ದೇಶೀಯ ಕಚ್ಚಾ ಅನಿಲ ಉತ್ಪಾದನೆಯಲ್ಲಿ ಇಳಿಕೆ; ಸಿಎನ್ಜಿ ದರ ಹೆಚ್ಚಳ ಸಾಧ್ಯತೆ
CNG prices may go higher: ದೇಶೀಯವಾಗಿ ಕಚ್ಚಾ ನೈಸರ್ಗಿಕ ಅನಿಲದ ಉತ್ಪಾದನೆ ಕಡಿಮೆಗೊಳಿಸಲಾಗುತ್ತಿದ್ದು, ಇದರಿಂದ ಸಿಎನ್ಜಿ ರೀಟೇಲ್ ಬೆಲೆ ಹೆಚ್ಚಳ ಸಾಧ್ಯತೆ ಇದೆ. ಸಿಎನ್ಜಿ ರೀಟೇಲ್ ಮಾರಾಟಗಾರರಿಗೆ ಸರಬರಾಜಾಗುವ ಗ್ಯಾಸ್ ಶೇ. 20ರಷ್ಟು ಕಡಿಮೆ ಆಗಿದೆ. ಇದನ್ನು ಸರಿದೂಗಿಸಲು ಎಲ್ಎನ್ಜಿಯನ್ನು ಆಮದು ಮಾಡಲಾಗುತ್ತಿದೆ. ಹೀಗಾಗಿ, ಸಿಎನ್ಜಿ ಬೆಲೆ ಶೇ. 4-6ರಷ್ಟು ಏರಿಕೆ ಆಗಬಹುದು.
Updated on: Oct 20, 2024 | 12:43 PM
ನವದೆಹಲಿ, ಅಕ್ಟೋಬರ್ 20: ಸಿಎನ್ಜಿ ಗ್ಯಾಸ್ ಬೆಲೆ ಒಂದು ಕಿಲೋಗೆ 4ರಿಂದ 6 ರೂನಷ್ಟು ಏರಿಕೆ ಆಗುವ ಸಾಧ್ಯತೆ ಇದೆ. ದೇಶೀಯವಾಗಿ ಉತ್ಪಾದನೆಯಾಗುವ ಅಗ್ಗದ ನೈಸರ್ಗಿಕ ಅನಿಲದ ಸರಬರಾಜು ಕಡಿಮೆಗೊಳಿಸಲಾಗಿದೆ. ನಗರದ ರೀಟೇಲ್ ಮಾರಾಟಗಾರರಿಗೆ ಸಿಎನ್ಜಿ ಸರಬರಾಜನ್ನು ಶೇ. 20ರವರೆಗೂ ಕಡಿಮೆಗೊಳಿಸಿದೆ. ಒಂದು ವೇಳೆ ಸರ್ಕಾರ ಅಬಕಾರಿ ಸುಂಕವನ್ನು ಕಡಿಮೆಗೊಳಿಸದೇ ಹೋದಲ್ಲಿ, ಸಿಎನ್ಜಿ ಬೆಲೆ ಶೇ. 4ರಿಂದ 6ರಷ್ಟು ಹೆಚ್ಚುವ ನಿರೀಕ್ಷೆ ಇದೆ.
ಅರಬ್ಬಿ ಸಮುದ್ರ ಮತ್ತು ಬಂಗಾಳ ಕೊಲ್ಲಿಯ ವಿವಿಧ ಭಾಗಗಳಿಂದ ನೆಲದ ಕೆಳಗಿಂದ ನೈಸರ್ಗಿಕ ಅನಿಲ ಸಂಪನ್ಮೂಲ ಸಿಗುತ್ತದೆ. ಇದನ್ನು ಸಿಎನ್ಜಿಯಾಗಿ ಪರಿವರ್ತಿಸಿ, ಅದನ್ನು ವಾಹನಗಳು ಹಾಗೂ ಗೃಹ ಅಡುಗೆ ಅನಿಲವಾಗಿ (Piped gas) ಬಳಕೆಗೆ ಸರಬರಾಜು ಮಾಡಲಾಗುತ್ತದೆ.
ನೈಸರ್ಗಿಕ ಅನಿಲದ ಲಭ್ಯತೆ ಕಡಿಮೆ ಆಗುತ್ತಿರುವುದರಿಂದ ಕಚ್ಛಾ ಅನಿಲದ ಉತ್ಪಾದನೆ ಪ್ರತೀ ವರ್ಷ ಶೇ. 5ರಷ್ಟು ಕಡಿಮೆ ಆಗುತ್ತಿದೆ. ಇದರಿಂದ ನಗರದ ಗ್ಯಾಸ್ ರೀಟೇಲ್ ಮಾರಾಟಗಾರರಿಗೆ ಸರಬರಾಜು ಕಡಿಮೆ ಆಗುತ್ತಿದೆ ಎಂದು ವರದಿಗಳು ಹೇಳುತ್ತಿವೆ. ಭಾರತದಲ್ಲಿ ಉತ್ಪಾದನೆಯಾಗುವ ಕಚ್ಚಾ ಅನಿಲವು 2023ರ ಮೇ ತಿಂಗಳಲ್ಲಿ ಭಾರತದ ಶೇ. 90ರಷ್ಟು ಸಿಎನ್ಜಿ ಅಗತ್ಯವನ್ನು ಪೂರೈಸುತ್ತಿತ್ತು. ಸೆಪ್ಟೆಂಬರ್ನಲ್ಲಿ ದೇಶಾದ್ಯಂತ ಅಗತ್ಯ ಇರುವ ಸಿಎನ್ಜಿಯಲ್ಲಿ ಶೇ. 67.74ರಷ್ಟನ್ನು ಮಾತ್ರ ಪೂರೈಸಲು ಆಗುತ್ತಿತ್ತು. ಅಕ್ಟೋಬರ್ 16ರಿಂದ ಇದು ಶೇ. 50.75ಕ್ಕೆ ಇಳಿದಿದೆ.
ಈ ಕೊರತೆ ನೀಗಿಸಲು ಗ್ಯಾಸ್ ರೀಟೇಲ್ ಕಂಪನಿಗಳು ದುಬಾರಿಯಾದ ಎಲ್ಎನ್ಜಿ ಅನಿಲವನ್ನು ಆಮದು ಮಾಡಿಕೊಳ್ಳುವುದು ಅನಿವಾರ್ಯವಾಗಿದೆ. ಹೀಗಾಗಿ, ಸಿಎನ್ಜಿ ಬೆಲೆ ಒಂದು ಕಿಲೋಗೆ ಶೇ. 4ರಿಂದ 6ರಷ್ಟು ಹೆಚ್ಚಳ ಮಾಡುವುದು ಅನಿವಾರ್ಯವಾಗಬಹುದು.
ದೇಶೀಯವಾಗಿ ಉತ್ಪಾದನೆಯಾಗುವ ಸಿಎನ್ಜಿ ಅನಿಲದ ಬೆಲೆ ಒಂದು ಎಂಎಂಬಿಟಿಯುಗೆ 6.50 ಡಾಲರ್ ಆಗುತ್ತದೆ. ಆದರೆ, ಆಮದಿತ ಎಲ್ಎನ್ಜಿ ಬೆಲೆ 11-12 ಡಾಲರ್ ಆಗುತ್ತದೆ. ಹೆಚ್ಚೂಕಡಿಮೆ ಎರಡು ಪಟ್ಟು ದರ ವ್ಯತ್ಯಾಸ ಆಗುತ್ತದೆ.
ಇದನ್ನೂ ಓದಿ: ಗಮನಿಸಿ, ಮುಂಗಡ ರೈಲು ಟಿಕೆಟ್ ಬುಕಿಂಗ್ ಅವಧಿ ಈಗ 60 ದಿನ ಮಾತ್ರ; ಮೂರು ತಿಂಗಳ ಮುಂಚೆ ಬುಕಿಂಗ್ ಅಸಾಧ್ಯ
ಸಿಎನ್ಜಿ ರೀಟೇಲ್ ಮಾರಾಟಗಾರರು ದರ ಹೆಚ್ಚಿಸಲೇಬೇಕಾಗುತ್ತದೆ. ಗ್ರಾಹಕರಿಗೆ ಬೆಲೆ ಏರಿಕೆ ಬಿಸಿ ತಾಕಬಾರದು ಎಂಬ ಉದ್ದೇಶ ಸರ್ಕಾರಕ್ಕೆ ಇದ್ದರೆ ಸಿಎನ್ಜಿ ಮೇಲಿನ ಅಬಕಾರಿ ಸುಂಕವನ್ನು ಕಡಿಮೆ ಮಾಡಬೇಕಾಗಬಹುದು. ಸದ್ಯ ಕೇಂದ್ರ ಸರ್ಕಾರ ಸಿಎನ್ಜಿ ಮೇಲೆ ಶೇ. 14ರಷ್ಟು ಎಕ್ಸೈಸ್ ಡ್ಯೂಟಿ ವಿಧಿಸುತ್ತದೆ. ಅಂದರೆ, ಒಂದು ಕಿಲೋ ಸಿಎನ್ಜಿಗೆ 14-15ರೂನಷ್ಟು ಅಬಕಾರಿ ಸುಂಕ ಇರುತ್ತದೆ. ಸರ್ಕಾರ ಈ ಅಬಕಾರಿ ಸುಂಕವನ್ನು ಶೇ. 10ಕ್ಕೆ ಇಳಿಸಿದರೆ ಸಿಎನ್ಜಿ ಬೆಲೆ ಹೆಚ್ಚಳ ತಡೆಯಲು ಸಾಧ್ಯವಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
