Sovereign Gold Bond: ಗೋಲ್ಡ್​ ಬಾಂಡ್​​ ಖರೀದಿಗೆ ಇಂದಿನಿಂದ ಅವಕಾಶ: ಕೊನೆಯ ದಿನ, ದರ ಸೇರಿ ನೀವು ತಿಳಿಯಬೇಕಾದ 10 ಮುಖ್ಯಾಂಶಗಳಿವು

ಬೆಂಗಳೂರು: ಭಾರತೀಯ ರಿಸರ್ವ್​ ಬ್ಯಾಂಕ್ (Reserve Bank of India – RBI) ಸಾವರಿನ್ ಗೋಲ್ಡ್​ ಬಾಂಡ್ ಸ್ಕೀಮ್​ (Sovereign Gold Bond – SGB) ಹೆಸರಿನ ಚಿನ್ನದ ಬಾಂಡ್​ಗಳ ಹೊಸ ಸರಣಿಯನ್ನು ಮಾರುಕಟ್ಟೆ ಬಿಡುಗಡೆ ಮಾಡುವುದಾಗಿ ಘೋಷಿಸಿದೆ. ಚಿನ್ನದ ಬಾಂಡ್​ ಇಂದಿನಿಂದಲೇ (ಆಗಸ್ಟ್ 22) ಖರೀದಿಗೆ ಲಭ್ಯವಿದ್ದು, ಆಗಸ್ಟ್ 26ರವರೆಗೆ ಖರೀದಿಗೆ ಅವಕಾಶ ಇರುತ್ತದೆ. ಈ ಸರಣಿಯಲ್ಲಿ ಒಂದು ಗ್ರಾಂ ಚಿನ್ನಕ್ಕೆ ಆರ್​ಬಿಐ ₹ 5,197 ನಿಗದಿಪಡಿಸಿದೆ. ಭಾರತೀಯ ಸ್ಟೇಟ್​ ಬ್ಯಾಂಕ್ (State Bank of India – SBI) ಸೇರಿದಂತೆ ಹಲವು ಬ್ಯಾಂಕ್​ಗಳು ಡಿಜಿಟಲ್ ರೂಪದಲ್ಲಿ ಬಾಂಡ್ ಖರೀದಿಗೆ ಅವಕಾಶ ಕಲ್ಪಿಸಿವೆ. ಡಿಮ್ಯಾಟ್​ ಖಾತೆ ಇರುವವರು ಡಿಮ್ಯಾಟ್ ಖಾತೆಗೆ ಬಾಂಡ್​ ಜಮಾ ಮಾಡಿಸಿಕೊಳ್ಳಬಹುದು. ಡಿಜಿಟಲ್ ರೂಪದಲ್ಲಿ ಬಾಂಡ್ ಖರೀದಿಸಿದವರಿಗೆ ₹ 50 ರಿಯಾಯ್ತಿಯೂ ಸಿಗುತ್ತದೆ. ‘ಚಿನ್ನ ಖರೀದಿಸುವ ಈ ಸುವರ್ಣಾವಕಾಶವನ್ನು ಕಳೆದುಕೊಳ್ಳಬೇಡಿ. ಆಗಸ್ಟ್ 22ರಿಂದ 26ರವರೆಗೆ ಸಾವರಿನ್ ಗೋಲ್ಡ್​ ಬಾಂಡ್ ಸ್ಕೀಮ್​ನಡಿ ಚಿನ್ನದ ಬಾಂಡ್ ಖರೀದಿಸಲು ಅವಕಾಶವಿದೆ’ ಎಂದು ಎಸ್​ಬಿಐ ತನ್ನ ಗ್ರಾಹಕರನ್ನು ಟ್ವೀಟ್ ಮೂಲಕ ಹುರಿದುಂಬಿಸಿದೆ. ಚಿನ್ನ ಬಾಂಡ್​ ಬಗ್ಗೆ ನೀವು ತಿಳಿಯಬೇಕಾದ 10 ಮುಖ್ಯ ಅಂಶಗಳಿವು…

1. ಕೇಂದ್ರ ಸರ್ಕಾರದ ಪರವಾಗಿ ಭಾರತೀಯ ರಿಸರ್ವ್​ ಬ್ಯಾಂಕ್ ಚಿನ್ನದ ಬಾಂಡ್​ಗಳನ್ನು ಬಿಡುಗಡೆ ಮಾಡುತ್ತದೆ.
2. ಬ್ಯಾಂಕ್​ಗಳು, ಸ್ಟಾಕ್ ಹೋಲ್ಡಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ (Stock Holding Corporation of India Limited – SHCIL), ನಿಗದಿತ ಅಂಚೆ ಕಚೇರಿಗಳು, ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್ (NSE) ಮತ್ತು ಬಾಂಬೆ ಸ್ಟಾಕ್ ಎಕ್ಸ್​ಚೇಂಜ್ (BSE) ಮೂಲಕ ಬಾಂಡ್​ಗಳು ಸಾರ್ವಜನಿಕರಿಗೆ ಲಭ್ಯವಾಗಲಿದೆ.
3. ಪ್ರತಿ ಬಾಂಡ್​ ಒಂದು ಗ್ರಾಮ್ ಚಿನ್ನದ ಮೌಲ್ಯ ಹೊಂದಿರುತ್ತದೆ. ಈ ಬಾಂಡ್​ನ ಬೆಲೆಯನ್ನೂ ಚಿನ್ನದ ಬೆಲೆ ಆಧರಿಸಿಯೇ ನಿಗದಿಪಡಿಸಲಾಗುತ್ತದೆ. ವರ್ಷಕ್ಕೆ ಶೇ 2.5ರ ಬಡ್ಡಿಯನ್ನೂ ನೀಡಲಾಗುತ್ತದೆ.
4. ಈ ಬಾಂಡ್​ಗಳ ಪರಿಪಕ್ವತಾ ಅವಧಿ 8 ವರ್ಷ. 5ನೇ ವರ್ಷದ ನಂತರ ಈ ಬಾಂಡ್​ಗಳ ಮಾರಾಟಕ್ಕೆ ಅವಕಾಶ ಇರುತ್ತದೆ. ಬಡ್ಡಿ ಪಾವತಿ ದಿನಾಂಕದಂದು ಬಾಂಡ್​ಗಳನ್ನು ಮಾರಬಹುದು.
5. ಕನಿಷ್ಠ ಖರೀದಿ ಮೌಲ್ಯ 1 ಗ್ರಾಮ್ ಚಿನ್ನ (1 ಬಾಂಡ್).
6. ಗರಿಷ್ಠ ಚಿನ್ನ ಖರೀದಿಗೂ ಮಿತಿಗಳಿವೆ. ವ್ಯಕ್ತಿಗಳು ಹಾಗೂ ಅವಿಭಕ್ತ ಕುಟುಂಬಕ್ಕೆ 4 ಕೆಜಿ ಖರೀದಿ ಮಿತಿಯಿದೆ. ಟ್ರಸ್ಟ್​ ಮತ್ತು ಅದೇ ರೀತಿಯ ಇತರ ಸಂಸ್ಥೆಗಳಿಗೆ ಒಂದು ಹಣಕಾಸು ವರ್ಷದಲ್ಲಿ 20 ಕೆಜಿಗೆ ಸರಿಸಮನಾದ ಮೌಲ್ಯದ ಚಿನ್ನದ ಬಾಂಡ್ ಖರೀದಿಗೆ ಅವಕಾಶವಿದೆ.
7. ಚಿನ್ನದ ಬಾಂಡ್ ಖರೀದಿಗೆ ಕೆವೈಸಿ (Know-your-customer – KYC) ನಿಯಮಾವಳಿಯನ್ನು ಪೂರೈಸುವುದು ಅನಿವಾರ್ಯ.
8. ಡಿಮ್ಯಾಟ್ ಅಥವಾ ಡಿಜಿಟಲ್ ರೂಪದಲ್ಲಿ ಬಾಂಡ್ ಖರೀದಿಸುವವರಿಗೆ ಕೇಂದ್ರ ಸರ್ಕಾರವು ₹ 50 ರಿಯಾಯ್ತಿ ಕೊಡುತ್ತದೆ. ಅರ್ಜಿಯನ್ನೂ ಆನ್​ಲೈನ್​ನಲ್ಲಿಯೇ ಹಾಕಬೇಕು, ಪಾವತಿಯನ್ನೂ ಡಿಜಿಟಲ್ ರೂಪದಲ್ಲಿಯೇ ಮಾಡಬೇಕು ಎನ್ನುವ ನಿಯಮ ವಿಧಿಸಲಾಗಿದೆ.
9. ಮೊದಲ ಬಾರಿಗೆ ನವೆಂಬರ್ 2015ರಲ್ಲಿ ಬಾಂಡ್​ ಸರಣಿಯನ್ನು ಬಿಡುಗಡೆ ಮಾಡಲಾಯಿತು. ಭೌತಿಕ ರೂಪದಲ್ಲಿ ಚಿನ್ನ ಖರೀದಿಗೆ ಇರುವ ಬೇಡಿಕೆ ಕಡಿಮೆ ಮಾಡುವುದು ಮತ್ತು ಹೂಡಿಕೆಯ ಭಾಗವಾಗಿ ಚಿನ್ನವನ್ನು ಪರಿಗಣಿಸುವವರಿಗೆ ಮತ್ತೊಂದು ರೀತಿಯ ಅವಕಾಶ ನೀಡುವುದು ಈ ಯೋಜನೆಯ ಮುಖ್ಯ ಉದ್ದೇಶ.
10. ಗೋಲ್ಡ್​ ಬಾಂಡ್ ಘೋಷಣೆಯ ಮುನ್ನಾದಿನಕ್ಕೆ ಮೊದಲಿನ ಮೂರು ದಿನಗಳ ಚಿನ್ನದ ಬೆಲೆಯ ಸರಾಸರಿಯನ್ನು ಲೆಕ್ಕಹಾಕಿ ಬಾಂಡ್​ನ ಮೌಲ್ಯ ನಿರ್ಧರಿಸಲಾಗುತ್ತದೆ. ಉಳಿತಾಯ ಮತ್ತು ಹೂಡಿಕೆಗಾಗಿ ಚಿನ್ನ ಖರೀದಿಸುವವರಿಗೆ ಇದು ಅತ್ಯುತ್ತಮ ಆಯ್ಕೆಯಾಗಿದೆ.