Cognizant Layoffs: ಆಗ ಅಕ್ಸೆಂಚರ್ನಲ್ಲಿ 19 ಸಾವಿರ, ಈಗ ಕಾಗ್ನಿಜೆಂಟ್ನಲ್ಲಿ 3,500 ಉದ್ಯೋಗಿಗಳ ಲೇ ಆಫ್
Office Spaces of Cognizant To Go Shorter: ಈ ವರ್ಷ ಕಂಪನಿಗೆ ಆದಾಯ ಕಡಿಮೆ ಬರುವ ಸಾಧ್ಯತೆ ಇರುವುದರಿಂದ ವೆಚ್ಚ ಕಡಿಮೆ ಮಾಡಲು ಕಾಗ್ನೈಜೆಂಟ್ ನಿರ್ಧರಿಸಿದೆ. ಈ ನಿಟ್ಟಿನಲ್ಲಿ ಉದ್ಯೋಗಿಗಳ ಲೇ ಆಫ್ ಮತ್ತು ಕಚೇರಿ ಸ್ಥಳ ಮೊಟಕುಗೊಳಿಸುವುದು ಸೇರಿದಂತೆ ವಿವಿಧ ಕ್ರಮಗಳಿಗೆ ಐಟಿ ಕಂಪನಿ ನಿರ್ಧರಿಸಿದೆ.
ನವದೆಹಲಿ: ಉದ್ಯೋಗಿಗಳನ್ನು ಸಾಲು ಸಾಲಾಗಿ ಲೇ ಆಫ್ ಮಾಡುತ್ತಿರುವ ಟೆಕ್ ಕಂಪನಿಗಳ ಪಟ್ಟಿಗೆ ಈಗ ಕಾಗ್ನಿಜೆಂಟ್ (Cognizant) ಸೇರ್ಪಡೆಯಾಗಿದೆ. ಭಾರತ ಮೂಲದ ಅಮೆರಿಕನ್ ಐಟಿ ಕಂಪನಿ ಕಾಗ್ನೈಜೆಂಟ್ ತನ್ನ ವೆಚ್ಚ ಕಡಿಮೆ ಮಾಡಲು ಮತ್ತು ಚುರುಕು ಕಂಡುಕೊಳ್ಳಲು ತನ್ನ ಕಾರ್ಯಾಚರಣೆ ಪ್ರಕ್ರಿಯೆ ಸರಳಗೊಳಿಸುತ್ತಿದೆ. ನೆಕ್ಸ್ಟ್ಜೆನ್ (NextGen) ಎನ್ನುವ ಯೋಜನೆಯೊಂದನ್ನು ಕಾಗ್ನೈಜೆಂಟ್ ಜಾರಿಗೆ ತಂದಿದ್ದು, ಇದರಲ್ಲಿ ಕಂಪನಿ ಕಾರ್ಯಾಚರಿಸುವ ವಿಧಾನವನ್ನು ಹೆಚ್ಚು ಪರಿಣಾಮಕಾರಿ ಮತ್ತು ಸರಳಗೊಳಿಸಲಾಗುತ್ತಿದೆ. ಇದರಿಂದ 3,500 ಉದ್ಯೋಗಿಗಳಿಗೆ ಕೆಲಸ ಹೋಗುವ ಸಾಧ್ಯತೆ ಇದೆ. ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕುವುದಷ್ಟೇ ಅಲ್ಲ, ಕೆಲಸ ಸ್ಥಳದಲ್ಲೂ ಬದಲಾವಣೆ ಮಾಡಲಾಗುತ್ತಿದೆ. ಅನವಶ್ಯಕತ ಕಚೇರಿ ಸ್ಥಳವನ್ನು ತೆರವುಗೊಳಿಸಲಾಗುತ್ತಿದೆ. ಇದರಿಂದಲೂ ಕಂಪನಿಗೆ ಒಂದಷ್ಟು ವೆಚ್ಚದ ಉಳಿತಾಯವಾಗುವ ನಿರೀಕ್ಷೆ ಇದೆ.
ಕಾಗ್ನಿಜೆಂಟ್ ಟೆಕ್ನಾಲಜೀಸ್ ಕಂಪನಿಯಲ್ಲಿ ಸದ್ಯ ಸುಮಾರು 3.5 ಲಕ್ಷ ಮಂದಿ ಕೆಲಸ ಮಾಡುತ್ತಿದ್ದಾರೆ. ಈಗ 3,500 ಮಂದಿ ಅಂದರೆ ಶೇ. 1ರಷ್ಟು ಉದ್ಯೋಗಿಗಳು ಕೆಲಸ ಕಳೆದುಕೊಳ್ಳಲಿದ್ದಾರೆ. ಅಂದರೆ ನೂರು ಉದ್ಯೋಗಿ ಪೈಕಿ ಒಬ್ಬರು ಮನೆಗೆ ಹೋಗಬೇಕಾಗುತ್ತದೆ. ಉದ್ಯೋಗಿ ವೆಚ್ಚ ಉಳಿಸುವುದಕ್ಕಿಂತ ಹೆಚ್ಚಾಗಿ ಕಾರ್ಯಾಚರಣೆ ವ್ಯವಸ್ಥೆ ಸರಳಗೊಳಿಸುವ ನಿಟ್ಟಿನಲ್ಲಿ ಲೇ ಆಫ್ ನಡೆಯುತ್ತಿರವಂತೆ ಮೇಲ್ನೋಟಕ್ಕೆ ತೋರುತ್ತಿದೆ. ಕಾರ್ಯಸ್ಥಳ ತೆರವು ಮೂಲಕ ಉಳಿಸಿದ ಹಣವನ್ನು ಸಣ್ಣ ನಗರಗಳಲ್ಲಿ ಕಚೇರಿ ಸ್ಥಾಪಿಸಲು ಬಳಸಲು ಕಾಗ್ನೈಜೆಂಟ್ ಯೋಜಿಸಿದೆ. ಉದ್ಯೋಗಿಗಳಿಗೆ ಕಚೇರಿಗೆ ಬಂದು ಕೆಲಸ ಮಾಡಲು ಅನುಕೂಲವಾಗಲು ಕಾಗ್ನೈಜೆಂಟ್ ಈ ಪ್ರಯತ್ನ ಮಾಡುತ್ತಿದೆ. ಭಾರತದಲ್ಲಿ 19,000 ಉದ್ಯೋಗಿಗಳನ್ನು ಲೇ ಆಫ್ ಮಾಡಿದ ಅಕ್ಸೆಂಚರ್ಗೆ ಹೋಲಿಸಿದರೆ ಕಾಗ್ನಿಜೆಂಟ್ ಲೇ ಆಫ್ ವಿಚಾರದಲ್ಲಿ ತುಸು ಮೃದುವಾಗಿದೆ.
ಈ ವರ್ಷ ಆದಾಯ ಕಡಿಮೆ ಆಗುವ ಭೀತಿ ಕಾಗ್ನಿಜೆಂಟ್ಗೆ
ಕಾಗ್ನಿಜೆಂಟ್ ತನ್ನ ಮೊದಲ ಕ್ವಾರ್ಟರ್ನಲ್ಲಿ (2023 ಜನವರಿಯಿಂದ ಮಾರ್ಚ್) ಶೇ. 3ರಷ್ಟು ಆದಾಯ ಹೆಚ್ಚಳ ಕಂಡಿದೆಯಾದರೂ, ಈ ವರ್ಷ ತನ್ನ ಅದಾಯ ವೃದ್ಧಿ ಶೇ. 0.8ಕ್ಕಿಂತ ಕಡಿಮೆಗೆ ಇಳಿಯಬಹುದು ಎಂದು ಅಂದಾಜಿಸಿದೆ. ಮೈನಸ್ ಶೇ. 1.2ರಷ್ಟು ಹಿನ್ನಡೆಯೂ ಆಗಬಹುದು ಎನ್ನುವ ಭೀತಿಯನ್ನೂ ಅದು ವ್ಯಕ್ತಪಡಿಸಿದೆ. ಐಟಿ ಕಂಪನಿಗಳ ಪೈಕಿ ಅತಿ ಕಡಿಮೆ ಲಾಭದ ಮಾರ್ಜಿನ್ ಹೊಂದಿರುವ ಕಂಪನಿಗಳಲ್ಲಿ ಕಾಗ್ನೈಜೆಂಟ್ ಕೂಡ ಒಂದು. ಹೀಗಾಗಿ, ಈ ಸಂಸ್ಥೆಗೆ ಬ್ಯುಸಿನೆಸ್ ಕಡಿಮೆ ಆದರೆ ಆದಾಯವೂ ಇನ್ನೂ ವೇಗವಾಗಿ ಕಡಿಮೆ ಆಗುತ್ತದೆ.
ಕಾಗ್ನಿಜೆಂಟ್ ಕಂಪನಿಯಲ್ಲಿ ಇತ್ತೀಚೆಗೆ ಸಾಕಷ್ಟು ಆಡಳಿತಾತ್ಮಕ ಬದಲಾವಣೆಗಳಾಗುತ್ತಿವೆ. ಸಿಇಒ ಆಗಿದ್ದ ಬ್ರಿಯಾನ್ ಹಮ್ಫ್ರೀಸ್ ಅವರನ್ನು ತೆಗೆದುಹಾಕಲಾಗಿತ್ತು. ಮೇಲ್ಪದರ ಇನ್ನೂ ಹಲವು ನಾಯಕರು ಕೆಲಸ ಬಿಡುವ ಸಾಧ್ಯತೆ ಇದೆ. ರವಿಕುಮಾರ್ ಎಸ್ ಎಂಬುವವರು ಇತ್ತೀಚೆಗಷ್ಟೇ ಸಿಇಒ ಆಗಿ ನೇಮಕವಾಗಿದ್ದಾರೆ. ಇಂಥ ಹೊತ್ತಿನಲ್ಲಿ ಹೊಸ ಸಿಇಒ ಮುಂದೆ ಗುರುತರ ಸವಾಲುಗಳಿವೆ. ಕಾಗ್ನಿಜೆಂಟ್ಗೆ ಪ್ರತಿಸ್ಪರ್ಧಿಗಳಾಗಿ ಇನ್ಫೋಸಿಸ್, ಟಿಸಿಎಸ್, ಅಕ್ಸೆಂಚರ್ ಮೊದಲಾದ ಕಂಪನಿಗಳಿವೆ.
ಇದನ್ನೂ ಓದಿ: Ola Refund: ಒಲಾ ಎಲೆಕ್ಟ್ರಿಕ್ ಶಾಕ್..! ಗ್ರಾಹಕರಿಗೆ 130 ಕೋಟಿ ರೂ ರೀಫಂಡ್; ಕಾರಣ ಏನು?
ಅಮೆರಿಕದಲ್ಲಿ ಮುಖ್ಯ ಕಚೇರಿ ಇದ್ದರೂ ಕಾಗ್ನಿಜೆಂಟ್ ಮೂಲ ಭಾರತದ್ದು:
ಕಾಗ್ನೈಜೆಂಟ್ ಸಂಸ್ಥೆ ಸ್ಥಾಪನೆಯಾಗಿದ್ದು 1994ರಂದು ಚೆನ್ನೈನಲ್ಲಿ. ಆತ ತೊಂಬತ್ತರ ದಶಕದಲ್ಲಿ ಬಹಳ ದೈತ್ಯ ಎನಿಸಿದ್ದ ಸತ್ಯಂ ಕಂಪ್ಯೂಟರ್ಸ್ ಹಾಗೂ ಡುನ್ ಅಂಡ್ ಬ್ರಾಡ್ಸ್ಟ್ರೀಟ್ ಸಂಸ್ಥೆಯ ಜಂಟಿ ಯೋಜನೆಯಾಗಿ ಇದರ ಸ್ಥಾಪನೆ ಆಗಿದ್ದು. ಬಳಿಕ ಇದರ ಮುಖ್ಯ ಕಚೇರಿಯನ್ನು ಅಮೆರಿಕಗೆ ವರ್ಗಾಯಿಸಲಾಯಿತು. ಅಲ್ಲಿನ ನಾಸ್ಡಾಕ್ ಷೇರುಪೇಟೆಯಲ್ಲಿ ಇದು ಲಿಸ್ಟ್ ಆಗಿದೆ. ಅಮೆರಿಕದ ಕಂಪನಿ ಆದರೂ ಇದರ ಹೆಚ್ಚಿನ ಕಾರ್ಯಾಚರಣೆ ಇರುವುದು ಭಾರತದಲ್ಲೇ.