Gaming Tax: ಇಡೀ ಗೇಮಿಂಗ್ ಉದ್ಯಮವನ್ನೇ ಕೊಂದುಬಿಟ್ರಿ..! ಆನ್​ಲೈನ್ ಗೇಮಿಂಗ್​ಗೆ ಶೇ. 28 ಜಿಎಸ್​ಟಿ ವಿಧಿಸಿದ್ದಕ್ಕೆ ಉದ್ಯಮಿ ಅಶ್ನೀರ್ ಗ್ರೋವರ್ ಆಕ್ರೋಶ

ನವದೆಹಲಿ: ಡ್ರೀಮ್ ಇಲವೆನ್ ಇತ್ಯಾದಿ ಕಂಪನಿಗಳು ನಡೆಸುವ ಆನ್​ಲೈನ್ ಫ್ಯಾಂಟಸಿ ಗೇಮ್ ಉದ್ಯಮಕ್ಕೆ (Online Gaming) ಶೇ. 28ರಷ್ಟು ಜಿಎಸ್​ಟಿ ವಿಧಿಸಿದ್ದಕ್ಕೆ ಮತ್ತು ಈ ಕೌಶಲ್ಯದ ಕ್ರೀಡೆಯನ್ನು (Skill Based Game) ಜೂಜಾಟಗಳೊಂದಿಗೆ (Chance Based Game) ಥಳುಕು ಹಾಕಿದ್ದಕ್ಕೆ ಸಾಕಷ್ಟು ವಿರೋಧ ವ್ಯಕ್ತವಾಗಿದೆ. ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಜುಲೈ 11ರಂದು ಜಿಎಸ್​ಟಿ ಕೌನ್ಸಿಲ್ ಸಭೆಯ ಬಳಿಕ ಆನ್​ಲೈನ್ ಗೇಮಿಂಗ್ ಸೇರಿದಂತೆ ಒಟ್ಟಾರೆ ಗೇಮಿಂಗ್ ವಲಯಕ್ಕೆ ಶೇ. 28ರಷ್ಟು ಜಿಎಸ್​ಟಿ ವಿಧಿಸುತ್ತಿರುವುದಾಗಿ ಘೋಷಿಸಿದರು. ಕ್ರಿಕ್​ಪೆ ಎಂಬ ಫ್ಯಾಂಟಸಿ ಸ್ಪೋರ್ಟ್ಸ್ ಲೀಗ್ ಸ್ಥಾಪಕ ಅಶ್ನೀರ್ ಗ್ರೋವರ್ ಕೇಂದ್ರದ ಈ ನಿರ್ಧಾರಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಗೇಮಿಂಗ್ ಉದ್ಯಮ ಈಗಾಗಲೇ ಶೇ. 28ರಷ್ಟು ತೆರಿಗೆ ಕಟ್ಟುತ್ತಿದೆ. ಇದರ ಜೊತೆಗೆ ಮತ್ತೆ 28 ಪರ್ಸೆಂಟ್ ಜಿಎಸ್​ಟಿ ವಿಧಿಸಿ ಉದ್ಯಮವನ್ನೇ ಕೊಂದುಬಿಟ್ರಿ ಎಂದು ಗ್ರೋವರ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಗೇಮಿಂಗ್​ನ ಅನುಶಾಸನಗಳು ಪರಿವರ್ತನೆ ಕಂಡಿವೆ. ಆನ್​ಲೈನ್ ಗೇಮ್​ಗಳು ಜೂಜಾಟ ಅಲ್ಲ ಎಂದು ನಿರೂಪಿಸಿದ್ದೇವೆ. ಸುಪ್ರೀಂಕೋರ್ಟ್​ನಲ್ಲಿ ಅಗ್ನಿಪರೀಕ್ಷೆ ಗೆದ್ದಿದ್ದೇವೆ. ಆನ್​ಲೈನ್ ಗೇಮಿಂಗ್ ಎಂಬುದು ಕೌಶಲ್ಯತೆ ಬೇಡುವ ಆಟ ಎಂದು ಆಶ್ನೀರ್ ಗ್ರೋವರ್ ಸಿಡಿಮಿಡಿಗೊಂಡಿದ್ದಾರೆ.

‘ಜಿಎಸ್​ಟಿ ದರ ಹೆಚ್ಚಿಸುವುದರಿಂದ ಹೆಚ್ಚಿನ ತೆರಿಗೆ ಸಂಗ್ರಹ ಆಗುವುದಿಲ್ಲ. ನೀವು ಈ ನಿರ್ಧಾರ ಹಿಂಪಡೆಯದಿದ್ದರೆ ಇಡೀ ಉದ್ಯಮವೇ ಅಂತ್ಯಗೊಳ್ಳುತ್ತದೆ’ ಎಂದು ಕ್ರಿಕ್​ಪೇ ಸಂಸ್ಥಾಪಕರು ವ್ಯಾಕುಲಗೊಂಡಿದ್ದಾರೆ.

ಇದನ್ನೂ ಓದಿ: Lithium Mining: ಲಿಥಿಯಂ ಮೈನಿಂಗ್ ಹರಾಜಿಗೆ ಕೇಂದ್ರ ಅನುಮೋದನೆ; ಆರು ಖನಿಜಗಳ ಗಣಿಗಾರಿಕೆಗೆ ಇದ್ದ ನಿಷೇಧ ಹಿಂತೆಗೆತ

ಆಶ್ನೀರ್ ಗ್ರೋವರ್ ಮಾತ್ರವಲ್ಲ ಮೋಹನ್ ದಾಸ್ ಪೈ ಸೇರಿದಂತೆ ಇತರ ವಲಯದ ಬಹಳಷ್ಟು ಉದ್ಯಮಿಗಳು ಗೇಮಿಂಗ್ ಉದ್ಯಮಕ್ಕೆ ಶೇ. 28ರಷ್ಟು ಜಿಎಸ್​ಟಿ ವಿಧಿಸಿರುವುದನ್ನು ವಿರೋಧಿಸಿದ್ದಾರೆ. ಕರ್ನಾಟಕದ ಐಟಿ ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಕೂಡ ಕೇಂದ್ರದ ನಿರ್ಧಾರಕ್ಕೆ ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.

ಆನ್​ಲೈನ್ ಗೇಮ್​ಗಳಿಗೆ ಜಿಎಸ್​ಟಿ ಹೇಗೆ ಹೇರಿಕೆ?

ಗೇಮಿಂಗ್ ಉದ್ಯಮದಲ್ಲಿ ಪೂರ್ಣ ಫೇಸ್ ವ್ಯಾಲ್ಯೂ ಮೇಲೆ ಶೇ. 28ರಷ್ಟು ಜಿಎಸ್​ಟಿ ವಿಧಿಸಲಾಗುತ್ತದೆ ಎಂದು ನಿರ್ಮಲಾ ಸೀತಾರಾಮನ್ ಹೇಳಿದ್ದರು. ಇಲ್ಲಿ ಫೇಸ್​ವ್ಯಾಲ್ಯೂ ಎಂದರೆ ಗೇಮ್ ಆಡಲು ಆಟಗಾರ ತೆರುವ ಬೆಟ್ ಅಥವಾ ಎಂಟ್ರಿ ಫೀ ಅಂಥ ಯಾವುದಾದರೂ ಶುಲ್ಕ. ಈಗಿರುವ ವ್ಯವಸ್ಥೆಯಲ್ಲಿ ಗೇಮಿಂಗ್ ಕಂಪನಿಗಳು ಪ್ಲಾಟ್​ಫಾರ್ಮ್ ಶುಲ್ಕವಾಗಿ ಶೇ. 18ರಷ್ಟು ತೆರಿಗೆ ಪಾವತಿಸುತ್ತಿವೆ. ಈಗ ಮಾಡಲಾಗುತ್ತಿರುವ ಬದಲಾವಣೆ ಪ್ರಕಾರ ಇಡೀ ಗೇಮಿಂಗ್ ಹಣಕ್ಕೆ ಶೇ. 28ರಷ್ಟು ಜಿಎಸ್​ಟಿ ಇರುತ್ತದೆ.

ಇಲ್ಲಿ ಒಬ್ಬ ವ್ಯಕ್ತಿ ಕ್ಯಾಸಿನೋ, ಕುದುರೆ ಜೂಜು ಅಥವಾ ಆನ್​ಲೈನ್ ಗೇಮಿಂಗ್​ನಲ್ಲಿ ಗೆಲ್ಲುವ ಹಣಕ್ಕೆ ಪ್ರತ್ಯೇಕ ಶೇ. 30ರಷ್ಟು ಟಿಡಿಎಸ್ ಇರುತ್ತದೆ. ಅದರ ಜೊತೆಗೆ ಈಗ ಶುಲ್ಕ ಹಣಕ್ಕೆ ಶೇ. 28ರಷ್ಟು ಜಿಎಸ್​ಟಿಯೂ ಸೇರುತ್ತದೆ.

ಇದನ್ನೂ ಓದಿ: Cess: ಎಸ್​ಯುವಿ ಕಾರುಗಳಿಗೆ 28ಪರ್ಸೆಂಟ್ ಜಿಎಸ್​ಟಿ ಜೊತೆಗೆ ಶೇ. 22 ಕಾಂಪೆನ್ಸೇಶನ್ ಸೆಸ್; ಯಾವ್ಯಾವುವು ಎಸ್​ಯುವಿ ಕಾರುಗಳು?

ನಾವು ಉದ್ಯಮ ಕೊಲ್ಲುತ್ತಿಲ್ಲ, ಸರಳಗೊಳಿಸುತ್ತಿದ್ದೇವೆ ಎಂದ ನಿರ್ಮಲಾ ಸೀತಾರಾಮನ್

ಜಿಎಸ್​ಟಿ ಹೆಚ್ಚಳದಿಂದ ನಾವು ಆನ್​ಲೈನ್ ಗೇಮಿಂಗ್ ಆಗಲೀ, ಕ್ಯಾಸಿನೋ, ಕುದುರೆ ರೇಸಿಂಗ್ ಉದ್ಯಮವನ್ನಾಗಲೀ ಕೊಲ್ಲಲು ಹೊರಟಿಲ್ಲ. ಈ ಗೇಮ್​ಗಳು ಬಹಳ ಸಂಕೀರ್ಣಗೊಂಡಿವೆ. ಪಾರದರ್ಶಕತೆ ಇಲ್ಲದ ಈ ಉದ್ಯಮದ ಮುಸುಕನ್ನು ತೆಗೆಯುವುದು ಕಷ್ಟಸಾಧ್ಯ. ಅದ್ದರಿಂದ ನಾವು ಗೇಮಿಂಗ್ ವ್ಯವಸ್ಥೆಯನ್ನು ಸರಳಗೊಳಿಸಿದ್ದೇವೆ ಎಂದು ನಿರ್ಮಲಾ ಸೀತಾರಾಮನ್ ಮೊನ್ನೆ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಆನ್​ಲೈನ್ ಗೇಮಿಂಗ್ ಅನ್ನು ಜೂಜಾಟಗಳ ಜೊತೆ ಸೇರಿಸಿದ್ದಕ್ಕೆ ಅಸಮಾಧಾನ ವ್ಯಕ್ತವಾಗಿರುವ ಬಗ್ಗೆ ಪ್ರತಿಕ್ರಿಯಿಸಿದ ನಿರ್ಮಲಾ ಸೀತಾರಾಮನ್, ತೆರಿಗೆ ಉದ್ದೇಶಕ್ಕೆ ಮಾತ್ರ ಈ ವರ್ಗೀಕರಣ ಮಾಡಿದ್ದೇವೆಯೇ ಹೊರತು ಆನ್​ಲೈನ್ ಗೇಮಿಂಗ್ ಅನ್ನು ಜೂಜಾಟವೆಂದು ವ್ಯಾಖ್ಯಾನಿಸಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ: Chip Enabled e-Passport: ಚಿಪ್ ಇರುವ ಇ-ಪಾಸ್​ಪೋರ್ಟ್; ಬೆಂಗಳೂರಿನಲ್ಲಿ ಮೊದಲ ಪ್ರಯೋಗ; ಎರಡೇ ದಿನದಲ್ಲಿ ಸಿಗುತ್ತಾ ಪಾಸ್​ಪೋರ್ಟ್?

ಬಹಳ ದೊಡ್ಡ ಉದ್ಯಮವಾಗುತ್ತಿದೆ ಗೇಮಿಂಗ್…

ಭಾರತದ ಆನ್​ಲೈನ್ ಗೇಮಿಂಗ್ ಉದ್ಯಮ ಸದ್ಯ 1.5 ಬಿಲಿಯನ್ ಡಾಲರ್​ನಷ್ಟು ಬೃಹತ್ತಾಗಿದೆ. ಅಂದರೆ 12,000 ಕೋಟಿ ರೂ ಮೊತ್ತದ ಉದ್ಯಮ ಇದು. ಡ್ರೀಮ್11 ಸೇರಿದಂತೆ ಸಾವಿರಕ್ಕೂ ಹೆಚ್ಚು ಗೇಮಿಂಗ್ ಸ್ಟಾರ್ಟಪ್​ಗಳಿವೆ. ಜಾಗತಿಕವಾಗಿ 200 ಬಿಲಿಯನ್ ಡಾಲರ್​ನಷ್ಟು ಬೃಹತ್ತಾಗಿರುವ ಆನ್​ಲೈನ್ ಗೇಮಿಂಗ್ ಉದ್ಯಮ ಭಾರತದಲ್ಲಿ ಮುಂದಿನ ದಿನಗಳಲ್ಲಿ ಇನ್ನೂ ದೊಡ್ಡದಾಗಿ ಬೆಳೆಯುವ ಸಾಧ್ಯತೆ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ