ಅ. 31ರಿಂದ ಯುಪಿಐ ಲೈಟ್ ಆಟೊ ಟಾಪ್ ಅಪ್; ಏನಿದು ಹೊಸ ಫೀಚರ್?

ಬೆಂಗಳೂರು, ಸೆಪ್ಟೆಂಬರ್ 13: ಯುಪಿಐ ಬಳಸುತ್ತಿರುವವರು ಯುಪಿಐ ಲೈಟ್ ಫೀಚರ್ ಬಳಸುತ್ತಿರಬಹುದು. ಸಣ್ಣ ಮೊತ್ತದ ಹಣ ವಹಿವಾಟಿಗೆ ಇದು ಬಹಳ ಅನುಕೂಲ ಆಗುತ್ತದೆ. ಪೇಟಿಎಂ, ಫೋನ್​ಪೇ ಮೊದಲಾದ ಕೆಲ ಯುಪಿಐ ಪ್ಲಾಟ್​ಫಾರ್ಮ್​ಗಳಲ್ಲಿ ಈ ಫೀಚರ್ ಅನ್ನು ಅಳವಡಿಸಲಾಗಿದೆ. ಎನ್​ಪಿಸಿಐ ಈಗ ಯುಪಿಐ ಲೈಟ್ ಫೀಚರ್​ನಲ್ಲಿ ಇನ್ನೊಂದು ಹಂತ ಮುಂದಕ್ಕೆ ಹೋಗಿದೆ. ಅಕ್ಟೋಬರ್ 31ರಿಂದ ಯುಪಿಐ ಲೈಟ್​ ಅಕೌಂಟ್​ಗೆ ಆಟೊ ಟಾಪ್ ಅಪ್ ಮಾಡುವ ಅವಕಾಶ ಇರಲಿದೆ.

ಆಟೊ ಟಾಪ್ ಅಪ್ ಎಂದರೆ ಆಟೊಮ್ಯಾಟಿಕ್ ಆಗಿ ಹಣ ವರ್ಗಾವಣೆ ಆಗುವುದು. ಯುಪಿಐ ಲೈಟ್ ಅಕೌಂಟ್​ನಲ್ಲಿ 2,000 ರೂವರೆಗೆ ಹಣ ತುಂಬಿಸಬಹುದು. ಆ ಹಣ ಖಾಲಿಯಾದರೆ ಬ್ಯಾಂಕ್ ಅಕೌಂಟ್​ನಿಂದ ಅದಕ್ಕೆ ಮ್ಯಾನುವಲ್ ಆಗಿ ಹಣ ತುಂಬಿಸಬೇಕಾಗುತ್ತದೆ. ಆಟೊ ಟಾಪ್ ಅಪ್ ಅವಕಾಶ ಇದ್ದರೆ ಯುಪಿಐ ಲೈಟ್ ಅಕೌಂಟ್​ನಲ್ಲಿ ಹಣ ಖಾಲಿಯಾದರೆ ಬ್ಯಾಂಕ್ ಅಕೌಂಟ್​ನಿಂದ ನೀವು ನಿರ್ದಿಷ್ಟಪಡಿಸಿದ ಮೊತ್ತದಷ್ಟು ಹಣ ತನ್ನಂತಾನೆ ವರ್ಗಾವಣೆ ಆಗುತ್ತದೆ. ಒಟ್ಟಾರೆ ಯುಪಿಐ ಲೈಟ್ ಅಕೌಂಟ್​ನಲ್ಲಿ ಇರುವ ಹಣ 2,000 ರೂ ಮೀರಿರಬಾರದು ಅಷ್ಟೇ.

ಈ ಯುಪಿಯ ಲೈಟ್​ನ ಆಟೊ ಟಾಪ್ ಅಪ್ ಫೀಚರ್ 2024ರ ಅಕ್ಟೋಬರ್ 31ರಿಂದ ಸಕ್ರಿಯಗೊಳ್ಳುತ್ತದೆ. ಆಗಸ್ಟ್ 27ರಂದು ಹೊರಡಿಸಲಾದ ಸುತ್ತೋಲೆಯಲ್ಲಿ ಎನ್​ಪಿಸಿಐ ಈ ವಿಚಾರವನ್ನು ತಿಳಿಸಿತ್ತು.

ಇದನ್ನೂ ಓದಿ: ಹೆಲ್ತ್ ಇನ್ಷೂರೆನ್ಸ್ ಪಾಲಿಸಿ: ನಿಮ್ಮ ಕ್ಲೇಮ್ ರಿಜೆಕ್ಟ್ ಆಗುತ್ತಿದೆಯಾ? ಇಲ್ಲಿವೆ 5 ಕಾರಣಗಳು

ಏನಿದು ಯುಪಿಐ ಲೈಟ್?

ಯುಪಿಐ ಮೂಲಕ ನೀವು ಹಣ ಪಾವತಿ ಮಾಡುವಾಗ ಬ್ಯಾಂಕ್ ಸರ್ವರ್​ನ ಬಾಗಿಲು ತಟ್ಟಬೇಕಾಗುತ್ತದೆ. ಕೋಟ್ಯಂತರ ಜನರು ವಹಿವಾಟು ನಡೆಸುವಾಗ ಬ್ಯಾಂಕ್ ಸರ್ವರ್​ಗಳಿಗೆ ಕಷ್ಟವಾಗಬಹುದು. ಬ್ಯಾಂಕ್ ಅಕೌಂಟ್​ನ ಪಿನ್ ನಂಬರ್ ಅನ್ನು ಗ್ರಾಹಕರು ಒದಗಿಸಬೇಕು. ಗ್ರಾಹಕರಿಗೂ ತುಸು ಹೆಚ್ಚು ಸಮಯ ಹಿಡಿಯುತ್ತದೆ. ಯುಪಿಐ ಲೈಟ್ ಫೀಚರ್​ನಲ್ಲಿ ಸಣ್ಣ ಮೌಲ್ಯದ ವಹಿವಾಟುಗಳನ್ನು (500 ರೂಗಿಂತ ಕಡಿಮೆ) ಯಾವುದೇ ಪಿನ್ ನಮೂದಿಸುವ ಅಗತ್ಯ ಇಲ್ಲದೇ ನಡೆಸಬಹುದು. ಬ್ಯಾಂಕ್​ನ ಕೋರ್ ಸಿಸ್ಟಮ್ ಅನ್ನು ಸಂಪರ್ಕಿಸುವ ಅವಶ್ಯಕತೆಯೂ ಇರುವುದಿಲ್ಲ.

ಯುಪಿಐ ಲೈಟ್ ಫೀಚರ್ ಎಂಬುದು ವ್ಯಾಲಟ್ ರೀತಿ ಕೆಲಸ ಮಾಡುತ್ತದೆ. ಆದರೆ ಪ್ರಮುಖ ವ್ಯತ್ಯಾಸ ಎಂದರೆ ಲೈಟ್ ಫೀಚರ್​ನಲ್ಲಿ ನೀವು ಯಾವುದೇ ಪ್ಲಾಟ್​ಫಾರ್ಮ್​ನ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿ ಹಣ ಪಾವತಿಸಬಹುದು. ವ್ಯಾಲಟ್ ಆದರೆ ಅದೇ ಪ್ಲಾಟ್​ಫಾರ್ಮ್​ನ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿ ಬಳಸಬಹುದು.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ