ಭಾರತದಲ್ಲಿ ಇನ್ಕಮ್ ಟ್ಯಾಕ್ಸ್ ಅತಿಯಾಗಿದೆಯಾ? ಬೇರೆ ಪ್ರಮುಖ ದೇಶಗಳಲ್ಲಿ ಎಷ್ಟಿದೆ ಆದಾಯ ತೆರಿಗೆ? ಇಲ್ಲಿದೆ ಡೀಟೇಲ್ಸ್

ನವದೆಹಲಿ, ಫೆಬ್ರುವರಿ 2: ಭಾರತದಲ್ಲಿ ಆದಾಯ ತೆರಿಗೆ ಅತಿಯಾಯಿತು ಎಂಬುದು ಹಲವರ ಆರೋಪ. ಆದಾಯ ತೆರಿಗೆಯೇ ಇಲ್ಲದ ಅಥವಾ ಬಹಳ ಕಡಿಮೆ ಆದಾಯ ತೆರಿಗೆ ಇರುವ ದೇಶಗಳನ್ನು ನಿದರ್ಶನವಾಗಿಟ್ಟುಕೊಂಡು, ಭಾರತದಲ್ಲಿ ಆದಾಯ ತೆರಿಗೆ ಅಧಿಕ ಮಟ್ಟದಲ್ಲಿದೆ ಎಂದು ಹೇಳುವುದುಂಟು. ವಾಸ್ತವದಲ್ಲಿ, ವಿಶ್ವದ ಪ್ರಮುಖ ಆರ್ಥಿಕತೆಗಳಲ್ಲಿ ಹೆಚ್ಚಿನ ದೇಶಗಳಲ್ಲಿ ಭಾರತದಕ್ಕಿಂತ ಹೆಚ್ಚಿನ ಆದಾಯ ತೆರಿಗೆ ದರಗಳಿವೆ. ಟ್ಯಾಕ್ಸ್ ಕನ್ಸಲ್ಟಿಂಗ್ ಸಂಸ್ಥೆಯಾದ ಆರ್​ಎಸ್​ಎಂ ಇಂಡಿಯಾದ ಇತ್ತೀಚಿನ ದತ್ತಾಂಶದ ಪ್ರಕಾರ ಕೆನಡಾ, ಚೀನಾ, ಫ್ರಾನ್ಸ್, ಜರ್ಮನಿ, ಜಪಾನ್ ಇತ್ಯಾದಿ ದೊಡ್ಡ ಆರ್ಥಿಕತೆಯ ದೇಶಗಳಲ್ಲಿ ಭಾರತಕ್ಕಿಂತ ಹೆಚ್ಚು ಆದಾಯ ತೆರಿಗೆ ಇದೆ.

ಭಾರತದ ಇತ್ತೀಚಿನ ಹೊಸ ಟ್ಯಾಕ್ಸ್ ರಿಜೈಮ್​ನ ದರಗಳನ್ನು ಪರಿಗಣಿಸಿದರೆ ಗರಿಷ್ಠ ತೆರಿಗೆ ಶೇ. 39 ಇದೆ. ಟ್ಯಾಕ್ಸ್ ಸ್ಲ್ಯಾಬ್ ಪ್ರಕಾರ ಗರಿಷ್ಠ ತೆರಿಗೆ ಶೇ. 30 ಎಂದಿದೆ. ಹೆಚ್ಚಿನ ಆದಾಯ ಇರುವವರಿಗೆ ವಿಧಿಸಲಾಗುವ ಸರ್​ಚಾರ್ಜ್ ಇತ್ಯಾದಿಯನ್ನೂ ಸೇರಿಸಿದರೆ ಶೇ. 39ರಷ್ಟು ತೆರಿಗೆ ಆಗುತ್ತದೆ. ಗಮನಿಸಿ, ಇದು ಗರಿಷ್ಠ ತೆರಿಗೆ ದರ.

ಇದನ್ನೂ ಓದಿ: Tariff war: ಅಮೆರಿಕ ವರ್ಸಸ್ ಕೆನಡಾ, ಮೆಕ್ಸಿಕೋ ಚೀನಾ ತೆರಿಗೆ ಯುದ್ಧ; ಭಾರತಕ್ಕಿದೆ ಲಾಭ

ವಿಶ್ವ ಆರ್ಥಿಕತೆಯ ಬಹುಪಾಲು ಇರುವ ಜಿ-20 ಗುಂಪಿನ ದೇಶಗಳಲ್ಲಿರುವ ಆದಾಯ ತೆರಿಗೆ ಗಮನಿಸಿದರೆ, ಹೆಚ್ಚಿನ ರಾಷ್ಟ್ರಗಳಲ್ಲಿ ಅಧಿಕ ಆದಾಯ ತೆರಿಗೆ ಇದೆ. ಬ್ರಿಟನ್​ನಲ್ಲಿ ಶೇ. 62ರಷ್ಟು ತೆರಿಗೆ ಇದೆ. ಜಪಾನ್​ನಲ್ಲಿ ಶೇ. 55.95, ಕೆನಡಾದಲ್ಲಿ ಶೇ. 54.8ರಷ್ಟು ಗರಿಷ್ಠ ಆದಾಯ ತೆರಿಗೆ ಇದೆ. ಫ್ರಾನ್ಸ್, ಚೀನಾ ಮತ್ತು ಜರ್ಮನಿಯಲ್ಲಿ ತಲಾ ಶೇ. 45ರಷ್ಟು ಆದಾಯ ತೆರಿಗೆ ಇದೆ. ಅಮೆರಿಕದಲ್ಲಿ ಗರಿಷ್ಠ ಟ್ಯಾಕ್ಸ್ ಸ್ಲಾಬ್ ದರವಾಗಿ ಶೇ. 37 ಇದೆ. ಕ್ಯಾಲಿಫೋರ್ನಿಯಾ ರಾಜ್ಯದಲ್ಲಿ ಅದು ಶೇ. 45ಕ್ಕಿಂತಲೂ ಹೆಚ್ಚಿದೆ. ಹೀಗಾಗಿ, ಭಾರತದಲ್ಲಿ ಇರುವ ಶೇ. 39 ತೆರಿಗೆ ತೀರಾ ಹೆಚ್ಚೆನಿಸುವುದಿಲ್ಲ.

ಬ್ರಿಟನ್, ಆಸ್ಟ್ರೇಲಿಯಾ, ಕೆನಡಾ, ಚೀನಾ, ಫ್ರಾನ್ಸ್, ಜರ್ಮನಿ, ಇಟಲಿ, ಜಪಾನ್, ಸೌತ್ ಕೊರಿಯಾ, ಸೌತ್ ಆಫ್ರಿಕಾ ದೇಶಗಳಲ್ಲಿ ಭಾರತಕ್ಕಿಂತ ಹೆಚ್ಚು ಇನ್ಕಮ್ ಟ್ಯಾಕ್ಸ್ ರೇಟ್ ಇದೆ. ಅರ್ಜೆಂಟೀನಾ, ಇಂಡೋನೇಷ್ಯಾ, ಮೆಕ್ಸಿಕೋ, ಅಮೆರಿಕ ಮೊದಲಾದ ಕೆಲ ದೇಶಗಳಲ್ಲಿ ಭಾರತಕ್ಕೆ ಹತ್ತಿರ ಹತ್ತಿರದಷ್ಟು ತೆರಿಗೆ ಪ್ರಮಾಣ ಇದೆ. ಸೌದಿ ಅರೇಬಿಯಾದಲ್ಲಿ ಶೂನ್ಯ ತೆರಿಗೆ ಇದೆ. ರಷ್ಯಾದಲ್ಲಿ ಶೇ. 22ರಷ್ಟು ಮಾತ್ರವೇ ತೆರಿಗೆ ಇರುವುದು.

ಇದನ್ನೂ ಓದಿ: ಬಜೆಟ್​ನಿಂದ ಅನುಭೋಗ ಆರ್ಥಿಕತೆಗೆ ಹೇಗೆ ಪುಷ್ಟಿ ಸಿಗುತ್ತೆ? ಇಲ್ಲಿದೆ ಸರಳ ವಿವರಣೆ

ಸ್ಲೊವೇನಿಯಾದಿಂದ ಹಿಡಿದು ಯುಕೆವರೆಗೆ ಹತ್ತಕ್ಕೂ ಹೆಚ್ಚು ದೇಶಗಳಲ್ಲಿ ಗರಿಷ್ಠ ಆದಾಯ ತೆರಿಗೆ ಶೇ. 50ಕ್ಕಿಂತ ಹೆಚ್ಚು ಇದೆ. ಮಾಲ್ಡೀವ್ಸ್, ಬಹಾಮಾಸ್ ಇತ್ಯಾದಿ ಪ್ರವಾಸೋದ್ಯಮ ಅಧಿಕ ಇರುವ ದೇಶಗಳಲ್ಲಿ ಶೂನ್ಯ ತೆರಿಗೆ ಅಥವಾ ಕಡಿಮೆ ತೆರಿಗೆ ಸಿಸ್ಟಂ ಇದೆ. ಕತಾರ್, ಓಮನ್, ಸೌದಿಯಂತಹ ಕೆಲ ಅರಬ್ ದೇಶಗಳಲ್ಲೂ ಆದಾಯ ತೆರಿಗೆ ಶೂನ್ಯ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ