ಪಿಎನ್​​ಬಿ, ಬಿಒಬಿ, ಇಂಡಿಯನ್ ಬ್ಯಾಂಕ್ ಇತ್ಯಾದಿ ಬ್ಯಾಂಕುಗಳಿಂದ ಬಡ್ಡಿದರ ಇಳಿಕೆ

ನವದೆಹಲಿ, ಜೂನ್ 9: ಆರ್​​ಬಿಐ ಕಳೆದ ಶುಕ್ರವಾರ ಸತತ ಮೂರನೇ ಬಾರಿ ರಿಪೋ ದರ (Repo Rate) ಇಳಿಕೆ ಮಾಡಿತು. ಈ ವರ್ಷ ಬಡ್ಡಿದರ ಬರೋಬ್ಬರಿ 100 ಮೂಲಾಂಕಗಳಷ್ಟು ಕಡಿಮೆ ಆಗಿದೆ. ಜೂನ್​ನ ಎಂಪಿಸಿ ಸಭೆಯಲ್ಲಿ ಒಮ್ಮೆಗೇ 50 ಮೂಲಾಂಕಗಳಷ್ಟು ದರ ಕಡಿತ ಮಾಡಲಾಗಿತ್ತು. ವರ್ಷದ ಆರಂಭದಲ್ಲಿ ಶೇ. 6.50 ಇದ್ದ ಆರ್​​ಬಿಐ ರಿಪೋ ದರ ಈಗ ಶೇ 5.50ಕ್ಕೆ ಇಳಿದಿದೆ. ಆರ್​​ಬಿಐ ದರ ಇಳಿಕೆಯ ಬೆನ್ನಲ್ಲೇ ಕೆಲ ಬ್ಯಾಂಕುಗಳೂ ಕೂಡ ರೇಟ್ ಕಟ್ ಮಾಡಿವೆ. ಪಂಜಾಬ್ ನ್ಯಾಷನಲ್ ಬ್ಯಾಂಕ್, ಇಂಡಿಯನ್ ಬ್ಯಾಂಕ್, ಬ್ಯಾಂಕ್ ಆಫ್ ಬರೋಡಾ ಮತ್ತು ಬ್ಯಾಂಕ್ ಆಫ್ ಇಂಡಿಯಾ ತಮ್ಮ ಗೃಹ ಸಾಲಗಳಿಗೆ ಬಡ್ಡಿದರ ಕಡಿಮೆಗೊಳಿಸಿವೆ.

ಬ್ಯಾಂಕುಗಳ ಆರ್​​ಎಲ್​​ಎಲ್​​ಆರ್ ಸಾಲಗಳ ಮೇಲೆ ರಿಪೋ ಪ್ರಭಾವ

ಆರ್​​ಬಿಐ ತನ್ನ ರಿಪೋ ದರ ಇಳಿಸಿದರೆ ಎಲ್ಲಾ ಬ್ಯಾಂಕುಗಳೂ ಕೂಡ ತಮ್ಮ ಬಡ್ಡಿದರಗಳನ್ನು ಇಳಿಸಬೇಕೆನ್ನುವ ಕಡ್ಡಾಯ ನಿಯಮ ಇಲ್ಲ. ಬ್ಯಾಂಕುಗಳು ಎರಡು ಮಾನದಂಡದ ಸಾಲ ನೀಡುತ್ತವೆ. ಮೊದಲನೆಯದು, ಫ್ಲೋಟಿಂಗ್ ರೆಟ್ ಇಂಟರೆಸ್ಟ್. ಮತ್ತೊಂದು ಫಿಕ್ಸೆಡ್ ರೇಟ್ ಇಂಟರೆಸ್ಟ್. ಈ ಎರಡನೆಯದನ್ನು ಸಾಮಾನ್ಯವಾಗಿ ಪರ್ಸನಲ್ ಲೋನ್​ಗಳಿಗೆ ನೀಡಲಾಗುತ್ತದೆ.

ಇದನ್ನೂ ಓದಿ: ಎಲ್​ಟಿವಿ ಏರಿಕೆಯಿಂದ ಹಿಡಿದು ಚಿನ್ನದ ಹರಾಜುವರೆಗೆ, ಆರ್​​ಬಿಐನ ಹೊಸ ಗೋಲ್ಡ್ ಲೋನ್ ನಿಯಮಗಳನ್ನು ತಿಳಿದಿರಿ

ಫ್ಲೋಟಿಂಗ್ ರೇಟ್ ಸಾಲದಲ್ಲಿ ಎರಡು ವಿಧ. ಒಂದು, ರಿಪೋ ಆಧಾರಿತ ಸಾಲ ದರ ಆರ್​​ಎಲ್​​​ಎಲ್​​ಆರ್. ಇದು ರಿಪೋ ದರಕ್ಕೆ ಅನುಗುಣವಾಗಿ ಬಡ್ಡಿದರ ಬದಲಿಸುವ ಸಾಧ್ಯತೆ ಹೆಚ್ಚು. ಇನ್ನೊಂದು, ಎಂಎಲ್​ಆರ್. ಇದು ಸ್ವಲ್ಪ ಮಟ್ಟಿಗೆ ರಿಪೋ ದರವನ್ನು ಅನ್ವಯ ಮಾಡುತ್ತದೆ. ಈ ಫ್ಲೋಟಿಂಗ್ ಇಂಟರೆಸ್ಟ್ ರೇಟ್ ಗೃಹ ಸಾಲಗಳಿಗೆ ಅನ್ವಯ ಆಗುತ್ತದೆ.

ಬಡ್ಡಿದರ ಇಳಿಸಿದ ಪಿಎನ್​​ಬಿ ಇತ್ಯಾದಿ ಬ್ಯಾಂಕುಗಳು

• ಪಂಜಾಬ್ ನ್ಯಾಷನಲ್ ಬ್ಯಾಂಕ್ ತನ್ನ ಆರ್​ಎಲ್​ಎಲ್​ಆರ್ ಅನ್ನು ಶೇ. 8.85ರಿಂದ ಶೇ. 8.35ಕ್ಕೆ ಇಳಿಸಿದೆ.
• ಬ್ಯಾಂಕ್ ಆಫ್ ಬರೋಡಾ ತನ್ನ ರಿಪೋ ಆಧಾರಿತ ಸಾಲ ದರವನ್ನು ಶೇ. 8.65ರಿಂದ ಶೇ. 8.15ಕ್ಕೆ ಇಳಿಸಿದೆ.
• ಬ್ಯಾಂಕ್ ಆಫ್ ಇಂಡಿಯಾ ಕೂಡ ಈ ದರವನ್ನು ಶೇ. 8.85ರಿಂದ ಶೇ. 8.35ಕ್ಕೆ ಇಳಿಸಿದೆ.
• ಇಂಡಿಯನ್ ಬ್ಯಾಂಕ್​​ನ ಈ ರಿಪೋ ಆಧಾರಿತ ಬಡ್ಡಿದರವು ಶೇ. 8.70ರಿಂದ ಶೇ. 8.20ಕ್ಕೆ ಇಳಿದಿದೆ.

ಇದನ್ನೂ ಓದಿ: ಗಮನಿಸಿ, ಆಯುಷ್ಮಾನ್ ಕಾರ್ಡ್ ಜೊತೆಗೆ ABHA ಕೂಡ ಇದ್ದರೆ ಪ್ರಯೋಜನ ಹೆಚ್ಚು; ಅದು ಹೇಗೆ, ಇಲ್ಲಿದೆ ಮಾಹಿತಿ

ಈ ಮೇಲಿನ ನಾಲ್ಕು ಬ್ಯಾಂಕುಗಳು ದರ ಕಡಿತಗೊಳಿಸಿರುವುದನ್ನು ತಮ್ಮ ರೆಗ್ಯುಲೇಟರಿ ಫೈಲಿಂಗ್​​ನಲ್ಲಿ ಪ್ರಕಟಿಸಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ