ಒಬ್ಬ ವ್ಯಕ್ತಿ ಎಷ್ಟು ಸಿಮ್ ಕಾರ್ಡ್ ಹೊಂದಬಹುದು? ಸರ್ಕಾರ ತಂದಿದೆ ಹೊಸ ಮಾರ್ಗಸೂಚಿ; ಈ ಹೊಸ ನಿಯಮಗಳೇನು?

ನವದೆಹಲಿ, ಆಗಸ್ಟ್ 20: ಅಪರಾಧ ಎಸಗುವವರು ಹತ್ತಾರು ಸಿಮ್ ಕಾರ್ಡ್​ಗಳನ್ನು ಬಳಸುತ್ತಾರೆ. ಯಾರದ್ದೋ ಆಧಾರ್ ಕಾರ್ಡ್​ನಿಂದ ಸಿಮ್​ಗಳನ್ನು ಪಡೆದು ಅವನ್ನು ಅಪರಾಧ ಕೃತ್ಯಗಳಿಗೆ ಬಳಸುವುದುಂಟು. ಇವುಗಳಿಗೆ ಕಡಿವಾಣ ಹಾಕಲು ಕೇಂದ್ರ ದೂರಸಂಪರ್ಕ ಇಲಾಖೆ (DoT – Department of Telecommunications) ಹೊಸ ನಿಯಮ ರೂಪಿಸಿದೆ. ಒಬ್ಬ ವ್ಯಕ್ತಿಯ ಹೆಸರಿನಲ್ಲಿ ಹೊಂದಬಹುದಾದ ಮೊಬೈಲ್ ಸಂಪರ್ಕಗಳ (SIM) ಮೇಲಿನ ನಿಯಮಗಳನ್ನು ಮತ್ತಷ್ಟು ಬಿಗಿಗೊಳಿಸಿದ್ದು ಈ ಸಂಬಂಧ ಒಂದು ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಈ ನಿಯಮದ ಪ್ರಕಾರ, ಒಬ್ಬ ವ್ಯಕ್ತಿಯ ಹೆಸರಿನಲ್ಲಿ 9ಕ್ಕಿಂತ ಹೆಚ್ಚು ಸಿಮ್ ಕಾರ್ಡ್​ಗಳನ್ನು ಹೊಂದಲು ಅವಕಾಶ ಇರುವುದಿಲ್ಲ.

ಸೂಕ್ಷ್ಮ ಪ್ರದೇಶಗಳೆನಸಿರುವ ಜಮ್ಮು ಮತ್ತು ಕಾಶ್ಮಿರ, ಅಸ್ಸಾಮ್ ಹಾಗು ಈಶಾನ್ಯ ರಾಜ್ಯಗಳಲ್ಲಿ ಒಬ್ಬ ವ್ಯಕ್ತಿ ಗರಿಷ್ಠ 6 ಸಿಮ್ ಕಾರ್ಡ್​ಗಳನ್ನು ಹೊಂದಲು ಮಾತ್ರ ಅನುಮತಿ ಇರುತ್ತದೆ.

SIM ಕಾರ್ಡ್‌ಗಳ ಪರಿಮಿತಿಯನ್ನು ತಲುಪಿರುವ ಗ್ರಾಹಕರಿಗೆ ಹೊಸ SIM ಕಾರ್ಡ್ ನೀಡಬಾರದು ಎಂದು ದೂರಸಂಪರ್ಕ ಸಂಸ್ಥೆಗಳಿಗೆ (Telecom Operators) ಸೂಚಿಸಲಾಗಿದೆ. ಗರಿಷ್ಠ ಮಟ್ಟದ SIM ಹೊಂದಿರುವ ವ್ಯಕ್ತಿಗಳ ಭಾವಚಿತ್ರ/ಮಾಹಿತಿಯನ್ನು ಸರಕಾರವು ಡಿಜಿಟಲ್ ಇಂಟೆಲಿಜೆನ್ಸ್ ಪ್ಲಾಟ್‌ಫಾರ್ಮ್‌ನಲ್ಲಿ ಅಪ್‌ಲೋಡ್ ಮಾಡಲಿದ್ದು, ಟೆಲಿಕಾಂ ಕಂಪನಿಗಳು ಇದನ್ನು ಪರಿಶೀಲಿಸಿ ಹೊಸ ಸಂಪರ್ಕಗಳನ್ನು ನಿರಾಕರಿಸಲಿವೆ.

ಇದನ್ನೂ ಓದಿ: ಜಿಯೋಬ್ಲ್ಯಾಕ್‌ರಾಕ್​ ಮ್ಯೂಚುವಲ್ ಫಂಡ್​ನಿಂದ ಡೈರೆಕ್ಟ್ ಪ್ಲಾನ್ ಜೊತೆಗೆ ರೆಗ್ಯುಲರ್ ಪ್ಲಾನ್ ಕೂಡ ಶುರು

ಹೆಚ್ಚುವರಿ SIM ಹೊಂದಿದ್ದರೆ ಕನೆಕ್ಷನ್ ನಿಲ್ಲುತ್ತದೆ

9ಕ್ಕಿಂತ ಹೆಚ್ಚು ಸಿಮ್‌ಗಳನ್ನು ಪಡೆಯಲು ಯತ್ನಿಸಿದರೆ ಅಥವಾ ಹೊಂದಿದ್ದರೆ, ಆ ಹೆಚ್ಚುವರಿ ಸಂಪರ್ಕಗಳನ್ನು ತಕ್ಷಣವೇ ಅಮಾನತುಗೊಳಿಸಲಾಗುತ್ತದೆ (Block/Suspend). ಗಮನಿಸಬೇಕಾದ ಸಂಗತಿ ಎಂದರೆ ಇಲ್ಲಿ ಸಿಮ್ ಮಿತಿ ಎಂದರೆ ಒಂದೇ ಟೆಲಿಕಾಂ ಕಂಪನಿಯದ್ದಲ್ಲ. ಎಲ್ಲಾ ಟೆಲಿಕಾಂ ಕಂಪನಿಗಳಿಂದ ಒಬ್ಬ ವ್ಯಕ್ತಿ ಪಡೆದಿರುವ ಒಟ್ಟು ಸಿಮ್ ಕಾರ್ಡ್​ಗಳಾಗಿವೆ. ಏರ್​ಟೆಲ್​ನಿಂದ 3, ಜಿಯೋದಿಂದ 4, ವೊಡಾಫೋನ್​ನಿಂದ 3 ಸಿಮ್ ಕಾರ್ಡ್​ಗಳಿದ್ದರೆ ಒಟ್ಟು 10 ಆಗುತ್ತದೆ. ಹಾಗೆ ಸಾಧ್ಯವಿಲ್ಲ. ಎಲ್ಲವೂ ಸೇರಿ ಒಟ್ಟು ಸಿಮ್ ಕಾರ್ಡ್ 9 ಮೀರುವಂತಿಲ್ಲ.

ಈ ಹೊಸ ಪರಿಶೀಲನಾ ವ್ಯವಸ್ಥೆಯು 2026ರ ಆಗಸ್ಟ್ 24 ರಿಂದ ಜಾರಿಗೆ ಬರಲಿದ್ದು, ನವೆಂಬರ್ 30 ರ ವೇಳೆಗೆ ರಿಯಲ್-ಟೈಮ್ ಸಿಸ್ಟಮ್ ಆಗಿ ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸಲಿದೆ.

ಇದನ್ನೂ ಓದಿ: ಮುಂದಿನ 5 ವರ್ಷ ಈಕ್ವಿಟಿ ಮಾರುಕಟ್ಟೆಯಿಂದ ಶೇ. 15 ವಾರ್ಷಿಕ ಆದಾಯ: ರಾಮದೇವ್ ಅಗರ್ವಾಲ್ ವಿಶ್ವಾಸ

ನಕಲಿ ದಾಖಲೆಗಳನ್ನು ಬಳಸಿ ಸಿಮ್ ಕಾರ್ಡ್ ಪಡೆದು ನಡೆಸುವ ‘ಡಿಜಿಟಲ್ ಅರೆಸ್ಟ್’ ಮುಂತಾದ ಸೈಬರ್ ಮತ್ತು ಆನ್‌ಲೈನ್ ಆರ್ಥಿಕ ವಂಚನೆಗಳಿಗೆ ಕಡಿವಾಣ ಹಾಕುವುದು ಈ ನಿಯಮದ ಮುಖ್ಯ ಉದ್ದೇಶವಾಗಿದೆ.

ಒಬ್ಬ ಹೆಸರಲ್ಲಿ ಎಷ್ಟು ಸಿಮ್ ಕಾರ್ಡ್ ಇದೆ ಎಂದು ತಿಳಿಯುವುದು ಹೇಗೆ?

ಈಗ ಸಿಮ್ ಕಾರ್ಡ್ ಅನ್ನು ಪಡೆಯಬೇಕಾದರೆ ಆಧಾರ್ ದಾಖಲೆ ನೀಡಬೇಕು. ಪ್ರತಿ ಸಿಮ್ ಕಾರ್ಡ್ ಕೂಡ ಆಧಾರ್​ಗೆ ಲಿಂಕ್ ಆಗಿರುತ್ತದೆ. ಹೀಗಾಗಿ, ಒಂದು ಆಧಾರ್ ನಂಬರ್​ನಲ್ಲಿ ಎಷ್ಟು ಸಿಮ್ ಕಾರ್ಡ್​ಗಳನ್ನು ಪಡೆಯಲಾಗಿದೆ ಎಂಬುದನ್ನು ತಿಳಿಸಬಹುದು. ಅದಕ್ಕೆ ಸಂಚಾರ್ ಸಾಥಿ ಪೋರ್ಟಲ್ ಅನ್ನು ಬಳಸಬಹುದು.

ಸಾಮಾನ್ಯವಾಗಿ ಕೇಳುವ ಪ್ರಶ್ನೆಗಳು (FAQs)

• ಪ್ರಶ್ನೆ: ಒಬ್ಬ ವ್ಯಕ್ತಿ ಹೆಸರಲ್ಲಿ ಎಷ್ಟು ಸಿಮ್ ಕಾರ್ಡ್ ಪಡೆಯಬಹುದು?
• ಉತ್ತರ: ಹೆಚ್ಚಿನ ರಾಜ್ಯಗಳಲ್ಲಿ ಒಬ್ಬ ವ್ಯಕ್ತಿ ಹೆಸರಲ್ಲಿ ಗರಿಷ್ಠ 9 ಸಿಮ್ ಕಾರ್ಡ್ ಪಡೆಯಬಹುದು. ಜಮ್ಮು ಕಾಶ್ಮೀರ, ಈಶಾನ್ಯ ರಾಜ್ಯಗಳಲ್ಲಿ ಈ ಮಿತಿ 6 ಇದೆ.
• ಪ್ರಶ್ನೆ: ಒಂದು ಟೆಲಿಕಾಂ ಕಂಪನಿಯಿಂದ 9 ಸಿಮ್ ಕಾರ್ಡ್ ಪಡೆಯಬಹುದಾ?
• ಉತ್ತರ: ಇಲ್ಲ. ಏರ್ಟೆಲ್, ಜಿಯೋ, ವೊಡಾಫೋನ್ ಹೀಗೆ ಎಲ್ಲಾ ಟೆಲಿಕಾಂ ಕಂಪನಿಗಳಿಂದ ಸೇರಿಸಿ ಪಡೆಯಲಾದ ಒಟ್ಟು ಸಿಮ್ ಕಾರ್ಡ್​ಗಳು ಲೆಕ್ಕಕ್ಕೆ ಬರುತ್ತವೆ.
• ಪ್ರಶ್ನೆ: ನಿಮ್ಮ ಹೆಸರಲ್ಲಿ ಎಷ್ಟು ಸಿಮ್ ಕಾರ್ಡ್ ಇವೆ ಎಂದು ಹುಡುಕುವುದು ಹೇಗೆ?
• ಉತ್ತರ: ಸಂಚಾರ್ ಸಾಥಿ ಪೋರ್ಟಲ್​ಗೆ ಹೋಗಿ ಅಲ್ಲಿ ನಿಮ್ಮ ಹೆಸರಲ್ಲಿ ಎಷ್ಟು ಕನೆಕ್ಷನ್ಸ್ ಇವೆ ಎಂದು ತಿಳಿಯಬಹುದು ಎನ್ನಲಾಗಿದೆ.

Published On - 12:26 pm, Thu, 20 August 26