ಟ್ರೆಂಡಿಂಗ್​ನಲ್ಲಿದೆ ಎಚ್​ಎಂಟಿ ಗಂಡಬೇರುಂಡ ವಾಚು; ಕನ್ನಡಿಗರ ಈ ಅಚ್ಚುಮೆಚ್ಚಿನ ಕೈಗಡಿಯಾರದ ವಿಶೇಷತೆ ಏನು ಗೊತ್ತಾ?

ಬೆಂಗಳೂರು, ಜುಲೈ 28: ಎಚ್​ಎಂಟಿಯ ಗಂಡಬೇರುಂಡ ವಾಚುಗಳು (HMT Gandaberunda watch) ಸೋಷಿಯಲ್ ಮೀಡಿಯಾದಲ್ಲಿ ಟ್ರೆಂಡ್ ಆಗುತ್ತಿವೆ. ಹಲವು ಕನ್ನಡಿಗರು ಈ ವಾಚುಗಳ ಫೋಟೋ ಪೋಸ್ಟ್ ಮಾಡಿ ಗರ್ವ ಪಡುತ್ತಿದ್ದಾರೆ. ತಮ್ಮಲ್ಲಿರುವ ಗಂಡಬೇರುಂಡ ವಾಚುಗಳನ್ನು ಹೆಮ್ಮೆಯಿಂದ ಪ್ರದರ್ಶಿಸುತ್ತಿದ್ದಾರೆ. ಅಂದಹಾಗೆ ಎಚ್​ಎಂಟಿಯ ಗಂಡಬೇರುಂಡ ವಾಚುಗಳ ವಿಶೇಷತೆ ಏನು, ಕನ್ನಡಿಗರಿಗೆ ಈ ವಾಚು ಮೇಲಿನ ಪ್ರೀತಿಗೆ ಕಾರಣ ಏನು ಎನ್ನುವ ವಿವರ ಇಲ್ಲಿದೆ.

ಬೆಂಗಳೂರಿನ ಎಚ್​ಎಂಟಿ ಕಂಪನಿ ಒಂದು ಕಾಲದಲ್ಲಿ ಕೈಗಡಿಯಾರ ತಯಾರಿಕೆಯಲ್ಲಿ ಭಾರತದ ನಂಬರ್ ಒನ್ ಎನಿಸಿತ್ತು. ಅದರ ವಾಚು ತುಸು ದುಬಾರಿಯಾದರೂ ಜನರಿಗೆ ಅದು ಪ್ರತಿಷ್ಠೆಯ ಸಂಕೇತ. ಎಪ್ಪತ್ತರ ದಶಕದಲ್ಲಿ ಎಚ್​ಎಂಟಿ ಬಿಡುಗಡೆ ಮಾಡಿದ ವಾಚುಗಳಲ್ಲಿ ಗಂಡಬೇರುಂಡ ಬ್ರ್ಯಾಂಡ್​ನದ್ದೂ ಒಂದು. ಹಲವು ವಿಶೇಷತೆಗಳು ಈ ಗಂಡಬೇರುಂಡ ವಾಚಿನಲ್ಲಿವೆ.

ಗಂಡಬೇರುಂಡ ವಾಚಿನ ವಿಶೇಷತೆಗಳು..

ಗಂಡಬೇರುಂಡ ಎಂಬುದು ಹಿಂದೂ ಪುರಾಣಗಳಲ್ಲಿ ಕೇಳಿಬರುವ ಎರಡು ಮುಖದ ಭಾರೀ ಗಾತ್ರದ ಪಕ್ಷಿ. ನರಸಿಂಹನ ಒಂದು ರೂಪ ಎಂದು ಪರಿಗಣಿಸಲಾಗುತ್ತದೆ. ಪುರಾಣದಲ್ಲಿ ಬಣ್ಣಿಸಿರುವ ಪ್ರಕಾರ ಗಂಡಬೇರುಂಡವು ಎರಡು ಆನೆಗಳನ್ನು ಹಿಡಿದಿಟ್ಟುಕೊಳ್ಳಬಲ್ಲಷ್ಟು ಶಕ್ತಿಶಾಲಿಯಂತೆ.

ಇದನ್ನೂ ಓದಿ: ಮನುಷ್ಯರ ಮಲ, ಮೂತ್ರ ಖರೀದಿಸುತ್ತಿದೆ ಮೈಕ್ರೋಸಾಫ್ಟ್; ಒಂದು ಟನ್​ಗೆ 30 ಸಾವಿರ ರೂ; ಯಾಕೆ ಗೊತ್ತಾ?

ಹಿಂದಿನ ಅನೇಕ ಸಾಮ್ರಾಜ್ಯಗಳು ಗಂಡಬೇರುಂಡವನ್ನು ತಮ್ಮ ಲಾಂಛನವನ್ನಾಗಿ ಮಾಡಿಕೊಂಡಿದ್ದುವು. ಅದರಲ್ಲೂ ಕನ್ನಡಿಗ ರಾಜವಂಶಗಳಾದ ಚಾಳುಕ್ಯರು, ಕದಂಬರು, ವಿಜಯನಗರ, ಮೈಸೂರು ಒಡೆಯರರ ಸಾಮ್ರಾಜ್ಯಗಳಿಗೆ ಗಂಡಬೇರುಂಡವೇ ಲಾಂಛನವಾಗಿತ್ತು. ಈಗ ಕರ್ನಾಟಕ ರಾಜ್ಯದ ಲಾಂಛನದಲ್ಲೂ ಗಂಡಬೇರುಂಡವನ್ನು ಉಳಿಸಿಕೊಳ್ಳಲಾಗಿದೆ.

ಎಚ್​ಎಂಟಿ ಸಂಸ್ಥೆಯ ಗಂಡಬೇರುಂಡ ವಾಚಿನಲ್ಲಿ ಹಲವು ವಿಶೇಷತೆಗಳಿವೆ. ಗಂಡಬೇರುಂಡ ಲಾಂಛನದ ಚಿತ್ರ ಇರುವುದು ಮಾತ್ರವಲ್ಲ, ಕನ್ನಡ ಅಂಕಿಗಳನ್ನು ಒಳಗೊಂಡಿದೆ. ಅದರಲ್ಲೂ ವೈನ್ ಬಣ್ಣದ ಗಂಡಬೇರುಂಡ ವಾಚುಗಳಿಗೆ ಆಗಲೇ ಬಹಳ ಡಿಮ್ಯಾಂಡ್ ಇತ್ತು. ಈಗ ವರ್ಷಕ್ಕೆ ಒಮ್ಮೆ ಎಚ್​ಎಂಟಿ ಸಂಸ್ಥೆ ಸೀಮಿತ ಸಂಖ್ಯೆಯಲ್ಲಿ ಇಂಥ ವಾಚುಗಳನ್ನು ಬಿಡುಗಡೆ ಮಾಡುತ್ತದೆ. ಕೆಲವೇ ದಿನಗಳಲ್ಲಿ ಎಲ್ಲವೂ ಖಾಲಿಯಾಗುವಷ್ಟು ಬೇಡಿಕೆ ಇದಕ್ಕಿದೆ.

ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಹಲವು ವ್ಯಕ್ತಿಗಳು ತಾವು ಹೊಂದಿರುವ ಎಚ್​ಎಂಟಿಯ ಗಂಡಬೇರುಂಡ ವಾಚುಗಳನ್ನು ಪ್ರದರ್ಶಿಸುತ್ತಿದ್ದಾರೆ. ಒಬ್ಬರಂತೂ, ಗಂಡಬೇರುಂಡ, ಜನತಾ ಮೊದಲಾದ ವಾಚುಗಳನ್ನು ಮತ್ತೆ ತಯಾರಿಸುವ ಕೆಲಸ ಮಾಡಬೇಕು ಎಂದು ಮನವಿ ಮಾಡಿದ್ದಾರೆ.

ಸೋಷಿಯಲ್ ಮೀಡಿಯಾದಲ್ಲಿ ಗಂಡಬೇರುಂಡ ವಾಚಿನ ಬಗ್ಗೆ ಪೋಸ್ಟ್

ಮತ್ತೊಂದು ಪೋಸ್ಟು

ಇದನ್ನೂ ಓದಿ: ಜನಸಂಖ್ಯೆಗಿಂತ ಕಂಪನಿಗಳ ಸಂಖ್ಯೆಯೇ ಹೆಚ್ಚು; ಏರ್​ಪೋರ್ಟ್ ಇಲ್ಲ; ಜನರು ಭಾರೀ ಶ್ರೀಮಂತರು; ಇದು ಲಿಕ್ಟನ್​ಸ್ಟೈನ್ ದೇಶದ ಕಥೆ

ಗಂಡಬೇರುಂಡ ವಾಚು ಎಲ್ಲಿ ಸಿಗುತ್ತೆ?

ಎಚ್​ಎಂಟಿ ತಯಾರಿಸುವ ಗಂಡಬೇರುಂಡ ವಾಚುಗಳು ಬೆಂಗಳೂರಿನಲ್ಲಿ ನಾಲ್ಕು ಕಡೆ ಸಿಗುತ್ತವೆ. ಎಂಜಿ ರಸ್ತೆಯಲ್ಲಿರುವ ಬಾರ್ಟಾನ್ ಸೆಂಟರ್, ಜಾಲಹಳ್ಳಿಯಲ್ಲಿರುವ ಎಬಿಡಿ ಶೋರೂಮ್, ಇದೇ ಜಾಲಹಳ್ಳಿಯಲ್ಲಿರುವ ಎಚ್​ಎಂಟಿ ಮ್ಯೂಸಿಯಂ ಸೋವನಿರ್ ಶಾಪ್, ಹಾಗೂ ಮೇಖ್​ರಿ ಸರ್ಕಲ್​ನಲ್ಲಿರುವ ಎಚ್​ಎಂಟಿ ಭವನ, ಈ ನಾಲ್ಕು ಕಡೆ ಗಂಡಬೇರುಂಡ ವಾಚುಗಳು ಲಭ್ಯ ಇರಬಹುದು.

ಸೀಮಿತ ಸಂಖ್ಯೆಯಲ್ಲಿ ಮಾತ್ರವೇ ಇವುಗಳನ್ನು ತಯಾರಿಸಲಾಗುವುದರಿಂದ ಬಹಳ ಬೇಗ ಮಾರಾಟವಾಗಿ ಹೋಗುತ್ತವೆ. ಎಚ್​ಎಂಟಿ ಈ ವಾಚುಗಳನ್ನು ಬಿಡುಗಡೆ ಮಾಡಿದ ಕೂಡಲೇ ಹೋದರೆ ಲಭ್ಯ ಇರಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ