೆ. ಹಿಂದಿನ ವಾರದಲ್ಲಿ ಸ್ಟಾರ್ಟಪ್​ಗಳು ಸಂಗ್ರಹಿಸಿದ ಫಂಡಿಂಗ್ ಮೊತ್ತ 135 ಮಿಲಿಯನ್ ಮಾತ್ರ. ಅದಕ್ಕೆ ಹೋಲಿಸಿದರೆ ಈ ವಾರ ಮೂರು ಪಟ್ಟು ಹೆಚ್ಚು ಫಂಡಿಂಗ್ ಗಿಟ್ಟಿಸಿವೆ.

ಇಲ್ಲಿ ಸೀಡ್ ಫಂಡಿಂಗ್ ಅಥವಾ ಆರಂಭಿಕ ಬಂಡವಾಳ ಸಂಗ್ರಹ ಈ ವಾರ 26.5 ಮಿಲಿಯನ್ ಡಾಲರ್ ಇದೆ. ಹಿಂದಿನ ವಾರ ಗಳಿಸಿದ 17.8 ಮಿಲಿಯನ್ ಡಾಲರ್​ಗೆ ಹೋಲಿಸಿದರೆ ಸೀಡ್ ಫಂಡಿಂಗ್​ನಲ್ಲಿ ಶೇ. 48.8ರಷ್ಟು ಹೆಚ್ಚಳ ಆಗಿದೆ. ಭಾರತದಲ್ಲಿ ಸ್ಟಾರ್ಟಪ್ ಇಕೋಸಿಸ್ಟಂನಲ್ಲಿ ಹೂಡಿಕೆ ಚುರುಕುಗೊಂಡಿರುವ ದ್ಯೋತಕ ಇದಾಗಿದೆ.

ಇದನ್ನೂ ಓದಿ: ಅಂಬಾನಿ ವರ್ಸಸ್ ಮಸ್ಕ್; ಭಾರತೀಯ ಸೆಟಿಲೈಟ್ ಇಂಟರ್ನೆಟ್ ಯುದ್ಧದಲ್ಲಿ ಗೆಲ್ಲೋದ್ಯಾರು?

ಶಿಕ್ಷಣ ತಂತ್ರಜ್ಞಾನದ ಕಂಪನಿಯಾದ ಎರುಡಿಟಸ್ 150 ಮಿಲಿಯನ್ ಡಾಲರ್ ಫಂಡಿಂಗ್ ಗಿಟ್ಟಿಸುವಲ್ಲಿ ಯಶಸ್ವಿಯಾಗಿದೆ. ಟಿಪಿಜಿ, ಸಾಫ್ಟ್​​ಬ್ಯಾಂಕ್, ಲೀಡ್ಸ್ ಇಲ್ಲೂಮಿನೇಟ್, ಆಕ್ಸಲ್, ಸಿಪಿಪಿ ಇನ್ವೆಸ್ಟ್​ಮೆಂಟ್ಸ್, ಚಾನ್ ಜುಕರ್ಬರ್ಗ್ ಅವರು ಭಾರತದ ಎರುಡಿಟಸ್ ಸ್ಟಾರ್ಟಪ್​ಗೆ ಫಂಡಿಂಗ್ ಒದಗಿಸಿವೆ.

ಪರ್ಫ್ಯೂಮ್, ಸ್ಕಿನ್​ಕೇರ್ ಇತ್ಯಾದಿ ಸೌಂದರ್ಯವರ್ಧಕಗಳ ಪ್ಲಾಟ್​ಫಾರ್ಮ್ ಆಗಿರುವ ಪರ್ಪಲ್ (Purplle) ಕಂಪನಿ 500 ಕೋಟಿ ರೂ ಫಂಡಿಂಗ್ ಪಡೆದಿದೆ. ಇದರೊಂದಿಗೆ ಅದರ ಒಟ್ಟಾರೆ ಬಂಡವಾಳ ಸಂಗ್ರಹ 1,500 ಕೋಟಿ ರೂ ಆದಂತಾಗಿದೆ. ಅಬುಭಾದಿ ಇನ್ವೆಸ್ಟ್​​ಮೆಂಟ್ ಅಥಾರಿಟಿ, ಪ್ರೇಮ್​ಜಿ ಇನ್ವೆಸ್ಟ್, ಬ್ಲೂಮ್ ವೆಂಚರ್ಸ್ ಕಂಪನಿಗಳು ಪರ್ಪಲ್​​ಗೆ ಫಂಡಿಂಗ್ ನೀಡಿವೆ.

ಜಿವಾ ಜ್ಯೂವೆಲರಿ, ಸಾಸ್ ಮೊದಲಾದ ಸ್ಟಾರ್ಟಪ್​ಗಳು ವಿವಿಧೆಡೆಯಿಂದ ಫಂಡಿಂಗ್ ಪಡೆದಿವೆ.

ಇದನ್ನೂ ಓದಿ: ಇನ್ಷೂರೆನ್ಸ್ ಪ್ರೀಮಿಯಮ್​ಗಳಿಗೆ ತೆರಿಗೆ ವಿನಾಯಿತಿ; ಸೈಕಲ್, ನೋಟ್​ಬುಕ್​ಗೆ ಜಿಎಸ್​ಟಿ ಇಳಿಕೆ; ದುಬಾರಿ ವಾಚು, ಶೂಗಳಿಗೆ ತೆರಿಗೆ ಹೆಚ್ಚಳಕ್ಕೆ ಪ್ರಸ್ತಾಪ

ಜುಲೈನಿಂದ ಸೆಪ್ಟೆಂಬರ್ ಅವಧಿಯಲ್ಲಿ ಫಿನ್​ಟೆಕ್ ಸ್ಟಾರ್ಟಪ್​ಗಳು 778 ಮಿಲಿಯನ್ ಡಾಲರ್ ಮೊತ್ತದ ಫಂಡಿಂಗ್ ಪಡೆದಿವೆ. ಅಮೆರಿಕ ಬಿಟ್ಟರೆ ಭಾರತದ ಫಿನ್​ಟೆಕ್ ಕಂಪನಿಗಳೇ ಈ ಅವಧಿಯಲ್ಲಿ ಅತಿಹೆಚ್ಚು ಬಂಡವಾಳ ಕಲೆಹಾಕಿರುವುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ