EPFO rules: 2-3 ವರ್ಷ ಕೆಲಸ ಇಲ್ಲದಿದ್ದಾಗ ಹಳೆಯ ಇಪಿಎಫ್ ಖಾತೆ ಏನಾಗುತ್ತದೆ?
What happens to EPF account after being unemployed for 3 years: ನಿರುದ್ಯೋಗಿಯಾಗಿ ಇಪಿಎಫ್ ಖಾತೆಗೆ ಉದ್ಯೋಗಿಗಳ ಕೊಡುಗೆ ನಿಂತು ಹೋದರೆ ಏನಾಗುತ್ತದೆ? ಇಪಿಎಫ್ ಖಾತೆಗೆ ಕೊಡುಗೆ ಬರಲಿ, ಬರದೇ ಇರಲಿ, ಖಾತೆದಾರರ ವಯಸ್ಸು 58 ವರ್ಷ ಆಗುವವರೆಗೂ ಬಡ್ಡಿ ಜಮೆ ಆಗುತ್ತಿರುತ್ತದೆ. ಖಾತೆದಾರರ ವಯಸ್ಸು 58 ವರ್ಷ ಆದ ಬಳಿಕ ಬಡ್ಡಿ ಜಮೆಯಾಗುವುದು ನಿಂತುಹೋಗುತ್ತದೆ.
Updated on: Aug 02, 2026 | 1:33 PM
ಉನ್ನತ ಶಿಕ್ಷಣ, ಕುಟುಂಬದ ಜವಾಬ್ದಾರಿ, ಆರೋಗ್ಯ ಸಮಸ್ಯೆಗಳು, ನಿರುದ್ಯೋಗ ಇತ್ಯಾದಿ ಕಾರಣಗಳಿಂದಾಗಿ ಜನರು ಕೆಲಸದಿಂದ ಕೆಲ ತಿಂಗಳು, ವರ್ಷಗಳು ಹೊರಗಿರುವುದು ಸಾಮಾನ್ಯ. ಈ ಸಂದರ್ಭದಲ್ಲಿ ಇಪಿಎಫ್ ಖಾತೆಯ (EPF) ಹಣ ಏನಾಗುತ್ತದೆ ಎಂಬ ಆತಂಕ ಹಲವರಲ್ಲಿರುತ್ತದೆ. ಹಾಗೆಯೇ, ಕೆಲಸ ಬದಲಿಸಿದಾಗ ಹಳೆಯ ಪಿಎಫ್ ಅಕೌಂಟ್ ಏನಾಗುತ್ತದೆ? ಭವಿಷ್ಯ ನಿಧಿ ಸಂಸ್ಥೆಯ ವೆಬ್ಸೈಟ್ನಲ್ಲಿ ನೀಡಲಾಗಿರುವ ಮಾಹಿತಿ ಪ್ರಕಾರ, ಪಿಎಫ್ ಅಕೌಂಟ್ ನಿಷ್ಕ್ರಿಯವಾಗಿದ್ದರೂ ಸಮಸ್ಯೆ ಇರುವುದಿಲ್ಲ. ನೀವು ಕೆಲಸವನ್ನು ನಿಲ್ಲಿಸಿದ ತಕ್ಷಣ ನಿಮ್ಮ EPF ಖಾತೆ ಮುಚ್ಚಿಹೋಗುವುದಿಲ್ಲ. ನಿಮ್ಮ ಖಾತೆಯಲ್ಲಿರುವ ಹಣ ಸುರಕ್ಷಿತವಾಗಿರುತ್ತದೆ.
EPF ಖಾತೆಗೆ ಬಡ್ಡಿ ಸಿಗುವುದು ಮುಂದುವರಿಯುತ್ತದೆಯೇ?
ಉದ್ಯೋಗಿ ಭವಿಷ್ಯ ನಿಧಿ ಸಂಸ್ಥೆಯ (EPFO) ನಿಯಮಗಳ ಪ್ರಕಾರ, ನೀವು ಉದ್ಯೋಗ ತೊರೆದರೂ ನಿಮ್ಮ EPF ಖಾತೆಯಲ್ಲಿರುವ ಮೊತ್ತಕ್ಕೆ 58 ವರ್ಷ ವಯಸ್ಸಾಗುವವರೆಗೆ ಬಡ್ಡಿ ಜಮೆಯಾಗುತ್ತಲೇ ಇರುತ್ತದೆ. ಆ ಬಳಿಕ ಅಕೌಂಟ್ನಲ್ಲಿರುವ ಹಣಕ್ಕೆ ಬಡ್ಡಿ ಸಿಗುವುದು ನಿಂತು ಹೋಗುತ್ತದೆ.
ಇದನ್ನೂ ಓದಿ: ಭಾರತ-ಟಿಬೆಟ್ ಪುರಾತನ ರೇಷ್ಮೆ ಮಾರ್ಗಕ್ಕೆ ಮರುಜೀವ; ಇಲ್ಲಿ ವ್ಯಾಪಾರಕ್ಕೆ ಹಣ ಅಲ್ಲ, ಬಾರ್ಟರ್ ಸಿಸ್ಟಂ
ಹಣವನ್ನು ಅವಧಿಗೆ ಮುನ್ನ ಹಿಂಪಡೆಯುವುದು ಸರಿಯೇ?
ಹೊಸ EPF ನಿಯಮಾವಳಿಗಳ ಪ್ರಕಾರ ಉದ್ಯೋಗಿಯು ಕೆಲಸ ಕಳೆದುಕೊಂಡ ತಕ್ಷಣ ಒಟ್ಟು EPF ಬ್ಯಾಲೆನ್ಸ್ನ ಶೇ. 75 ರಷ್ಟು ಭಾಗವನ್ನು ಹಿಂಪಡೆಯಬಹುದು. 12 ತಿಂಗಳ ಕಾಲ ಕೆಲಸ ಸೇರದೇ ಇದ್ದಾಗ ಉಳಿದ ಶೇ. 25ರಷ್ಟನ್ನು ಹಿಂಪಡೆಯಲು ಅವಕಾಶ ಇದೆ.
ತೆರಿಗೆ ನಿಯಮಗಳು: ಇಪಿಎಫ್ ನಿಯಮಗಳ ಪ್ರಕಾರ, ಉದ್ಯೋಗಿ 5 ವರ್ಷಗಳಿಗಿಂತ ಕಡಿಮೆ ಸೇವೆ ಸಲ್ಲಿಸಿದ್ದರೆ ವಿತ್ಡ್ರಾ ಹಣಕ್ಕೆ ತೆರಿಗೆ ಅನ್ವಯ ಆಗುತ್ತದೆ. 5 ವರ್ಷಗಳ ನಿರಂತರ ಸೇವೆ ಪೂರ್ಣಗೊಂಡಿದ್ದರೆ ವಿತ್ಡ್ರಾ ಹಣಕ್ಕೆ ಯಾವುದೇ ತೆರಿಗೆ ಅನ್ವಯ ಆಗುವುದಿಲ್ಲ.
ಕ್ಲೇಮ್ ಮತ್ತು ಬಡ್ಡಿ ವಿಳಂಬವಾದರೆ ಏನು ಮಾಡಬೇಕು?
- ಬಡ್ಡಿ ಜಮೆ ವಿಳಂಬ: ಕೆಲವೊಮ್ಮೆ EPFO ಬ್ಯಾಲೆನ್ಸ್ ಪಾಸ್ಬುಕ್ನಲ್ಲಿ ಬಡ್ಡಿ ಜಮೆಯಾಗುವುದು ತಡವಾಗಬಹುದು. ಆದರೆ ಅರ್ಹ ಖಾತೆದಾರರಿಗೆ ಬಡ್ಡಿಯನ್ನು ಖಚಿತವಾಗಿ ನೀಡಲಾಗುತ್ತದೆ.
- ಕ್ಲೇಮ್ ಇತ್ಯರ್ಥದ ಸಮಯ: ಆನ್ಲೈನ್ ಮೂಲಕ ಸಲ್ಲಿಸಲಾದ ಕ್ಲೇಮ್ಗಳು ಸಾಮಾನ್ಯವಾಗಿ 7 ರಿಂದ 10 ಕೆಲಸದ ದಿನಗಳಲ್ಲಿ ಇತ್ಯರ್ಥವಾಗುತ್ತವೆ.
- ದೂರು ಸಲ್ಲಿಕೆ: ಒಂದು ವೇಳೆ 20 ದಿನಗಳ ಒಳಗಾಗಿ ನಿಮ್ಮ ಕ್ಲೇಮ್ ಇತ್ಯರ್ಥವಾಗದಿದ್ದರೆ, `epfigms.gov.in` ಪೋರ್ಟಲ್ನಲ್ಲಿ ದೂರು ನೀಡಬಹುದು. ನಿಯಮಗಳ ಪ್ರಕಾರ, ಅಧಿಕಾರಿಗಳ ನಿರ್ಲಕ್ಷ್ಯದಿಂದ ವಿಳಂಬವಾದರೆ ವಾರ್ಷಿಕ ಶೇ. 12 ರಷ್ಟು ದಂಡದ ಬಡ್ಡಿಯನ್ನು ನೀಡಬೇಕಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
