RBI: 2,000 ರೂ ನೋಟುಗಳು ಈಗಲೂ ಸಿಂಧುವಾ? ಆರ್​​ಬಿಐ ಗವರ್ನರ್ ಸ್ಪಷ್ಟನೆ ಇದು

ನವದೆಹಲಿ, ಜುಲೈ 11: ಎರಡು ವರ್ಷದ ಹಿಂದೆ ಚಲಾವಣೆಯಿಂದ ಹಿಂಪಡೆಯಲಾಗಿದ್ದ 2,000 ರೂ ಮುಖಬೆಲೆಯ ನೋಟುಗಳು ಈ ಅಮಾನ್ಯವಾಗಿ ಎನ್ನುವಂತಹ ಸುದ್ದಿಗಳಿವೆ. ಆದರೆ, ಆರ್​ಬಿಐ ಗವರ್ನರ್ ಸಂಜಯ್ ಮಲ್ಹೋತ್ರಾ (RBI Governor Sanjay Malhotra) ಅವರು ಈ ಬಗ್ಗೆ ಸ್ಪಷ್ಟನೆ ನೀಡಿದ್ದು, 2,000 ರೂ ನೋಟುಗಳು ಅಮಾನ್ಯವಾಗಿಲ್ಲ, ಆದರೆ ಚಲಾವಣೆಯಲ್ಲೂ ಇಲ್ಲ ಎಂದಿದ್ದಾರೆ. ಭಾರತೀಯ ಆರ್ಥಿಕತೆಯ ಬೆಳವಣಿಗೆ ಬಗ್ಗೆ ಸಂಸದೀಯ ಸ್ಥಾಯಿ ಸಮಿತಿ (Parliament Standing Committee on Finance) ಜೊತೆ ಮಾತನಾಡುವ ವೇಳೆ ಸಂಜಯ್ ಮಲ್ಹೋತ್ರಾ 2,000 ರೂ ನೋಟಿನ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಜುಲೈ 1ರವರೆಗಿನ ಅಧಿಕೃತ ದತ್ತಾಂಶದ ಪ್ರಕಾರ 2,000 ರೂ ಮುಖಬೆಲೆಯ ನೋಟುಗಳು ಮೂರು ಕೋಟಿಗೂ ಅಧಿಕ ಸಂಖ್ಯೆಯಲ್ಲಿವೆ. ಸುಮಾರು 6,099 ಕೋಟಿ ರೂ ಮೌಲ್ಯದ 2,000 ರೂ ನೋಟುಗಳು ಆರ್ಬಿಐಗೆ ಮರಳಿಲ್ಲ ಎನ್ನಲಾಗಿದೆ.

ಇದನ್ನೂ ಓದಿ: Paytm New Features: ಪೇಟಿಎಂನಿಂದ ಹೊಸ ಐದು ಫೀಚರ್ಸ್ ಅಳವಡಿಕೆ; ನೀವು ಗಮನಿಸಿದ್ದೀರಾ?

ಭಾರತೀಯ ರಿಸರ್ವ್ ಬ್ಯಾಂಕ್ 2023ರ ಮೇ 19ರಂದು 2,000 ರೂ ನೋಟುಗಳನ್ನು ಚಲಾವಣೆಯಿಂದ ಹಿಂಪಡೆಯಲಾಗಿದೆ ಎಂದು ಘೋಷಿಸಿತ್ತು. ಆ ನೋಟುಗಳನ್ನು ಹೊಂದಿರುವವರು ಅವನ್ನು ಬ್ಯಾಂಕುಗಳಿಗೆ ಮರಳಿಸಿ, ಅದಕ್ಕೆ ಬದಲಾಗಿ ಆ ಮೌಲ್ಯಕ್ಕೆ ಸರಿಸಮಾನವಾದ ಬೇರೆ ಮುಖಬೆಲೆಯ ನೋಟುಗಳನ್ನು ಪಡೆಯಲು, ಅಥವಾ ಆ ಮೌಲ್ಯದ ಹಣವನ್ನು ಬ್ಯಾಂಕ್ ಖಾತೆಗೆ ಜಮೆ ಮಾಡಿಕೊಳ್ಳಲು ಅವಕಾಶ ಕೊಟ್ಟಿತ್ತು.

2,000 ರೂ ನೋಟುಗಳನ್ನು ಚಲಾವಣೆಗೆ ಬಳಸಲು ಅವಕಾಶ ಇಲ್ಲ. ಆದರೆ, ಈಗಲೂ ಕೂಡ ಯಾರಾದರೂ ಈ ನೋಟುಗಳನ್ನು ಹೊಂದಿದ್ದರೆ ಬ್ಯಾಂಕ್​​ಗೆ ಮರಳಿಸಬಹುದು. ರೆಗ್ಯುಲರ್ ಬ್ಯಾಂಕುಗಳಲ್ಲಿ ಇವುಗಳನ್ನು ಸ್ವೀಕರಿಸಲಾಗುವುದಿಲ್ಲ. ಬದಲಾಗಿ, ಆರ್​ಬಿಐನ ಪ್ರಾದೇಶಿಕ ಕಚೇರಿಗಳಲ್ಲಿ ಇವುಗಳನ್ನು ಎಕ್ಸ್​ಚೇಂಜ್ ಮಾಡಬಹುದು. ಬಹುತೇಕ ಎಲ್ಲಾ ಪ್​ರಮುಖ ರಾಜ್ಯಗಳಲ್ಲಿ ಪ್ರಾದೇಶಿಕ ಆರ್​ಬಿಐ ಕಚೇರಿಗಳಿವೆ. ದೇಶಾದ್ಯಂತ 19 ಕಡೆ ಇಂಥ ಆಫೀಸ್​​ಗಳಿವೆ. ಕರ್ನಾಟಕದಲ್ಲಿ ಆರ್​ಬಿಐನ ಕಚೇರಿ ಇರುವುದು ಬೆಂಗಳೂರಿನ ನೃಪತುಂಗ ರಸ್ತೆಯಲ್ಲಿ. ಇಲ್ಲಿ ಹೋಗಿ 2,000 ರೂ ನೋಟು ವಿನಿಮಯ ಮಾಡಿಕೊಂಡು ಬರಬಹುದು.

ಇದನ್ನೂ ಓದಿ: ಸಾಲಗಳಿಗೆ ಇರಲ್ಲ ಪ್ರೀಪೇಮೆಂಟ್ ಚಾರ್ಜ್; ಜನವರಿ 1ರಿಂದ ಆರ್​ಬಿಐ ಹೊಸ ನಿಯಮ

ಒಂದು ವೇಳೆ, ಆರ್​​ಬಿಐ ಕಚೇರಿಗೆ ಹೋಗಲು ಸಾಧ್ಯ ಇಲ್ಲ ಎಂದಾದವರು ಅಂಚೆ ಕಚೇರಿ ಸೌಲಭ್ಯ ಬಳಸಬಹುದು. ಅಂಚೆ ಮೂಲಕ ನೋಟುಗಳನ್ನು ಆರ್​ಬಿಐ ಕಚೇರಿ ವಿಳಾಸಕ್ಕೆ ಕಳುಹಿಸಿ, ಆ ಮೌಲ್ಯದ ಹಣವನ್ನು ನಿಮ್ಮ ಬ್ಯಾಂಕ್ ಖಾತೆಗೆ ಜಮೆಯಾಗುವಂತೆ ಮಾಡಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ