Direct Sales: ಡೈರೆಕ್ಟ್ ಸೇಲ್ಸ್​ನಲ್ಲಿ ಕರ್ನಾಟಕವೇ ಮುಂದು; ನೇರ ಮಾರಾಟದಿಂದ ಬದಕುಕಟ್ಟಿಕೊಂಡ 78,000 ಕನ್ನಡಿಗರು

ಬೆಂಗಳೂರು, ಜುಲೈ 19: ಭಾರತದಲ್ಲಿ ನೇರ ಮಾರಾಟದ ಮಾರುಕಟ್ಟೆ ಇನ್ನೂ ಗಟ್ಟಿ ಮುಟ್ಟಾಗಿದೆ. 2021-22ರಲ್ಲಿ ಭಾರತದಲ್ಲಿ ನೇರ ಮಾರಾಟದಲ್ಲಿ ಆದ ವಹಿವಾಟು 19,030 ಕೋಟಿ ರೂ ಎಂದು ಇಂಡಿಯನ್ ಡೈರೆಕ್ಟ್ ಸೆಲ್ಲಿಂಗ್ ಅಸೋಷಿಯೇಶನ್ (IDSA- Indian Direct Selling Association) ನಡೆಸಿದ ವಾರ್ಷಿಕ ಸಮೀಕ್ಷೆ ವರದಿಯಲ್ಲಿ ಹೇಳಲಾಗಿದೆ. 2021-22ರ ಹಣಕಾಸು ವರ್ಷದಲ್ಲಿ ರಾಷ್ಟ್ರವ್ಯಾಪಿ 19,030 ರೂನಷ್ಟು ಡೈರೆಕ್ಸ್ ಸೇಲ್ಸ್ ಆಗಿದ್ದರೆ, ಕರ್ನಾಟಕದ ಪಾಲು ಶೇ. 5.9ರಷ್ಟಿದೆ. ಆ ವರ್ಷ ಕರ್ನಾಟಕದಲ್ಲಿ ಡೈರೆಕ್ಟ್ ಸೇಲ್ಸ್​ನಿಂದ 1,128 ಕೋಟಿ ರೂ ಮೌಲ್ಯದ ವಸ್ತುಗಳ ಮಾರಾಟವಾಗಿರುವುದು ತಿಳಿದುಬಂದಿದೆ. ದಕ್ಷಿಣ ಭಾರತ ಪ್ರದೇಶಗಳಲ್ಲಿ ಕರ್ನಾಟಕದಲ್ಲೇ ಅತಿ ಹೆಚ್ಚು ಡೈರೆಕ್ಟ್ ಸೇಲ್ಸ್ ಆಗಿರುವುದು.

ಭಾರತೀಯ ನೇರ ಮಾರಾಟ ಸಂಘಟನೆ (ಐಡಿಎಸ್​ಎ) ಬಿಡುಗಡೆ ಮಾಡಿದ ಸರ್ವೆ ರಿಪೋರ್ಟ್ ಪ್ರಕಾರ 2020-21ರ ವರ್ಷದಲ್ಲಿ ಕರ್ನಾಟಕದಲ್ಲಿ ಡೈರೆಕ್ಟ್ ಸೇಲ್ಸ್​ನಿಂದ 1,034 ಕೋಟಿ ಬ್ಯುಸಿನೆಸ್ ಅಗಿತ್ತು. ಕೋವಿಡ್ ಸಾಂಕ್ರಾಮಿಕ ಪರಿಸ್ಥಿತಿಯಲ್ಲೂ ಕುಂದದ ಈ ಉದ್ಯಮ 2021-22ರಲ್ಲಿ 94 ಕೋಟಿ ರೂನಷ್ಟು ಹೆಚ್ಚು ಬ್ಯುಸಿನೆಸ್ ವೃದ್ಧಿಸಿದೆ. ಡೈರೆಕ್ಟ್ ಸೇಲ್ಸ್ ಉದ್ದಿಮೆಯಿಂದ ಸರ್ಕಾರದ ಬೊಕ್ಕಸಕ್ಕೆ ಆ ಒಂದು ವರ್ಷದಲ್ಲಿ 170 ಕೋಟಿ ರೂ ಮೊತ್ತದಷ್ಟು ತೆರಿಗೆ ಜಮೆಯಾಗಿದೆ.

ಇದನ್ನೂ ಓದಿ: LIC Kanyadan Scheme: ಎಲ್​ಐಸಿ ಕನ್ಯಾದಾನ್ ಪಾಲಿಸಿ: ಹೆಣ್ಮಕ್ಕಳ ಓದು ಮತ್ತು ಮದುವೆ ಖರ್ಚಿಗೆ ಉತ್ತಮ ಸ್ಕೀಮ್

ಕರ್ನಾಟಕದಲ್ಲಿ ಡೈರೆಕ್ಟ್ ಸೇಲ್ಸ್ ಮಾರ್ಕೆಟ್ ಉತ್ತಮ ಸ್ಥಿತಿಯಲ್ಲಿದೆ. 78,000 ಮಂದಿ ಇದರಲ್ಲಿ ಕೆಲಸ ಮಾಡುತ್ತಿದ್ದಾರೆ. ಇದರಲ್ಲಿ 34,000 ಮಂದಿ ಮಹಿಳೆಯರೇ ಇದ್ದಾರೆ. ಇಡೀ ಭಾರತದಲ್ಲಿ ನೇರ ಮಾರುಕಟ್ಟೆ ಉದ್ದಿಮೆಯಲ್ಲಿ 84 ಲಕ್ಷ ಮಂದಿ ತೊಡಗಿಸಿಕೊಂಡಿದ್ದಾರೆ. ಕಳೆದ ನಾಲ್ಕು ಹಣಕಾಸು ವರ್ಷಗಳಲ್ಲಿ ಈ ಉದ್ಯಮ ಶೇ. 13ರ ವಾರ್ಷಿಕ ದರದಲ್ಲಿ ವೃದ್ಧಿಸಿದೆ ಎಂದು ಐಡಿಎಸ್​ಎ ಛೇರ್ಮನ್ ರಜತ್ ಬ್ಯಾನರ್ಜಿ ಹೇಳಿದ್ದಾರೆ.

ಏನಿದು ಡೈರೆಕ್ಟ್ ಸೆಲ್ಲಿಂಗ್?

ಅಂಗಡಿ ಮುಂಗಟ್ಟು, ಮಳಿಗೆ ಇತ್ಯಾದಿ ಮೂಲಕ ಗ್ರಾಹಕರಿಗೆ ವಸ್ತುಗಳನ್ನು ಮಾರುವುದು ಸಾಂಪ್ರದಾಯಿಕ ಮಾರಾಟ ಪದ್ಧತಿ. ಆದರೆ, ಗ್ರಾಹಕರನ್ನು ಮುಖತಃ ಭೇಟಿಯಾಗಿ ಅವರಿಗೆ ವಸ್ತುಗಳನ್ನು ಮಾರುವುದು ಡೈರೆಕ್ಟ್ ಸೆಲ್ಲಿಂಗ್. ಇನ್ಷೂರೆನ್ಸ್ ಏಜೆಂಟ್​ಗಳು, ಮನೆ ಮನೆಗೆ ಮಾರಲು ಬರುವ ಸೇಲ್ಸ್​ಮೆನ್ ಮೊದಲಾದವರದ್ದು ಡೈರೆಕ್ಟ್ ಸೆಲ್ಲಿಂಗ್.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ