Chip Enabled e-Passport: ಚಿಪ್ ಇರುವ ಇ-ಪಾಸ್ಪೋರ್ಟ್; ಬೆಂಗಳೂರಿನಲ್ಲಿ ಮೊದಲ ಪ್ರಯೋಗ; ಎರಡೇ ದಿನದಲ್ಲಿ ಸಿಗುತ್ತಾ ಪಾಸ್ಪೋರ್ಟ್?
Passport Revolution By PSP 2.0: ಭಾರತದಲ್ಲಿ ಈಗ ಹೊಸ ಆವೃತ್ತಿಯ ಪಾಸ್ಪೋರ್ಟ್ ಸೇವಾ ಯೋಜನೆ ಜಾರಿಗೆ ಬರಲಿದ್ದು, ಬೆಂಗಳೂರನಲ್ಲಿ ಮೊದಲ ಪ್ರಾಯೋಗಿಕ ಚಾಲನೆ ಪಡೆಯಲಿದೆ. ಚಿಪ್ ಇರುವ ಇ-ಪಾಸ್ಪೋರ್ಟ್ ವ್ಯವಸ್ಥೆ ಬರಲಿದೆ.
Updated on: Jul 12, 2023 | 12:19 PM
ಬೆಂಗಳೂರು: ಶೀಘ್ರದಲ್ಲೇ ಜಾರಿಯಾಗಲಿರುವ ಎರಡನೇ ಆವೃತ್ತಿಯ ಪಾಸ್ಪೋರ್ಟ್ ಸೇವಾ ಯೋಜನೆಯಿಂದ (PSP v2.0- Passport Seva Programme) ಪಾಸ್ಪೋರ್ಟ್ ವಿತರಣಾ ಸೇವೆಯಲ್ಲಿ ಬಹಳ ದೊಡ್ಡ ಪರಿವರ್ತನೆಗಳಾಗುವ ಸಾಧ್ಯತೆ ಇದೆ. ಪಾಸ್ಪೋರ್ಟ್ ಸೇವಾ ಯೋಜನೆಯ ಭಾಗವಾಗಿ ಚಿಪ್ ಜೋಡಿತ ಇ–ಪಾಸ್ಪೋರ್ಟ್ ಬರಲಿದ್ದು, ಪಾಸ್ಪೋರ್ಟ್ ವಿತರಣೆಯ ಸಮಯ ಅರ್ಧದಷ್ಟು ಕಡಿಮೆ ಆಗುವ ನಿರೀಕ್ಷೆ ಇದೆ. ಹೊಸ ಪಾಸ್ಪೋರ್ಟ್ ಸೇವಾ ಯೋಜನೆಯ ಪ್ರಯೋಗ ಮೊದಲು ಬೆಂಗಳೂರಿನಲ್ಲೇ ಆಗುತ್ತಿರುವುದು ವಿಶೇಷ.
ಟಾಟಾ ಕನ್ಸಲ್ಟನ್ಸಿ ಸರ್ವಿಸಸ್ ಸಂಸ್ಥೆ ತಾಂತ್ರಿಕವಾಗಿ ಅಭಿವೃದ್ಧಿಪಡಿಸಿರುವ ಹೊಸ ಪಾಸ್ಪೋರ್ಟ್ ಸೇವಾ ಯೋಜನೆ ಬೆಂಗಳೂರಿನ ಎರಡು ಪಾಸ್ಪೋರ್ಟ್ ಸೇವಾ ಕೇಂದ್ರಗಳಲ್ಲಿ ಅಳವಡಿಕೆ ಆಗಲಿದೆ. ಈ ಎರಡು ಸೆಂಟರ್ಗಳಲ್ಲಿ ಸಾಫ್ಟ್ವೇರ್ ಅಪ್ಗ್ರೇಡ್ ಇತ್ಯಾದಿ ಸೌಕರ್ಯ ವ್ಯವಸ್ಥೆ ಬದಲಿಸಲಾಗುತ್ತಿದೆ. ಇದು ಈ ವರ್ಷದೊಳಗೆ ಮುಗಿಯುವ ನಿರೀಕ್ಷೆ ಇದೆ. ಒಂದು ಅಂದಾಜು ಪ್ರಕಾರ ಈ ನವೆಂಬರ್ ಅಥವಾ ಡಿಸೆಂಬರ್ವೊಳಗೆ ಹೊಸ ಆವೃತ್ತಿಯ ಸಾಫ್ಟ್ವೇರ್ ಅಳವಡಿಕೆ ಆಗಲಿದೆ.
ಇದನ್ನೂ ಓದಿ: Cess: ಎಸ್ಯುವಿ ಕಾರುಗಳಿಗೆ 28ಪರ್ಸೆಂಟ್ ಜಿಎಸ್ಟಿ ಜೊತೆಗೆ ಶೇ. 22 ಕಾಂಪೆನ್ಸೇಶನ್ ಸೆಸ್; ಯಾವ್ಯಾವುವು ಎಸ್ಯುವಿ ಕಾರುಗಳು?
15 ವರ್ಷಗಳ ಮುನ್ನ ಪಾಸ್ಪೋರ್ಟ್ ಮಾಡಿಸಲು ತಿಂಗಳುಗಳೇ ಆಗುತ್ತಿದ್ದವು. ನಂತರ ಕ್ರಮೇಣವಾಗಿ ಪಾಸ್ಪೋರ್ಟ್ ನೀಡುವ ವ್ಯವಸ್ಥೆಯನ್ನು ಸರಳಗೊಳಿಸುತ್ತಾ ಬರಲಾಗಿದೆ. ಸದ್ಯ ನಾಲ್ಕೈದು ಕೆಲಸದ ದಿನಗಳಲ್ಲಿ ಪಾಸ್ಪೋರ್ಟ್ ಸಿಗುತ್ತದೆ. ಈಗ ಹೊಸ ಪಾಸ್ಪೋರ್ಟ್ ಸೇವಾ ಯೋಜನೆ ಅಳವಡಿಕೆ ಆದರೆ ಎರಡು ಅಥವಾ ಮೂರು ದಿನದೊಳಗೆ ಪಾಸ್ಪೋರ್ಟ್ ಸಿಗಬಹುದು.
2010ರಲ್ಲೂ ಬೆಂಗಳೂರೇ, 2023ರಲ್ಲೂ ಬೆಂಗಳೂರೇ…
ಕುತೂಹಲವೆಂದರೆ ಪಾಸ್ಪೋರ್ಟ್ ಸೇವಾ ಪ್ರೋಗ್ರಾಮ್ 2012ರಲ್ಲಿ ಜಾರಿಗೆ ಬಂದಿತ್ತು. ಆದರೆ, ಅದಕ್ಕೆ ಮುನ್ನ 2010ರ ಮೇ ತಿಂಗಳಲ್ಲಿ ಬೆಂಗಳೂರು ಮತ್ತು ಚಂಡೀಗಡದಲ್ಲಿ ಇದರ ಪ್ರಾಯೋಗಿಕ ಯೋಜನೆ ನಡೆಸಲಾಗಿತ್ತು. ಅಲ್ಲಿ ಯಶಸ್ವಿಯಾದ ಬಳಿಕ 2012ರಲ್ಲಿ ದೇಶಾದ್ಯಂತ ಚಾಲನೆಗೊಳಿಸಲಾಯಿತು.
ಇದನ್ನೂ ಓದಿ: Strict Action: ಔಷಧ ಗುಣಮಟ್ಟದಲ್ಲಿ ರಾಜಿ ಇಲ್ಲ; ಕಳಪೆ ಔಷಧ ತಯಾರಿಸುವವರ ವಿರುದ್ಧ ಕಠಿಣ ಕ್ರಮಕ್ಕೆ ಮುಂದಾದ ಕೇಂದ್ರ ಸರ್ಕಾರ
ಈಗ ಎರಡನೇ ಆವೃತ್ತಿಯ ಪಾಸ್ಪೋರ್ಟ್ ಸೇವಾ ಯೋಜನೆಯ ಪೈಲಟ್ ಪ್ರಾಜೆಕ್ಟ್ ಬೆಂಗಳೂರಿನಲ್ಲಿ ಮೊದಲು ನಡೆಯಲಿದೆ. ಬೆಂಗಳೂರಿನಲ್ಲಿ ಎರಡು ಪಾಸ್ಪೋರ್ಟ್ ಸೇವಾ ಕೇಂದ್ರಗಳಿವೆ. ಲಾಲ್ಬಾಗ್ ರಸ್ತೆಯಲ್ಲಿ ಒಂದು, ಮಾರತಹಳ್ಳಿಯಲ್ಲಿ ಇನ್ನೊಂದು ಇದೆ. ಲಾಲ್ಬಾಗ್ ರಸ್ತೆಯಲ್ಲಿರುವ ಪಾಸ್ಪೋರ್ಟ್ ಸೆಂಟರ್ನಲ್ಲಿ 1,700 ಅರ್ಜಿಗಳು ಬರುತ್ತವೆ. ಮಾರತ್ತಹಳ್ಳಿಯಲ್ಲಿರುವ ಪಾಸ್ಪೋರ್ಟ್ ಸೇವಾ ಕೇಂದ್ರದಲ್ಲಿ 900 ಅರ್ಜಿಗಳು ಬರುತ್ತವೆ.
ಬೆಂಗಳೂರನಲ್ಲಿ ಪ್ರಯೋಗ ಯಶಸ್ವಿಯಾದ ಬಳಿಕ ಹೊಸ ಪಾಸ್ಪೋರ್ಟ್ ಸೇವಾ ಯೋಜನೆಯನ್ನು ದೇಶಾದ್ಯಂತ ಎಲ್ಲಾ ಪಾಸ್ಪೋರ್ಟ್ ಸೇವಾ ಕೇಂದ್ರಗಳಲ್ಲೂ ವಿಸ್ತರಿಸಲಾಗುತ್ತದೆ. 2014ರಲ್ಲಿ ಭಾರತದಲ್ಲಿ 77 ಪಾಸ್ಪೋರ್ಟ್ ಸೇವಾ ಕೇಂದ್ರಗಳಿದ್ದವು. ಈಗ 9 ವರ್ಷದಲ್ಲಿ ಏಳು ಪಟ್ಟು ಹೆಚ್ಚಾಗಿದ್ದು, 523 ಸರ್ವಿಸ್ ಸೆಂಟರ್ಗಳಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
