ಭಾರತದಲ್ಲಿ ತಯಾರಿಸಿದ ಪಿಕ್ಸೆಲ್ ಸ್ಮಾರ್ಟ್ಫೋನ್ಗಳನ್ನು ಅಮೆರಿಕ, ಯೂರೋಪ್ಗೆ ರಫ್ತು ಮಾಡಲು ಗೂಗಲ್ ಯೋಜನೆ
Google pixel smartphones made-in-India: ಐಫೋನ್ನಂತೆ ಗೂಗಲ್ ಪಿಕ್ಸೆಲ್ ಸ್ಮಾರ್ಟ್ಫೋನ್ ಅನ್ನು ಭಾರತದಲ್ಲಿ ತಯಾರಿಸುವ ಕೆಲಸ ಸದ್ಯದಲ್ಲೇ ಆರಂಭವಾಗಲಿದೆ. ತಮಿಳುನಾಡಿನ ಫಾಕ್ಸ್ಕಾನ್ ಘಟಕದಲ್ಲಿ ಪ್ರಾಯೋಗಿಕ ಉತ್ಪಾದನೆ ನಡೆಯುತ್ತಿದೆ. ತೈವಾನ್ ಮೂಲದ ಮತ್ತೊಂದು ಕಂಪನಿಯಾದ ಕಾಂಪಾಲ್ ಎಲೆಕ್ಟ್ರಾನಿಕ್ಸ್ ಜೊತೆಗೂಡಿ ಡಿಕ್ಸಾನ್ ಸಂಸ್ಥೆಯಿಂದ ಪಿಕ್ಸೆಲ್ ತಯಾರಿಕೆ ನಡೆಯಲಿದೆ. ಈ ಮೇಡ್ ಇನ್ ಇಂಡಿಯಾ ಫೋನ್ಗಳನ್ನು ಅಮೆರಿಕ, ಯೂರೋಪ್ಗೆ ರಫ್ತು ಮಾಡುವುದು ಗೂಗಲ್ ಯೋಜನೆ.
ನವದೆಹಲಿ, ಜುಲೈ 4: ಭಾರತದಲ್ಲಿ ತಯಾರಿಸಲಾಗುವ ಪಿಕ್ಸೆಲ್ ಶ್ರೇಣಿಯ ಗೂಗಲ್ ಸ್ಮಾರ್ಟ್ಫೋನ್ಗಳನ್ನು ಮುಂದುವರಿದ ದೇಶಗಳಿಗೆ ರಫ್ತು ಮಾಡಲು ಗೂಗಲ್ ಸಂಸ್ಥೆ ಯೋಜಿಸಿದೆ. ಆ್ಯಪಲ್ನ ಐಫೋನ್ನಂತೆ ಗೂಗಲ್ ಪಿಕ್ಸಲ್ ಸ್ಮಾಟ್ಫೋನ್ಗಳೂ ಸದ್ಯದಲ್ಲೇ ಭಾರತದಲ್ಲಿ ತಯಾರಾಗಲಿವೆ. ಐಫೋನ್ ತಯಾರಿಸುವ ಫಾಕ್ಸ್ಕಾನ್ ಸಂಸ್ಥೆಯೇ ಗೂಗಲ್ ಪಿಕ್ಸೆಲ್ ಅನ್ನೂ ತಯಾರಿಸಿಕೊಡಲಿದೆ. ಡಿಕ್ಸಾನ್ ಟೆಕ್ನಾಲಜೀಸ್ನ ಉಪಸಂಸ್ಥೆಯಾದ ಪ್ಯಾಡ್ಜೆಟ್ ಎಲೆಕ್ಟ್ರಾನಿಕ್ಸ್ ಕೂಡ ಪಿಕ್ಸೆಲ್ ಉತ್ಪಾದನೆ ಮಾಡಲಿದೆ.
ವಿಶ್ವದ ಅತಿದೊಡ್ಡ ಗುತ್ತಿಗೆ ಆಧಾರಿತ ಎಲೆಕ್ಟ್ರಾನಿಕ್ಸ್ ಮ್ಯಾನುಫ್ಯಾಕ್ಚರಿಂಗ್ ಕಂಪನಿಯಾದ ತೈವಾನ್ ಮೂಲದ ಫಾಕ್ಸ್ಕಾನ್ ತಮಿಳುನಾಡಿನಲ್ಲಿರುವ ತನ್ನ ಘಟಕದಲ್ಲಿ ಪಿಕ್ಸೆಲ್ ಫೋನ್ಗಳ ಪ್ರಾಯೋಗಿಕ ಉತ್ಪಾದನೆ ಆರಂಭಿಸಿದೆ. ತೈವಾನ್ನ ಮತ್ತೊಂದು ಎಲೆಕ್ಟ್ರಾನಿಕ್ಸ್ ದೈತ್ಯ ಹಾಗೂ ವಿಶ್ವದ ಎರಡನೇ ಅತಿದೊಡ್ಡ ಲ್ಯಾಪ್ಟಾಪ್ ತಯಾರಕರಾದ ಕಾಮ್ಪಾಲ್ ಎಲೆಕ್ಟ್ರಾನಿಕ್ಸ್ ಸಂಸ್ಥೆಯೊಂದಿಗೆ ಡಿಕ್ಸಾನ್ ಒಪ್ಪಂದ ಮಾಡಿಕೊಂಡಿದ್ದು ಎರಡೂ ಜಂಟಿಯಾಗಿ ಸೇರಿ ಭಾರತದಲ್ಲಿ ಗೂಗಲ್ ಪಿಕ್ಸಲ್ ಸ್ಮಾರ್ಟ್ಫೋನ್ ತಯಾರಿಸಲಿವೆ. ಈ ವರ್ಷಾಂತ್ಯದೊಳಗೆ ಉತ್ಪಾದನೆ ಶುರುವಾಗುವ ನಿರೀಕ್ಷೆ ಇದೆ.
ಇದನ್ನೂ ಓದಿ: ನಿಮ್ಮ ಆದಾಯದಲ್ಲಿ ಗರಿಷ್ಠ ಎಷ್ಟು ಮೊತ್ತದಷ್ಟು ಟ್ಯಾಕ್ಸ್ ಡಿಡಕ್ಷನ್ಸ್ ಪಡೆಯಬಹುದು? ಇಲ್ಲಿದೆ ಪಟ್ಟಿ
ಮನಿಕಂಟ್ರೋಲ್ ವರದಿ ಪ್ರಕಾರ ಡಿಕ್ಸಾನ್ ಟೆಕ್ನಾಲಜೀಸ್ ಮತ್ತು ಕಾಂಪಾಲ್ ಎಲೆಕ್ಟ್ರಾನಿಕ್ಸ್ ಘಟಕದಲ್ಲಿ ಪಿಕ್ಸಲ್ನ ಕಡಿಮೆ ಶ್ರೇಣಿಯ ಫೋನ್ಗಳ ಉತ್ಪಾದನೆಯಾಗಬಹುದು. ಪಿಕ್ಸೆಲ್ನ ಪ್ರೋ ಶ್ರೇಣಿಯ ಫೋನ್ಗಳನ್ನು ಫಾಕ್ಸ್ಕಾನ್ ಘಟಕದಲ್ಲಿ ತಯಾರಿಸಬಹುದು ಎನ್ನಲಾಗಿದೆ.
ಪಿಎಲ್ಐ ಸ್ಕೀಮ್ನ ಅನುಕೂಲ
ಭಾರತದ ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿ ಪಿಕ್ಸೆಲ್ ಫೋನ್ ಉಪಸ್ಥಿತಿ ನಗಣ್ಯವಾಗಿದೆ. ಒಂದು ಪ್ರತಿಶದಷ್ಟು ಮಾರುಕಟ್ಟೆಯೂ ಇಲ್ಲ. ಆದರೂ ಭಾರತದಲ್ಲಿ ಪಿಕ್ಸಲ್ ಫೋನ್ ತಯಾರಿಸಲು ಗೂಗಲ್ ಹೊರಟಿದೆ. ಇದಕ್ಕೆ ಕಾರಣ ಪಿಎಲ್ಐ ಸ್ಕೀಮ್. ಸರ್ಕಾರದಿಂದ ಸಬ್ಸಿಡಿ ಪಡೆದು ಕಡಿಮೆ ವೆಚ್ಚದಲ್ಲಿ ಫೋನ್ ತಯಾರಿಸಬಹುದು. ಭಾರತದಲ್ಲಿ ಇದಕ್ಕೆ ಮಾರುಕಟ್ಟೆ ಇಲ್ಲದಿದ್ದರೂ ಯೂರೋಪ್, ಅಮೆರಿಕ ದೇಶಗಳಿಗೆ ಇವುಗಳನ್ನು ರಫ್ತು ಮಾಡಬಹುದು.
ಇದನ್ನೂ ಓದಿ: ವಿಯೆಟ್ನಾಂ, ಚೀನಾ ರೀತಿ ಆಮದು ಸುಂಕ ಇಳಿಯಲಿ: ಬಜೆಟ್ನಿಂದ ಎಲೆಕ್ಟ್ರಾನಿಕ್ ಉದ್ಯಮದ ನಿರೀಕ್ಷೆಗಳಿವು…
ತಯಾರಿಕೆ ವೆಚ್ಚ ಕಡಿಮೆ ಆಗುವುದರಿಂದ ತುಸು ಡಿಸ್ಕೌಂಟ್ ಇತ್ಯಾದಿ ಆಫರ್ ಮಾಡಿ ಭಾರತದಲ್ಲೂ ಒಂದಷ್ಟು ಪಿಕ್ಸೆಲ್ ಫೋನ್ಗಳ ಮಾರಾಟ ಹೆಚ್ಚಿಸಬಹುದು ಎನ್ನುವುದು ಗೂಗಲ್ ಆಲೋಚನೆಯಾಗಿದೆ. ಸದ್ಯ ಗೂಗಲ್ ಪಿಕ್ಸೆಲ್ ಫೋನ್ಗಳೆಲ್ಲವೂ ಚೀನಾ ಮತ್ತು ವಿಯೆಟ್ನಾಂ ದೇಶಗಳಲ್ಲಿ ತಯಾರಿಸಲ್ಪಡುತ್ತಿವೆ. ಚೀನಾ ಮೇಲೆ ಅವಲಂಬನೆ ಆಗುವುದನ್ನು ತಪ್ಪಿಸಲು ಗೂಗಲ್ ಸಂಸ್ಥೆ ತನ್ನ ಫೋನ್ ತಯಾರಿಕೆಯ ಕೆಲ ಭಾಗವನ್ನು ಭಾರತಕ್ಕೆ ವರ್ಗಾಯಿಸಲು ನಿರ್ಧರಿಸಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ