Mumbai: ಮುಂಬೈ ಪೆಂಟ್​ಹೌಸ್ 240 ಕೋಟಿಗೆ ಮಾರಾಟ; ದೇಶದ ಅತಿ ದುಬಾರಿ ಅಪಾರ್ಟ್​​ಮೆಂಟ್ ಡೀಲ್ ಇದು!

ಮುಂಬೈ: ದೇಶದ ವಾಣಿಜ್ಯ ನಗರಿ ಮುಂಬೈಯ (Mumbai) ವರ್ಲಿಯಲ್ಲಿರುವ ಐಷಾರಾಮಿ ಪೆಂಟ್​ಹೌಸ್​ (Penthouse) ಅನ್ನು ಉದ್ಯಮಿಯೊಬ್ಬರು 240 ಕೋಟಿ ರೂ.ಗೆ ಖರೀದಿಸಿದ್ದಾರೆ. ಇದನ್ನು ದೇಶದ ಅತಿ ದುಬಾರಿ ಅಪಾರ್ಟ್​​ಮೆಂಟ್ ಡೀಲ್ ಎಂದೇ ಹೇಳಲಾಗಿದೆ. ವರ್ಲಿಯ ಅನ್ನಿ ಬೆಸೆಂಟ್​ ರಸ್ತೆಯಲ್ಲಿರುವ ‘ತ್ರೀ ಸಿಕ್ಸ್​ಟಿ ವೆಸ್ಟ್ (Three Sixty West)’ ಐಷಾರಾಮಿ ಪೆಂಟ್​ಹೌಸ್​ ಅನ್ನು ‘ವೆಲ್ಸ್​​ಪನ್ ಗ್ರೂಪ್​’ನ ಅಧ್ಯಕ್ಷ ಬಿ.ಕೆ. ಗೋಯೆಂಕಾ (BK Goenka) ಖರೀದಿಸಿದ್ದಾರೆ. ಮಾರುಕಟ್ಟೆ ಮೂಲಗಳ ಪ್ರಕಾರ ಪೆಂಟ್​ಹೌಸ್​​​ ಗಗನಚುಂಬಿ ಕಟ್ಟಡದ ಟವರ್ ಬಿ ವಿಭಾಗದ 63, 64 ಮತ್ತು 65ನೇ ಮಹಡಿಯಲ್ಲಿದೆ. ದುಬಾರಿ ಪೆಂಟ್​ಹೌಸ್ 30,000 ಚದರ ಅಡಿ ವ್ಯಾಪ್ತಿಯಲ್ಲಿದೆ. ಸರ್ಕಾರದ ಕೊಳೆಗೇರಿ ಪುನರ್ವಸತಿ ಯೋಜನೆಯಡಿ ರೂಪಿಸಲಾದ 300 ಚದರ ಅಡಿ ವಠಾರಕ್ಕಿಂತ ಸುಮಾರು 100 ಪಟ್ಟು ದೊಡ್ಡದಾಗಿದೆ ಎಂದು ವರದಿ ಉಲ್ಲೇಖಿಸಿದೆ. ಬುಧವಾರ (ಫೆಬ್ರವರಿ 8) ಖರೀದಿ ವಹಿವಾಟು ನಡೆದಿದೆ. ಖರೀದಿದಾರರು ಪೆಂಟ್​​ಹೌಸ್​ನಲ್ಲಿ ವಾಸಿಸುವ ಉದ್ದೇಶ ಹೊಂದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

‘ದೇಶದಲ್ಲಿ ಈವರೆಗೆ ಮಾರಾಟವಾದ ಅಪಾರ್ಟ್​​ಮೆಂಟ್​ಗಳ ಪೈಕಿ ಇದುವೇ ಅತಿ ದುಬಾರಿಯದ್ದಾಗಿದೆ. ಅಲ್ಟ್ರಾ-ಲಕ್ಷುರಿ ಸೆಗ್ಮೆಂಟ್​ನಲ್ಲಿ ಮುಂದಿನ ಎರಡು ತಿಂಗಳ ಒಳಗಾಗಿ ಇನ್ನಷ್ಟು ವಹಿವಾಟಿನ ಗುರಿ ಹೊಂದಿದ್ದೇವೆ. ಯಾಕೆಂದರೆ 2023ರ ಏಪ್ರಿಕ್​ ಬಳಿಕ ತೆರಿಗೆ ಕಾಯ್ದೆಯ ಸೆಕ್ಷನ್ 54ರ ಅಡಿ ಬಂಡವಾಳ ಗಳಿಕೆಯ ಮಿತಿಯನ್ನು 10 ಕೋಟಿ ರೂ.ಗೆ ನಿಗದಿಪಡಿಸಲಾಗಿದೆ. ಅದಕ್ಕಿಂತ ಹೆಚ್ಚಿನ ಗಳಿಕೆಗೆ ತೆರಿಗೆ ಪಾವತಿಸಬೇಕಾಗುತ್ತದೆ’ ಎಂದು ರಿಯಲ್ ಎಸ್ಟೇಟ್ ಸಂಸ್ಥೆ ಲೈಸೆಸ್ ಫೋರಸ್​ನ ಎಂಡಿ ಪಂಕಜ್ ಕಪೂರ್ ಹೇಳಿದ್ದಾರೆ.

ಇದನ್ನೂ ಓದಿ: Credit Card: ಕ್ರೆಡಿಟ್ ಕಾರ್ಡ್ ಬಿಲ್ ಇಎಂಐಗೆ ಪರಿವರ್ತಿಸುವುದು ಒಳ್ಳೆಯದೇ? ಇಲ್ಲಿವೆ ಸಾಧಕ ಬಾಧಕಗಳ ವಿವರ

‘ತ್ರೀ ಸಿಕ್ಸ್​ಟಿ ವೆಸ್ಟ್’ ಟವರ್​ಗೆ ಹೊಂದಿಕೊಂಡಂತಿರುವ ಮತ್ತೊಂದು ಪೆಂಟ್​​ಹೌಸ್​ ಅನ್ನು ಬ್ಯುಲ್ಡರ್ ವಿಕಾಸ್ ಒಬೆರಾಯ್ 240 ಕೋಟಿ ರೂ.ಗೆ ಖರೀದಿಸಿದ್ದಾರೆ. ಬ್ಯುಲ್ಡರ್ ಹಾಗೂ ಉದ್ಯಮಿ ಸುಧಾಕರ್ ಶೆಟ್ಟಿ ಸಹಭಾಗಿತ್ವದಲ್ಲಿ ಒಬೆರಾಯ್ ಅವರು ಐಷಾರಾಮಿ ಪೆಂಟ್​​ಹೌಸ್ ಅಭಿವೃದ್ಧಿಪಡಿಸಿದ್ದಾರೆ. ಇದನ್ನು ತಮ್ಮ ಕಂಪನಿ ಆರ್​​.ಎಸ್​​. ಎಂಟರ್​ಪ್ರೈಸಸ್ ಲಿಮಿಟೆಡ್​ನಿಂದ ಒಬೆರಾಯ್ ಖರೀದಿಸಿದ್ದಾರೆ ಎನ್ನಲಾಗಿದೆ.

ಪೆಂಟ್​ಹೌಸ್​ ಎಂದರೇನು?

ಗಗನಚುಂಬಿ ಕಟ್ಟದ ಅತಿ ಎತ್ತರದ ಮಹಡಿಯಲ್ಲಿರುವ ಫ್ಲ್ಯಾಟ್​ ಅನ್ನು ಸಾಮಾನ್ಯವಾಗಿ ಪೆಂಟ್​ಹೌಸ್ ಎಂದು ಕರೆಯಲಾಗುತ್ತದೆ. ಪೆಂಟ್​ಹೌಸ್ ಎಂದು ಕರೆಯಲ್ಪಡುವ ಈ ಫ್ಲ್ಯಾಟ್​ಗಳು ಅತ್ಯಂತ ಐಷಾರಾಮಿಯಾಗಿರುತ್ತವೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ