ರೀಟೇಲ್ ಹೂಡಿಕೆದಾರರಿಗೆ ಫೇವರಿಟ್ ಆಗಿರುವ ಇಂಡೆಕ್ಸ್ ಫಂಡ್​ಗಳು; ಐದು ವರ್ಷದಲ್ಲಿ ಹೂಡಿಕೆಯಲ್ಲಿ ಗಣನೀಯ ಏರಿಕೆ

ನವದೆಹಲಿ, ಆಗಸ್ಟ್ 26: ಚಿಲ್ಲರೆ ಹೂಡಿಕೆದಾರರ (Retail Investors) ಆದ್ಯತೆ ಕಳೆದ 5 ವರ್ಷದಲ್ಲಿ ಗಮನಾರ್ಹವಾಗಿ ಬದಲಾಗಿದೆ. ಈ ವರ್ಗದ ಹೂಡಿಕೆದಾರರು ಇಂಡೆಕ್ಸ್ ಫಂಡ್​ಗಳಲ್ಲಿ (Index Funds) ಹೂಡಿಕೆ ಮಾಡುವುದು ಹೆಚ್ಚಾಗಿದೆ. ವರದಿಗಳ ಪ್ರಕಾರ, ಕಳೆದ 5 ವರ್ಷಗಳಲ್ಲಿ ಇಂಡೆಕ್ಸ್ ಫಂಡ್‌ಗಳಲ್ಲಿ ಚಿಲ್ಲರೆ ಹೂಡಿಕೆದಾರರ ಪಾಲು ಶೇ. 12 ರಿಂದ ಶೇಕಡಾ 55 ಕ್ಕೆ ಭಾರಿ ಏರಿಕೆ ಕಂಡಿದೆ.

ಇಂಡೆಕ್ಸ್ ಫಂಡ್​ಗಳಿಗೆ ಹೂಡಿಕೆದಾರರು ಮುಗಿಬೀಳಲು ಏನು ಕಾರಣ?

• ಕಡಿಮೆ ವೆಚ್ಚ (Low Expense Ratio): ಆಕ್ಟಿವ್ Mutual Funds ಗೆ ಹೋಲಿಸಿದರೆ ಇಂಡೆಕ್ಸ್ ಫಂಡ್‌ಗಳ ನಿರ್ವಹಣಾ ವೆಚ್ಚ (TER) ಅತ್ಯಂತ ಕಡಿಮೆಯಾಗಿರುವುದು ಹೂಡಿಕೆದಾರರನ್ನು ಆಕರ್ಷಿಸಲು ಮುಖ್ಯ ಕಾರಣ.
• ಸುಲಭ ಹಾಗೂ ಸರಳ ಹೂಡಿಕೆ: ಶೇರು ಮಾರುಕಟ್ಟೆಯ ಪ್ರತ್ಯೇಕ ಶೇರುಗಳನ್ನು ಆಯ್ಕೆ ಮಾಡಿ ರಿಸ್ಕ್ ತೆಗೆದುಕೊಳ್ಳುವ ಬದಲು, Nifty 50 ಅಥವಾ Sensex ನಂತಹ ಪ್ರಮುಖ ಸೂಚ್ಯಂಕಗಳನ್ನು (Indices) ಆಧರಿಸಿ ಹೂಡಿಕೆ ಮಾಡುವುದು ಸರಳವಾಗಿದೆ.
• ಉತ್ತಮ ರಿಟರ್ನ್ಸ್: ದೀರ್ಘಾವಧಿಯಲ್ಲಿ ಹೆಚ್ಚಿನ ಆಕ್ಟಿವ್ ಫಂಡ್‌ಗಳು ಮಾರುಕಟ್ಟೆಯ ಸೂಚ್ಯಂಕವನ್ನು (Benchmark Index) ಹಿಂದಿಕ್ಕಲು ವಿಫಲವಾಗುತ್ತಿರುವುದರಿಂದ, ಹೂಡಿಕೆದಾರರು ಪ್ಯಾಸಿವ್ ಹೂಡಿಕೆ (Passive Investing) ವಿಧಾನವಾದ ಇಂಡೆಕ್ಸ್ ಫಂಡ್‌ಗಳತ್ತ ವಾಲುತ್ತಿದ್ದಾರೆ.

ಇದನ್ನೂ ಓದಿ: ಸಿಸ್ಟಮ್ಯಾಟಿಕ್ ಇನ್ವೆಸ್ಟ್​ಮೆಂಟ್ ಪ್ಲಾನ್ ಮೂಲಕ ಹೂಡಿಕೆ ಮಾಡುವ ಮುನ್ನ ಈ ವಿಷಯಗಳು ತಿಳಿದಿರಲಿ

ಆ್ಯಕ್ಟಿವ್ ಫಂಡ್ ಮತ್ತು ಪಾಸಿವ್ ಫಂಡ್ ಮಧ್ಯೆ ಏನು ವ್ಯತ್ಯಾಸ?

ಆ್ಯಕ್ಟಿವ್ ಫಂಡ್​ನಲ್ಲಿರುವ ಹಣವನ್ನು ಮ್ಯೂಚುವಲ್ ಫಂಡ್​ನಲ್ಲಿನ ತಜ್ಞ ನಿರ್ವಹಣಾ ತಂಡವು ನಿರ್ವಹಿಸುತ್ತದೆ. ಅವರು ಮಾರುಕಟ್ಟೆಯ ಅಧ್ಯಯನ ನಡೆಸಿ ಸೂಕ್ತವಾದ ಶೇರುಗಳಲ್ಲಿ ಹಣ ಹೂಡಿಕೆ ಮಾಡುತ್ತಾರೆ. ಫಂಡ್ ಮ್ಯಾನೇಜರ್ ಸಕ್ರಿಯವಾಗಿ ನಿರ್ವಹಣೆ ಮಾಡುವುದರಿಂದ ಅದು ಆ್ಯಕ್ಟಿವ್ ಫಂಡ್ ಎನಿಸುತ್ತದೆ.

ಇನ್ನೊಂದೆಡೆ, ಪಾಸಿವ್ ಫಂಡ್​ನಲ್ಲಿ ಮ್ಯಾನೇಜರ್ ಪಾತ್ರ ತೀರಾ ನಗಣ್ಯ. ನಿರ್ದಿಷ್ಟ ಇಂಡೆಕ್ಸ್​ನಲ್ಲಿ ಹೂಡಿಕೆ ಮಾಡಲಾಗುತ್ತದೆ. ಇಂಡೆಕ್ಸ್ ಫಂಡ್ ಇದಕ್ಕೆ ಉದಾಹರಣೆ. ನಿಫ್ಟಿ50 ಇಂಡೆಕ್ಸ್, ಮಿಡ್ ಕ್ಯಾಪ್ ಇಂಡೆಕ್ಸ್, ಐಟಿ ಇಂಡೆಕ್ಸ್ ಹೀಗೆ ವಿವಿಧ ಇಂಡೆಕ್ಸ್​ಗಳಿಗೆ ಪ್ರತ್ಯೇಕ ಇಂಡೆಕ್ಸ್ ಫಂಡ್​ಗಳಿರುತ್ತವೆ.

ಆ್ಯಕ್ಟಿವ್ ಫಂಡ್ ಅನ್ನು ಮ್ಯಾನೇಜರ್ ನಿರ್ವಹಿಸುವುದರಿಂದ ಅವರಿಗೆ ತಗುಲುವ ವೆಚ್ಚ ಇತ್ಯಾದಿಗಾಗಿ ಎಕ್ಸ್​ಪೆನ್ಸ್ ರೇಶಿಯೋ ನಿಗದಿಯಾಗಿರುತ್ತದೆ. ಪಾಸಿವ್ ಫಂಡ್​ಗೆ ಎಕ್ಸ್​ಪೆನ್ಸ್ ರೇಶಿಯೋ ಬಹಳ ಕಡಿಮೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ