ರೈಲ್ವೆ ಕೌಂಟರ್​ನಲ್ಲೂ ಟಿಕೆಟ್ ಜೊತೆಗೆ ಇನ್ಷೂರೆನ್ಸ್ ಆಯ್ಕೆ ಲಭ್ಯ; ಆದರೆ, ಹಣ ಪಾವತಿ ನಿಯಮದಲ್ಲಿ ಬದಲಾವಣೆ ಇದೆ, ಗಮನಿಸಿ

ನವದೆಹಲಿ, ಅಕ್ಟೋಬರ್ 27: ಆನ್​ಲೈನ್​ನಲ್ಲಿ ರೈಲ್ವೆ ಟಿಕೆಟ್ ಖರೀದಿಸಿದರೆ ಅದರ ಜೊತೆಗೆ ಟ್ರಾವೆಲ್ ಇನ್ಷೂರೆನ್ಸ್ ಕೂಡ ಸೇರಿರುತ್ತದೆ. ಸುಪ್ರೀಂಕೋರ್ಟ್ ಆದೇಶದ ಮೇರೆಗೆ ರೈಲ್ವೆ ನಿಲ್ದಾಣದ ಕೌಂಟರ್​ಗಳಲ್ಲಿ ಖರೀದಿಸುವ ಟಿಕೆಟ್​ಗೂ ಇನ್ಷೂರೆನ್ಸ್ ಆಯ್ಕೆಯನ್ನು ಈಗ ಒದಗಿಸಲಾಗಿದೆ. ಇದು ಇವತ್ತಿನಿಂದಲೇ (ಅ. 27) ಜಾರಿಗೆ ಬರುತ್ತಿದೆ. ಆದರೆ, ಕೌಂಟರ್​ನಲ್ಲಿ ಟಿಕೆಟ್ ಖರೀದಿಸುವ ಮುನ್ನ ಒಂದು ನಿಯಮ ಬದಲಾವಣೆಯನ್ನು ಪ್ರಯಾಣಿಕರು ಗಮನಿಸಬೇಕು.

ಕೌಂಟರ್​ಗಳಲ್ಲಿ ಖರೀದಿಸುವ ಟಿಕೆಟ್ ಜೊತೆಗೆ ಟ್ರಾವಲ್ ಇನ್ಷೂರೆನ್ಸ್ ಬೇಕೆಂದರೆ ಕ್ಯಾಷ್​ನಿಂದ ಹಣ ಪಾವತಿಗೆ ಅವಕಾಶ ಇರುವುದಿಲ್ಲ. ಡಿಜಿಟಲ್ ಪೇಮೆಂಟ್​ಗೆ ಮಾತ್ರ ಅವಕಾಶ ಇರುತ್ತದೆ. ಇನ್ಷೂರೆನ್ಸ್ ಬೇಡವೆಂದರೆ ಕ್ಯಾಷ್​ನಲ್ಲಿ ಟಿಕೆಟ್ ಖರೀದಿಸಬಹುದು.

ಇದನ್ನೂ ಓದಿ: ಷೇರುಗಳ ಮೇಲಿನ ಎಲ್​ಟಿಸಿಜಿ ತೆರಿಗೆ ದರ ಪರಿಷ್ಕರಣೆಗೆ ಕೇಂದ್ರ ಆಲೋಚನೆ; ಬಜೆಟ್​ನೊಳಗೆ ನಿರ್ಧಾರ ಸಾಧ್ಯತೆ

ಟ್ರಾವೆಲ್ ಇನ್ಷೂರೆನ್ಸ್ ಹಣ ಎಷ್ಟು?

ಭಾರತೀಯ ರೈಲ್ವೆಯಲ್ಲಿ ಟಿಕೆಟ್ ಜೊತೆಗೆ ಸಿಗುವ ಟ್ರಾವೆಲ್ ಇನ್ಷೂರೆನ್ಸ್​ನ ಪ್ರೀಮಿಯಮ್ ಹಣ 45 ಪೈಸೆ ಮಾತ್ರವೇ ಇರುತ್ತದೆ. ಕಾಯ್ದಿರಿಸಿದ ಟಿಕೆಟ್​ಗಳಿಗೆ ಈ ಇನ್ಷೂರೆನ್ಸ್ ಆಯ್ಕೆ ಇರುತ್ತದೆ. ಟಿಕೆಟ್ ಜೊತೆಗೆ ಇನ್ಷೂರೆನ್ಸ್ ಸೇರಿಸಿ ಖರೀದಿಸಿದರೆ ನಾಮಿನಿಯನ್ನು ಹೆಸರಿಸಬಹುದು.

ಇನ್ಷೂರೆನ್ಸ್ ಕವರೇಜ್ ಎಷ್ಟಿರುತ್ತದೆ?

ಈ ಇನ್ಷೂರೆನ್ಸ್​ನಲ್ಲಿ 10 ಲಕ್ಷ ರೂವರೆಗೆ ಕವರೇಜ್ ಇರುತ್ತದೆ. ಪ್ರಯಾಣ ಮಾಡುವಾಗ ಸಾವಾದರೆ ನಾಮಿನಿಗೆ 10 ಲಕ್ಷ ರೂ ಸಿಗುತ್ತದೆ. ಪೂರ್ಣ ಅಂಗವೈಕಲ್ಯವಾದರೂ 10 ಲಕ್ಷ ರೂ ಸಿಗುತ್ತದೆ. ಭಾಗಶಃ ಅಂಗವೈಕಲ್ಯವಾದರೆ 7.5 ಲಕ್ಷ ರೂ ಪರಿಹಾರ ಸಿಗುತ್ತದೆ.

ಗಾಯಗೊಂಡು ಆಸ್ಪತ್ರೆ ಸೇರಿದರೆ 2 ಲಕ್ಷ ರೂವರೆಗಿನ ವೆಚ್ಚವನ್ನು ಇನ್ಷೂರೆನ್ಸ್ ಕಂಪನಿ ಭರಿಸುತ್ತದೆ. ಈ ಟ್ರಾವೆಲ್ ಇನ್ಷೂರೆನ್ಸ್​ಗಾಗಿ ರೈಲ್ವೆ ಇಲಾಖೆಯು ಬೇರೆ ಬೇರೆ ಇನ್ಷೂರೆನ್ಸ್ ಕಂಪನಿಗಳ ಜೊತೆ ಸಹಯೋಗ ಮಾಡಿಕೊಂಡಿದೆ.

ಇದನ್ನೂ ಓದಿ: ಇ100 ಇಂಧನ ಚಾಲಿತ ವಾಹನಗಳಿಗೆ ಗ್ರೀನ್ ಸಿಗ್ನಲ್; ಕೇಂದ್ರ ಮೋಟಾರು ವಾಹನ ನಿಯಮಗಳಿಗೆ ಸರ್ಕಾರದ ತಿದ್ದುಪಡಿ

ಟ್ರಾವೆಲ್ ಇನ್ಷೂರೆನ್ಸ್ ಜೊತೆ ಟಿಕೆಟ್ ಅನ್ನು ಕ್ಯಾಷ್​ನಲ್ಲಿ ಕೊಳ್ಳಲು ಯಾಕೆ ಅವಕಾಶವಿಲ್ಲ?

ಇನ್ಷೂರೆನ್ಸ್ ಪ್ರೀಮಿಯಮ್ ಹಣ ಪೈಸೆ ಲೆಕ್ಕದಲ್ಲಿ ಇರುತ್ತದೆ. ಕೌಂಟರ್​ನಲ್ಲಿ ಇದಕ್ಕೆ ಹಣ ಪಾವತಿಸುವಾಗ ಚಿಲ್ಲರೆ ಸಮಸ್ಯೆಯಾಗುತ್ತದೆ. ಇದನ್ನು ತಪ್ಪಿಸಲು ಸಂಪೂರ್ಣ ಡಿಜಿಟಲ್ ಪೇಮೆಂಟ್ ನಿಯಮ ಮಾಡಲಾಗಿದೆ. ಟ್ರಾವೆಲ್ ಇನ್ಷೂರೆನ್ಸ್ ಬೇಡವೆಂದರೆ ಕೌಂಟರ್​ನಲ್ಲಿ ಕ್ಯಾಷ್ ಕೊಟ್ಟೇ ಟಿಕೆಟ್ ಖರೀದಿಸಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ