ಭಾರತದ ಫಾರೆಕ್ಸ್ ರಿಸರ್ವ್ಸ್ 50 ದಿನದಲ್ಲಿ 47 ಬಿಲಿಯನ್ ಡಾಲರ್ನಷ್ಟು ಇಳಿಕೆ; ಪಾಕಿಸ್ತಾನದ್ದು 17 ಮಿಲಿಯನ್ ಡಾಲರ್ ಏರಿಕೆ
Forex reserves of India: ಭಾರತದ ಫಾರೀನ್ ಎಕ್ಸ್ಚೇಂಜ್ ರಿಸರ್ವ್ಸ್ ನವೆಂಬರ್ 15ರಂದು ಅಂತ್ಯಗೊಂಡ ವಾರದಲ್ಲಿ 17 ಬಿಲಿಯನ್ ಡಾಲರ್ನಷ್ಟು ಇಳಿಕೆ ಕಂಡಿದೆ. ಕಳೆದ 50 ದಿನಗಳಿಂದ ಕುಸಿತವಾದ ಫಾರೆಕ್ಸ್ ಮೀಸಲು ನಿಧಿಯ ಪ್ರಮಾಣ ಬರೋಬ್ಬರಿ 47 ಬಿಲಿಯನ್ ಡಾಲರ್ ಆಗಿದೆ. ಅದೇ ವೇಳೆ ಪಾಕಿಸ್ತಾನದಲ್ಲಿ ಫಾರೆಕ್ಸ್ ಸಂಪತ್ತು 17 ಮಿಲಿಯನ್ ಡಾಲರ್ನಷ್ಟು ಏರಿದೆ.
ನವದೆಹಲಿ, ನವೆಂಬರ್ 24: ಭಾರತದ ವಿದೇಶೀ ವಿನಿಮಯ ಮೀಸಲು ನಿಧಿಯಲ್ಲಿ ಸತತವಾದ ಇಳಿಕೆ ಮುಂದುವರಿದಿದೆ. ಮೊನ್ನೆ ಆರ್ಬಿಐ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಭಾರತದ ಫಾರೆಕ್ಸ್ ರಿಸರ್ವ್ಸ್ ನವೆಂಬರ್ 15ರಂದು 657.892 ಬಿಲಿಯನ್ ಡಾಲರ್ಗೆ ಇಳಿದಿದೆ. ಆ ವಾರ ಬರೋಬ್ಬರಿ 17.761 ಬಿಲಿಯನ್ ಡಾಲರ್ನಷ್ಟು ನಿಧಿ ಕುಸಿತ ಕಂಡಿದೆ. ಅದಕ್ಕೂ ಹಿಂದಿನ ವಾರದಲ್ಲಿ, ಅಂದರೆ ನವೆಂಬರ್ 8ರಂದು ಅಂತ್ಯಗೊಂಡ ವಾರದಲ್ಲಿ 6.477 ಬಿಲಿಯನ್ ಡಾಲರ್ನಷ್ಟು ಇಳಿದಿತ್ತು.
ನವೆಂಬರ್ 15ರಂದು ಅಂತ್ಯಗೊಂಡ ವಾರದಲ್ಲಿ ಫಾರೆಕ್ಸ್ ರಿಸರ್ವ್ಸ್ ಕುಸಿತವಾದ 17.761 ಬಿಲಿಯನ್ ಡಾಲರ್ನಲ್ಲಿ ವಿದೇಶೀ ಕರೆನ್ಸಿ ಆಸ್ತಿಗಳ ಮೌಲ್ಯ ಕುಸಿತವೇ 15.548 ಬಿಲಿಯನ್ ಡಾಲರ್ನಷ್ಟಿದೆ. ಗೋಲ್ಡ್ ರಿಸರ್ವ್ ಕೂಡ 2.068 ಬಿಲಿಯನ್ ಡಾಲರ್ನಷ್ಟು ಇಳಿಕೆ ಆಗಿದೆ. ಎಸ್ಡಿಆರ್ ಮತ್ತು ಐಎಂಎಫ್ನೊಂದಿಗಿನ ನಿಧಿಯಲ್ಲೂ ಇಳಿಕೆ ಆಗಿದೆ.
ಇದನ್ನೂ ಓದಿ: ಭಾರತದ ಸ್ಟಾರ್ಟಪ್ಗಳಿಗೆ ಈ ವಾರ ಫಂಡಿಂಗ್ ಸುಗ್ಗಿ; ಶೇ. 226ರಷ್ಟು ಫಂಡಿಂಗ್ ಹೆಚ್ಚಳ
50 ದಿನದಲ್ಲಿ 47 ಬಿಲಿಯನ್ ಡಾಲರ್ನಷ್ಟು ಫಾರೆಕ್ಸ್ ರಿಸರ್ವ್ಸ್ ಕುಸಿತ
ಭಾರತದ ಫಾರೆಕ್ಸ್ ರಿಸರ್ವ್ಸ್ ಸೆಪ್ಟೆಂಬರ್ ಕೊನೆಯ ವಾರದಲ್ಲಿ ಗರಿಷ್ಠ ಮಟ್ಟವಾದ 704.885 ಬಿಲಿಯನ್ ಡಾಲರ್ ಮುಟ್ಟಿತ್ತು. ಅದಾದ ಬಳಿಕ ನಿಧಿಯಲ್ಲಿ ಸತತ ಇಳಿಕೆ ಆಗಿದೆ. 50 ದಿನದ ಅಂತರದಲ್ಲಿ 47 ಬಿಲಿಯನ್ ಡಾಲರ್ನಷ್ಟು ಇಳಿಕೆ ಆಗಿದೆ.
ಪಾಕಿಸ್ತಾನದಲ್ಲಿ ಹೆಚ್ಚುತ್ತಿರುವ ಫಾರೆಕ್ಸ್ ಸಂಪತ್ತು
ಪಾಕಿಸ್ತಾನದ ವಿದೇಶೀ ವಿನಿಮಯ ಮೀಸಲು ನಿಧಿ ಕಳೆದ ಕೆಲ ವಾರಗಳಿಂದ ಉತ್ತಮ ಪ್ರಮಾಣದಲ್ಲಿ ಹೆಚ್ಚಳ ಕಾಣುತ್ತಿದೆ. ಭಾರತದ ಫಾರೆಕ್ಸ್ ಸಂಪತ್ತು 50 ದಿನದಲ್ಲಿ 47 ಬಿಲಿಯನ್ ಡಾಲರ್ನಷ್ಟು ಕುಸಿತ ಕಂಡರೆ, ಪಾಕಿಸ್ತಾನದ ಸಂಪತ್ತು ಅದೇ ವೇಳೆ 29 ಮಿಲಿಯನ್ ಡಾಲರ್ನಷ್ಟು ಏರಿಕೆ ಆಗಿದೆ. ಆ ದೇಶದ ಒಟ್ಟಾರೆ ಫಾರೆಕ್ಸ್ ನಿಧಿ 16 ಬಿಲಿಯನ್ ಡಾಲರ್ಗೆ ಏರಿದೆ.
ಪಾಕಿಸ್ತಾನದ ಒಟ್ಟಾರೆ ಫಾರೆಕ್ಸ್ ನಿಧಿಗಿಂತ ಹೆಚ್ಚಿನ ಪ್ರಮಾಣದಲ್ಲಿ ಭಾರತದ ಸಂಪತ್ತು ಒಂದೇ ವಾರದಲ್ಲಿ ಕರಗಿದೆ. ಇಷ್ಟಾದರೂ ಭಾರತದ ಫಾರೆಕ್ಸ್ ನಿಧಿಯು ಪಾಕಿಸ್ತಾನದಕ್ಕಿಂತ 41 ಪಟ್ಟು ಹೆಚ್ಚು ಇದೆ. ಚೀನಾ, ಜಪಾನ್, ಸ್ವಿಟ್ಜರ್ಲ್ಯಾಂಡ್ ಬಿಟ್ಟರೆ ಭಾರತವೇ ಅತಿಹೆಚ್ಚು ಫಾರೆಕ್ಸ್ ರಿಸರ್ವ್ಸ್ ನಿಧಿ ಹೊಂದಿರುವುದು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ