Trade Deficit: ಹಣದುಬ್ಬರ ಬಳಿಕ, ಈಗ ವ್ಯಾಪಾರ ಕೊರತೆಯೂ ಜೂನ್ನಲ್ಲಿ ಕಡಿಮೆ
Exports and Imports Down In June: ಭಾರತದ ರಫ್ತು ಮತ್ತು ಆಮದು ನಡುವಿನ ಅಂತರವಾದ ಟ್ರೇಡ್ ಡೆಫಿಸಿಟ್ 2023ರ ಜೂನ್ ತಿಂಗಳಲ್ಲಿ 20.13 ಬಿಲಿಯನ್ ಡಾಲರ್ಗೆ ಇಳಿದಿರುವುದು ಸರ್ಕಾರ ಬಿಡುಗಡೆ ಮಾಡಿದ ಅಂಕಿ ಅಂಶಗಳಿದ ತಿಳಿದುಬಂದಿದೆ.
Updated on:Jul 14, 2023 | 6:14 PM
ನವದೆಹಲಿ, ಜುಲೈ 14: ಭಾರತದ ಸರಕು ವ್ಯಾಪಾರ ಅಂತರ ಅಥವಾ ವ್ಯಾಪಾರ ಕೊರತೆ (Merchandise Trade Deficit) ಕಡಿಮೆಗೊಂಡಿದೆ. ಮೇ ತಿಂಗಳಲ್ಲಿ 22.1 ಬಿಲಿಯನ್ ಡಾಲರ್ ಇದ್ದ ಮರ್ಚಾಂಡೈಸ್ ಟ್ರೇಡ್ ಡೆಫಿಸಿಟ್ ಜೂನ್ ತಿಂಗಳಲ್ಲಿ 20.13 ಬಿಲಿಯನ್ ಡಾಲರ್ಗೆ ಇಳಿಮುಖವಾಗಿದೆ. ಮೇ ತಿಂಗಳಿಗೆ ಹೋಲಿಸಿದರೆ ಜೂನ್ ತಿಂಗಳಲ್ಲಿ ಸರಕುಗಳ ಆಮದು ಮತ್ತು ರಫ್ತು (Export and Import) ಎರಡೂ ಕಡಿಮೆ ಆಗಿವೆ. ಅದರೆ, ರಫ್ತಿಗಿಂತ ಆಮದು ಹೆಚ್ಚು ಇಳಿದಿದೆ. ಹೀಗಾಗಿ, ವ್ಯಾಪಾರ ಕೊರತೆ ಕಡಿಮೆ ಆಗಿದೆ. ಆದರೆ ಆರ್ಥಿಕ ತಜ್ಞರು ಜೂನ್ ತಿಂಗಳಲ್ಲಿ ಟ್ರೇಡ್ ಡೆಫಿಸಿಟ್ ಇನ್ನೂ ಹೆಚ್ಚು ಇಳಿಕೆಯಾಗಬಹುದು ಎಂದು ಎಣಿಸಿದ್ದರು.
ಟ್ರೇಡ್ ಡೆಫಿಸಿಟ್ ಎಂದರೇನು?
ವ್ಯಾಪಾರ ಕೊರತೆ ಎಂದರೆ ಹೊರಹೋಗುವ ಮತ್ತು ಒಳಬರುವ ವಸ್ತುಗಳ ಮೌಲ್ಯದಲ್ಲಿರುವ ಅಂತರ. ರಫ್ತಾದ ವಸ್ತುಗಳೆಷ್ಟು ಮತ್ತು ಆಮದಾದ ವಸ್ತುಗಳು ಎಷ್ಟು ಎಂಬ ಲೆಕ್ಕವೇ ಟ್ರೇಡ್ ಡೆಫಿಸಿಟ್. ರಫ್ತಿಗಿಂತ ಆಮದು ಹೆಚ್ಚಾದರೆ ಅದಕ್ಕೆ ಟ್ರೇಡ್ ಡೆಫಿಸಿಟ್ ಎನ್ನುವುದು.
ಮೇ, ಜೂನ್ ತಿಂಗಳಲ್ಲಿ ಆಮದು ರಫ್ತು ಎಷ್ಟು?
2023ರ ಜೂನ್ ತಿಂಗಳು: ರಫ್ತು 32.97 ಬಿಲಿಯನ್ ಡಾಲರ್; ಆಮದು 53.10 ಬಿಲಿಯನ್ ಡಾಲರ್
ಮೇ ತಿಂಗಳು: ರಫ್ತು 34.98 ಬಿಲಿಯನ್ ಡಾಲರ್; ಆಮದು 57.10 ಬಿಲಿಯನ್ ಡಾಲರ್
ಇದನ್ನೂ ಓದಿ: Wholesale Inflation: ಸಗಟು ಹಣದುಬ್ಬರ ಮೈನಸ್ 4.12ಪ್ರತಿಶತ; 2015ರ ಬಳಿಕ ಅತಿಕಡಿಮೆ ಮಟ್ಟ
ಇನ್ನು ರಫ್ತಿನಲ್ಲಿ ಸರ್ವಿಸ್ ಸೆಕ್ಟರ್ ಅನ್ನೂ ಒಳಗೊಂಡರೆ ಜೂನ್ ತಿಂಗಳಲ್ಲಿ ಆದ ರಫ್ತು 60.09 ಬಿಲಿಯನ್ ಡಾಲರ್ ಇದೆ. ಜೂನ್ ತಿಂಗಳಲ್ಲಿ ರಫ್ತು ಹೆಚ್ಚಳ ಕಂಡ ಸರಕುಗಳಲ್ಲಿ ಎಲೆಕ್ಟ್ರಾನಿಕ್ ವಸ್ತುಗಳಿವೆ. ಇವುಗಳ ರಫ್ತು ಶೇ. 40ಕ್ಕಿಂತಲೂ ಹೆಚ್ಚಾಗಿದೆ. ಕಬ್ಬಿಣದ ಅದಿರು, ಕೃಷಿ ಉತ್ಪನ್ನಗಳು, ತೈಲ ಬೀಜ ಇತ್ಯಾದಿ ವಸ್ತುಗಳ ರಫ್ತು ಹೆಚ್ಚಳ ಕಂಡಿದೆ.
ರೀಟೇಲ್ ಹಣದುಬ್ಬರ ಇಳಿಕೆ
ಮೊನ್ನೆ (ಜುಲೈ 12) ಬಿಡುಗಡೆ ಆದ ವರದಿ ಪ್ರಕಾರ ಜೂನ್ ತಿಂಗಳಲ್ಲಿ ರೀಟೇಲ್ ಹಣದುಬ್ಬರ ತುಸು ಏರಿಕೆ ಕಂಡು ಶೇ. 4.81ಕ್ಕೆ ಹೋಗಿ ನಿಂತಿದೆ. ಮೇ ತಿಂಗಳಲ್ಲಿ ಇದು ಶೇ. 4.25ರಷ್ಟಿತ್ತು. ಇವತ್ತು (ಜುಲೈ 14) ಸಗಟು ಹಣದುಬ್ಬರ ವರದಿ ಬಂದಿದ್ದು, ಮೈನಸ್ 4.12 ಪ್ರತಿಶತಕ್ಕೆ ಕುಸಿದಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 6:12 pm, Fri, 14 July 23
